Bubinebine I Bulēme Namani Kodi?

“Mukayuka bubinebine ne bubinebine buno nabo bukemupa bwanapabo.”—YOANO 8:32, MB.

 1. Muswelo wāingidije Pilato kishima “bubinebine” i mwishile namani na wāingidije’kyo Yesu?

“BUBINEBINE nabo i kika le?” Mobimwekela, Pilato pa kwipangula kino kipangujo wādi wisambila pa bubinebine bufunkila pa myanda mivulevule. Ino Yesu wādi ukitamba mu kunena’mba: “E kyo nabutwidilwe ne kyo naidile pano pantanda i kwisamba bya bubinebine.” (Yoano 18:37, 38, MB) Yesu kādipo na milangwe ya Pilato, o mwanda mu Kingidiki kishima “bubinebine” kyānene Yesu i kibadikilwe na ntangye mupotoloke. Bine Yesu wādi wisambila pa bubinebine bwa Leza.

Ntanda Moimwenine Bubinebine

 2. Yesu wānene bika bilombola amba bubinebine budi na mvubu?

² Polo wānene amba: “Lwitabijo ke kintupo kya bantu bonso, mhm.” (2 Tesalonika 3:2, NW) Ne bubinebine nabo mo monka, ke bwa bantu bo-bonsopo. Nansha bavule byobalombolwanga bubinebine bwa mu Bible, kebebwelangapo ku mutyima. Ino na bubine, abo i bulēme mpata! O mwanda Yesu wānene amba: “Mukayuka bubinebine ne bubinebine buno nabo bukemupa bwanapabo.”—Yoano 8:32, MB.

3. I kidyumu’ka kyotufwaninwe kulonda pa mwanda utala bufundiji bwa kyongo?

³ Mutumibwa Polo wānene amba bubinebine kebukokejapo kutanwa mu mafilozofi ne mu bisela bya bantu. (Kolose 2:8) I amo, mwanda mafilozofi ne bisela i bufundiji bwa kyongo. Polo wādyumwine bene Kidishitu ba mu Efisesa amba shi balonde’bo, bakekala bana ba lukeke ku mushipiditu, ‘ba kusunkanibwa na mabimbi ne bivula byonso bya lufundijo, ku budyumuku bwa bantu bwa buzazangi, monka mwikadile kubembeka kwa kyongo.’ (Efisesa 4:14) Dyalelo, “budyumuku bwa bantu” busonshilwanga na lunsamfwakanwa lwa boba balwa na bubinebine bwa Leza. “Lunsamfwakanwa” lushintululwa mu dibuku dimo (The New Encyclopædia Britannica) amba i “kampanye ka kunyengakanya nkulupilo, mimweno nansha bilongwa bya bantu bakwabo.” Mu luno lunsamfwakanwa mudi budyumuku bwa kunyengakanya bubinebine bumweke bu bubela, ne kutumbija bubela amba bo bubinebine. Pa kusokola bubinebine mu mitabakano ya munshimunshi uno muswelo, tufwaninwe kubandaula Bisonekwa na kininga.

Bene Kidishitu ne Ntanda

 4. Bubinebine bupebwanga bāni, ne i kiselwa’ka kidi na boba bonso bebutambula?

⁴ Yesu Kidishitu wēsambile pa boba bāikele bandi bana-babwanga, wālombela milombelo kudi Yehova amba: ‘Wibapandule na bubinebine. Uno mwanda obe bo bubinebine.’ (Yoano 17:17) Bana-babwanga bādi ba kupandulwa, kutūlwa pa bula, na kitungo kya kwingidila Yehova ne kuyukanya dijina ne Bulopwe bwandi. (Mateo 6:9, 10; 24:14) Eyo, bubinebine bwa Yehova ke kintupo kya bonso, inoko bupebwanga ku buntu ku boba bonso bebukimba, bekale ba muzo’ka, ba musaka’ka nansha bantu ba muswelo’ka. O mwanda mutumibwa Petelo wānene amba: “Namone Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bilongwa 10:34, 35.

