Tubingijei Lwitabijo Lwetu

“Kidishitu ēkale mupandulwemo na mityima yenu ke Mfumwenu; pa kwikala na kampeja bukidi ka kutentulwila bantu bonso bemwipangula monka mwikadile kukulupila ko mudi nako munda.”​—1 PETELO 3:​15.

MU MATANDA mavule, Batumoni ba Yehova bayukene bu bantu bambulwa budimbidimbi, ba mwikadilo muyampe. Bavule bebamwene bu balondakani balumbuluke, bambulwa kavutakanya. Ino kintu kitulumukwa i kino, bano bene Kidishitu baswele ndoe bapangwapañwanga mwanda ke mwanda​—mu bitatyi bya mavita ne bya ndoe. Ino abo kebamonangapo kulondwalondwa kwa uno muswelo bu kintu kyeni. Ke-pantu bekalanga bekutengele kala. Mu bino byonso, bayukile amba bene Kidishitu bakikōkeji ba mu myaka katwa imbajinji K.K. bādi ‘bashikibwe,’ le penepo boba bekankila kwikala balondi babine ba Kidishitu dyalelo batengela namani kulongwa bintu bishile na bya bēbabadikile? (Mateo 10:22) Bible unena kadi amba: “Bonso batele mutyima ku bwine-Leza [na kwilunga na Kidishitu Yesu] kupangwapangwa ko kwabo.”​—2 Temote 3:​12.

² Batumoni ba Yehova kebesakilangapo kupangwapangwa, nansha kusangela kususulwa​—bibawe, buloko, nansha kumweshibwa malwa. Kyobasakanga i ‘kwikala biyampe, talala, nyā’ mwa kusapwila myanda miyampe ya Bulopwe bwa Leza pampikwa kijika. (1 Temote 2:​1, 2) Basepelela bwanapabo bwa kutōta bobapelwe mu matanda mavule, batōta senene, kadi balonga na mutyima umo buninge bwa kwikala mu “ndoe ne bantu bonso,” ne bambikavu bene kumo. (Loma 12:18; 13:​1-7) Le penepo ‘kyobebashikilwe’ i kika?

³ Bantu kyobashikilwe Batumoni ba Yehova mwanda ke mwanda i kyonka kyādi kipangilwapangilwa bene Kidishitu babajinji. Dibajinji, Batumoni ba Yehova balongelanga bintu mungya nkulupilo ya mutōtelo wabo, o mwanda bafutululwa. Kifwa, basapulanga na bupyasakane myanda miyampe ya Bulopwe bwa Leza, ino divule bantu balangilanga bupyasakane bwabo bibi, bamona busapudi bwabo bu “kupūmina bantu mu kipwilo kyabo ku bukomo.” (Enzankanya na Bilongwa 4:​19, 20.) Kadi Batumoni ba Yehova kebekujangapo mu politike nansha mu mavita elwa mizo, o mwanda bantu bamo bebamonanga bibi, amba ke banapo ba kibundi badikōkeji.​—Mika 4:​3, 4.

⁴ Kya bubidi, Batumoni ba Yehova balambikilwanga myanda yabubela​—batwikwa bubela bwakubulwa kafwetefwete ne kunyengakanya nkulupilo yabo. O mwanda batopekwanga mu matanda amo mu muswelo wakubulwa kwendela’mo. Kadi, mwanda’po’tu bakimbanga kundapwa na lawa yambulwa kutyangwa na mashi mwanda wa kukōkela kobakōkele ku lubila lwa mu Bible lulomba ‘kwilama ku mashi,’ bashiñwanga tuto twa bitupu, amba “bepayanga bana” ne amba i “butōtyi bwa mwiyoe.” (Bilongwa 15:29) Ino na bubine Batumoni ba Yehova i bantu bakwete būmi na bulēme bukatampe, o mwanda abo ne babo bana bakimbanga kundapwa bundapi butendelwa kutabuka. Matope ebatopekwanga, amba bana bavule ba Batumoni ba Yehova bafwanga mwaka ne mwaka mwanda wa kupela kwelwa mashi, keadipo na kitopekelo. I kutupu ubwanya kulupula bibalwa bya bafwile kupela kwelwa mashi. Bubinebine bwa mu Bible kebutundailwangapo muswelo umo na bantu bonso mu kisaka, o mwanda Batumoni banenenwa bibi amba kebo kukalañanya bisaka. Inoko boba bapotolwele Batumoni ba Yehova bebayukile amba i bantu bamwene būmi bwa kisaka na mvubu mikatampe mpata kadi baloñanga bukomo bwa kulonda mbila ya mu Bible isoñanya mulume ne mukaji besanswe ne kwilēmeka, bana nabo kukōkela bambutwile babo, bekale betabije nansha bakubulwa kwitabija.​—Efisesa 5:⁠21–​6:⁠3.

