Tempelo Mikatampe ya Yehova Yakumushipiditu

‘Tudi ne kitobo mukatampe namino, . . . mwingidi wa bantu bonso wa mu kifuko kikola ne wa mu kipema-kyakikalo kilumbuluke kyāshimikile Yehova ino kekyāshimikilwepo na muntu, mhm.’​—BAHEBELU 8:​1, 2.

YEHOVA LEZA, pamwanda wa buswe bwandi bukatampe bwaswele bantu, wātudileko kitapwa mwanda wa kutalula bubi bwa ntanda yonso. (Yoano 1:29; 3:16) Kyāmulombele kutundulwila būmi bwa wandi Mwana umbedi kutamba momwa mūlu ne kwibutūla munda mwa Madia Muyuda wādi mujike. Mwikeulu wa Yehova wāshintulwidile Madia amba mwana wākemita ‘ukatelwa bu ukola, Mwanā Leza.’ (Luka 1:​34, 35) Yosefa wādi usaka kusonga Madia, wāsapwidilwe muswelo wāimitwe Yesu mu kingelengele ne wāyukile amba uno mwana “ukapandijanga bantu bandi ku mambo abo.”​—Mateo 1:​20, 21.

² Byādi byenda bitama Yesu, wāivwanije myanda imo-imo itala pa muswelo wāimitwe kupityila ku kingelengele. Wādi uyukile’mba Shandi wamūlu wādi umusakila avuije mwingilo wa kupandija bantu pano pantanda. Ebiya, pādi ke muntu mutame senene wa myaka 30, Yesu wāendele kudi Yoano mupolofeto wa Leza mwanda wa akabatyijibwe mu Munonga wa Yodano.​—Mako 1:9; Luka 3:23.

³ Yesu wādi ulombela kitatyi kyādi ubatyijibwa. (Luka 3:21) I kimweke patōka’mba wāfikidije myanda imutala idi mu Mitōto 40:​6-8, pamo’nka na mwēkinenene mutumibwa Polo mafuku pakupitapo’mba: “Kitapwa ne kyakwela abe kuswele’byo, Ino wanongolwedile ngitu.” (Bahebelu 10:5) Shi kepano, Yesu wālombwele bu wādi uyukile’mba Leza ‘kādipo ukisaka’ bantu bendelele na kwela bitapwa bya banyema mu tempelo yandi ya mu Yelusalema. Ino, wājingulwile’mba Leza wāteakenye umbidi wa Yesu, wa bu-muntu mubwaninine bu kitapwa. Kino kyādi kya kufundula mpangiko yonso itala pa mulambu wa bitapwa bya banyema. Mwanda wa kulombola na mutyima umo kilokoloko kyandi kya kukōkela ku kiswamutyima kya Leza, Yesu wāendelele na kulombela’mba: “Amiwa uno ngiyanga (monka mu muvunga wa mukanda kinsonekelwe) kulonga kiswa-mutyima obe, abe Leza.” (Bahebelu 10:7) Bine kino i kimfwa kya bukankamane bukatampe kashaa ne kwipāna kwakubulwa kwisakila kamweno kwālombwele Yesu mu dine difuku’dya pamwanda wa boba bonso bakasaka kwikala bandi bana-babwanga mu ano mafuku!​—Mako 8:34.

⁴ Lelo Leza wāitabije milombelo ya Yesu yādi ulombela kitatyi kya lubatyijo lwandi? Umo wa mu batumibwa bātongele Yesu ulondolola’mba: “Penepo Yesu byābatyijibw[e], aye wabuka’tu mu mema, ponkapo kala ne diulu dyamujikukila, wamona ne aye Mushipiditu wa Leza utūka bwa nkunda kumutentamapo. Ino kwivwana ne diwi dyatamba mūlu amba: ‘Uno nandi i wami Mwana wakuswedibwa o ntōkelwe pa mutyima.’ ”​—Mateo 3:​16, 17; Luka 3:​21, 22.