 5. Mwanda waka divule bene Kidishitu bapangwapañwanga?

⁵ Bene Kidishitu bafundijanga bakwabo bubinebine bwa mu Bible, ino ke konsopo kobebatambulanga. Yesu wādyumwine amba: “Bakemufikija ku kususulwa, ne kwipaya bakemwipaye, ino mukashikibwa na mizo yonso pa mwanda wa dijina dyami.” (Mateo 24:9) Mu 1817, John Cotter, mwendeji wa kipwilo mwine Irlande wāsonekele pangala pa uno vese amba: “Kininga kyabo [bene Kidishitu] kya kwalamuna būmi bwa bantu na busapudi bwabo, pa kyaba kya kutonona’kyo bantu bebafwije’ko, ino kyo kine kyadi kya kulengeja bantu bashikwe bana-babwanga ne kwibapangapanga mwanda wa kusokola kobasokwela bilubo byabo patōka.” Bano bantu bebapangapanga ‘kebetabijangapo buswe bwa bubinebine amba bapande, mhm.’ O mwanda “Leza webatumine kyakwibaluakanya, bētabije kya bubela; amba bakaponejibwe bonso bakubulwa kwitabija byabinebine, nanshi baloelelwe mu byonka bya bukondame.”—2 Tesalonika 2:10-12.

 6. I bilokoloko’ka kebifwaninwepo kutamija mwine Kidishitu?

⁶ Mutumibwa Yoano udyumuna bene Kidishitu badi mu ino ntanda yalwana amba: ‘Kemukiswai ntanda, ne bya ntanda bine. . . . Ke-bintu byonsololo bidi mu ntanda, kilokoloko kya ngitu, ne kilokoloko kya meso, ne ntumbo ya kwitatula ya būmi, kebidipo bya Tata, mhm, i bya ntanda.’ (1 Yoano 2:15, 16) Yoano pa kutela bintu “byonsololo,” kadipo kyatalwile’mo nansha kimo. Pa kino ketufwaninwepo kutamija kilokoloko kya kusaka kintu kyo-kyonso kituletela ino ntanda akyo’ko kitusonsolola ku bubinebine. Namino, kulonda madingi a Yoano kukekala na lupusa lukatampe mu būmi bwetu. Muswelo’ka?

 7. Buyuki bwa bubinebine buteñanga namani bantu ba mityima myoloke?

⁷ Mu mwaka wa 2001, Batumoni ba Yehova ntanda yonso baendeje kweji ne kweji bifundwa bya Bible bipite pa midiyo iná ne kipindi, bafundije bantu ne bisumpi bya bantu bintu bibasakila Leza mu būmi. O mwanda bantu 263 431 baikele kubatyijibwa. Mwinya wa bubinebine i mulēme mpata ku meso a bano bana-babwanga bapya, i basumbule kisense kibi ne mashinda a munyanji, afutulwija Leza avudile mu ino ntanda. Tamba babatyijibwa, bendelelanga na kulonda misoñanya ya Yehova yapele bene Kidishitu bonsololo. (Efisesa 5:5) Lelo buno bubinebine i bulēme ne kodi abe?

Yehova Witukwatakanyanga

 8. Yehova umwene namani kwipāna kwetu, ne mwanda waka i kya tunangu ‘kubadikila bidi kukimba bulopwe’?

⁸ Yehova witabije na mutyima tō kwipāna kwetu, wiikija mwanda wa kwitukokela kwadi nansha byotudi bampikwa kubwaninina. Pa kino witufundijanga twikale kuzunzula bitungo ne kwabila kwetu. (Mitōto 113:6-8) Ne kadi Yehova witabije kupwana na umo ne umo wa motudi, kadi witulaile ne kwitukwatakanya shi ‘tubadikile bidi kukimba bulopwe ne boloke bwandi.’ Wivwane tulonge bino bintu ne kwilama batwe bene ku mushipiditu, aye mwine witulaya amba: ‘Ne bintu bikwabo byonso biketutentekelwa’po.’—Mateo 6:33.

