Kemukikokai Kunyema Lubilo Lwa Kukapebwa Būmi!

“Tunyeme ne bukankamane ponka luno lubilo lo tutungilwe.”​—BAHEBELU 12:⁠1.

INO myaka yotudi’mo i myaka ya nsangaji, ayo kadi ya malwa. Mu 1914, Yesu wābikikilwe ke Mulopwe wa Bulopwe bwa mūlu bwa Leza, pano kepadi myaka 80 ne kupita. Po ponka pāshilwile “difuku dya Mfumwetu” ne “kyaba kya kumfulo” kya ino ngikadilo ya bintu. (Kusokwelwa 1:​10; Danyele 12:9) Tamba pene’pa, lubilo lwa bwine Kidishitu lwa kukapebwa būmi ke lwa kampeja-bukidi. Bengidi ba Leza baputuminanga bininge mu kwendela pamo na dikalo dya mūlu dya Yehova, ke bulongolodi bwandi bwa mūlu kadi, bwenda bufikidija mpango ya Yehova pakubulwa kwimanaimana.​—Ezekyele 1:​4-​28; 1 Kodinda 9:​24.

² Le bantu ba Leza badi na nsangaji ‘pobanyema lubilo’ lwa kukapebwa būmi bwanyeke? Eyo, badi nayo! I basangale mpata pa kumona kukongakanibwa kwa basheleko ba mu banababo na Yesu, ne pa kuyuka’mba kutūlwa biyukeno kwa mfulo kwa basheleko ba mu 144 000 kekudi pabwipi na kupwa. (Kusokwelwa 7:​3, 4) Ino kadi badi na nsangaji pa kujingulula amba Mulopwe utongelwe na Yehova ke mutweje kala lupete lwa kunoa nalo mu “byangulwa bya pano pantanda.” (Kusokwelwa 14:15, 16, MB) Bine i mwangulo mukatampe kashāa! (Mateo 9:​37) Konso konso, myuya midiyo itano ne kupita ke myungwijibwe​—“kibumbo kikatampe kīne kekibadibwapo na muntu, mhm; batambile mu mizo yonso, ne mu bisaka byonso ne mu bantu, ne mu ndimi.” (Kusokwelwa 7:9) I kutupu muntu ubwanya kutela buvule bwamfulo busa kufikila’po kino kibumbo, mwanda i kutupu nansha umo ukokeja kwikibala.

³ Eyo, Satana utompanga kwitukukaja nansha kwitukala mu lubilo lwetu lotunyema. (Kusokwelwa 12:17) Kūminina mu lubilo ke kipēlapo, ke-pantu kudi mavita, nzala, bipupo bya mba, ne masusu makwabo a mu ano mafuku a ku mfulo. (Mateo 24:​3-9; Luka 21:11; 2 Temote 3:​1-5) Pano, mityima yetu i miyule nsangaji mwanda mfulo ya lubilo ibafwenenena pabwipi. Tulongei bukomo bwa kwikala na mushipiditu wāsoñenye Polo ku bapwani nandi bene Kidishitu ba mu yabo myaka’ya, amba: “Sepelelai nyeke mudi Mfumwetu; kadi nkemunenanga dikwabo na’mba, sepelelai.”​—Fidipai 4:4.

⁴ Bene Kidishitu bātumīnwe bino binenwa bya Polo kebābudilwepo kusangela lwitabijo lwabo, mwanda Polo wēbanene amba: ‘Endelelai na kusepelela mudi Mfumwetu.’ (Fidipai 3:1) Ba mu kipwilo kya Fidipai bādi na buntu ne buswe, bengila na bupyasakane ne buzanzamuke. (Fidipai 1:​3-5; 4:​10, 14-​20) Ino ke bene Kidishitu bonsopo ba mu myaka katwa imbajinji bādi na uno mushipiditu. Kifwa, bene Kidishitu bamobamo Bayuda, bātumīnwe mukanda wa Bahebelu na Polo, bādi bantu ba bimyanda myanda.