⁵ Muswelo wāitabije Leza mulambu wa umbidi wa Yesu bu kitapwa, ushintulula’mba kwāshimikilwe kilambwilo kikatampe kya kumushipiditu kupita kyōkya kyādi mu tempelo ya mu Yelusalema. Kilambwilo kyādi kimweka na meso pādi palambulwa bitapwa bya banyema, kyādi bu munjiñininya wa kilambwilo kya kumushipiditu, kokunena’mba “kiswamutyima” kya Leza nansha mpangiko ya kwitabija būmi bwa Yesu bu kitapwa. (Bahebelu 10:10) O mwanda mutumibwa Polo wāsonekele balunda nandi bakristu amba: ‘Ino bātwe bano tudi ne kilambwilo, boba bādi bāvuija mwingilo ukola mu tempelo kebadipo na lupusa lwa kudyako.’ (Bahebelu 13:10) Mu bishima bikwabo, kokunena’mba bakristu babine bamwenanga byabuyabuya mu kitapwa kikatampe kya kukenda bubi, kyāpelele Bayuda bavule.

⁶ Kushingwa kwa Yesu māni a mushipiditu sandu kushintulula’mba pano Leza kemutuleko mpangiko yonso itala pa tempelo yandi ya kumushipiditu, ne Yesu ye wingila’mo bu Kitobo Mukatampe. (Bilongwa 10:38; Bahebelu 5:5) Luka mwana-bwanga wāpelwe bukomo bwa mushipiditu mwanda wa kulombola mwaka wādi ufwaninwe kukafikidila uno mwanda mukatampe amba ukekala “mwaka wa dikumi ne ītano wa kubikikwa kwa Tyibilusa Kesala.” (Luka 3:​1-3) Kino kitatyi kyāfikidile mu mwaka wa 29 K.K.​—kupwa kwa mayenga 69 a myaka, nansha myaka 483, kushilwila pa kitatyi kyāletele Mulopwe Alatazelekishishi mbila ya kukōbakulula mpembwe ya Yelusalema. (Nehemia 2:​1, 5-8) Kukwatañana na bupolofeto, “Mushingwe-māni Mfumu’wa,” wādi ufwaninwe kumweka mu mwine mwaka’wa. (Danyele 9:25) Nabubine, Bayuda bavule bādi bekiyukile. Luka usekununa’mba: ‘Bantu bādi batengele’ kwiya kwa Meshiasa, nansha Kristu, bitenta bitamba ku bishima bya mu Kihebelu ne mu Kingidiki, bidi na nshintulwilo imo yonka kushintulula ko kunena’mba “mushingwe-māni.”​—Luka 3:15.

⁷ Kitatyi kyābatyijibwe Yesu, kīkalo kya Leza kyamūlu kyāshingilwe māni, kokunena’mba kyātudilwe pafula bu “Pantu Pakola Nakampata” mu mpangiko mikatampe ya tempelo ya kumushipiditu. (Danyele 9:24) ‘Kipema kyabine [nansha tempelo], yākushimikwa na Yehova, yakubulwa kushimikwa na bantu,’ yāshilwile kwingidijibwa. (Bahebelu 8:2) Kadi, kupityila ku lubatyijo lwandi mu mema ne mu mushipiditu sandu, muntu Yesu Kristu wābutwilwe dipya bu Mwanā Leza wa kumushipiditu. (Enzankanya na Yoano 3:3.) Kino kyādi kishintulula’mba mu kitatyi kitungwe, Leza wādi wa kukajokeja wandi Mwana ku būmi bwādi nabo momwa mūlu, mwādi wa kukashikata ku lundyo lwa Shandi bu Mulopwe ne bu Kitobo Mukatampe nyeke ne nyeke “monka mwendele muswelo wa Melekisedeka.”​—Bahebelu 6:20; Mitōto 110:​1, 4.

Kifuko Kikola Nakampata kya Momwa Mūlu

⁸ Difuku dyābatyijibwe Yesu, lupona lwa Leza lwa momwa mūlu lwāpelwe nshintulwilo impya. Mpangiko yātudileko Leza itala pa kitapwa kya muntu mubwaninine mwanda wa kupūta bubi bwa bantu ba pano pantanda yādi ilombola nakampata bu-ujila bwa Leza kwishila na ngikadilo ya muntu ya bupyamambo. Kufwila-lusa kwandi wēkulombwele kupityila ku muswelo wāitabije kuzobolola mutyima na kwitabija kusengibwa nansha kupūta bubi. Shi kepano, lupona lwa Leza lwa momwa mūlu lwāikele ke njibo ya munda ya tempelo yādi itwela’mo enka kitobo mukatampe musunsa umo pa mwaka na mashi a nyema mwanda wa kupūta bubi mu muneneno wa kyelekejo.

