KIFUNDWA 09
Fwena Kudi Leza mu Milombelo
Lelo kodi mwiivwane bu usakilwa mu būmi muntu wa kukuludika? Le udi na bipangujo bya mvubu mpata byokimba bakulondolole? Lelo ukimbanga muntu wa kukusenga ne kukukulupija? Lelo ukimbanga kwikala pabwipi na Yehova? Milombelo ibwanya kupwija ino myanda yonso. Ino le i muswelo’ka muyampe wa kulombela? Lelo Leza wivwananga milombelo yonso? I bika byokalonga mwanda wa kunena’mba Leza evwane milombelo yobe? Tutalei.
1. I kudi ani kotufwaninwe kulombela, ne i myanda’ka yotubwanya kutela mu milombelo?
Yesu wāfundije amba tufwaninwe kulombela enka kudi Tata wetu udi mūlu. Aye mwine wādi ulombela kudi Yehova. Wānenene amba: “Mufwaninwe kulombela namino amba: ‘Tata wetu udi mūlu . . .’” (Mateo 6:9) Shi tulombela kudi Yehova, tukomejanga bulunda bwetu nandi.
Tukokeja ne kulombela pa mwanda o-onso. Shako, pa kusaka’mba Leza alondolole milombelo yetu, milombelo’ya ifwaninwe kukwatañana na kiswa-mutyima kyandi. “Shi tumulombe kintu kyonso, shi kika shi kika, mwendele kiswa-mutyima kyandi [Leza], witwivwananga.” (1 Yoano 5:14) Yesu wētushidile kimfwa mu uno mwanda. (Tangai Mateo 6:9-13.) Kutentekela pa kulombela pa myanda yetu, ketufwaninwepo kwilwa kufwija’ko Leza pa byobya byaetulongela ebiya ne kumulomba akwashe’ko bakwabo.
2. Tufwaninwe kulombela muswelo’ka?
Bible witukankamika ‘tupungulule mityima yetu ku meso a Leza.’ (Ñimbo ya Mitōto 62:8) Nanshi, milombelo yetu ifwaninwe kulombelwa na mutyima umo kadi bya binebine. Tubwanya kulombela na diwi ditunduke nansha dya munshimunshi, na mwimanino ne mushikatyilo wa bulēme. Tubwanya kulombela kitatyi kyo-kyonso ne mu kifuko kyo-kyonso.
3. Lelo Leza ulondololanga namani milombelo yetu?
Wiilondololanga mu miswelo mishileshile. Yehova i mwitupe Kinenwa kyandi Bible, mwine motuvudile kutana bilondololwa bya bipangujo byetu. Kutanga Kinenwa kya Leza “[kwalamunanga muntu] wampikwa bwino ke wa tunangu.” (Ñimbo ya Mitōto 19:7; tangai Yakoba 1:5.) Yehova ubwanya kwitupa ndoe ya mutyima kitatyi kyotutanwa na makambakano. Kadi ubwanya kutonona batōtyi bandi betukwashe kitatyi kyotusakilwa bukwashi.
LANGULUKA BININGE
Wifunde uyuke mwa kulombelela bitamba ku mutyima, bine bisangaja Leza, kadi tala muswelo okokeja kumwena mu milombelo.
4. Milombelo itabijibwa na Leza
Le i bika biketukwasha tuyuke shi milombelo yetu i itabijibwa na Leza? Talai VIDEO.
Yehova usaka tulombele kwadi. Tangai Ñimbo ya Mitōto 65:2, ne kwisambila pa bino bipangujo:
Le ulanga yewa “Mwine wivwananga milombelo” usaka ulombele kwadi? Mwanda waka ubanena nankyo?
Shi tusaka Leza evwane milombelo yetu, tufwaninwe kwikala na būmi bulonda misoñanya yandi. Tangai Mika 3:4 ne 1 Petelo 3:12, ne kwisambila pa kino kipangujo:
Le tukalonga bika pa kusaka’mba Yehova evwane milombelo yetu?
