“Nkendanga mu Bubine Bobe”

1-3. (a) Le tufwaninwe kumona bubine bwa mu Bible namani? Leta kimfwa. (Tala bifwatulo ku ngalwilo.) (b) Le i bika byotusa kwisambila’po mu kino kishinte?

DYALELO, bantu bavudile kupota kintu kampanda ku mangajini kupwa bakajokeja’kyo. Kadi shi bantu abapote kintu pa Entelenete, basakanga padi’nka kwikyaluja. Padi kintu kyobapotele kekibasangejepo na mobadi bafwatakenya nansha padi abamone’ko kintu kibi. Ebiya bakwata butyibi shi bwa kwikishinta na kintu kikwabo nansha bwa kulomba bebalwije lupeto lwabo.

² Ino batwe ketukalongapo uno muswelo na bubine bwa mu Bible. Shi ‘tubapote’bo’ ketusakengapo nansha dimo ‘kupotoloja’bo’, ko kunena’mba shi tubefunde bubine, ketusakengapo nansha dimo kwibuleka. (Tanga Nkindi 23:23; 1 Temote 2:4) Monka motwefundile’kyo mu kishinte kibadikile, twitūdilanga’ko kitatyi kivule kya kwifunda bubine. Padi twalekele ne kaji kadi ka kwitusokwela lupeto luvule. Kadi, padi twashintyile kipwano kyetu na bakwetu, mulangilo ne bilongwa byetu, nansha kuleka bibidiji ne bilongwa kebisangajapo Yehova. Ino tukulupile amba i kutupu kintu nansha kimo kyotwesuminwe kidi na mvubu pamo bwa madyese otweselwa pa kuyuka bubine.

³ Yesu wāletele kyelekejo kya nsunga wendakana wādi ukimba malungo malumbuluke. Uno muntu paātene dilungo dimo dya bulēme bukatampe, wāpoteje ponka na ponka byonso byaādi nabyo mwanda wa kwidipota. Dino dilungo dyelekeja bubine bwa Bulopwe bwa Leza. Mu uno muswelo, Yesu wālombwele amba bubine i bulēme mpata ku boba bebukimba. (Mateo 13:45, 46) Potwefundile bubine, ko kunena’mba bubine bwa Bulopwe bwa Leza ne bubine bukwabo bonso bulēme bwa mu Bible, netu twaitabije kwisuminwa kintu kyo-kyonso mwanda wa twikale nabo. Shi tumwene nyeke bubine na mvubu, nabya ketukebulekapo nansha dimo. Ino i kya bulanda, mwanda bantu bamo ba Leza balekele kumona bubine na mvubu bafula’nka ne ku kwibuleka. Ketusakengapo nansha dimo kulonga namino! Tufwaninwe kulonda madingi a mu Bible a kunangila “nyeke mu bubine.” (Tanga 3 Yoano 2-4.) Ko kunena’mba tutūlanga bubine pa kifuko kibajinji ne kulombola kino mu mwiendelejo wetu wa mu būmi. Ino le muntu ubwanya ‘kupotoloja’ nansha kuleka bubine namani ne mwanda waka? Le i bika biketukwasha tuleke kulonga kino? Ne tubwanya kusumininwa namani ‘kunangila nyeke mu bubine’?

 4. Mwanda waka bantu bamo ba mu mafuku a Yesu kebānangīlepo nyeke mu bubine?

⁴ Bantu bamo ba mu mafuku a Yesu, bāitabije bubine dibajinji, ino kebānangīle’mopo nyeke. Kimfwa, Yesu pa kupwa kulonga kingelengele ne kudisha kibumbo kikatampe, kino kibumbo kyāmulondele ne bukila bwa Dijiba dya Ngadilea. Ino Yesu wānena kintu kimo kyēbasense, amba: “Shi kemudilepo ngitu ya Mwanā muntu ne kutoma mashi andi, kemudipo na būmi munda mwenu.” Pa kyaba kya kwipangula Yesu ebashintulwile byasaka kunena, ino abo kala’mba: “Uno mwanda usansa; i ani ukokeja kwiwivwana?” Mfulo mfulō, “bandi bana ba bwanga bavule bajokela ku bintu bya kunyuma, baleka ne kwenda nandi monka pamo.”​—Yoano 6:53-66.

5, 6. (a) Mwanda waka bantu bamo i basāsuke mu bubine mu ano etu mafuku? (b) Le muntu ubwanya kubomboka namani ku bubine?