⁹ Kidimbo kyādi kikalañanya Kifuko Kikola na Kifuko Kikola Nakampata kyādi kifunkila pa ngitu ya Yesu. (Bahebelu 10:​19, 20) Ngitu ya Yesu kyādi kijika kyādi kimukankaja aleke kutwela kumeso a Shandi pākidi bu muntu wa mashi pano pantanda. (1 Kodinda 15:50) Kitatyi kyāfwile Yesu, “kisandi kya kukalañanya kyādi kiyeje [pabukata bwa] njibo ya Leza, kyasanyika ntwaa bipeta bibidi kwalwila k[ū]lu kufika ne panshi.” (Mateo 27:​51, MB) Kino kyālombwele’mba kijika kyādi kikankaja Yesu kutwela mūlu kyātalwilwe. Mafuku asatu pakupita’po, Yehova Leza wālongele kingelengele kitulumukwa bininge. Wāsangwile Yesu mu bafu, ke na ngitupo ya mashi ne misunya, mhm, ino wāmusangwile bu kipangwa kya mushipiditu kyantumbo kya “kwikala [na būmi] nyeke ne nyeke.” (Bahebelu 7:24) Mafuku makumi aná pakupitapo, Yesu wākandile mūlu wātwela ‘Pantu Pakola Nakampata,’ “mwanda wa kwitwimanina kumpala ya Leza.”​—Bahebelu 9:​24, MB.

¹⁰ Lelo Leza wāitabije mvubu ya mashi amwāngile Yesu bu lupūto lwa kupūta bubi bwa bantu ba pano pantanda? Wēkitabije. Bukamoni bwa uno mwanda bwāfikidile mafuku 50 kupwa kwa lusangukilo lwa Yesu, mu difuku dya masobo a Pentekosa. Mushipiditu sandu wa Leza wāpungulwilwe pa bana-babwanga 120 ba Yesu bādi bebungile pamo mu Yelusalema. (Bilongwa 2:​1, 4, 33) Pamo bwa Kitobo wabo Mukatampe, Yesu Kristu, nabo bāshingilwe māni mwanda wa kwingila bu ‘babitobo bakola bakwela bitapwa bya kumushipiditu’ mu mpangiko ya tempelo mikatampe ya Leza yakumushipiditu. (1 Petelo 2:5) Pakwabo kadi, bano bashingwe-māni bābundile muzo umpya, Isalela wa kumushipiditu, ‘muzo ukola’ wa Leza. Pa kino, bupolofeto bonso bwa bintu biyampe bitala pa Isalela, kimfwa “kipwanino kipya” mulao usekunwinwe mu Yelemia 31:​31, bwādi bufunkila pa kipwilo kya bakristu bashingwe māni, “Isalela wa Leza” wabinebine.​—1 Petelo 2:9; Ngalatea 6:16.

Myanda Mikwabo Itala pa Tempelo ya Leza Yakumushipiditu

¹¹ Nansha Kifuko Kikola Nakampata byokifunkila pa ‘madiulu,’ mushikete Leza pa lupona lwandi, bipindi bikwabo byonso bya tempelo ya Leza yakumushipiditu bifunkila pa bintu bidi pano panshi. (Bahebelu 9:24) Mu tempelo ya mu Yelusalema, mwādi kipango kya bitobo kyādi mu njibo ya munda mwādi kilambwilo kya kwelelapo bitapwa ne nsāni wa kyoilo mwādi mema ādi engidija ba bitobo mwanda wa kwitōkeja abo bene kumeso kwa kuvuija mwingilo ukola. Lelo bino bintu byādi bifunkila pa kika mu mpangiko ya tempelo ya Leza yakumushipiditu?

