“Lama Kyokya Kyakupelwe”

1-2. Mungya 1 Temote 6:20, le Temote wāpelwe bika?

DIVULE dine tupanga bakwetu betulamine bintu byetu bya mvubu. Kimfwa, tubwanya kutūla lupeto lwetu ku banki. Potuloñanga namino, twikalanga tukulupile amba mukōlo wetu ukalamwa senene, keukajiminapo nansha kwibwa. Nanshi twivwanije mushintulwila kupa mukwetu kintu kyotumwene na bulēme.

² Tanga 1 Temote 6:20. Mutumibwa Polo wāvulwije Temote amba i mupebwe kintu kilēme—buyuki bwa bine bwa mpango ya Leza itala pa bantu. Kadi Temote bāmupele ne dyese dya ‘kusapula kinenwa’ ne dya kwingila “mwingilo wa bu musapudi wa myanda miyampe.” (2 Tm. 4:2, 5) Polo wāsoñenye Temote alame kyokya kyāmupelwe. Pamo bwa Temote, netu tufwaninwe kulama bintu bya mvubu bitupelwe. Le i bintu’ka? Ne mwanda waka tufwaninwe kulama kyabulēme kitupele Yehova?

3-4. Le i bubinga’ka bumobumo bunenenwa’mba bubine bwa mu Bible i bulēme?

³ Yehova i mwitupe na buswe buyuki bwa binebine bwa bubine budi mu Bible, Kinenwa kyandi. Buno bubine i bulēme mwanda bwitufundijanga mwa kupwanina na Yehova ne kwitulombola bine biletanga nsangaji ya bine mu būmi. Shi twitabije buno bubine ne kwibwingidija, tukanyongololwa ku bupika bwa bufundiji bwa bubela ne ku bilongwa bya disubi.​—1 Ko. 6:9-11.

⁴ Bubinga bukwabo bunenenwa’mba bubine budi mu Kinenwa kya Leza i bulēme, i mwanda Yehova usokwelanga’bo enka bantu betyepeje “badi na mutyima muyampe.” (Bil. 13:48) Bano bantu betabije mukola waingidija mwanda wa kufundija buno bubine dyalelo. (Mat. 11:25; 24:45) Ketubwanyapo kwifunda buno bubine na bukomo bwa batwe bene, kadi i kutupu kintu kidingakene na mvubu yabo.​—Nki. 3:13, 15.

 5. Le Yehova i mwitupe bika bikwabo?

⁵ Kadi Yehova i mwitupe dyese dya kufundija bakwetu bubine bwa myanda yandi ne myanda ya mpango yandi. (Mat. 24:14) Musapu otusapula udi na mvubu mwanda ukwashanga bantu bekale mu kisaka kya Yehova ne kwibapa mukenga wa kukamona būmi bwa nyeke. (1 Tm. 4:16) Ekale shi tusapulanga bininge nansha bityetye, tukwatakanyanga mwingilo wa mvubu mpata wingilwa dyalelo. (1 Tm. 2:3, 4) Bine, tudi na dyese’po kashā dya kwikala bengidi bengila pamo na Leza!​—1 Ko. 3:9.

 6. Le i bika byālongele bantu bamo bākomenwe kwilama?

⁶ Bantu bamo ba mu kitatyi kya Temote, bākomenwe kusangela dyese dyobādi nadyo dya kwingila pamo na Leza. Demasa byaāsenswe ino ngikadilo ya bintu, wālekele dyese dyandi dya kwingila na Polo. (2 Tm. 4:10) Mobimwekela, ba Fitekusa ne Helamongene bālekele mwingilo wabo mwanda bāivwene moyo wa kupangwapangwa na mobādi bapangilapangila Polo. (2 Tm. 1:15) Ba Himeneusa, Alekizandele, ne Filetusa bāikele ke batupondo, bāleka bubine. (1 Tm. 1:19, 20; 2 Tm. 2:16-18) Mobimwekela bano bantu bonso bādi dibajinji bakomo ku mushipiditu, ino bākomenwa kujingulula bintu bya mvubu mpata.