⁵ I kya bulanda, mwanda bantu bamo dyalelo i baleke bubine. Mwanda waka? Bamo bakukele pa mwanda wa mwivwanino mupya wa vese wa mu Bible nansha na binenwa ne bilongwa bya tutu uyukene biyampe. Bakwabo nabo kebasangedilepo muntu ebape madingi a mu Bible, nansha padi bepile myanda na muntu kampanda mu kipwilo. Bangi nabo balondele bufundiji bwa bubela bwa batupondo ne bwa bantu bakwabo betubepela bubela. Buno i bubinga’tu butyetye busāsukila bantu bamo ku kusaka kudi Yehova ne ku kipwilo. (Bahebelu 3:12-14) Bine, byadi bya kwikala biyampe shi bakulupile mudi Yesu pamo bwa Petelo! Binenwa bya Yesu pobyāsense bantu bamo mu kibumbo, Yesu wāipangwile batumibwa bandi shi nabo basaka kumushiya. Petelo wālondolola’mba: “A Mfumwetu, le twenda kudi ani? Abe udi na binenwa bya būmi bwa nyeke.”​—Yoano 6:67-69.

⁶ Bakwabo babombokanga bityetye ku bubine, padi ne kujingulula kwine mpika. Muntu ubomboka bityebitye ku bubine, udi pamo bwa bwato bushunuka bityebitye ku mbadi ya munonga. Bible witudyumuna tutadije “kutyina’mba twakēja.” (Bahebelu 2:1) Divule dine muntu ubomboka ku bubine keyukangapo. Ino ulekanga kipwano kyandi na Yehova kyenda kizoza, ebiya mwenda mafuku kyajimina. Le i bika biketukwasha tuleke kufikilwa na kino?

 7. Le i bika biketukwasha tuleke kupotoloja bubine?

⁷ Pa kunangila nyeke mu bubine, tufwaninwe kwitabija bintu byonso binena Yehova ne kwibikōkela. Tufwaninwe kumona bubine bu kintu kya mvubu mpata mu būmi bwetu, ne kulonda misoñanya ya mu Bible mu bintu byonso byotulonga. Mulopwe Davida wālaile Yehova mu milombelo amba: “Nkendanga mu bubine bobe.” (Ñimbo ya Mitōto 86:11) Davida wādi usumininwe kwenda nyeke mu bubine, netu tufwaninwe kusumininwa uno muswelo. Shi bitupu, tubwanya kushilula kulangulukila pa bintu byotwalekele pa mwanda wa bubine, enka ne kusaka kwaluja’ko bimo. Inoko ketubwanyapo kwitongela bubine bwa mu Bible bwa kwitabija ne bwa kupumpunya. Tufwaninwe kunangila mu “bubine bonso.” (Yoano 16:13) Mu kishinte kibajinji, twesambīle pa bintu bitano byotwesuminwe pa mwanda wa kwifunda bubine ne kwibwingidija. Pano tusa kumona mwa kulongela pa kuleka kujokela ku bino bintu byotwashile kunyuma.​—Mateo 6:19.

 8. Le muswelo wingidija mwine Kidishitu kitatyi kyandi ubwanya namani kumulengeja asāsuke mu bubine? Leta kimfwa.

⁸ Kitatyi. Pa kuleka kusāsuka mu bubine, tufwaninwe kwingidija nyeke kitatyi kyetu na tunangu. Shi ketutadijepo, tubwanya kupityija kitatyi kivule mu kwipwija mukose, mu makayo, kukimba bintu pa Entelenete, nansha kutala televijo. Nansha shi bino bintu kebimwekapo bu bibi, bibwanya kwitusela kitatyi kya kwifunda ne kwenda mu busapudi. Kino kyo kyafikīle ne Emma.a (Tala kunshi kwa dyani.) Paadi ukidi mwanuke, wadi usenswe kwenda na tubalwe kitatyi kyonso kyasaka. Ino washilula kwitopeka pa kitatyi kyaadi ujimija mu ano makayo, ebiya wakwata butyibi bwa kushinta bintu bya kutangidija kumeso. Kadi Emma waboile ñeni ku bintu byatene Cory Wells, kaka umo wadi na kibidiji kya kwenda na tubalwe mu bitatyi bya kwipwija mukose.b (Tala kunshi kwa dyani.) Pano Emma upityijanga kitatyi kivule mu mwingilo wa Yehova, kadi udi na kitatyi kivule kya kushikata na kisaka ne balunda nandi bengidila Leza. Pano umwene amba udi pabwipi na Leza kadi i musangale pa kuyuka’mba wingidijanga kitatyi kyandi na tunangu.