¹² Kudi Yesu Kristu, kipango kya bitobo kya mu njibo ya munda kifunkila pa ngikadilo yandi ya bu muntu mubwaninine Mwanā Leza. Balondi ba Yesu bashingwe māni batelwa bu boloke kupityila ku kulombola lwitabijo mu kitapwa kya Yesu. Mwanda, Leza udi na bubinga bwa kupwāna nabo pamo bwa bantu bakubulwa bubi. (Loma 5:1; 8:​1, 33) Ebiya kadi kino kipango kifunkila monka pa ngikadilo ya bu-bantu boloke idi na boba bavuija mwingilo ukola wa bu bitobo kumeso a Leza. Inoko, bakristu bashingwe-māni bakidi bakubulwa kubwaninina ne bakokeja kulonga bubi. Mema adi mu nsāni udi mu kipango afunkila pa Kinenwa kya Leza kingidija Yesu, Kitobo Mukatampe, mwanda wa kutōkeja ba bitobo bakola bityebitye. Na kukōkela ku ino mpangiko ya kutōkejibwa, ibafikile pa ngikadila ya bulemantu itumbija Leza ne ikokela bantu ba panja ku mutōtelo wandi ujila.​—Efisesa 5:​25, 26; enzankanya na Malaki 3:​1-3.

Kifuko Kikola

¹³ Kipindi kibajinji kya tempelo kifunkila pa ngikadilo ya peulu ya kipango. Kudi Yesu Kristu muntu mubwaninine, kino kifuko kifunkila pa kubutulwa kwandi kupya bu Mwanā Leza wakumushipiditu wādi ufwaninwe kujokela ku būmi bwa momwa mūlu. Kupwa kwa kubalwa bu boloke, pamwanda wa lwitabijo lwabo mu mashi amwāngile Yesu, bano balondi bashingwe-māni nabo bamonanga muswelo wingila uno mushipiditu wa Leza mu muswelo wapabula. (Loma 8:​14-17) ‘Bekalanga babutulwa dipya’ bu bana ba Leza ba kumushipiditu kupityila ku “mema [kokunena’mba ku lubatyijo lwabo] ne ku mushipiditu.” Byobadi mu ino ngikadilo, badi na lukulupilo lwa kukasangulwa bu bana ba Leza ba kumushipiditu mwanda wa kukekala na būmi momwa mūlu, inoko enka shi bekale kulama kikōkeji kyabo kufika ne ku lufu.​—Yoano 3:​5, 7; Kusokwelwa 2:10.

¹⁴ Ba bitobo bādi bengila munda mwa Kifuko Kikola kya tempelo ya pano panshi kebādipo bamonwa na batōtyi bakwabo bādi panja pa tempelo. Muswelo umo onka, bakristu bashingwe-māni badi mu ngikadilo yakumushipiditu ke idi’mo batōtyi bavule ba Leza badi na lukulupilo lwa kukekala na būmi bwanyeke pano pantanda ne yokebakokejapo kwivwanija senene. Kibikwa-binanu kya nsahabu kyādi mu tabernakulo kifunkila pa ngikadilo ya bakristu bashingwe-māni ya kumunika kitōkeji. Mwingilo wa mushipiditu sandu wa Leza, udingakene na māni a mu binanu, uletanga kitōkeji kitala pa Bible. Kwivwanija kusokolanga bano bakristu kebelaminangakopo abo bene. Ino bakōkele Yesu wānene’mba: “Mudi mwinya wa panopantanda, . . . bu-mwinya bwenu busokokele ku bantu, amba bemumone mīngilo yenu miyampe, nabo batumbije Shenu wa mūlu.”​—Mateo 5:​14, 16.