“Tuningidile Kutámo Mutyima”

⁵ Kipwilo kibajinji kya bwine Kidishitu mu mānga ya ntanda yonso kyādi kibundilwe enka na Bayuda bakibutwila ne baketutyile mu bwine Yuda, kadi kyāshimikilwe mu Yelusalema mu 33 K.K. I mushipiditu wa muswelo’ka okyādi nao? Ukokeja’tu kutanga mashapita mabajinji a mukanda wa Bilongwa ne kuyuka wayuka buzanzamuke ne nsangaji yokyādi nayo, nansha ke mu kupangwapangwa mwine. (Bilongwa 2:​44-​47; 4:​32-​34; 5:​41; 6:7) Myaka makumi pa kupita’po, bintu byāshinta, bene Kidishitu Bayuda bavule bāshilula kupungila mu lubilo lwa kukapebwa būmi. Mānga imo inena namino pa mwanda utala ngikadilo yāikele’ko kubwipi kwa mwaka 60 K.K.: “Kwādi ngikadilo ya bukōkekōke ne buzoze, bitengelwe kufika kebifika, bikulupilwe kebimweka, amba ne kuleka’byo kwitabija i pamo ponka. Bādi bene Kidishitu, ino bādi bakwatyile lwito lwabo lwa ntumbo ku mulēle.” Lelo bene Kidishitu bashingwe-māni bāponene mu ino ngikadilo muswelo’ka? Bubandaudi bwa bipindi bya mukanda wa Polo ku Bahebelu (waāsonekele kubwipi kwa 61 K.K.) buketupa kilondololwa ku kino kipangujo. Buno bubandaudi busa kwitulombola batwe bonso dyalelo mwa kwepukila kuponena mu bukōkekōke bwa kumushipiditu bwa uno muswelo.

⁶ Bene Kidishitu Bahebelu bātambile mu mutōtelo wa Bayuda wādi wifwatakenya amba ukōkele ku Bijila byobāpele Mosesa kudi Yehova. Bino Bijila bimweka bu byāendelele na kwikala na lupusa pa bene Kidishitu Bayuda bavule, kepabulwe padi myaka pa kuvula, i enka abyo kete byo byāshele bu dishinda dya kufwena kudi Yehova, kadi byo byonka byādi bibundile mutōtelo wādi mutumbe, udi na babitobo, na bitapwa bya kitatyi ne kitatyi, ne na tempelo ya mu Yelusalema yādi miyukane ntanda yonso. Bwine Kidishitu abo i bwishile. Bulomba kwikala na mumweno wa kumushipiditu, pamo bwa wa Mosesa, “aye wadi ubambile meso konka ku kupalwa mpalo [mu mafuku a kumeso]” kadi “wakankamene ne kukankamana bwa wamona aye wakubulwa kumweka.” (Bahebelu 11:26, 27) Bene Kidishitu Bayuda bavule bābudilwe uno mumweno wa kumushipiditu. Bādi benda matadi, pa kyaba kya kunyema lubilo munyemenanga bantu bafwila kukapalwa mpalo.

⁷ Lelo kudi ngikadilo ya uno muswelo dyalelo? Eyo idi’ko, bintu kebidipo muswelo umo. Mwanda bene Kidishitu i batambe mu ngikadilo ya bintu mubikele mitatulo yonkayonka. Ntanda ipānanga mikenga mivule isangaja, ino kadi itwikanga bantu biselwa bilēma. Bavule umbukata mwetu bashikete mu matanda mubikele kisela kya kwalakana bintu, mudi bantu besakila’nka abo, batembaula’nka ami bidi. Shi twilekelele batwe bene kutādilwa na ngikadilo pamo bwa ino, ‘meso etu a mutyima’ akekala na kafi bukidi bonka. (Efisesa 1:​18) Lelo tukanyema senene muswelo’ka luno lubilo lwa kukapebwa būmi shi tukomenwe kusansanya biyampe ne kuyuka i kwepi kotwenda?