⁵ Mu myanda mivule, batulenga byanzwe ba kupangwapangwa kwa bengidi ba Yehova i bakinkwa nabo ba mu mitōtelo ingi basonshila balupusa ba kipolitike ne balembi ba majulunale amba batalule’ko mingilo ya Batumoni. Penepo batwe Batumoni ba Yehova tufwaninwe kulondolola namani ku kuno kukalakanibwa​—pa mwanda wa nkulupilo ne bilongwa byetu nansha pa kulambikilwa myanda yabubela?

“Kikōkeji Kyenu Kiyūkibwe ku Bantu Bonso”

⁶ Dibajinji tufwaninwe kwikala na mumweno moloke​—mumweno wa Yehova​—pa boba boketudipo nabo nkulupilo imo. Shi bitupu, tukeobolwela mushikwa ne matope ku bakwetu. “Kikōkeji kyenu kiyūkibwe ku bantu bonso,” mo mwāsonekele Polo. (Fidipai 4:5) Nanshi Bible witukankamika twikale na mumweno mujalale pa boba badi panja pa kipwilo kya bwine Kidishitu.

⁷ Ku mutamba mukwabo, Bisonekwa bitudyumuna patōka amba ‘twilame bakubulwa kiko kya ku ino ntanda.’ (Yakoba 1:​27; 4:4) Mu uno vese, ne mu mavese makwabo mavule mu Bible, kino kishima ‘ntanda’ kifunkilanga pa kibumbo kya bantu beshile na bene Kidishitu babine. Twi belwe umbukata na kino kitango kya bantu; twitana nabo ku kaji, ku masomo, ne mu mukenza wetu. (Yoano 17:11, 15; 1 Kodinda 5:​9, 10) Ino twilamine bakubulwa kiko kya ku ino ntanda na kwepuka mikadilo, mineneno, ne miendelejo yampikwa kukwatañana na mashinda moloke a Leza. Kadi i kya mvubu mpata kuyuka kyaka kidi mu kwenda kisense na ino ntanda, nakampata na boba bafutulula misoñanya ya Yehova.​—Nkindi 13:20.

⁸ Inoko madingi a kwikala nyeke bakubulwa kiko kya ku ino ntanda keetupelepo bubinga bwa kupēlwila boba bakubulwa kwikala Batumoni ba Yehova. (Nkindi 8:​13) Vuluka kifwa kya bendeji ba mutōtelo wa Bayuda kyotwesambile’po mu kishinte kishele kunyuma. Mutōtelo obāikele kulungulula, Yehova kēutōkelwepo pa mutyima, ne kadi kewāloejepo kipwano na bakubulwa kwikala Bayuda. (Mateo 21:43, 45) Bano bantu, na mwididi obādi nao, bādi bemona abo bene bu boloke, bela Bajentaila mwenji. Ketufwaninwepo kwikala na uno mumweno mwīpi, wa kwela mwenji boba bakubulwa kwikala Batumoni. Kyotusaka, pamo bwa mutumibwa Polo, i bonso bateja musapu wa bubinebine udi mu Bible batambule buntu bwa Leza.​—Bilongwa 26:29; 1 Temote 2:​3, 4.

⁹ Mumweno mujalale, mukwatañane na Bisonekwa ufwaninwe kumweka mu muswelo otwisambila pa bakubulwa kwikala Batumoni. Polo wāsoñenye Tetusa kuvuluja bene Kidishitu ba pa kisanga kya Kelete kwijiba “kunena muntu bibi, nansha umo, ne lūma mpika; [bekale] ba kyonka kikōkeji kyonka kya kwilombola mutyima wa [kutalala ku] bantu bonso.” (Tetusa 3:2) Kwatyila’po, bene Kidishitu kebādipo ba kunenena muntu “nansha umo” bibi​—nansha ke bene Kelete bakubulwa kwikala bene Kidishitu bādi batumbīle kubepa bubela, kadyakata, ne mulēlemulēle. (Tetusa 1:​12) Nanshi ketukivulaminwai kino, kunena bishima bya kafutululo potwisambila pa boba boketudipo nabo nkulupilo imo kekyendele’mopo na Bisonekwa. Muneneno wa kwizunzula keufwenyangapo bakwetu ku mutōtelo wa Yehova. Ino shi tumwene bakwetu ne twibakwete mungya mulombwela misoñanya mijalale idi mu Kinenwa kya Yehova, i bine ‘tunengejanga senene shē bufundiji’ bwa Leza.​—Tetusa 2:​10.