¹⁵ Shi bakristu bashingwe-māni basaka kulama kitōkeji kyabo bafwaninwe kudya kitatyi ne kitatyi bidibwa bya kyelekejo bifunkila pa mukate wādi utulwa pa mesa a mikate milombolwe. Nsulo yabo imbajinji kutambanga bidibwa bya kumushipiditu i Kinenwa kya Leza, kyobalonga bukomo na kutanga ne kulanguluka pa myanda idimo difuku ne difuku. Yesu nandi wālaile kwibapa ‘bidibwa mu kitatyi kifwaninwe’ kupityila kudi “umpika wabinebine ne wamanwa.” (Mateo 24:​45, NW) Uno “umpika” i kibumbo kya bakristu bashingwe-māni bonso badi pano pantanda mu kitatyi kyo-kyonso. Kristu wāingidije kano kabumbo ka bashingwe-māni mwanda wa kuyukanya myanda itala pa kufikidila kwa bupolofeto bwa Bible ne kupāna buludiki mu kitatyi kitungwe butala pa muswelo wa kwingidija misoñanya ya mu Bible mu būmi mu kino kyetu kitatyi. O mwanda nanshi, bakristu bashingwe-māni basangelanga kudya bino bidibwa byonso bya kumushipiditu. Ino bukomo bwa būmi bwabo bwa kumushipiditu bwimanine pa myanda mivule kupitako enka kwifunda myanda itala pa buyuki bwa Leza mu ñeni ne mu mityima yabo. Yesu wānene’mba: “Bidibwa byami i byonka bino’mba: Ngube kiswa-mutyima kya yewa wakuntuma, ne kumupwila mīngilo yandi.” (Yoano 4:34) Muswelo umo onka, bakristu bashingwe-māni bemvwananga nsangaji difuku ne difuku ya kulonga kiswamutyima kya Leza.

¹⁶ Ku lubanga ne ku kyolwa, kitobo umo wādi ulambula ensense kudi Leza pa kilambwilo kya ensense kyādi mu Kifuko Kikola. Mu kitatyi kimo kyonka, batōtyi bakubulwa mu dīfu dya butobo bādi balombela kudi Leza koku bēmene panja pa kipango kya tempelo. (Luka 1:​8-10) Bible ushintulula’mba “ensense” i “milombelo ya bapandulwemo.” (Kusokwelwa 5:8) Davida mulembi-wamitōto wālombele’mba: “Lulombelo lwami lubikwe mu kifuko kyobe bwa binunkabiyampe [“ensense,” NW].” (Mitōto 141:2) Bakristu bashingwe-māni nabo basangedile madyese a kwifwenya kudi Yehova mu milombelo kupityila kudi Yesu Kristu. Milombelo yabinebine itamba mu mutyima idi pamo bwa ensense idi na luvumba lununka biya. Kadi bakristu bashingwe-māni batendelanga Leza mu muswelo mukwabo, na kwingidija milomo yabo mwanda wa kufundija bakwabo. Kūminina kwabo kitatyi kyobatanwanga na makambakano ne pātulwanga kikōkeji kyabo mu matompo, bine bisangajanga Leza pakatampe.​—1 Petelo 2:​20, 21.

¹⁷ Mu Difuku dya Kipwanyo, kitobo mukatampe wa bene Isalela wādi utwela mu Kifuko Kikola Nakampata mwanda wa kusoka ensense mu kinyinga kya nsahabu kyādi’mo makala a mudilo. Wādi ufwaninwe kwikilonga kumeso kwa kuleta mashi a bitapwa bya pamwanda wa bubi. Mwanda wa kufikidija kino kyelekejo kya bupolofeto, muntu Yesu wālamine kikōkeji kudi Yehova Leza na kusumininwa kukatampe kumeso kwa kupāna būmi bwandi bu kitapwa kimo kete kya pamwanda wa bubi bwetu. Mu uno muswelo wālombwele’mba muntu mubwaninine ukokeja kulama kikōkeji kyandi kudi Leza nansha shi udi mu masusu a muswelo’ka amuletela Satana. (Nkindi 27:11) Pātenwe na matompo, Yesu wālombele “ne kwisasa ponka ne kuyoyokota miyoa, ne impolo ponka, kudi yewa uyūkile kumupandija monka mu lufu, ne kwivwanibwa pa kwakamwa kwandi kwa bu-Leza.” (Bahebelu 5:​7) Mu uno muswelo, wātumbije Yehova amba ye moloke kadi’mba udi na bubinga bwa kutelwa bu Mfumu wa umbuo onso wa diūlu ne ntanda. Leza wāpadile Yesu mpalo na kumusangula mu bafu ne kumupa būmi bwakubulwa lufu momwa mūlu. Mu ino ngikadilo ya peulu yadi’mo, Yesu utēle mutyima ku buluji bwabubidi bwāidile pano pantanda, kupwanya na Leza ba bipyamambo balombola ngikadila ya kwisāsa.​—Bahebelu 4:​14-16.

