Nansha Ke Mu Byakutompibwa, Lamatai Pototo Ku Lwitabijo Lwenu!

“Bānwe bāna betu, po muponena mu byakutompibwa mwibitela bu-bya tusepo tonka.”​—YAKOBA 1:⁠2.

BANTU ba Yehova i Batumoni bandi bengila, batūdile lwitabijo mudi aye, badi ne “nsangaji shē.” (Kupituluka 28:​47; Isaya 43:10) Bamwingidilanga nansha byobatanwa na byakutompibwatompibwa. Nansha byobekondanga na bikoleja, ino baseñwanga na bino binenwa: “Bānwe bāna betu, po muponena mu byakutompibwa mwibitela bu-bya tusepo tonka; pa kuyūka’mba kutompibwa kwa kwitabija kwenu kuleta kutūkija mutyima [kūminina, NW].”​—Yakoba 1:​2, 3.

² Bino binenwa byāsonekelwe kubwipi kwa mwaka wa 62 K.K. na mwanā-bwanga Yakoba, mwanabo na Yesu Kidishitu wa munda mwa inandi. (Mako 6:⁠3) Yakoba wādi mukulumpe pa kipwilo kya mu Yelusalema. I bine, aye, ne Kefasa (Petelo), ne Yoano bādi “bakulupilwe’nka bwa bipanda”​—bipose, bikomo bishimikwe nkenkenke, bikwete kipwilo. (Ngalatea 2:⁠9, MB) Kitatyi kyātūdilwe mwanda wa disao ku meso a “batumibwa ne bakulumpe” kubwipi kwa mwaka wa 49 K.K., Yakoba wāletele mulangwe wimanine pa Bisonekwa wāikele kwitabijibwa na kitango kyendeji kya mu myaka katwa imbajinji.​—Bilongwa 15:​6-29.

³ Yakoba wādi mukumbi wa kumushipiditu wa kilelo, ‘muyuke mwikadile luombe.’ (Nkindi 27:23) Wādi uyukile amba mu kine kitatyi’kya, bene Kidishitu bādi balwa byamwiko na byakutompibwa. Milangwe ya bamobamo yādi ikimba kulemununwa, mwanda bādi belela bampeta kunyuma. Bavule, mutōtelo wabo wādi ke wa kuvuija mbila bitupu. Bamobamo bādi batapa bakwabo ku mityima na ndimi yabo ya bunenenene. Mushipiditu wa bwine ntanda wādi ke mutwele’mo bibibibi, bavule bādi ke bajimije kitūkijetyima ne mushipiditu wa kwipāna. Bene Kidishitu bamobamo bādi ke baponenwe na misongo ya kumushipiditu. Mukanda wa Yakoba ulombola ino myanda mu muswelo ūbaka, madingi andi akidi mafike’po ne dyalelo, pamo’nka na moādi ekadile mu myaka katwa imbajinji K.K. Shi tubandaule uno mukanda pamo bwa ao witusonekelwe batwe, i bine umo ne umo umbukata mwetu kakabulwepo kumwena’mo kamweno kakatampe.a

Kitatyi Kyotufikilwanga na Byakutompibwa

⁴ Yakoba witulombola muswelo otufwaninwe kumona byakutompibwa. (Yakoba 1:​1-4) Aye ketelelepo bu mwanabo na Mwanā Leza, ehe, ino witela na kwityepeja bu “umpika wa Leza ne wa Mfumwetu Yesu Kidishitu.” Yakoba i musonekele “bisaka dikumi ne bibidi” bya Isalela wa kumushipiditu “byapalakanibwe konso,” nakampata pa mwanda wa kupangwapangwa. (Bilongwa 8:1; 11:19; Ngalatea 6:16; 1 Petelo 1:⁠1) Ne batwe netu monka na monka, tupañwangapañwanga, kadi tutanwanga na “byakutompibwa” bishileshile, mwanda tudi bene Kidishitu. Ino shi tuvuluke amba kunekenya byakutompibwa kukomejanga lwitabijo lwetu, nankyo kubapu, nansha bibetufikila, i bine tukebimona “bu-bya tusepo tonka.” Ne kadi shi tulame bululame bwetu kudi Leza mu byakutompibwa, tukekala na būmi bwa nsangaji yanyeke ne nyeke.