Kitatyi kya Kwikala Talala ne Kitatyi kya Kwisamba

¹⁰ Kudi “kitatyi kya kwikala talala nyā, ne kitatyi kya kwisamba,” mo munenena Musapudi 3:7. Pano po pa mwanda mwine: kuyuka kitatyi kya kuba talala petusomba bakinkwa ne kya kwisamba mwanda wa kubingija lwitabijo lwetu. Pa kino tukokeja kuboila ñeni mivule ku kifwa kya muntu wādi nyeke mubwaninine mu uno mwanda​—Yesu. (1 Petelo 2:​21) Wādi uyukile “kitatyi kya kwikala talala nyā.” Kifwa, kyaba kyāmulambikile babitobo bakatampe ne bakulumpe byamabela ku meso a Pilato, Yesu wāubile nyā, ne “kwibalondololapo, mpika.” (Mateo 27:11-​14) Kāsakilepo kunena kintu nansha kimo kyādi kikokeja kukalakanya kuvuika kwa kiswamutyima kya Leza padi aye. Wāsakile bintu byaālongele ku meso a bantu bonso binene pa kyandi kyaba. Wāyukile amba nansha ke bubinebine kebubwanyapo kwalamuna ñeni ne mityima yabo ya kwitatula. O mwanda wāubile nyā pobādi bamutopeka, wāpela kukadikija kuba talala kwandi mungya kitungo kyandi.​—Isaya 53:7.

¹¹ Inoko Yesu wādi uyukile ne “kitatyi kya kwisamba.” Kyaba kikwabo, wādi wipotomeja patōkelela na bādi bamufutulula, wibatuluja matope akubulwa kitopekelo. Kifwa, pātompele basonekeji ne Bafadiseo kumupunika ku meso a kibumbo amba upañanga bademona na bukomo bwa Belezebuba, Yesu kāsakilepo bubela bwabo bumweke bu bwabine. Wēbatulwije’bo na kuleta kyelekejo kiluji kadi kya bukomo kekidi mwa kupatena. (Mako 3:​20-​30; tala ne Mateo 15:​1-​11; 22:17-​21; Yoano 18:37) Ne pobāmutwele ku Sanhedrini, ke mupwe kwabwa ne kukwatwa, napo mo monka, Kitobo Mukatampe Kaifasa wāmwipangwile na bunwanwa’mba: “Nakutyipila mutyipo kudi Leza wa būmi witusapwilepo shi abe udi Kidishitu, aye Mwanā Leza.” Kino nakyo kyādi “kitatyi kya kwisamba,” mwanda shi wādi amba wāubile talala, longa bālangile amba i kutuna kwatuna amba ke Kidishitupo. O mwanda Yesu wālondolwele amba: “I ami uno.”​—Mateo 26:63, 64; Mako 14:61, 62.

¹² Ivwana kifwa kikwabo kya ba Polo ne Banabasa. Bilongwa 14:​1, 2 unena’mba: “Pano kadi ke mu Ikoniuma namo bakatwelele pamo abo bonso mu shinakoka ya [Bayuda, NW], kadi namo byo bēsambilemo kibumbo kikatampe kya [Bayuda] ne baNgidiki baitabija. Nanshi [Bayuda] badipo ba mifutululo badi ke bakolomona baJentaila bebapa mityima yonka ya kukwatyilwa bāna babo kiji.” Bible umo (The New English Bible) unena’po amba: “Ino Bayuda bakubulwa kwalamuka bākela Bajentaila bulobo ne kwibatonda bashikwe bene Kidishitu.” Bayuda bakinkwa kebākadikilepo’nka pa kupela musapu kete, ehe, ino bēkwete’ko na kulonga kampanye ka kusalaja lubabo, basonshila Bajentaila bashikwe bene Kidishitu.a Bine, bādi na mushikwa wa nshikani pa bwine Kidishitu! (Enzankanya na Bilongwa 10:28.) Ku ba Polo ne Banabasa, kino kyādi “kitatyi kya kwisamba,” kutyina’mba bana-babwanga bapya bakapungila pa mityima pa kumvwana matope a bantu. “Ino [ba Polo ne Banabasa] byo baikele konka kitatyi kikatampe bēsambidila’tu ne moyo mwine mpika mudi Mfumwetu [Yehova, NW],” wēlombwele amba i mwibatōkelwe pa mutyima na kwibapa bukomo bwa kulonga bingelengele. Kino kyālengeje bamo bekale “aba koku ku [Bayuda], aba koku ku batumibwa.”​—Bilongwa 14:⁠3, 4.