⁸ Polo, pa kusaka kukankamika bene Kidishitu Bayuda, wēbavulwije bwine Kidishitu mobutabukile Bijila bya Mosesa. Byabine, pādi muzo wa Isalela wa kungitu ukibundilwe na bantu ba Yehova bādi munshi mwa Bijila, Yehova wādi wisamba nao kupityila ku bapolofeto bāpelwe bukomo bwa mushipiditu. Ino Polo unena’mba, dyalelo Leza wisambanga kupityila kudi “Mwana wandi, wātongele ke mpyana wa bintu byonso, ne wāpangije panopantanda ponsololo.” (Bahebelu 1:2) Inoko Yesu i mukatampe kupita balopwe ‘bakwabo’ bonso ba ku musuku wa Davida. I mupite ne bamwikeulu bene.​—Bahebelu 1:​5, 6, 9.

⁹ Polo wādingile bene Kidishitu Bayuda’mba: “Po pene pa mwanda ne mwanda pano o kitufwaninwe tuningidile kutámo mutyima mu bintu byo twaivwene pa kutyina’mba twakēja.” (Bahebelu 2:1) Nansha kwifunda myanda itala padi Kidishitu byoādi madyese akutendelwa, ino kwādi kukibasakila kulonga bintu bivule. Bādi bakisakilwa kuninga kuta mutyima ku Kinenwa kya Leza, kutyina’mba bakaponena mu milongelo ya Bayuda bādi bebajokolokele. Ne batwe netu mo monka, tufwaninwe ‘kuninga kuta mutyima’ ku byobya binena Yehova, mwanda bisela bipupwa bibavula. Kino kishintulula’mba tufwaninwe kwikala na kibidiji kya kwifunda ne kulonda mpangiko senene ya butangi bwa Bible. Kishintulula ne kutanwa ku kupwila kitatyi ne kitatyi ne kusapwila bakwabo lwitabijo lwetu, pamo na munenene Polo mu mukanda wandi kudi Bahebelu. (Bahebelu 10:23-​25) Uno o mwingilo uketupa bukomo bwa kwikala nyeke batengele kumushipiditu, pampikwa kuvundamina ku lukulupilo lwetu lwa ntumbo. Shi tuyuje milangwe ya Yehova mu ñeni yetu, nankyo ketukalobejibwapo nansha kujinibwa na kintu kyo-kyonso kibwanya kwitulonga ino ntanda.​—Mitōto 1:​1-3; Nkindi 3:​1-6.

“Ikalai Kwisashila Bānwe Bene na Bene”

¹⁰ Shi ketuningidilepo kuta mutyima ku bintu bya kumushipiditu, milao ya Leza iketumwekela bu kwididika bitupu. Kino kyo kyālongekele mu myaka katwa mibajinji pādi bipwilo byonso bikidi bibundwe’nka na bene Kidishitu bashingwe-māni ne batumibwa bamobamo bakidi bōmi. Polo wādyumwine Bahebelu amba: “Bānwe bāna betu, dyumukai mwanda wa kutyina’mba, padi, kwakēkala umo wa mwenu wa mutyima umbi wa mifutululo ya kubomboka Leza mūmi. Nanshi ikalai kwisashila bānwe bene na bene, mo bukila, mo bukila, pano ponka pakitelwa bu-dyalelo; mwanda wa kunena’mba, umo wa mwenu wakōminina na kongolwa kwa bubi.” (Bahebelu 3:​12, 13) Kishima “dyumukai” kitelele Polo kilombola mvubu ya kwikala batadije. Kyaka kitutengele! Kujimija lwitabijo​—“bubi”​—bukokeja kutama mu mityima yetu, ne kubomboka Leza nako enka nabya, pa kyaba kya kumufwena. (Yakoba 4:8) Polo wituvuluja’mba “ikalai kwisashila bānwe bene na bene.” Twikalei mu kyanga kya kisense kya banabetu. “Yewa wikalañanya aye mwine ukimba kiswa-mutyima kyandi aye mwine, kadi upatana pa ñeni yonso mituntulu.” (Nkindi 18:1) Kuyuka mvubu ya kisense kya uno muswelo kusombelanga bene Kidishitu dyalelo bekale kutanwa kitatyi ne kitatyi ku kupwila kwa pa kipwilo, ku kubungakana ne ku bitango.

