“Tuningidile Kutámo Mutyima”

“Po pene pa mwanda ne mwanda pano o kitufwaninwe tuningidile kutámo mutyima mu bintu byo twaivwene pa kutyina’mba twakēja.”—BAHEBELU 2:1.

 1. Lombola kilabi mokikokejeja kuleta musala.

MAAKISHIDA a myotoka atukijanga kubwipi kwa myuya 37 000 mwaka ne mwaka mu États-Unis’tu kete. Bashayuka banena amba ino mfu mivule yadi ibwanya kwepukwa shi bashofele badi bata mutyima mpata pobendeja mu dishinda. Bendeji bamo balabikwanga na biyukeno ne bilami bya kusumbija bintu bikalanga kwishinda nansha na mīsambo ya ku matelesele. Bakwabo nabo bepānanga mu bitelwa bu mpao ya mu lwendo—yobadyanga koku bendeja. Mu ino myanda yonso, kilabi kikokeja kuleta musala.

2, 3. Le i kidyumu’ka kyādyumwinwe bene Kidishitu Bahebelu na Polo, ne i kika kinenenwa amba ādi madingi mafwaninwe?

² Kubwipi kwa myaka 2 000 kumeso kwa motoka kupungwa, mutumibwa Polo wātelele kilabi kimo kyādi kileta musala ku bene Kidishitu Bahebelu bamobamo. Wānena ukoma amba Yesu Kidishitu musanguke upelwe kitenta kitabukile kya bamwikeulu bonso, mwanda ushikete ku kuboko kwa lundyo kwa Leza. Kupwa mutumibwa wānena’mba: “Po pene pa mwanda ne mwanda pano o kitufwaninwe tuningidile kutámo mutyima mu bintu byo twaivwene pa kutyina’mba twakēja.”—Bahebelu 2:1.

³ Mwanda waka bene Kidishitu Bahebelu bādi bafwaninwe ‘kuningidila kuta mutyima mu bintu byobāivwene’ padi Yesu? Mwanda pādi ke papite kintu kya myaka 30 mituntulu kasha Yesu utaluka pano pa ntanda. Bene Kidishitu Bahebelu bamo, pa kumona Mfumwabo kakidi’po, bāshilwile kweja mu lwitabijo lwabine. Bādi kebalabikwa na mutōtelo wabo wa kala wa bwine Yuda.

Bādi Bafwaninwe Kuta’ko Mutyima Mpata

 4. Mwanda waka bene Kidishitu Bahebelu bamo bādi padi kebadi na mutyima wa kujokela ku mutōtelo wa bwine Yuda?

⁴ Mwanda waka mwine Kidishitu wādi ubwanya kwikala na mutyima wa kujokela ku mutōtelo wa bwine Yuda? Mwanda mutōtelo wa mu Bijila wādi wimanine pa bintu bimweka na meso. Bantu bādi bamona babitobo, bevwana ne kinīngu kya bitapwa byādi bisokwa. Ino bwine Kidishitu abo bwādi bwishile mu bintu kampanda. Bene Kidishitu nabo bādi na Kitobo Mukatampe, Yesu Kidishitu, ino pādi ke papite myaka makumi asatu kutupu kumweka’ye pano pa ntanda. (Bahebelu 4:14) Bādi na tempelo, ino kifuko kyayo kikola kikele mūlu. (Bahebelu 9:24) Disao dya bene Kidishitu dyādi ‘dya ku mutyima mungya mushipiditu,’ dishile na disao dya ku ngitu dya mu Bijila. (Loma 2:29) O mwanda, ku bene Kidishitu Bahebelu, bwine Kidishitu bwādi padi ke bumweka bu kintu kya mu luvula bitupu.

 5. Polo wālombwele namani amba mutōtelo wāshimikilwe na Yesu wādi upityile kulampe kwine owa wa kulonda Mukanda wa Bijila?