¹³ Shi ke pano, i muswelo’ka otufwaninwe kulondolola potunenenwa bibi? Bino byonso bilonda mwendele ngikadilo yotutanwa’mo. Ngikadilo imo itusakila tulonde musoñanya unena’mba kudi “kitatyi kya kwikala talala nyā.” Kuba namino i biyampe, nakampata shi bakinkwa netu i basumininwe kwitukokela ku lupata lwa bitupu. Ketufwaninwepo kwilwa kino, bantu bamo kebakimbangapo kuyuka bubinebine. (2 Tesalonika 2:​9-​12) Kwikankila’ko kulanguluka na bantu ba mityima ya mitatulo keisake kwitabija i kwela kyaba. Kadi shi twikuje mu lupata lwa kamwanda ne kamwanda kabubela kotutwikwa, tukasasuka kulampe na mwingilo wa mvubu ne kamweno​—wa kukwasha bantu ba mityima myoloke bakimba ne mutyima umo kwifunda bubinebine bwa Bible. Nanshi, shi tubatana bantu basenswe lupata betusambakenya myanda yabubela, madingi a kulonda i ano: “Mwibavundaminei.”​—Loma 16:17, 18; Mateo 7:6.

¹⁴ Na bubine, kulonga namino ke kunenapo’mba tubatunya kubingija lwitabijo lwetu, mhm. Eyo, kudi shako ne “kitatyi kya kwisamba.” Tudi na bubinga bwa kukambakena bantu ba mityima myoloke balombwelwe myanda yabubela itutwikwa. Tusakanga kushintulula patōka nkulupilo yetu ku bakwetu; eyo tusangelanga ino mikenga. Petelo wāsonekele amba: “Kidishitu ēkale mupandulwemo na mityima yenu ke Mfumwenu; pa kwikala na kampeja bukidi ka kutentulwila bantu bonso bemwipangula monka mwikadile kukulupila ko mudi nako munda, napo ne kikōkeji ne moyo ponka.” (1 Petelo 3:​15) Shi bantu basangela kuyuka abetwipangula bukamoni bwa nkulupilo yetu yotukwete makasa abidi, basaka kupotolola mwikadile myanda yabubela itulambikila bakinkwa netu, tudi na kiselwa kya kubingija lwitabijo lwetu na kuleta malondololo mafike’po memanine pa Bible. Ino nakampata, mwiendelejo wetu mulumbuluke o wisambanga bivule. Bantu bañeni mipūtuke, batadija biyampe, bamonanga’mba bine tuloñanga bukomo bwa kukwatañanya būmi bwetu na misoñanya myoloke ya Leza, kebejangapo kumona’mba tuto totushingwa i twabubela.​—1 Petelo 2:​12-​15.

Le pa Bubela bwa Patōkelela Napo?

¹⁵ Kyaba kimo Batumoni ba Yehova batwikwanga myanda yabubela mu majulunale. Kifwa, mu difuku 1 Kweji 8, 1997, julunale umo wa mu Rusi walupwile kishinte kyabubela kinena’mba, mu bintu bivule, Batumoni badi na mutyima mūmu, balomba ba mu kyabo kipwilo ‘kupela babo bakaji, balume, ne bambutwile shi kebemvwanijapo ne kwitabija lwitabijo lwabo.’ Bine, muntu yense upotolwele Batumoni ba Yehova uyukile amba buno i bubela. Bible ulombola’mba bene Kidishitu banenwe kulonga bintu na buswe ne bulēme ku ba mu kisaka kyabo bakubulwa kwitabija, Batumoni baloñanga bukomo bwa kulonda buno buludiki. (1 Kodinda 7:​12-​16; 1 Petelo 3:​1-4) Nansha byobwadi bubela, ino kishinte kyadi ke kitampwe kala, enka namino, batangi bavule basapwilwa myanda yabubela. Lelo i muswelo’ka otukokeja kubingija lwitabijo lwetu mu myanda yotutwikwa?