¹¹ Polo i mulete madingi makwabo a kamweno monka mu mukanda wandi, amba: “I ponka pano po kimufwaninwe mwikale bafundiji, ino mukisaka ungi ēmufundije dikwabo bya umbunkasampe bya ngalwilo ya binenwa bya Leza; kadi umbālamuka pamo bwa boba basaka mabele, bidibwa bikomokomo mpika. . . . Bidibwa bikomokomo i bya boba ke bapwe kutama; ke boba kadi badi ne byakwivwana nabyo byabo bībidile kala bya kuyūkidila ne bulumbuluke ne bibi, mwanda wa kwivwanaivwana.” (Bahebelu 5:​12-​14) I kimweke patōka’mba bene Kidishitu Bayuda bavule bākomenwe kwendelela kumeso mu kwivwanija. Bādi betabija na lukoko kukamba kwa mwinya utala pa Bijila ne pa kutwejibwa kwisao. (Bilongwa 15:27-​29; Ngalatea 2:​11-​14; 6:​12, 13) Bamo bāshele bakwete makasa abidi bino bisela bya kishi, kifwa, Sabado wa ku yenga ne yenga ne masobo a Difuku dya Kipwanyo a ku mwaka ne mwaka.​—Kolose 2:​16, 17; Bahebelu 9:​1-​14.

¹² O mwanda Polo unena’mba: “Penepo nanshi tushīe owa mwanda wa pangalwilo pa Kidishitu tutundulukile ku byabukulu.” (Bahebelu 6:1) Munyemi wa lubilo utele mutyima bininge ku kubweja mpao yandi ye ūmininanga biyampe mu lubilo lwa mulela mulampe uleta mpungiji. Ne mwine Kidishitu utele mutyima ku bidibwa bya kumushipiditu nandi monka na monka​—kafwaninwepo kukadikila pa ‘bya pa ngalwilo pa lufundijo’​—shi binebine endelele nyeke na kunyema lubilo namino pambulwa kwishisa, i bine ukafikija’lo ku mfulo. (Enzankanya na 2 Temote 4:7.) Kino kishintulula kutunduluka mu kusepelela kwa bubinebine mu ‘bula ne mu bunkimbwa ne mu bwimwa ne mu nkulwe’ yabo, ne kutama nako enka nabya.​—Efisesa 3:​18.

‘Mufwanyinwe Kūminina’

¹³ Bene Kidishitu Bayuda bādi batōtyi bemanije pototo, nansha byobādi mu kupangwapangwa kukomo kinondanonda na Pentekosa mu 33 K.K. (Bilongwa 8:1) Kekubulwe padi o mulangwe wādi na Polo ku mutyima paāsonekele’mba: “Vulukaipo bidi ku yoya myaka yoya, mo mwakankamene mu bulwi bukatampe bwa misongo ne misongo, po mwadi ke mudi kala batōkejibwe.” (Bahebelu 10:32) Kūminina kwa kikōkeji kudi namino kwālombwele amba bādi baswele Leza, kadi ye konka kwēbapele bukankamane bwa kunena ku meso andi pakubulwa kafinda. (1 Yoano 4:​17) Polo wibakankamika baleke kujimija buno bukankamane bwa kunena pambulwa kafinda, shi bitupu, bakajimija lwitabijo. Wibasoñanya’mba: ‘Mufwanyinwe kūminina amba mulonge musakila Leza, nabya mutambule kyaālaile. Monka munenena Bisonekwa’mba: Kubashala kakyaba katyetye tu, i katyetyetyetye tu. Wakwiya ukeya, kakalengwepo, enhe.’​—Bahebelu 10:35-​37.