Kitatyi kya mavita, mitamba īlwa ilombelanga mwanda wa inekenye. Le i byendele’mo kulanga’mba Leza usa kwitabija ino milombelo?
5. Milombelo yetu ifwaninwe kutamba ku mutyima
Bantu bamo i bafundijibwe kupituluka mu milombelo kishima pa kishima. Le ulanga mo musakila Leza tulombele kwadi? Tangai Mateo 6:7, ne kwisambila pa kino kipangujo:
Le ukepuka namani kunena “bintu bimo byonka wadi’mo kodi’mo” kitatyi kyolombela?
Difuku ne difuku, langulukila pa dyese kampanda dimo dyowimwenine mu būmi bobe, ebiya umufwije’ko Yehova pa dyadyo dyese. Ebiya longa nankyo mu bula bwa yenga mutuntulu, nabya ukalombela pa myanda isamba-ibidi mishileshile pampikwa kupituluka mu bintu bimo byonka.
Mbutwile muyampe usakanga mwana wandi amusapwile bidi ku mutyima wandi. Yehova nandi usakanga tumulombole bidi ku mityima yetu
6. Milombelo i kyabuntu kitamba kudi Leza
Lelo milombelo ibwanya kwitukomeja namani mu bitatyi biyampe ne mu bibi mwine? Talai VIDEO.
Bible ulaya’mba milombelo ibwanya kwitukwasha tutane ndoe ya mutyima. Tangai Bene Fidipai 4:6, 7, ne kwisambila pa bino bipangujo:
Nansha milombelo byokeifundulangapo nyeke makambakano etu, ino itukwashanga namani?
Le i myanda’ka imoimo yoabila kutela mu milombelo?
Le wadi uyukile?
Kishima “amena” kishintulula’mba “mo monka” nansha’mba “i amo.” Tamba mu bitatyi byālembelwe Bible, kishima “amena” kinenwanga ku mfulo kwa milombelo.—1 Bilongwa bya Mafuku 16:36.
7. Kimba kitatyi kya kulombela
Kyaba kimo tulēmenenwanga na mingilo twailwa ne kulombela. Le milombelo yādi na mvubu’ka kudi Yesu? Tangai Mateo 14:23 ne Mako 1:35, ne kwisambila pa bino bipangujo:
Yesu wādi ulonga namani pa kumona’ko kitatyi kya kulombela?
Le abe nobe i kitatyi’ka kyobwanya kumona kyaba kya kulombela?
BANTU BAMO BANENANGA’MBA: “Kulombela i kwela kyaba mwanda i kutupu wivwananga milombelo.”
Le abe unena’po namani?
MU KĪPI
Milombelo ya bine itufwenyanga kudi Leza, itupa ndoe ya mutyima, ne kwitupa bukomo botusakilwa pa kusangaja Yehova.
Pitulukai’mo
Lelo tufwaninwe kulombela kudi ani?
Le tufwaninwe kulombela muswelo’ka?
I byabuyabuya’ka bimo bimwenwa mu milombelo?
KIMBA
Tala bilondololwa bya bipangujo byobepangulanga divule pa mwanda utala milombelo.
“Bintu Bisamba-Bibidi Byofwaninwe Kuyuka Bitala Milombelo” (Kiteba kya Mulami, 1 Kweji 11, 2010)
Tala bubinga bwa mvubu mpata botufwaninwe kulombelela ne muswelo obwanya kulumbulula milombelo yobe.
“Mwanda Waka Mfwaninwe Kulombela?” (Kishinte kya pa Entelenete)
Tala umone i kudi ani kwine kotufwaninwe kulombela mungya mufundijija Bible.
“Le Mfwaninwe Kulombela Kudi Basanto?” (Kishinte kya pa Entelenete)
Londa ino video ya minjiki, umone byoinena pa mwanda utala kifuko ne kitatyi kya kulombela.