Bipangujo bya Batangi

I kika kilengeja “bintu bisaka mityima bya mizo yonso” bīye ku “njibo” ya mutōtelo wa bine?—Hakai 2:7.

Yehova wālaile kupityila kudi mupolofeto Hakai amba: “Nkatenkenya mizo yonsololo, ne bintu bisaka mityima bya mizo yonso bikāyanga; penepo nkayuja ino njibo ino’i ne ntumbo.” (Hakai 2:7) Le i kutenkanibwa kwa “mizo yonsololo” kulengeje “bintu bisaka mityima bya mizo”—bantu ba mityima miyampe—betabije mutōtelo wa bine? Ke amopo.

Ivwana bidi bine bitenkanya nansha kuzakaja mizo ne kuno kuzakaja i kulengeje bika. Bible unena’mba “mizo ne mizo [ibunga] kūmana, ne bantu na bantu bafwatakanya kintu kya bitupu bitupu.” (Mitōto 2:1) “Kintu kya bitupu bitupu” ‘kyobafwatakanya’ i kufwila kobafwila kwendeleja bubikadi bwabo. I kutupu kintu kikwabo kibatenkenya, poso kyaka kikimba kulwa na bubikadi bwabo.

Busapudi bwa Bulopwe bwa Leza bubikele, busapulwa ntanda yonso na Batumoni ba Yehova, kyo kyaka kine kitenkanya mizo. Ne kadi, Bulopwe bwa Leza bupelwe Meshiasa, ke Yesu Kidishitu kadi, bo “bukatyumuna bipindibipindi ne kukubija malopwe ano’a onsololo” abikelwe na bantu. (Danyele 2:44) Musapu wa kidye ubadilwa mu mwingilo wetu wa busapudi uzakajanga mizo. (Isaya 61:2) Kadi kuno kutenkanya kwendanga kwituntwila’ko penda panana mwingilo wa busapudi ne kusambakana’o koku ne koku. Penepa kutenkanibwa kulailwe mu Hakai 2:7 kwelekeja bika?

Tutanga mu Hakai 2:6 amba: “E mwanenena Yehova wa bibumbo namino amba: Musungu mukwabo kukidi kakitatyi katyetye, kabidi ami nkatenkenya madiulu, ne panshi, ne kalunga-kamema, ne ntanda myumu mine.” Mutumibwa Polo wāpitulukile mu uno vese, wāsoneka’mba: “Ino pano walá, amba: Nkatenkanyanga dimo dikwabo kadi keīkidi ntanda yonka, kete, mhm, ke ne diulu dīne kumo. Kadi pa uno mwanda wa kunenwa’mba, dimo dikwabo, ufunkila pa kufundulwa kwa byobya bintu byakutenkana, ke byonka byakupangibwa kadi, amba byobya byampikwa kutenkana bishale ponka.” (Bahebelu 12:26, 27) Bine, ngikadilo yonso ya bintu idi’ko dyalelo isa kutenkana pa konakanibwa’yo ne kushila kyaba ntanda impya ilongele Leza.

Kintu kilengeja bantu ba mityima miyampe bāye ku mutōtelo wa bine ke kutenkanibwapo kwa mizo nansha kuzakajibwa kwayo. Ino kine kibakokela kudi Yehova ne ku mutōtelo wandi i kyonka kyokya kilengeja mizo itenkanibwe nansha kuzakala, ke busapudi bwa Bulopwe bwa Leza bupwile kala kubikala kadi. Kusapulwa kwa “myanda-miyampe ya nyeke” kadi ya nsangaji ko kulengeja bantu badi mu ngikadilo mifwaninwe bāye ku mutōtelo wa bine wa Leza.—Kusokwelwa 14:6, 7.

Musapu wa Bulopwe i musapu wa kidye kadi wa lupandilo. (Isaya 61:1, 2) O mwanda uno musapu usapulwa ntanda yonso i mulengeje bintu bibidi kyaba kimo: kutenkanibwa kwa mizo ne kwiya kwa bintu bisaka mityima bya mizo ku ntumbo ya Yehova.