 7. Le Satana wingidijanga manwa’ka amba tulonge byasaka?

⁷ Le i muswelo’ka witulengejanga Satana tuleke byabulēme bitupele Yehova? Tutalei bidi manwa amoamo engidijanga Satana. Wingidijanga kwipwija mukose ne bisanji mwanda wa kukankamika misoñanya, mulangilo, ne mwiendelejo wamona’mba ubwanya kwitulengeja tuleke bubine. Utompanga kwituzakaja kupityila ku bakwetu betuningila, nansha ku kupangwapangwa mwanda wa tuleke kusapula. Kadi usakanga twivwane byobya “bitelwa bya bubela bu ‘buyuki’” bwa batupondo mwanda wa tuleke bubine.​—1 Tm. 6:20, 21.

 8. Le i ñeni’ka yowaboila ku kimfwa kya tutu Daniel?

⁸ Shi ketutadijepo, tubwanya kuleka bubine bityebitye. Twisambilei bidi pa kimfwa kya Daniel,b wadi usenswe makayo a video. Unena’mba: “Nashilwile kukaya makayo a video ponadi na kintu kya myaka dikumi. Dibajinji, nadi nkaya makayo mayampe. Ino bityebitye nashilula kukaya makayo a bya lūma ne bya majende.” Mwenda mafuku, wadi kakaye makayo a video kintu kya mansá 15 difuku ne difuku. Daniel unena’mba, “Kunena na bubine, nadi ndyukile amba makayo onadi nkaya ne bula bwa kitatyi kyonadi nkaya’o, byadi bizozeja kipwano kyami na Yehova. Inoko mutyima wami wāūmine, kenkomenwa kwitabija’mba misoñanya ya mu Bible intalanga.” Lupusa ludi na kwipwija mukose lubwanya kwitulengeja tukomenwe kulama bubine. Shi kino kibetufikila, tubwanya kufula ku kujimija bintu bya bulēme bitupele Yehova.

 9. Mungya 1 Temote 1:18, 19, le Polo wādingakenye Temote na ani?

⁹ Tanga 1 Temote 1:18, 19. Polo wādingakenye Temote na sola ne kumusoñanya endelele “kulwa divita dilumbuluke.” Dino divita ke dinopo dilwibwanga’di, ino i divita dya ku mushipiditu. Le bene Kidishitu badi pamo bwa basola, badi mu bulwi muswelo’ka? Le batwe basola ba Kidishitu tufwaninwe kwikala na ngikadila’ka? Tutalei ñeni itano yotubwanya kuboila ku kyelekejo kya Polo. Ino ñeni ibwanya kwitukwasha tulame bubine.

10. Le bwine Leza i bika, ne mwanda waka tufwaninwe kwikala nabo?

¹⁰ Ikala na bwine Leza. Sola muyampe wikalanga na lulamato. Ukalwa bininge mwanda wa kukinga muntu wasenswe nansha kintu kyamwene na mvubu. Polo wākankamikile Temote ekale na bwine Leza, ko kunena’mba, alamate nyeke kudi Leza. (1 Tm. 4:7) Shi tusenswe Leza bininge ne kwipāna kwadi, nabya tukasaka kulama bubine.​—1 Tm. 4:8-10; 6:6.