⁵ Mu byakutompibwa bitufikilanga mubadilwa ne bikambija bitananga bantu bonso. Kimfwa, tubwanya kūbikwa na bya misongo misongo. Leza kakyundapangapo bantu mu kingelengele dyalelo, ino ulondololanga ku milombelo yetu yotulomba’mo tunangu ne bukomo bya kwitukwasha pa kulwa na misongo. (Mitōto 41:​1-3) Kadi tususulwanga pa mwanda wa boloke, kino kyo kitwityilanga ne bantu bu babo Batumoni ba Yehova bapangwapangwa. (2 Temote 3:​12; 1 Petelo 3:14) Ino shi tubabwanya kūminina byakutompibwa, kubapu, lwitabijo lwetu lwikalanga ke lupimwe, lupwe “kutompibwa” bukomo bwalo. Kuno kunekenya kwa lwitabijo lwetu ko kubutulanga ‘kūminina.’ Lwitabijo lukomejibwe na byakutompibwatompibwa luketupanga bukomo bwa kukominina ne matompo akāya kumeso mene.

⁶ ‘Ino,’ uno ye Yakoba unena, ‘lekai kūminina kufikidije mwingilo wako.’ Wivwane tuleke kyakutompibwa kampanda kyendelela pakubulwa kukimba kukalakanya’kyo na kiyumbye, na mulongelo kampanda wakubulwa kukwatañana na Bisonekwa, i bine kūminina kwetu kukengila ‘mwingilo’ wako wa kwitwikadija bene Kidishitu bakunkane, ke bu bakubulwapo lwitabijo, mhm. I byabine, shi kyakutompibwa kibasokwela bukōkekōke bwetu kampanda patōka, tufwaninwe kukimba bukwashi bwa Yehova, ye wa kwitupa bukomo bwa kwibunekenya. Lelo kikekala namani shi kino kyakutompibwa kitutonwena ku busekese bwa munyanji? Tufwaninwe kulombela pa uno mwanda ne kulongela monka mwendele milombelo yetu. Kekubulwe padi kitulomba kushinta kifuko kya mingilo yetu, nansha kutabwila’ko matabula makwabo mwanda wa kulama bululame bwetu ku meso a Leza.​—Ngalwilo 39:​7-9; 1 Kodinda 10:⁠13.

Kulomba Tunangu

⁷ Yakoba i mwitulombole kya kulonga shi ketuyukilepo muswelo wa kulwa na kyakutompibwa kitufikila. (Yakoba 1:​5-8) Yehova kaketutopekapo pa mwanda wa kubulwa tunangu nansha wa kulombela kotulombela na lwitabijo amba etupe’to. Ino uketupa bukomo bwa kulama mumweno moloke pa byakutompibwa bitufikila, ne bwa kūminina’byo. Kepabulwe padi tukokeja kwivwana batela Bisonekwa binenena potudi kudi balunda netu mu lwitabijo ku kupwila nansha kitatyi kya kifundwa kya Bible. Pakwabo kadi, Leza ukokeja kulongolola myanda senene mwanda wa tumone kyotufwaninwe kulonga’po. Tukokeja kuludikwa ne na mushipiditu wa Leza. (Luka 11:13) Ino kunena na bubine, pa kusaka amba tuloelelwe bino byabuyabuya byonso, kitusakila kulamata mbū kudi Leza ne ku bantu bandi.​—Nkindi 18:⁠1.

⁸ Yehova witupanga tunangu twa kuyuka mwa kunekenyenya byakutompibwa enka poso twendelela na kulomba “ne kwitabija [lwitabijo, NW] ponka, kulangalanga mpika.” Mwanda muntu ulangalanga “i pamo ponka bwa dintanki dya pa dijiba ditwalwa na luvula ne kusunkanibwa” pakubulwa kulaya. Ekale twi bantu basunkanibwa kumushipiditu, bine ‘ketufwaninwepo kukulupila’mba tukatambula kintu kampanda kudi Yehova.’ Ketukikalai “na mityima ībidi,” “ya kulangalanga” kitatyi kyotulombela milombelo nansha mu mashinda makwabo. Ino tushimatyijei lwitabijo lwetu mudi Yehova, Nsulo ya tunangu.​—Nkindi 3:​5, 6.