 9. Le bintu bya ku ngitu bibwanya kwikala namani na mvubu mpata kotudi?

⁹ Bintu bya ku ngitu. Pa kunangila nyeke mu bubine, ketufwaninwepo kumona bintu bya ku ngitu bu bidi na mvubu kutabuka. Potwefundile bubine, twajingulwile amba kwingidila Yehova kudi na mvubu mpata kutabuka bintu bya ku ngitu, kadi twasangedile kwisuminwa bintu bimo pa mwanda wa bubine. Ino kitatyi pokyenda kipita, tubwanya kumona bakwetu bapota bingidilwa bya busendwe bya panopano nansha kwikala na bintu bikwabo bibwanya kupotwa na lupeto. Tubwanya kushilula kulanga’mba kudi byotwabulwa. Tubwanya’nka ne kuleka kusangela byobya byotudi nabyo, twashilula kuta mutyima bininge ku kukimba bintu bya ku ngitu pa kyaba kya kwingidila Yehova. Kino kituvuluja byobya byāfikīle Demasa. Wāsenswe bininge “ino ngikadilo ya bintu,” penepa wāleka mwingilo obādi bengila na mutumibwa Polo. (2 Temote 4:10) Padi Demasa wāsenswe bininge bintu bya ku ngitu kupita’ko kusanswa kwingidila Leza. Nansha padi kādipo ukisaka kwipāna mwanda wa kwingila na Polo. Le i ñeni’ka yotuboila’ko? Padi twadi tusenswe bininge bintu bya ku ngitu pa kala. Shi ketutadijepo, buno buswe bubwanya kutama bininge monka motudi, twafula’nka ne ku kujimija buswe botuswele bubine.

10. Le i lupusa’ka lotufwaninwe kukomena?

¹⁰ Kipwano kyetu na bakwetu. Pa kunangila nyeke mu bubine, ketufwaninwepo kuleka bantu kebengidilapo Yehova bekale na lupusa potudi. Potwefundile bubine, kipwano kyetu na balunda ne bantu ba mu kisaka ke Batumonipo kyashintyile. Padi bamo badi balēmekele nkulupilo yetu mipya, ino bakwabo nabo betulwa. (1 Petelo 4:4) Na bubine, tuloñanga bukomo bwa kwikala biyampe na bantu ba mu kyetu kisaka ne kwibalombola kanye. Inoko ketufwaninwepo kupumpunya misoñanya ya Yehova mwanda wa kwibasangaja. Kadi enka motwifundila’kyo mu 1 Kodinda 15:33, balunda netu bafwaninwe kwikala bantu basenswe Yehova.

11. Le i muswelo’ka otubwanya kuleka milangwe ne bilongwa bya disubi?

¹¹ Milangwe ne bilongwa bya disubi. Pa kunangila mu bubine, tufwaninwe kwikala bajila, nansha bampikwa disubi, mungya mumweno wa Yehova. (Isaya 35:8; tanga 1 Petelo 1:14-16.) Potwefundile bubine, twashintyile būmi bwetu mwanda wa kulonda misoñanya ya mu Bible. Bamo bashintyile bya binebine. Inoko tukifwaninwe kutadija kutyina’mba twakashinta būmi bwetu bwampikwa disubi na būmi bwa disubi. Le i bika bibwanya kwitukwasha tukomene ditompo dyo-dyonso dya kulonga kintu kibi? I kulangulukila pa byobya bitupele Yehova mwanda wa twikale bajila. Wētupele būmi bulēme bwa wandi Mwana wasenswe, Yesu Kidishitu! (1 Petelo 1:18, 19) Pa kusaka’mba twikale nyeke bampikwa disubi ku meso a Yehova, tufwaninwe kuvuluka nyeke bulēme bwa kitapwa kya kinkūlwa kya Yesu.

12, 13. (a) Mwanda waka tufwaninwe kumona mafetyi na mwiamwena Yehova? (b) Le i bika byotusa kwisambila’po?

¹² Bibidiji ne bilongwa kebisangajapo Leza. Bantu ba mu kisaka, botwingilanga nabo, ne bakwetu ba ku masomo babwanya kwituningila tukatanwe ku mafetyi abo. Le i bika bibwanya kwitukwasha tukomene kuningilwa kwa kutanwa ku bibidiji ne mafetyi keasangajapo Yehova? Tufwaninwe kuvuluka nyeke bubinga bwine kebwitabijijepo Yehova ano mafetyi. Tubwanya kukimba mu mabuku etu ne kuvuluka muswelo wāshilwile mafetyi amoamo. Shi tulangulukila pa bubinga bwa mu Bisonekwa boketufetelangapo ano mafetyi, tukakulupila’mba tunangilanga mu dishinda ‘ditabijibwe na Mfumwetu.’ (Efisesa 5:10) Shi tukulupile mudi Yehova ne Kinenwa kyandi, ketukatyinapo bilanga bantu.​—Nkindi 29:25.