 9. “Umpika wabinebine ne wamanwa” i ani, ne Yehova witutele mutyima namani kupityila kudi uno “umpika”?

⁹ Yesu Kidishitu wātongele batumibwa 12, wāshimika kyalwilo kya kipwilo kya bene Kidishitu bashingwe-māni kyātelelwe mwenda mafuku bu “Isalela wa Leza.” (Ngalatea 6:16, MB; Kusokwelwa 21:9, 14) Mwenda myaka kyātelwa bu “kipwilo kya Leza mūmi, kipanda, ne kyalwilo kya [bu]binebine.” (1 Temote 3:15) Yesu wālombwele amba boba badi mu kino kipwilo ye “umpika wabinebine ne wamanwa,” ne “kalama wa bine, udi na ñeni.” Wānena ne kunena amba uno mwingidi wa kikōkeji ukekala na kiselwa kya kupa bene Kidishitu “bidibwa mwendela kitungo ne mafuku monka.” (Mateo 24:3, 45-47, NW; Luka 12:42) Pampikwa bidibwa ketutunyapo kufwa nzala. Ne bidibwa bya ku mushipiditu nabyo monka na monka, shi i kutupu’byo, tukazoza ne kufwa ku mushipiditu. Nanshi kwikala’ko kwa “umpika wabinebine ne wamanwa” i bukamoni bukwabo bulombola amba Yehova witutele mutyima. Bine, tukwatei nyeke na mutyika bino bidibwa bya ku mushipiditu byobetupa kupityila kudi uno “umpika.”—Mateo 5:3.

10. Mwanda waka i kya kamweno kotudi kutanwa kitatyi ne kitatyi ku kupwila?

¹⁰ Kudya bidibwa bya ku mushipiditu i ne kwifunda kifundwa kya kasuku. Kadi i ne kwinangila na banabetu bene Kidishitu ne kutanwa ku kupwila kwa pa kipwilo. Lelo uvulukile bidibwa byowadile myeji isamba nansha mayenga asamba kunyuma? Eyo, kodi mwilwe’byo. Inoko byonso byowadile i bikupe bukomo bwa kukukwatakanya. Kekubulwe padi udyanga monka bidibwa bya muswelo umo na byowadile. Ne bidibwa bya ku mushipiditu bitupebwa ku kupwila kwa bwine Kidishitu nabyo mo monka. Padi ketukivulukilepo kamwanda kamo ne kamo ka mu byotwaivwene ku kupwila. Pakwabo myanda imo yonka’ya ke minenwe misunsa mivule. Inoko ikidi nyeke bu bidibwa bya ku mushipiditu bya kamweno kotudi. Kupwila kwetu kwitupanga nyeke bidibwa bya ku mushipiditu bya kwitukomeja, biletwa pa kitatyi kifwaninwe.

11. I biselwa’ka byotwikalanga nabyo ponso potutanwanga ku kupwila kwa bwine Kidishitu?

¹¹ Kadi kutanwa ku kupwila kwa bwine Kidishitu kwitutwikanga biselwa. Bene Kidishitu i basoñanibwe ‘kwikankamika abo bene na bene,’ kusombela banababo ba mu kipwilo ku ‘buswe ne ku mingilo miyampe.’ Kuteakanya kupwila kwa bwine Kidishitu konso, ne kunena’ko byo bintu bikomeja lwitabijo lwetu batwe bene ne kukankamika bakwetu. (Bahebelu 10:23-25) Bamo basakilwanga kukankamikwa nyeke kudya bidibwa bya ku mushipiditu, monka mukankamikilwanga mwana wa manye utonga’nka bidibwa byasaka. (Efisesa 4:13) I buswe bukatampe shi bantu ba uno muswelo bakankamikwa amba batame bekale ke bene Kidishitu bapye, bēsambile’po mutumibwa Polo pa kusoneka’mba: “Bidibwa bikomokomo i bya boba ke bapwe kutama; ke boba kadi badi ne byakwivwana nabyo byabo bībidile kala bya kuyūkidila ne b[i]lumbuluke ne bibi, mwanda wa kwivwanaivwana.”—Bahebelu 5:14.