Bampeta ne Balanda Bakokeja Kusepelela

⁹ Nansha shi bulanda kyo kyakutompibwa kituyeja, ino tuvulukei nyeke amba bene Kidishitu, bekale bampeta nansha balanda, abo bonso bakokeja kusepelela. (Yakoba 1:​9-11) Bene Kidishitu bashingwe-māni bavule, kumeso kwa kwikala’bo balondi ba Yesu, kebādipo na bituntwa bya kungitu bivulevule, ehe, ino bādi tupwaipwai tufutululwa na ino ntanda. (1 Kodinda 1:26) Ino abo bādi basepelela, mwanda bāikele “kulemekwa” pa kupebwa kyepelo kya bu bampyana ba Bulopwe. (Loma 8:​16, 17) Ino bakwabo nabo, bādi bampeta balēmekwa pa kala, pano ke balondi ba Kidishitu ‘bapelulwa,’ bapunikwapunikwa na ino ntanda. (Yoano 7:​47-52; 12:​42, 43) Ino byotudi bengidi ba Yehova, batwe bonso tukokeja kusepelela, mwanda bupeta bwa ino ntanda ne bitenta kebidipo na mvubu shi twibidingakanye na bupeta bwa kumushipiditu botudi nabo. Kadi bine tufwijanga’ko Leza mpata, mwanda umbukata mwetu kemudipo kyepelo nansha kimo kya kwianinya amba kyoki kyo kitenta kipityile kyokya!​—Nkindi 10:​22; Bilongwa 10:34, 35.

¹⁰ Yakoba witukwasha tumone amba, būmi bwetu kebwimaninepo pa bupeta nansha pa kubwina kufwila ino ntanda. Buya bwa diluba kebubwanyangapo kwidyepeja ku “luvula lwa kyanga” kya dyuba amba dileke kufumba, ne bupeta bwa mpeta nabo mo monka, i bwa lupito, kebudipo na kiluji kikokeja kutuntwila mafuku ku būmi bwandi. (Mitōto 49:​6-9; Mateo 6:27) Ubwanya’nka ne kufwila mwaenda ulondalonda “mashinda andi,” kutadije wafwila’nka mu byabusunga’mwa. Nanshi, kintu kine kidi na mvubu i kwikala ‘mpeta kudi Leza’ ne kulonga byonso byotukokeja kulonga mwanda wa kwendeja kamweno ka Bulopwe kumeso.​—Luka 12:​13-21; Mateo 6:33; 1 Temote 6:​17-19.

Katōkwe Kabo Boba Bominina Byakutompibwa

¹¹ Twikale bampeta nansha balanda, tukokeja kwikala ba katōkwe enka poso shi tūmininanga byakutompibwa bitufikila. (Yakoba 1:​12-15) Wivwane tūminine byakutompibwa na kulama lwitabijo lwetu lukunkane, tukatelwa bu ba katōkwe, mwanda mu kulonga byoloke ku meso a Leza mo mutambanga nsangaji. Bene Kidishitu babutulwe kumushipiditu balamatanga pototo ku lwitabijo lwabo kufika ne ku lufu, bo batambulanga “kilukwa kya būmi,” kushintulula ko kunena amba, kubulwa kufwa momwa mūlu. (Kusokwelwa 2:10; 1 Kodinda 15:50) Wivwane tudi na lukulupilo lwa kukekala pano pantanda, ne shi tulamine lwitabijo lwetu mudi Leza binebine, nankyo kintu kikwabo kyetushadila’ko i kubambila meso ku būmi bwanyeke bukekalwa nabo mu paladisa pano pantanda. (Luka 23:43; Loma 6:23) Bine, Yehova i muyampe mpata ku boba bonso baloeja lwitabijo mudi aye!