11. Mwanda waka tufwaninwe kwikala bedingile?

¹¹ Ikala mwidingile. Sola ufwaninwe kwidingila pa kwikala mwiteakanye mwa kulwila. Temote wādi nyeke mwiteakanye ku mushipiditu mwanda wālondele madingi a Polo a ku bukomo bwa mushipiditu, a kunyema kusakasaka kubi, a kulondalonda ngikadila ya bwine Leza, ne a kupwana na banababo mu lwitabijo. (2 Tm. 2:22) Bino bilomba kwikala bedingile. Tufwaninwe kwikala bedingile pa kunekenya divita dyotulwa na bya kusakasaka byetu bya ngitu. (Loma 7:21-25) Ne kadi tufwaninwe kwikala bedingile pa kuvūla bumuntu bwa kala ne kuvwala bumuntu bupya. (Ef. 4:22, 24) Kadi shi tubakōka ku mfulo kwa difuku, tufwaninwe padi kwikankila’ko kukatanwa ku kupwila.​—Bah. 10:24, 25.

12. Le tubwanya kwilumbulula namani mu muswelo otwingidija Bible?

¹² Sola ufwaninwe kwiibidija byabulwi byandi. Pa kwikala na bwino, ufwaninwe kwiibidija kitatyi ne kitatyi. Muswelo umo onka, netu tufwaninwe kwikala na bwino bwa kwingidija Kinenwa kya Leza. (2 Tm. 2:15) Tubwanya kwifunda ku kupwila mwa kwikadila na buno bwino. Ino shi tukimba kukulupija bakwetu amba bubine bwa mu Bible budi na mvubu, tufwaninwe kwikala nyeke na kibidiji kya kwifunda Bible. Tufwaninwe kwingidija Kinenwa kya Leza pa kukomeja lwitabijo lwetu. Bino bilombanga kulonga bivule kupita’ko’tu kutanga Bible. Bitulombanga kulangulukila pa byotutanga ne kukimba mu mabuku etu mwanda wa twivwanije Bisonekwa senene ne kwibingidija. (1 Tm. 4:13-15) Nabya tukabwanya kwingidija Kinenwa kya Leza pa kufundija bakwetu. Kadi kebilombengapo’nka kwibatangila mavese a mu Bible. Tufwaninwe kwibakwasha bevwanije kisonekwa ne mokibatadila. Shi tulēmekele mpangiko yetu ya kwifunda Bible, tubwanya kulumbulula bwino bwetu bwa kwingidija Kinenwa kya Leza kya ku bukomo bwa mushipiditu pa kufundija bakwetu.​—2 Tm. 3:16, 17.

13. Kukwatañana na Bahebelu 5:14, mwanda waka tufwaninwe kwikala na bujinguludi?

¹³ Ikala na bujinguludi. Sola ufwaninwe kujingulula kyaka ne muswelo wa kwikyepuka. Netu tufwaninwe kujingulula bintu bibwanya kwitusanshija ne kulonga’po kintu mwanda wa kwepuka kyaka. (Nki. 22:3; tanga Bahebelu 5:14.) Kimfwa, tufwaninwe kutonga makayo ne kwipwija mukose na tunangu. Divule dine balombolanga bilongwa bya disubi mu mampangiko a ku Televijo ne mu mafilime. Bino bilongwa bifītyijanga Leza mutyima, kadi biketusanshija. Na bubine, tulekanga kwipwija mukose kubwanya kona bityebitye buswe botusenswe Leza.​—Ef. 5:5, 6.

14. Le bujinguludi bwakweshe Daniel namani?

¹⁴ Daniel otwatelanga kala, washilwile kujingulula’mba kukaya makayo a video a bya lūma ne bya majende i mwanda mukatampe. Wakimbile mu Watchtower Library myanda ya kumukwasha mu uno mwanda. Le byamukweshe namani? Walekele kukaya makayo mabi a video. Waleka’byo ne kulomba makayo a video pa Entelenete kadi watyiba kipwano na bantu badi bakaya’o. Daniel unena’mba, “Pa kyaba kya kukaya makayo a video, nashilwile kwingila mingilo ya panja ne kulonga bintu na balunda ba mu kipwilo.” Pano Daniel wingilanga bu pania, kadi i mukulumpe.