¹⁶ Pano napo palomba “kitatyi kya kwikala talala nyā, ne kitatyi kya kwisamba.” Kyaba kimo, Kiteba kya Mulami kyānene’po namino: “Kupela kutuluja myanda yabubela idi mu majulunale, ne kubingija bubinebine na miswelo mifwaninwe kulondanga mungya ngikadilo, mungya mwine kalenga byanzwe wa tufutululo’wa, ne kitungo kyandi.” Mu byaba bimobimo i kipite buya kuba talala pa bimyanda byabubela, kutyina’mba kwakalungulukila mabela makwabo.

¹⁷ Mu byaba bikwabo kikokeja kwikala “kitatyi kya kwisamba.” Muntu ubwanya kwikala mulembi wa julunale nansha muletyi wa misapu ukulupilwa, ino aye mulombolwe myanda yabubela itala pa Batumoni ba Yehova, muntu wa namino ubwanya kwitabija misapu yabine isambila potudi. (Tala kapango “Kulemununa Binenwa Binyengakane.”) Shi mu majulunale mudi myanda mibi ilangula mfwatakani ikalakanya mwingilo wetu wa busapudi, bemaniji ba bilo bya musambo wa Sosiete Watch Tower bakakwata’po mpangiko ya kubingija bubinebine mu miswelo yanwa.b Kifwa, kubwanya kutongwa bakulumpe ba bwino ba kulombola myanda patōka, kifwa ku televijo, shi bimweka amba kubulwa kunena kubwanya kumwekeja Batumoni ba Yehova amba ababulwe kilondololwa. Pa kino, Kamoni ne Kamoni ukengila na tunangu umbumo na bwendeji bwa Sosiete Watch Tower ne bantunguluji bandi mu ino myanda.​—Bahebelu 13:17.

Kubingija Myanda Miyampe Mungya Bijila

¹⁸ Lupusa lwetu lwa kusapula myanda miyampe ya Bulopwe bwa Leza i lutambe mūlu. Yesu witupele kwingila uno mwingilo i mupebwe ‘lupusa lonso mūlu ne pano pantanda.’ (Mateo 28:18-​20; Fidipai 2:​9-​11) O mwanda ketusakilwapo kupebwa na mabikavu a bantu lupusa lwa kusapula. Kuyuka’ko tuyukile amba bwanapabo bwa mutōtelo bupējanga mwingilo wa kusambakanya musapu wa Bulopwe. Mu matanda motudi na bwanapabo bwa kutōta, tukwatyilei pa bijila bya Leta twibulame. Momwa mobapela kwitupa’bo, tulongei buninge mungya bijila tupebwe’bo. Kitungo kyetu ke kwalamunapo mishikatyilo ya bantu, mhm, ino i “kukankamija kwa myanda-miyampe [mungya bijila].”​—Fidipai 1:7.

¹⁹ Byotudi Batumoni ba Yehova, tuyukile amba Yehova ye Mfumu Mulopwe wa diulu ne ntanda. Bijila byandi byo bidi peulu pa byonso. Tukōkele na mutyima umo ku mabikavu a bantu, o mwanda ‘tulubulanga bya Kesala kudi Kesala.’ Ino ketudipo mwa kulekela kintu nansha kimo kitubudije kuvuija kiselwa kikatakata kyotupelwe​—kya ‘kulubula bya Leza kudi Leza.’ (Mateo 22:21) Twi bayuke biyampe amba kwikala na uno mwimanino kwitukolomwenanga ‘kushikibwa’ na mizo, ino twitabije’ko, mwanda nako kubadilwa mu lupoto lwa bu mwanā-bwanga. Myanda ya bidye bimuka Batumoni ba Yehova mu myaka tutwa 20 i bukamoni bulombola kusumininwa kotusumininwe kubingija lwitabijo lwetu. Tukendelela nyeke “kuleka’byo kufundija mpika, ne kusapula” myanda miyampe, mwanda Yehova ye witukwashanga, bine i mwitwele mu kyadi.​—Bilongwa 5:​42.

[Kunshi kwa dyani]

[Bipangujo]

1, 2. Mwanda waka Batumoni ba Yehova kebamonangapo kupangwapangwa bu kintu kyeni, ino i bika byobasaka?