¹² Lelo bibwanika Yehova mwine ekale kwitutompa na kwitukolomwena bikambija? Mhm, kebibwanikapo, o mwanda netu ketufwaninwepo kunena’mba: “Natompibwa na Leza.” Yehova ketutonwenangapo ku kulonga bubi, mhm, ino shi twikale nyeke bominine mu lwitabijo, nandi kakabulwepo kwitukwasha ne kwitupa bukomo bwa kunekenya nabo byakutompibwa bitufikilafikila. (Fidipai 4:13) Leza i ukola, o mwanda ketutūlangapo mu ngikadilo ikokeja kuzozeja bukomo bwetu bwa kwilama ku kulonga bibi. Shi twikuja batwe bene mu ngikadilo ya bya disubi nansha kulonga bubi kampanda, ketufwaninwepo kumutopeka, “ke-muntu Leza kayūkilepo kutompibwa ne bubi, ne aye mwine mo monka katompangapo muntu, mhm.” Yehova ukokeja shandi kuleka bitompibwa bitufikila mwanda wa kwitulemununa tumwene’mo biyampe, ino aye ketutompangapo ku nshikani, i kijila. (Bahebelu 12:​7-11) Satana ukokeja kwitutompa tulonge bibi, ino Leza udi netu wa kwitunyongolola kudi uno umbi wanshikani.​—Mateo 6:​13.

¹³ Tufwaninwe kwikala basumininwe, mwanda tukokeja kutanwa mu ngikadilo kampanda ilangula kilokoloko kibi kikokeja padi kwitutwala ku kulonga bubi. Yakoba unena’mba: “Bantu bonso, wa pandi, wa pandi, batompibwanga, pa kukokwa na kilokoloko kyāye mwine, waongolwa.” Nansha shi tubalonga bubi, ketufwaninwepo kutopeka Leza, ehe, i batwe bene baikele kuleka kilokoloko kibi kishikata kijabanda mu mutyima wetu. Kilokoloko kibi kyotuleka munda mwetu kekijangapo “kwimita,” enka pano kala, kyatamina mu mutyima, kupwa “kibutula bubi.” Bubi nabo shi bubalongwa, “bwabutula lufu.” I kimweke patōka amba tufwaninwe kulama mityima yetu ne kukomena milangwe ya kulēmenena ku kulonga bubi. (Nkindi 4:23) Kena wādyumwinwe amba tadija, bubi kebusake kukutādila, ino aye ne kukomena’bo mpika. (Ngalwilo 4:​4-8) Shi kepano, lelo kikekala namani shi ketudi bashilule kulondalonda mwiendelejo wakubulwa kukwatañana na Bisonekwa? Bine, tufwaninwe kufwija’ko bakulumpe bene Kidishitu batompa kwitōlola tuleke kulonga bubi ku meso a Leza.​—Ngalatea 6:⁠1.

Leza​—Nsulo ya Bintu Biyampe

¹⁴ Tufwaninwe kuvuluka’mba, Yehova ye Nsulo ya bintu biyampe; ke ya byakutompibwapo, mhm. (Yakoba 1:​16-18) Yakoba utela balunda nandi mu lwitabijo bu “bāna betu, baswedibwe,” kadi ulombola’mba, Leza ye Mupāni wa “byonso byakupanwa bilumbuluke, ne byabuntu bibwa[nini]ne.” Byabuntu bya kumushipiditu ne bya kungitu bipāna Yehova i ‘bibwaninine,’ bikunkane, byambulwa kupatuka. Bitamba “mūlu,” mu kīkalo kya Leza momwa mu madiūlu. (1 Balopwe 8:39) Yehova ye “Shandya bitōkeji” bya mūlu​—dyuba, kweji, ne ñenyenye. Kadi witupanga kitōkeji ne bubinebine bya kumushipiditu. (Mitōto 43:3; Yelemia 31:35; 2 Kodinda 4:⁠6) Leza kadipo pamo bwa dyuba dishinta kyemba podyenda dikanda, dinananga’nka pa kufika’dyo mu kampumpu (kampumpa), mhm, aye udi nyeke peulu pa peulu mu kuleta bintu biyampe. Shi batwe twikale kulonda mu kamo ne kamo mpangiko yandi ya kumushipiditu yapāna kupityila ku Kinenwa kyandi ne kudi “umpika wabinebine ne wamanwa,” bine nandi uketukumbanya bya bulwi byonso bya kunekenya nabyo byakutompibwa.​—Mateo 24:⁠45, NW.