⁵ Bene Kidishitu Bahebelu bādi bafwaninwe kuyuka kintu kimo kya mvubu mikatampe kitala pa mutōtelo wāshimikilwe na Kidishitu. I kino: wādi wimanine pa lwitabijo, ke pa kumonapo, mhm; ino ao wādi upityile kulampe Bijila byāletelwe kupityila kudi mupolofeto Mosesa. Polo wāsonekele amba: “Shi mashi a bambuji balume ne a bañombe balume ne buto bwa ñombe mukaji byakushilwe bantu basubile, ebasubula ku ngitu, lelo penepa mashi a Kidishitu nao ke pepi? Aye wepene aye mwine kudi Leza, konka ku [mushipiditu] wa nyeke, ne kabulema kene mpika, po pene ao akakendelela tu bilongwa bibibibi bya mityima yetu, amba twingidile Leza mumi.” (Bahebelu 9:13, 14, MB) Bine, mu bintu bivule, kulekelwa kwa bubi pa lwitabijo mu kitapwa kya kinkūlwa kya Yesu Kidishitu i kupite kulampe kwine kokwa kwādi kuleta bitapwa byādi byelwa mungya Bijila.—Bahebelu 7:26-28.

6, 7. (a) I bika byālengeje bene Kidishitu Bahebelu basakilwe mutyima wa kampeja-bukidi wa ‘kuningidila kuta mutyima ku bintu byobāivwene’? (b) I myaka inga yādi ishadile’ko Yelusalema kitatyi kyātumine Polo mukanda wandi kudi Bahebelu? (Tala kunshi kwa dyani.)

⁶ Kudi buluji bukwabo bwādi bufwaninwe bene Kidishitu Bahebelu kutela mutyima bininge ku bintu bitala padi Yesu byobāivwene. Yesu wālaile amba Yelusalema ukonakanibwa. Amba: “Myaka īkakufikilako, kadi bakuk[u]shikwa bakakukolela mu mpembwe bakakujokoloke, ne ku mitamba yonso bakakujikile monka. Ebiya bakakusala ne bāna bobe bōdi nabo monka, kadi kebakakulekela nansha dibwe ditentakene ku dibwe dikwabo, mwanda kwayūkile mwaka wa kupempulwa kobe.”—Luka 19:43, 44.

⁷ Le i mwaka’ka wādi wa kufikidila kino? Yesu kātelelepo difuku nansha nsaa mine. Ino wāletele uno musoñanya’mba: “Po mukamonapo ku Yelusalema vita, ibajokoloka konso konso, po pakuyūka’mba, musala wakyo ubafwena. Penepo ba mu Yudea bakanyemene ku ngulu, ne badi mubukata bafundukemo, ne ba mu masokeja a tubibundi kebakatwelamopo, mhm.” (Luka 21:20, 21) Ino bene Kidishitu bamo ba mu Yelusalema bājimije mutyima wabo wa kampeja-bukidi, balabikwa, mwanda pādi ke papite myaka 30 mituntulu kasha Yesu unena bino binenwa. Bākupwila meso kungi kutala mu dishinda mpika. Bine, shi kebāsendulwilepo mulangilo wabo, musala wādi wa kwibafikila. Eyo, nansha bekale bālongele shi namani shi namani, bonakani bwa Yelusalema abo bwādi kebudi mu bisuku!a Na bya dyese, madingi a Polo āikala pamo bwa mazolo a ku lubanga, alangula bene Kidishitu ba mu Yelusalema bādi bakunuka ku mushipiditu.

“Tuningidile Kutámo Mutyima” mu Ano Mafuku

 8. Mwanda waka netu tufwaninwe ‘kuningidila kuta mutyima’ ku bubinebine bwa mu Kinenwa kya Leza?

⁸ Netu tufwaninwe ‘kuningidila kuta mutyima’ ku bubinebine bwa mu Kinenwa kya Leza pamo bwa bene Kidishitu ba mu myaka katwa kabajinji. Mwanda waka? Mwanda netu tutengele bonakani bufwena’nka kufwena, ke enkapo bwa muzo umo kete, ino i bwa ngikadilo yonso ya bintu. (Kusokwelwa 11:18; 16:14, 16) Eyo, ketuyukilepo shetu difuku ne nsaa minemine ikafikidija’bo Yehova. (Mateo 24:36) Inoko twimwenanga kufikidila kwa bupolofeto bwa Bible bulombola patōkelela amba tudi mu ‘mafuku a mfulo.’ (2 Temote 3:1-5) O mwanda tufwaninwe kwijiba ku kintu kyo-kyonso kisaka kwitulabika. Tufwaninwe kuta mutyima ku Kinenwa kya Leza ne kulama mutyima wetu wa kampeja-bukidi. Wivwane tulonge namino, “[t]ukafwaninwa kupanda ku byobya bisa kufika.”—Luka 21:36.