3. I buluji’ka bumo bobashikilwe Batumoni ba Yehova mwanda ke mwanda?

4, 5. (a) I muswelo’ka ulambikilwa Batumoni ba Yehova myanda yabubela? (b) Divule dine i bāni batulenga byanzwe ba kupangwapangwa kwa bengidi ba Yehova?

6. Mwanda waka i biyampe kwikala na mumweno mujalale pa boba ba panja pa kipwilo kya bwine Kidishitu?

7. Kwilama batwe bene ‘bakubulwa kiko kya ku ino ntanda’ kulomba kulonga bika?

8. Mwanda waka madingi a kwikala nyeke bakubulwa kiko kya ku ino ntanda ke bubingapo bwa kupēlwila bakwetu?

9. Mumweno mujalale, ukwatañene na Bisonekwa ufwaninwe kwiyukanya namani mu mīsambo yotwisamba itala boba boketudipo nabo nkulupilo imo?

10, 11. Yesu wālombwele muswelo’ka amba wādi uyukile (a) “kitatyi kya kwikala talala nyā”? (b) “kitatyi kya kwisamba”?

12. Lelo i myanda’ka yāfikije ba Polo ne Banabasa besambe pakubulwa moyo mu Ikoniuma?

13. Potunenenwa bibibibi, i kitatyi’ka kifwaninwe “kwikala talala nyā”?

14. I miswelo’ka yotufwaninwe kubingija lwitabijo lwetu ku meso a bakwetu?

15. I kifwa’ka kimo kilombola muswelo ulambikilwa Batumoni ba Yehova myanda minyengakane mu majulunale?

16, 17, ne kapango pa paje 28. (a) Kyaba kimo Kiteba kya Mulami kyānene bika pa mwanda utala kulondolola ku misapu yabubela ya mu majulunale? (b) I mu ngikadilo’ka mubwanya kulondolola Batumoni ba Yehova ku malapolo mabi a mu majulunale?

18. (a) Mwanda waka ketusakilwapo kupebwa na maludiki a bantu lupusa lwa kusapula? (b) Tusa kulonga muswelo’ka shi tubapelelwa lupusa lwa kusapula?

19. (a) ‘Kulubula kotulubulanga bya Leza kudi Leza’ kukokeja kwitulengela bika? (b) Lelo twi basumininwe kulonga bika?

[Kapango pa paje 28]

KULEMUNUNA BINENWA BINYENGAKANE

“Mu Yacuiba, mu Bolivia, kisumpi kya baevanjelike kyaumvwañene na emisho imo ya televijo kulombola filime yālupwilwe na tupondo. Pa kumona lupusa lubi lwalupwilwe na ino mpangiko, bakulumpe bakwete’po mulangwe wa kukapempula maemisho abidi a televijo ne kwialomba beafute alomboje ku bantu mabande a video Les Témoins de Jéhovah — Un nom, une organisation ne La Bible: un récit historique exact, des prophéties dignes de foi. Pa kupwa kubandila mabande a video a Sosiete, mukelenge umo mwinē emisho ya ladiyo wafītwa bininge pangala pa binenwa binyengakane byapityijibwe mu mpangiko ya tupondo, webapa lupusa lwa kupityija ku bitupu ku yandi ladiyo musapu wa kitango kya distrike kya Batumoni ba Yehova kyadi kekidi kubwipi na kulongwa. Bantu batenwe ku kino kitango badi bavule kupita batanwanga’ko nyeke, bantu bavule ba mityima myoloke bashilula kwipangula bipangujo na mutyima umo padi pebapempula Batumoni mu mwingilo wa busapudi.”​—Annuaire 1997 des Témoins de Jéhovah, paje 61-62.

[Kifwatulo pa paje 29]

Kyaba kimo, Yesu wātulwije matope ambulwa kitopekelo ādi amutwika boba badi bamufutulula

Lelo Ukivulukile’byo?

◻ Mwanda waka Batumoni ba Yehova i ‘bashikibwe’?

◻ I muswelo’ka otufwaninwe kumona boba boketudipo nabo nkulupilo imo?

◻ Yesu wāshile kifwa’ka kijalale mu mwikadilo wandi na bakinkwa nandi?

◻ Potunenenwa bibibibi, i muswelo’ka otukokeja kulonda musoñanya unena’mba kudi “kitatyi kya kwikala talala nyā, ne kitatyi kya kwisamba”?