¹⁵ Lelo kimo kya mu byabuntu bilumbuluke bya Leza i kyabuntu’ka? I bana ba kumushipiditu, bandi babutwile ku mushipiditu sandu, balēle lukwaba ku mwingilo wa myanda miyampe, ke ‘kinenwa kya bubinebine’ kadi. Boba babutulwa lubutulo lwa kumushipiditu i “bipa bya mulakisho shabyo, NW,” batongelwe umbukata mwa bantu mwanda wa kwikala “balopwe bapidishitu” momwa mūlu. (Kusokwelwa 5:10; Efisesa 1:​13, 14) Kepabulwe padi Yakoba wādi uvuluka mebele-abuluba a mulakisho ālambwilwe mu mafuku 16, kweji wa Nisane, difuku dyāsangwilwe Yesu, ne ku mikate ibidi ya bukula bwa ñano yālambwilwe mu difuku dya Pentekosa, pāpungulwilwe mushipiditu sandu. (Levi 23:​4-11, 15-​17) Mu uno muswelo, Yesu ye wa kwikala kipa kine kya mulakisho, ino bampyana pamo nandi abo i “bipa bya mulakisho shabyo.” Lelo kikekala namani shi tudi na lukulupilo lwa kukekala pano panshi? Eyo, kulama luno lukulupilo mu ñeni yetu kuketukwasha tulamate pototo ku lwitabijo lwetu mudi Mupāni wa “byakupanwa bilumbuluke,” utūdile’ko kyepelo kya būmi bwanyeke munshi mwa buludiki bwa Bulopwe.

Ikala ‘Mulongi wa Kinenwa’

¹⁶ Shi nansha mu lwitabijo lwetu twikondanga na byakutompibwa, nansha shi pano kebyetufikile, ino kitusakila kwikala “balongi ba kinenwa.” (Yakoba 1:​19-25, NW) Tufwaninwe kwikala “bapej[a] pa kwivwana” kinenwa kya Leza, balongi bakyo bakikōkeji. (Yoano 8:47) Ku mutamba mukwabo nako, twikalei bantu “bēj[a] pa kwisamba,” balanga kumeso kwa kunena. (Nkindi 15:28; 16:23) Yakoba witusoñanya nanshi ne kuleka kwikala na kiyumbye kya kunenena’mba, bino byakutompibwa bitufikila bitambile kudi Leza. Kadi twi badingilwe kwikala ‘bēja pa kukalabala; mwanda muntu wa bukalabale kaloñangapo mwendele boloke bwa Leza, mhm.’ Ekale shi byanena kabidye bibetukela bulobo, ‘twitūkijei’ mwanda wa kwepuka kulondolola bibi na nsungu. (Efisesa 4:​26, 27) Mushipiditu wa bukalabale, ukokeja kwitulupwila bitulu, nansha kwikala bu kitompibwa nakyo pakyo bwa pala ku bakwetu, keukokejapo kubutula milongelo ilombola amba kansangwa’u udi na lwitabijo mudi Leza wetu wa boloke. Ino, shi tudi ‘na kusansanya kuvulevule,’ ‘tukeja pa kufuna bulobo,’ ne batutu ne bakaka baketulumba.​—Nkindi 14:29.

¹⁷ Bine tufwaninwe kufundula “byonso bibibibi”​—bintu byo-byonso biletela Leza munyanji ne kumukela bulobo. Kadi tufwaninwe kufundula “ne bubi bwine busubukile ku bubi.” Batwe bonso tufwaninwe kwitōkeja tuto to-tonso, twikale twa ku ngitu nansha twa kumushipiditu. (2 Kodinda 7:1; 1 Petelo 1:​14-16; 1 Yoano 1:⁠9) Kufundula bubi mu mutyima ne mu ñeni yetu kwitushitwilanga kibelo kya ‘kwitabija na mutyima mutūke kukunibwa kinenwa’ kya bubinebine. (Bilongwa 17:​11, 12) Nansha shi twi bene Kidishitu ba pa mukulu’ka, eyo ke kibipo, ino kikatampe kikimbwa i batwe bonso twendelele nyeke na kuleka bubinebine bwa mu Bisonekwa bushimikwe buvulevule munda mwetu. Mwanda waka tunena namino? Mwanda na bukwashi bwa mushipiditu wa Leza, kinenwa kikuninwe munda kilupulanga ‘bumuntu bupya’ bufikijañana ku lupandilo.​—Efisesa 4:​20-24.