¹⁴ Kidi namani kotudi dyalelo? Bavule umbukata mwetu bādi bapyasakane pobēfundile dibajinji bubinebine bwa bwine Kidishitu. Lelo tukidi na bobwa bupyasakane’ni? Nansha ‘ketudi kala bashie buswe bwetu bubajinji’? (Kusokwelwa 2:4) Lelo tubatalajibwa, pakwabo ne kupungila bityetye nansha kukōka mu kukungila Amakedona? Kunkamana’po bidi, ulanguluke. Bubinebine kebudipo na pobushindulwa, bukidi bulumbuluke’nka na mobwādi bwikadile pabajinji. Yesu ukidi enka Mulopwe wetu wamūlu. Tukikulupile būmi bwanyeke mu paladisa pano pantanda, kadi tukilamine kipwano kyetu na Yehova. Kokolwa kwilwa kino: “Wakwiya ukeya, kakalengwepo, enhe.”

¹⁵ Nanshi binenwa bya Polo bitelelwe mu Bahebelu 12:​1, 2 i bifwaninwe mpata, amba: “Tuvule byonso bya kwitulemenena, shi bika, shi bika, ne bubi [kubulwa lwitabijo] bwitūminine bwine, tunyeme ne bukankamane ponka luno lubilo lo tutungilwe, lwa kwela meso konka kudi aye Yesu kilongoji kya kwitabija kwetu, ke mub[wanin]iji wako kadi, aye wakankamene ne [ku mutyi wa masusu] ne kubanga bumvu kwine mpika, pa mwanda wa tusepo twadi tumutūdilwe kumeso, ino pano washikata ku lundyo lwa lupona lwa Leza.” I bintu bivule byūminina bengidi ba Leza mu ano mafuku a ku mfulo. Batutu ne bakaka abalonda mu lwayo lwa Yesu, wālamine kikōkeji kufika’nka ne ku lufu lwa malwa, i bine, bōmininanga na kikōkeji kupangwapangwa kusansa mutyima​—makomponi a bifungo, kumweshibwa malwa, kusambakana nabo ku bukomo, ne kwipaibwa. (1 Petelo 2:​21) Mwene potulangulukanga pa bululame bwabo, mityima yetu itukunkanga twibasanswe?

¹⁶ Kunena na bubine, bino binenwa bikwabo bya Polo i bifike’po ku bavule: ‘Banwe pomulwa na bwabo bubi, kemwebukomene kufika’nka ne ku kusūmija mashi.’ (Bahebelu 12:4) I kyabine, mu ino ngikadilo, ku muntu ye-yense, dishinda dya bubinebine kedipēlangapo. Bavule bajondwa mityima “pa kufutululwa na babipyamambo” bobengila nabo ku kaji, nansha ku masomo, bōminina kusepwa, ino abo bejibe ku lupusa lwa kulonga bubi. (Bahebelu 12:3) Kudi matompo makomokomo asengemunanga kusumininwa kwa bamobamo bakomenwa kulama misoñanya ya peulu ya Leza. (Bahebelu 13:​4, 5) Kifwa, kudi batupondo basunkanya bujalale bwa kumushipiditu bwa bamo batejanga bisela bya bulembe bipupwa. (Bahebelu 13:9) Kwishīla kwa bumuntu nako monka, kujimijijanga bantu bakwabo nsangaji. Kulēmenena ku byamazua ne ku makayo a kwipwija mukose nako monka na monka, kubapungija bene Kidishitu bamobamo. Bavule nabo bejingwila amba i batyintyidilwe bininge na makambakano a mu būmi bwa mu ino ngikadilo ya bintu.