15. Mwanda waka mānga ya bubela idi na kyaka?

¹⁵ Pamo bwa Temote, tufwaninwe ne kujingulula kyaka kidi mu myanda ya bubela izambalaja batupondo. (1 Tm. 4:1, 7; 2 Tm. 2:16) Kimfwa, babwanya kulonga bukomo bwa kuzambalaja mānga ya bubela pa banabetu nansha kwitulengeja tutatane bulongolodi bwa Yehova. Ino myanda ya bubela ibwanya kona lwitabijo lwetu. Ketufwaninwepo kukulupila luno lunsafwakanwa. Mwanda waka? Mwanda mānga ya uno muswelo izambalajibwanga na “bantu ba ñeni myoneke kadi babudilwe bubine.” Kitungo kyabo i kukolomona “lupata ne kwipotomeja.” (1 Tm. 6:4, 5) Basakanga twitabija bubela bwabo, kadi tufwatakenye banabetu bibi.

16. Le i bika bibwanya kwitulabika byotufwaninwe kwepuka?

¹⁶ Leka kulabikwa. Temote byaādi “sola mulumbuluke wa Kidishitu Yesu,” wādi ufwaninwe kuta nyeke mutyima ku mwingilo wandi, pa kyaba kya kulondalonda bintu bya ku ngitu nansha bya ino ntanda. (2 Tm. 2:3, 4) Pamo bwa Temote, ketufwaninwepo kulabikwa na kusakasaka bintu bivule bya ku ngitu. “Kyongo kya bya bupeta” kibwanya kwitulengeja tuleke kusanswa Yehova, tuleke kufwija’ko pa Kinenwa kya Leza, kadi tubulwe mutyima wa kusaka kufundija bakwetu. (Mat. 13:22) Tufwaninwe kwikala na būmi bwa kwisuminwa ne kwingidija kitatyi ne bukomo bwetu mwanda wa kukimba “bidi nyeke Bulopwe.”​—Mat. 6:22-25, 33.

17-18. Le i bika byotubwanya kulonga pa kwikinga ku mushipiditu?

¹⁷ Witeakanye kulonga’po kintu bukidibukidi. Sola ufwaninwe kuyuka bya kulonga kumeso kwa kitatyi. Shi tusaka kulama bintu bitupele Yehova, tufwaninwe kulonga’po kintu bukidibukidi shi tubamone kyaka. Le i bika bibwanya kwitukwasha tulonge uno muswelo? Tufwaninwe kuyuka kumeso kwa kitatyi bya kulonga pa kyaka.

¹⁸ Tulete kimfwa, kitatyi kyotanwa ku kinkumenkume, divule dine bantu batenwe’ko bakimbanga kuyuka kwa kutambila kumeso kwa kinkumenkume kushilula. Mwanda waka? Mwanda wa batambe bukidibukidi shi kubaikala mwanda wa mu kitulumukila. Mu muswelo umo onka, tufwaninwe kubadikila kuyuka pa “kutambila” shi tubamone mu kitulumukila bintu bya disubi, bya lūma, ne myanda ya bupondo potwingidija Entelenete nansha potutala filime ne mpangiko ya Televijo. Shi twi beteakanye ku bintu bibwanya kulongeka, tubwanya kulonga’po kintu bukidibukidi mwanda wa kwikinga ku mushipiditu ne kushala nyeke batōka ku meso a Yehova.​—Ñim. 101:3; 1 Tm. 4:12.

19. Le i madyese’ka otukeselwa shi tubalama bintu bya mvubu bitupele Yehova?

¹⁹ Tufwaninwe kulama bintu bya mvubu bitupele Yehova—bubine bulēme bwa mu Bible ne dyese dyotudi nadyo dya kufundija bakwetu. Shi tulonge namino, nabya tukekala na mutyima wa munda-munda utōka, būmi budi na kitungo kya binebine, ne kusangela kukwasha bakwetu bayuke Yehova. Na bukwashi bwandi, tukabwanya kulama kyokya kitupelwe.​—1 Tm. 6:12, 19.