Ntumbo Mikatakata ya Tempelo ya Leza Yakumushipiditu

¹⁸ Yehova wātobele butobo’mba: “Ntumbo ya kumfulo ya ino njibo ino’i ikatabuka ntumbo ya yoya imbajinji’ya.” (Hakai 2:9) Yehova wāpele tempelo yandi yakumushipiditu ntumbo mikatakata, kitatyi kyāsangwile Yesu bu Mulopwe ne bu Kitobo Mukatampe wakubulwa kadi kukafwa nansha dimo. Pano Yesu ukokeja kupāna “lupandilo lwanyeke ku bonso bamukōkela.” (Bahebelu 5:9, MB) Bantu babajinji bābadikile kulombola kikōkeji kya uno muswelo bādi bana-babwanga 120 bātambwile mushipiditu sandu pa Pentekosa wa mu mwaka wa 33 K.K. Mukanda wa Kusokwelwa wātobele’mba kibalwa kya bano bana ba Isalela wa kumushipiditu kyādi kya kukafika pa bantu 144 000 kete. (Kusokwelwa 7:4) Pa kufwa, bavule umbukata mwabo bādi ba kukalala mu kibundu kya bantu bonso, pakubulwa kuyuka kintu belaija kitatyi kya pakwikala’po kwa Yesu mu lupusa lwa bulopwe bwandi. Bupolofeto bulombola kitatyi budi mu Danyele 4:​10-17, 20-27 bufunkilanga pa mwaka wa 1914 amba ye kitatyi kyāshilwile kubikala Yesu mubukata mwa balwana nandi. (Mitōto 110:2) Makumi a myaka kumeso kwa 1914, bakristu bashingwe-māni bādi belaija uno mwaka. Divita dibajinji dya ntanda yonso ne malwa āponene muzo wa muntu byālombwele bukamoni amba bine Yesu wābikikilwe bu Mulopwe mu 1914. (Mateo 24:​3, 7, 8) Kitatyi kityetye kupita’po, kitatyi kyāfikile kya ‘kutyiba mambo kushilwila mu njibo ya Leza,’ Yesu wāfikidije uno mulao padi bandi bana-babwanga bādi balele mu lufu, amba: “Nsa kwiya dikwabo kwimutambwila ko ndi.”​—1 Petelo 4:17; Yoano 14:3.

¹⁹ Bantu 144 000 ba mu kisaka kya ba bitobo abo bonso kebātudilwe kayukeno kamfulo ne kubungakanibwa pamo mu kikalo kyabo kya momwa mūlu. Basheleko ba mubukata mwabo bakidi pano pantanda badi mu Kifuko Kikola, kushintulula ko kunena’mba mu ngikadilo yakumushipiditu. Kudi “kidimbo” kibakalañenye na Kifuko Kikola Nakampata kidi’mo Leza; kino kisandi nansha kijika, i ngitu yabo ya misunya. Shi bafwe na kulama kikōkeji kyabo, bakasangulwa ponka na ponka bu bipangwa bya mushipiditu na būmi bwakubulwa lufu mwanda wa kukelunga ku kipindi kya mu bantu 144 000 boba kebadi kala mūlu.​—1 Kodinda 15:​51-53.

²⁰ Tempelo ya Leza yakumushipiditu imitentekeleko ntumbo mikatampe mine pamwanda wa ba bitobo bavule bengidila pamo na Kitobo Mukatampe momwa mūlu. Mu kitatyi kimo kyonka, basheleko ba mu kisaka kya bitobo, bavuijanga mwingilo wamvubu pano pantanda. Kupityila ku busapudi bwabo, ‘Leza utenkenyanga mizo yonso’ na butyibi bwandi, pamo’nka na mokilombwelwe mu butobo budi mu Hakai 2:7. Mu kitatyi kimo kyonka, midiyo ya batōtyi batelelwe bu “bintu bisaka mutyima bya mizo yonso” benda batwela mu bipango bya tempelo ya Yehova pano panshi. Lelo bano bantu bavuijanga mwingilo’ka mu mpangiko ya Leza ya butōtyi, ne i ntumbo’ka yotwelaija mu mafuku akāya kumeso pamwanda utala tempelo yandi mikatampe yakumushipiditu? Tukabandaula bino bipangujo mu kishinte kilondako.