Kwikwatakanya Batwe Bene ku Mushipiditu

12. Lelo kiselwa kikatampe kya kwitushadija nyeke mu bubinebine kidi pa mutwe wa ani? Shintulula.

¹² Mwine-petu nansha mbutwile wetu ubwanya kwitukankamika tulonde nyeke dishinda dya bubinebine. Bakulumpe pa kipwilo nabo betukumbanga mwanda twi luombe lobalelele. (Bilongwa 20:28) Ino i ani ufwaninwe kusela kiselwa kikatampe shi tusaka kulonda nyeke dishinda dya bubinebine? Na bubine, kiselwa kidi pa mutwe wa muntu ne muntu. Kidi namino mu ngikadilo miyampe ne mu bitatyi bikomo mwine. Tala bidi uno mwanda ulonda’ko.

13, 14. Monka mwikilombwela mwanda wafikile mukōko mwana umo, i muswelo’ka otukokeja kusokola bukwashi bwa ku mushipiditu bwitusakilwa?

¹³ Mu Ekose, mikōko myana kampanda yadi idya lumenya pamo, ino umo wakunkulumuka ku mukuna wakaponena munshi mu kinkolankola. Eyo, kewetyumwinepo shao, ino wazakele, watunya kukanda monka pa mukuna. Washilula kudila bya bulanda. Inao pa kwivwana, nandi washilula kudila enka ne byaile mukumbi kwabula mukōko mwana’wa.

¹⁴ Tala mwilondele myanda pano. Mukōko mwana waabije, inao nandi wabweja’ko kudila, mukumbi nandi pa kwivwana wakimba muswelo wa kwiunyongolola. Shi uno mukōko mwana ne inao bamwene amba tubatanwa mu kyaka ne kukimba bakimba bukwashi bukidibukidi, lelo batwe ke pepi, tubulwe’po kwabija shi tubakukala ku mushipiditu ne kutanwa na kyaka kyampikwa kulaya muno mu ntanda ya Satana? (Yakoba 5:14, 15; 1 Petelo 5:8) Bine, tufwaninwe kwabija, nakampata shi ketudipo na bwino buvule mwanda twi banuke nansha bapya bininge mu bubinebine.

Kulonda Buludiki bwa Leza Kuletanga Nsangaji

15. Mwana-mukaji umo weivwene namani paashilwile kwilunga na kipwilo kya bwine Kidishitu?

¹⁵ Ivwana mvubu ya kwivwanija kwa Bible ne ndoe ya mutyima yokuleta ku boba bengidila Leza wa bubinebine. Mwana-mukaji umo wa myaka 70 wadi upwila nyeke mu Kipwilo kya Angeletele, difuku dimo waitabija kwifunda Bible na Kamoni wa Yehova. Kepaijijepo wayuka dijina dya Leza amba i Yehova, washilula ne kwitabija “Amena” ku milombelo ya bantu bonso yadi ilombelwa ku Njibo ya Bulopwe ya mu kyabo kibundi. Unena na mutyima onso amba: “Pa kyaba kya kumona Leza bu muntu udi kulampe mpata na batwe bantu ba kufwa kubola, banwe mudi pamo bwa banwe bamufwenya umbukata mwetu, pamo bwa mulunda netu. Kino i kintu kyonadi nkyamwene kashā.” Mobimwekela uno lolo usangela musapu kakelwapo nansha dimo muswelo wamutengele bubinebine. Ne batwe netu mo monka, ketwakilwai nansha dimo mutyika otwadi tukwete nao bubinebine musunsa umbajinji otwebwitabije.