¹⁸ Lelo tubwanya kulombola namani amba kino kinenwa ko kalombwe ketu? I na kwikala bantu bakōkele, ‘balongi ba kinenwa, ke bemvwanikipo bitupu, ehe.’ (Luka 11:28) “Balongi” i bantu badi na lwitabijo lulupula mingilo yabinebine, kimfwa mingilo ingilwa na bupyasakane mu mwingilo wa bwine Kidishitu ne kulondolola kitatyi kyonso mu kupwila kwa bantu ba Leza. (Loma 10:​14, 15; Bahebelu 10:​24, 25) Mwimvwaniki bitupu wa kinenwa “udi pamo bwa muntu utala mpala ya ngitu yandi mu kitalo.” Apwe kwitala kubapu, utaluka’po, waididilwa ne dyangi dine dyaadi usaka kwidyangula. Ino batwe byotudi “balongi ba kinenwa,” twifundei na katentekeji “kijila kibwa[nini]ne” kya Leza ne kukōkela ponka, ke-pantu akyo kino i kikumbanye bintu byonsololo byasaka kotudi. I amo, buno bwanapabo botudi nabo i bwishile kulampe kwine na bupika bwa kumunwa na bubi ne lufu, mwanda abo i bwanapabo butwala ku būmi. Shi kepano, ‘tūmininei mu kijila kibwaninine,’ na kwikisantaula nyeke ne kwikikōkela. Langa’po bidi! Batwe ‘balongi ba mwingilo ke bemvwaniki ba kīlwa bitupu, ehe,’ tudi na nsangaji ilupuka ku kutōkelwa pa mutyima na Leza.​—Mitōto 19:​7-11.

Kupita ne pa bu Batōtyi Bitupu

¹⁹ Shi tusaka kwitabijibwa na Leza, tufwaninwe kuvuluka’mba bwine Leza bwabine ke kuvūyapo mbila bitupu. (Yakoba 1:​26, 27) Eyo, dimodimo tukokeja kulanga amba, nansha shi tubaitwe bu ‘batōtyi bavūya mbila bitupu’ ba Yehova kekudipo mwanda, kiyampe’ko twi betabijibwe nandi, kuno i kwididika, kintu kitabukile mvubu i wandi mumweno wamwene umo ne umo umbukata mwetu. (1 Kodinda 4:⁠4) Kekubulwe padi bukōkekōke botwikonda nabo i kukomenwa kuyuka ‘kukoka ludimi.’ Shi tubābanga bakwetu, nansha twingidijanga ludimi lwetu bibi mu miswelo mikwabo, ino koku kadi tulanga’mba Leza usepelelanga bwine Leza bwetu, i bine twiongolanga bitupu. (Levi 19:16; Efisesa 4:25) Kunena kuyampe, ketusakilepo “bwine-Leza” bwetu bwikale “bwa bitupubitupu,” bwakubulwa kwitabijibwa na Leza pa mwanda wa buluji kampanda.

²⁰ Nansha shi Yakoba katelelepo bipindi byonso bya bwine Leza butōka, ino i munene amba mu bwine Leza butōka tō mudi ne “kukwasha banabanshiye ne bakaji ba bafu mu bufudilwe bwabo, MB.” (Ngalatea 2:10; 6:​10; 1 Yoano 3:18) Kipwilo kya bwine Kidishitu i kite mutyima bininge ku kusāsaketa bakaji ba bafu. (Bilongwa 6:​1-6; 1 Temote 5:​8-10) Leza byadi Muledi wa bakaji ba bafu ne bana banshiye, nanshi netu twingidilei Nandi pamo na kulonga byonso mungya pafudile bukomo bwetu, twikale kwibakwasha kumushipiditu ne kungitu. (Kupituluka 10:​17, 18) Bwine Leza butōka tō bulomba monka umo ne umo ekale “kwilama aye mwine, nansha kiko kīne mpika” kya ino ntanda, kushintulula ko kunena amba, kya bano bantu ba bukondame badi munshi mwa lupusa lwa Satana. (Yoano 17:16; 1 Yoano 5:19) Shi kepano, twilamei ku mwiendelejo wakubulwa bwine Leza wa ino ntanda, tutumbije Yehova ne kwikala bantu bengila senene mwingilo wandi.​—2 Temote 2:​20-22.