¹⁷ Eyo, i kutupu ngikadilo nansha imo mu ino ‘ifikanga ku kusūmija mashi.’ Imoimo twiobelanga’yo batwe bene na mbila yotwityibilanga bibi. Ino ayo yonso ileta bikoleja mu lwitabijo lwetu. O mwanda nanshi tufwaninwe kulama meso etu mabambile sō pa kifwa kya ntumbo kya kūminina kwa Yesu. Netu ketufwaninwepo kwilwa kino, lukulupilo lwetu i lwakutendelwa. Ketwakijimijai nansha dimo lukulupilo lwetu lwa’mba Yehova “upala mpalo boba bamukimba ne mikeketo.” (Bahebelu 11:6) Shi tulonge namino, tukekala na bukomo bwa kumushipiditu bwa kwendelela na kunyema lubilo lwa kukapebwa būmi.

Netu Tukokeja Kūminina

¹⁸ Lelo bene Kidishitu Bayuda bāitabile muswelo’ka ku mukanda wa Polo? Kubwipi kwa myaka isamba kupwa kwa kusonekwa kwa mukanda wa Bahebelu, Yuda wātambwa divita. Mu 66 K.K., bibumbo bya bene Loma byāela Yelusalema mu lukalo, enka namino, byāfikidija kyānene Yesu, amba: “Po mukamonapo ku Yelusalema vita, ibajokoloka konso konso, po pakuyuka’mba, musala wakyo ubafwena.” (Luka 21:20) Inoko, Yesu wādi usakila biyampe bene Kidishitu bādi mu Yelusalema mu mene mafuku’a, o mwanda wēbasoñenye’mba: “Penepo ba mu Yudea bakanyemene ku ngulu, ne badi mubukata bafundukemo, ne ba mu masokeja a tubibundi kebakatwelamopo, mhm.” (Luka 21:21) Dino divita dya bene Loma dyāletele ditompo: Lelo bene Kidishitu Bayuda bādi ba kushiya Yelusalema, kitako kya mutōtelo wa Bayuda, kité pādi tempelo ya ntumbo?

¹⁹ Bene Loma bētolele pamo’nka bwa mu kukopa kwa diso, ne kyobētolele kine kekiyukana. Kekubulwe padi Bayuda bepāne mu butōtyi bāmwene amba i kiyukeno kilombola amba Leza wākingile kibundi kyabo kikola. Lelo bene Kidishitu nabo? Mānga itulombola amba bānyemene. Kupwa, mu 70 K.K., bene Loma bāaluka ne kutūta Yelusalema yense, bātukija bantu. ‘Difuku dya Yehova’ dyātobelwe na Yoela dyāfikila Yelusalema. Ino bene Kidishitu bakikōkeji bādi kebakidi’mopo. ‘Bānyongolwelwe.’​—Yoela 2:​30-​32; Bilongwa 2:​16-​21.

²⁰ Dyalelo nadyo tuyukile amba ‘difuku dikatampe dya Yehova’ dikwabo dikaposokela ino ngikadilo yonso ya bintu panopano ponka. (Yoela 3:​12-​14) Ketuyukilepo i kitatyi’ka kikafika dino difuku. Ino Kinenwa kya Leza kitukulupija’mba dikafika binebine! Yehova unena’mba kedikejepo. (Habakuka 2:3; 2 Petelo 3:​9, 10) Nanshi “tuningidile kutámo mutyima mu bintu byo twaivwene.” Twepukei kujimija lwitabijo, “bubi bwituminine bwine.” Tusumininwei nyeke kwikala bōminine. Tuvulukei amba bulongolodi bwa mūlu bwa Yehova budi pamo bwa dikalo budi nyeke mu lwendo. Kufika’nka ne pobukafikidija mpango yabo. Nanshi batwe bonso kya pamo, twendelelei na kunyema lubilo lwa kukapebwa būmi ne kukoka mpika!