16. (a) I bika biketufikila shi kukimba lupeto kwikale ke kitungo kikatampe mu būmi bwetu? (b) I muswelo’ka otukokeja kwikala na nsangaji yabinebine?

¹⁶ Bavule bafwatakanyanga amba shi badi na lupeto luvule, longa badi na nsangaji. Ino kunena na bubine, shi kukimba lupeto kwikale ke kitungo kikatampe mu būmi bwetu, ketukabulwepo kumona “dyemo dya mu ñeni kedineneka.” (1 Temote 6:10, Phillips) Kifwa, i bantu banga bapotanga matyike a tombola, bajimija lupeto mu mazua, betononatonona mu mobo a bakongweja lupeto mobafwila kwikala na byabupeta bivulevule? Ino i batyutyu kete bamonanga bupeta bwine bobafwila. Kadi divule boba bamona’bo nabo kebejangapo bayuka kala amba bupeta bobasokwele na mu kukopa kwa diso kebwibaletelepo nsangaji. Bine nsangaji ya nyeke ayo itambanga ku kulonga kiswa-mutyima kya Yehova, kwingidila pamo na kipwilo kya bwine Kidishitu mu buludiki bwa mushipiditu sandu wa Yehova ne bukwashi bwa bamwikeulu bandi. (Mitōto 1:1-3; 84:4, 5; 89:15) Shi tulonge namino, tukemwena madyese mavule oketwadipo tulangila. Lelo bubinebine i bulēme mpata kodi mu muswelo obukokeja kukuletela ano madyese mu būmi bobe?

17. Kushikata kwāshikete mutumibwa Petelo kwa Shimona sendwe unyuka biseba kulombola amba wādi na ngikadilo’ka?

¹⁷ Ivwana mwanda wātene mutumibwa Petelo. Mu mwaka wa 36 K.K., wāendele lwendo lwa bu mishonele ku Musanza wa Shalone. Wāimana bidi mu Dida, wāundapa’mo Eneasa wādi ubela bulebe, kupwa wāenda kufika ne ku kyabu kya Yopa. Kwine’ko nako wāsangula’ko Dokasa. Bilongwa 9:43 (MB) witulombola’mba: “Wāikele mafuku mangimangi mu Yopa kwa Shimona, sendwe unyuka biseba.” Bino binenwa bityetye bisokola patōka amba Petelo kādipo na mboloji paādi wingidila bantu ba mu kino kibundi. I kika kyotwanenena namino? Frederic Farrar, mufundi wa Bible, usonekele amba: “Mu njibo ya sendwe unyuka biseba kemwādipo musomonwa kushikata mulondi ulonda Bijila bya ku Kanwa [bya Mosesa] mu kamo ne kamo, pampikwa kujilula. Kutanwa kwadi kutanwa’mo difuku ne difuku bikupo ne banyema bafwe, bintu kebifwaninwe kubulwa mu buno busunga, ne bingidilwa bisakibwa na uno mwingilo, byādi bilengeja njibo ke ya disubi ne ya munyanji ku meso a muntu ulonda bijila na kaninga-mpo.” Eyo, nansha shi njibo ya Shimona yādi “kunkula kwa dijiba” keyādipo ilondakene na njibo yaādi unyukila’ko biseba, inoko wādi usunga ‘busunga bwādi bwelwa mwenji, bufutulwija bantu bonso basunga’bo,’ mo munenena Farrar.—Bilongwa 10:6.

18, 19. (a) Mwanda waka Petelo wādi kazumbija mutyima pa kimonwa kyaāmwene? (b) I dyese’ka dyāeselwe Petelo dyakādipo ulangila?