¹³ Tukulupile kunangila mu bubine nyeke ne nyeke. Le i bika bibwanya kwitukwasha tusumininwe bininge kunangila nyeke mu bubine? Twisambilei pa bintu bisatu byotubwanya kulonga.

14. (a) Le kwifunda nyeke Bible kuketukwasha namani tusumininwe kuleka kushiya bubine? (b) Mwanda waka tusakilwa tunangu, bulemununi ne ñeni?

¹⁴ Kibajinji, wifunde nyeke Bible ne kulangulukila bininge pa byobya byowifunda. Witūdile’ko kyaba kyonso kitatyi kya kwifunda. Poenda wifunda, ukasanswa bininge bubine kadi ukasumininwa kuleka kwibushiya nansha dimo. Nkindi 23:23 witunena ‘tupote bubine’ ne kupota “tunangu ne bulemununi ne ñeni.” Kuyuka’tu bubine bwa mu Bible kekubwenepo. Tufwaninwe ne kwibwingidija mu bwetu būmi. Shi tubaikala na kwivwanija, tutyañanga bintu byotwifunda na bintu byotuyukile kala. Tunangu twitutononanga tulonge kintu pa byobya byotuyukile. Kyaba kimo bubine bwitulemununanga na kwitulombola bintu byotufwaninwe kushinta. Tufwaninwe kwitabija bukidi bonka buno bulemununi, bwine bunena Bible amba i bulēme mpata kutabuka ndalama.—Nkindi 8:10.

15. Le bubine bwitukiñanga namani pamo bwa mukaba?

¹⁵ Kya bubidi, sumininwa kwingidija bubine mu būmi bobe bwa difuku ne difuku. Bible udingakanya bubine na mukaba wa sola. (Efisesa 6:14) Mu bitatyi byāsonekelwe Bible, mukaba wādi ukwasha sola ne kumukinga mu bulwi shi i mwikute’o. Mwanda shi ubazela, kewādipo ubwanya kumukwasha. Le bubine bwitukiñanga namani pamo bwa mukaba? Shi bubine bwa mu Bible bwikale pabwipi netu kitatyi kyonso, buketukinga ku mulangilo mubi kadi buketukwasha tukwate butyibi buyampe. Kitatyi kyotutanwa na makambakano makomo nansha kwikala pa ditompo dya kulonga kintu kibi, bubine bwa mu Bible buketukwasha tusumininwe bininge kulonga kyokya kyoloke. Sola byakādipo ubwanya kwenda ku bulwi pampikwa mukaba wandi, netu ketufwaninwepo nansha dimo kuleka bubine. Tufwaninwe kujingulula shi twingidijanga bubine bwa mu Bible mu būmi bwetu bonso. Sola wādi usomeka ne kipete mu mukaba wandi. Tutalei netu muswelo otubwanya kulonga namino.

16. Le kufundija bubine kwitukwashanga namani tunangile nyeke mu bubine?

¹⁶ Kya busatu, fundija bakwenu bubine bwa mu Bible ponso pobwanya. Bible i mudingakanibwe na kipete. Monka mwādi mukwatyijija sola muyampe kipete kyandi, netu tufwaninwe kukwatyija nyeke Kinenwa kya Leza. (Efisesa 6:17) Batwe bonso tubwanya kwikala bafundiji bayampe, bengidija “kinenwa kya bubine mobifwaninwe.” (2 Temote 2:15) Kitatyi kyotwingidija Bible potufundija bakwetu, tuyukanga bubine ne kwibusanswa bininge. Kadi tusumininwanga bininge kunangila nyeke mu bubine.

17. Mwanda waka bubine i bulēme kodi?

¹⁷ Bubine i kyabuntu kilēme kitupele Yehova. Bwitukwashanga tupwane bininge na Tata wetu wa mūlu. Kino kyo kintu kya mvubu mpata kyotudi nakyo. Yehova ke mwitufundije bintu bivule, inoko i ku ngalwilo’tu! I mwitulaye kwitufundija nyeke ne nyeke. Nanshi, sanswa bubine monka mobwanya kusanshilwa dilungo dya bulēme. ‘Pota nyeke bubine, kokapotoloja’bo.’ Nabya, pamo bwa Davida, ukalama uno mulao kudi Yehova amba: “Nkendanga mu bubine bobe.”​—Ñimbo ya Mitōto 86:11.