[Bipangujo]

1. I mpangiko’ka ya buswe yātudileko Leza pamwanda wa muzo wa bantu babubi?

2. I kika kyālongele Yesu pādi na myaka 30 ne mwanda waka?

3. (a) I kika kyāsakile kunena Yesu pa kunena’mba: “Kitapwa ne kyakwela abe kuswele’byo”? (b) I kimfwa’ka kilumbuluke kyāshile Yesu ku boba bonso basaka kwikala bu bandi bana-babwanga?

4. Leza wālombwele muswelo’ka amba wāitabije kitapwa kya Yesu kyāletele na kwipāna?

5. Kilambwilo kyādi mu tempelo wākala, kyādi kifunkila pa kika?

6. (a) I kika kyālongekele kitatyi kyābatyijibwe Yesu? (b) Kitenta kya bu Meshiasa nansha kya bu Kristu kishintulula kika?

7. (a) ‘Pantu Pakola Nakampata’ pāshingilwe māni na Leza mu kitatyi’ka ne kishintulula’ka? (b) I kika kikwabo kyāfikile Yesu kitatyi kyābatyijibwe?

8. Lupona lwa Leza lwa momwa mūlu lwāikele na nshintulwilo’ka impya?

9. (a) Kidimbo kyādi pabukata bwa Kifuko Kikola ne Kifuko Kikola Nakampata, kyādi kifunkila pa kika? (b) I muswelo’ka wāsambukile Yesu bobwa bukila bwa “kisandi” mu tempelo ya Leza yakumushipiditu?

10. (a) I kika kyālongekele pākatudile Yesu mvubu ya kitapwa kyandi kudi Shandi momwa mūlu? (b) Kushingwa māni a kumushipiditu lelo kushintululanga kika ku bana-babwanga ba Yesu?

11, 12. (a) Kipango kya butobo kyādi kifunkila pa kika kudi Yesu, ne kishintulula’ka ku balondi bandi bashingwe-māni? (b) Mema ādi mu nsāni wa kyoilo ādi afunkila pa kika, ne engidijibwanga muswelo’ka?

13, 14. (a) Kifuko Kikola kya tempelo kifunkilanga pa kika kudi Yesu ne ku balondi bandi bashingwe-mani? (b) Kibikwa-binanu kya nsahabu kifunkilanga pa kika?

15. Mukate wādi pa mesa pādi patulwa mikate milombolwe, ufunkilanga pa kika?

16. Mwingilo wa ku kilambwilo kya ensense ufunkila pa kika?

17. I kika kyālongekele mwanda wa kufikidija bupolofeto bufunkila pa kutwela kubajinji kwa kitobo mukatampe mu Kifuko Kikola Nakampata mu Difuku dya Kipwanyo?

18. Yehova wāletele ntumbo itulumukwa ku tempelo yandi yakumushipiditu muswelo’ka?

19. Basheleko ba mu bantu 144 000 bākatwelanga muswelo’ka mu Kifuko Kikola Nakampata kya momwa mūlu?

20. I mwingilo’ka wamvubu uvuijanga basheleko ba mu kisaka kya bitobo mu kino kyetu kitatyi, ne kulupukile bipá’ka?

[Kapango pa paje 24]

Pāshingilwe Yesu māni a mushipiditu sandu mu mwaka wa 29 K.K., tempelo mikatampe ya Leza yakumushipiditu yāshilwile kwingidijibwa

Bipangujo bya Kupituluka’mo

◻ I kimfwa’ka kitulumukwa kyāshile Yesu mu mwaka wa 29 K.K.?

◻ I mpangiko’ka yāshilwile kwingidijibwa mu mwaka wa 29 K.K.?

◻ Kifuko Kikola ne Kifuko Kikola Nakampata bifunkila pa kika?

◻ Tempelo mikatampe yakumushipiditu yāikele na ntumbo muswelo’ka?