¹⁸ Petelo, muntu wa kubulwa mboloji, wāitabije kutundailwa na Shimona, wātambwila konka ne bwendeji bwa Leza bwakubulwa kulaibwa. Wāmona kimonwa mobādi bamusoñanya kudya banyema badisubi mungya bijila bya Bayuda. Ponka’po Petelo wāpela amba “ami nkyadilepo, kashya, bidyanga bantu bonso kidyedye, nansha bijidikwe kijila.” Ino misungu isatu mituntulu bāmusapwila’mba: “Byobya byāpwa kujilula Leza, abewa kokifutulula’byo’mba, [i bya disubi].” I bine, ‘Petelo wādi kazumbija mutyima mwendele kyokya kimonwa’mba: Shi kishintulula bika.’—Bilongwa 10:5-17; 11:7-10.

¹⁹ Petelo kādipo uyukile amba kesha dyapityile mu Kesalea, ku kilometele 50, kwadi Mujentaila utelwa bu Konilusa wamwene nandi kimonwa. Mwikeulu wa Yehova wālombwele Konilusa atume bengidi bandi kudi Petelo mu njibo ya Shimona sendwe unyukanga biseba. Konilusa wātuma bengidi bandi ku njibo ya Shimona, Petelo nandi wāitabija kwenda nabo ku Kesalea. Kwine’kwa wāsapwila Konilusa ne balongo bandi ne balunda nandi. Ponka’po bāikala Bajentaila bakubulwa kutwela kwisao babajinji kwitabija ne kutambula mushipiditu sandu ke bampyana ba Bulopwe. Eyo, bana-balume kebādipo shabo batwejibwe kwisao, inoko bonso bāivwene binenwa bya Petelo bābatyijibwe. Kino kyāshitwila bantu ba mizo, bādi bamwenwe na Bayuda bu badisubi, kibelo kya kutwela mu kipwilo kya bwine Kidishitu. (Bilongwa 10:1-48; 11:18) Bine, ano i madyese makatampe āpelwe Petelo—byonso bino mwanda bubinebine bwādi bulēme kwadi, kadi bo bwāmukweshe alonde bwendeji bwa Yehova ne kulonga bintu na lwitabijo!

20. I bukwashi’ka bwitupa Leza ponso potubadikija bubinebine kumeso mu būmi bwetu?

²⁰ Polo usoñanya’mba: “Pa kwikala kwisamba byabinebine mu lusa tutamine monka mudi aye umbintu byonsololo, aye i mutwe, ke aye Kidishitu kadi.” (Efisesa 4:15) Eyo, bubinebine buketuletela nsangaji ya kashā tamba pano shi twibubadikije kumeso mu būmi bwetu ne shi tuleke Yehova aludike matabula etu kupityila ku mushipiditu sandu wandi. Kadi tuyukei amba bamwikeulu bakola betukwatakanyanga mu mwingilo wetu wa kusapula otwingila. (Kusokwelwa 14:6, 7; 22:6) Bine, twi badyese ne dyese’po pa kulunga kobetulunga’ko kuboko mu uno mwingilo witupele Yehova! Wivwane tulame bululame bwetu, tukatendela Yehova, Leza wa bubinebine, nyeke ne nyekeke. Lelo kudi’po kintu kikwabo kilēme kitabukile kulonga namino?—Yoano 17:3.

Lelo Tubefunde Bika?

• Mwanda waka bavule bapela kwitabija bubinebine?

• Bene Kidishitu bafwaninwe kumona namani bintu bya ntanda ya Satana?

• I muswelo’ka otufwaninwe kumona kupwila, ne mwanda waka?

• I kiselwa’ka kyotudi nakyo mu myanda itala kwita mutyima ku mushipiditu?

[Kifwatulo pa paje 28]

Yesu wāpēne bukamoni butala pa bubinebine

[Kifwatulo pa paje 31]

Pamo bwa bidibwa bya ku ngitu, bidibwa bya ku mushipiditu nabyo bidi na kamweno kotudi