[Bipangujo]

1, 2. Le i mwanda’ka mukatampe usangeje nakampata bengidi ba Yehova mu ano mafuku a ku mfulo?

3. Tufwaninwe kwikankila nyeke kutamija mushipiditu wa nsangaji nansha shi kudi makambakano’ka?

4. Lelo i mushipiditu wa muswelo’ka wādi na bene Kidishitu ba mu Fidipai?

5. (a) Le i mushipiditu’ka wādi na bene Kidishitu Bahebelu, kitatyi kyābundilwe kipwilo kibajinji kya bwine Kidishitu? (b) Lombola mwādi mwikadile mushipiditu wa bene Kidishitu Bahebelu bamobamo kubwipi kwa mwaka wa 60 K.K.

6. I kwishila’ka kumokumo kwishidile mutōtelo wādi munshi mwa Bijila bya Mosesa ne mutōtelo wimanine pa lwitabijo mudi Yesu Kidishitu?

7. Ino ngikadilo yotutambile’mo ikokeja kutenga muswelo’ka munyemeno wetu wa lubilo lwa kukapebwa būmi?

8. Le bwine Kidishitu butabukile mutōtelo wādi munshi mwa Bijila mu miswelo’ka imoimo?

9. Mwanda waka netu tufwaninwe ‘kuninga kuta mutyima’ ku byobya binena Yehova, pamo bwa bene Kidishitu Bayuda ba mu mafuku a Polo?

10. (a) Lelo i kika kikokeja kufikila muntu upela kuta mutyima ku Kinenwa kya Yehova? (b) Le i muswelo’ka ‘otukesashila batwe bene na bene’?

11, 12. Mwanda waka ketufwaninwepo kusangela’nka kuyuka bufundiji bwa bwine Kidishitu bwa pa kitako kete?

13. Bene Kidishitu Bahebelu bālombwele muswelo’ka lwitabijo lwabo mu mafuku a kunyuma?

14. I myanda’ka ifwaninwe kwitukwasha tūminine nansha shi ketudi balāle myaka kapwila mu kwingidila Yehova?

15. Bene Kidishitu bamobamo bōmininanga muswelo’ka mu kupangwapangwa kukatampe pamo na mwāuminine Yesu?

16, 17. (a) I bikoleja’ka bya lwitabijo bīkoka na bene Kidishitu bavule? (b) Lelo i kika kyotufwaninwe kuvuluka shi tusaka twendelele na kunyema lubilo lwa kukapebwa būmi?

18, 19. I binkumenkume’ka bya mu mānga bilombola’mba bene Kidishitu Bahebelu ba mu Yelusalema bālondele madingi a Polo a ku bukomo bwa mushipiditu?

20. Kuyuka kotwayuka’mba “difuku dya Yehova” dikatakata dibafwena kufwaninwe kwitutonona muswelo’ka?

[Kifwatulo pa paje 19]

Mwine Kidishitu, pamo bwa munyemi, kafwaninwepo kuleka kintu nansha kimo kimulabike

[Kifwatulo pa paje 20]

I kutupu kintu kikokeja kukala dikalo dikatampe dya mūlu dya Yehova kufikidija mpango yadyo

Lelo Ukivulukile’byo?

◻ Le i musoñanya’ka wāletele Polo ku bene Fidipai otufwaninwe kulonda netu tumone kūminina mu luno lubilo lwa kukapebwa būmi lotunyema?

◻ I kika kiketukwasha tujikile mashinda milangwe ya ino ntanda ikimba kwitulabika?

◻ I muswelo’ka otubwanya kwikwasha batwe bene na bene ne kwipa bukankamane bwa kūminina mu lubilo?

◻ Le i bintu’ka bimobimo bikokeja kukala lubilo lwa mwine Kidishitu?

◻ Kifwa kya Yesu kikokeja kwitukwasha namani tūminine?