²¹ Ano madingi a Yakoba otwabandaula kamo ne kamo afwaninwe kwitukwasha tūminine byakutompibwa ne kulamata pototo ku lwitabijo lwetu. Bine, afwaninwe kwitukunka ku mityima tutuntwile’ko kutendela kwetu kotutendela Mupāni wa buswe witupanga byabuntu biyampe. Kadi binenwa bya Yakoba bitukwasha twikale na bwine Leza butōka tō. Lelo witukokelanga milangwe yetu ku bika bikwabo? Lelo i matabula’ka makwabo otukokeja kutabula alombola amba tudi na lwitabijo lwabine mudi Yehova?

Lelo Ukalondolola Namani?

◻ Lelo i bika bibwanya kwitupa manwa a kuyuka mwa kunekenyenya byakutompibwa?

◻ Mwanda waka bene Kidishitu bakokeja kusepelela nansha byobatanwa na byakutompibwa?

◻ Lelo tukokeja kwikala balongi ba kinenwa namani?

◻ Lelo mutōtelo utōka ulomba kulonga bika?

[Bipangujo bya Kifundwa]

 1. Bantu ba Yehova bamwingidilanga na lwitabijo ne “nsangaji shē” nansha byobatanwa na bika?

 2. Le i myanda’ka yotuyukile itala pa mulembi wa mukanda wa Yakoba?

 3. Lelo i myanda’ka imoimo yādi ikonda nayo bene Kidishitu ba mu myaka katwa imbajinji, ne i muswelo’ka otukokeja kumwena kamweno kakatampe mpata mu mukanda wa Yakoba?

 4. Lelo i muswelo’ka otufwaninwe kumona byakutompibwa?

 5. Lelo byakutompibwa bikokeja kwikala bika ne bika, ne biketupityila namani shi twikale kūminina’byo?

 6. ‘Kūminina kufikidijanga mwingilo wako ne pa mfulo’ muswelo’ka, ne i matabula’ka mafwaninwe otufwaninwe kutabula kitatyi kyotwikonda na byakutompibwa?

 7. Lelo i kwepi kotukokeja kumwena bukwashi bwa kunekenya nabo byakutompibwa?

 8. Mwanda waka muntu walakana kakatambulapo kintu nansha kimo kudi Yehova?

 9. Mwanda waka tudi na bubinga bwa kusepelela pa kwikala batōtyi ba Yehova?

10. Lelo mwine Kidishitu ufwaninwe kumona bupeta bwa bintu bya kungitu muswelo’ka?

11. Lelo i bintu’ka bitengele kukatambula boba balamete pototo ku lwitabijo lwabo nansha byobekonda na byakutompibwa bibafikilafikila?

12. Kitatyi kyotutanwa na bikambija, mwanda waka ketufwaninwepo kunena’mba: “Natompibwa na Leza”?

13. Lelo i kika kikokeja kulupuka’ko shi ketufundwilepo kilokoloko kibi munda mwetu?

14. Lelo tukokeja kunena’mba byabuntu bya Leza i ‘bibwaninine’ mu buluji’ka?

15. Lelo kimo kya mu byabuntu bilumbuluke bya Yehova i kyabuntu’ka?

16. Mwanda waka tufwaninwe kwikala ‘bapeja pa kwivwana ino beja pa kwisamba ne pa kukalabala’?

17. Lelo kufundula bubi mu mutyima ne mu ñeni kubutulanga bika?

18. Lelo mwimvwaniki bitupu wa kinenwa wishidile namani na mulongi wakyo?

19, 20. (a) Kukwatañana na Yakoba 1:​26, 27, lelo bwine Leza butōka bwitusakila tulonge bika? (b) I bimfwa’ka bimobimo bilombola bwine Leza bwakubulwa kusubijibwa?

21. Kukwatañana na mukanda wa Yakoba, lelo i bipangujo’ka bikwabo bitusakila kubandaula?

[Kunshi kwa dyani]

[Kifwatulo pa paje 5]

Kitatyi kyoikonda na byakutompibwa, loeja lwitabijo mudi Yehova udi na bukomo bwa kulondolola ku milombelo yobe

[Kifwatulo pa paje 7]

“Balongi ba kinenwa” basapulanga Bulopwe bwa Leza konso konso pano pantanda