Mushipiditu Usapulanga Bukamoni na Mushipiditu Wetu

1-3. Lelo i binkumenkume’ka byālengeje difuku dya Pentekosa dikale dya pa bula, ne byāfikidije namani byobya byālaile Bisonekwa? (Tala kifwatulo ku ngalwilo.)

TUDI mu Yelusalema Dya Yenga lubanga. I difuku dya pa bula kadi dya kantyinyentyinye. Bantu basoba masobo a Pentekosa, masobo ajila a ku ngalwilo kwa mwangulo wa ñano. Luno lubanga mu tempelo, kitobo mukatampe waela bitapwa byaelanga nyeke. Ebiya mu nsá ya kitema, waela mikate ibidi yampikwa kiyujo ya ku ñano mibajinji, nansha byangulwa bibajinji. Kitobo mukatampe wapepeja mikate ibidi koku ne koku kwiipāna kudi Yehova. Bino byonso byālongekele mu Pentekosa wa mwaka 33.—Levi 23:15-20.

² Mu myaka tutwa na tutwa, kitobo mukatampe wādi wela mwaka ne mwaka kyakwela kipepeje. Kino kyakwela kyādi kikwatañene na kintu kya mvubu mpata kyālongekele dya Pentekosa mu mwaka 33. Ne kino kyālongekele ku bana ba bwanga 120 ba Yesu bādi balombela pamo mu kyumba kya peulu mu Yelusalema. (Bilongwa 1:13-15) Myaka tutwa mwānda kumeso, mupolofeto Yoela wāsonekele pa bino binkumenkume. (Yoela 2:28-32; Bilongwa 2:16-21) Mwanda waka byālongekele difuku’dya byādi na kamweno mpata?

³ Tanga Bilongwa 2:2-4. Mu Pentekosa wa mu 33, Leza wāpungulwidile bano bene Kidishitu mushipiditu ujila, bāikala ke bashingwe māni. (Bilongwa 1:8) Penepa, bantu bashilula kwibungila kobādi, ebiya bana ba bwanga bashilula kwisamba bintu bya kutendelwa byobāmwene ne byobāimvwene. Mutumibwa Petelo wāshintulwile kyokya kyālongekele ne mwanda waka kyādi na mvubu. Ebiya wāsapwila kibumbo amba: “Mwisāsei, kadi umo ne umo abatyijibwe mu dijina dya Yesu Kidishitu mwanda wa kulekelwa bubi bwenu, kadi mukatambula kyabuntu kya ku bitupu kya mushipiditu ujila.” Mu difuku’dya, kintu kya bantu 3000 bābatyijibwa kadi bāpungulwilwa ne mushipiditu ujila.—Bilongwa 2:37, 38, 41.

 4. (a) Mwanda waka tute mutyima ku byālongekele dya Pentekosa? (b) Le i kinkumenkume’ka kikwabo kyālongekele mu difuku dya uno muswelo myaka kunyuma? (Tala bilembwa bya ku mfulo.)

⁴ Lelo byobya byālongele kitobo mukatampe ne kyakwela kya mu dya Pentekosa byelekeja bika? Kitobo mukatampe welekeja Yesu. Mikate yelekeja bana ba bwanga ba Yesu bashingwe māni. Bano bana ba bwanga batongelwe mu babipya-mambo betwanga bu “byangulwa bibajinji.” (Yakoba 1:18) Leza wibetabije bu bandi bana kadi i mwibatonge kukabikala pamo na Yesu mu Bulopwe bwa Leza momwa mūlu. (1 Petelo 2:9) Yehova ukesela bantu bonso ba kikōkeji kupityila ku Bulopwe bwandi. Nansha shi twi ba kwikala mūlu nansha pano panshi mu paladisa, Pentekosa wa mwaka 33 udi na mvubu kotudi.^[1] —Tala bilembwa bya ku mfulo.

 5. Le tubayuka namani amba boba bashiñwanga māni kebashiñwanga’opo muswelo umo?

⁵ Bana ba bwanga bādi mu kyumba kya peulu mu dino difuku kebādipo ba kwidilwa. Muntu ne muntu wādi na ludimi ludi pamo bwa mudilo pa mutwe wandi. Yehova wēbapele bukomo bwa kwisamba mu ndimi mikwabo. Kebādipo ne kya kutatena’mba abashingwa māni a mushipiditu ujila. (Bilongwa 2:6-12) Ino kino kilongwa kitulumukwa kekilongekangapo ku bene Kidishitu bonso bashingwa māni. Kimfwa, Bible kanenepo amba kintu kidi pamo bwa ludimi lwa mudilo kyāmwekele pa mitwe ya tununu ne tununu twa bantu mu Yelusalema bāshingilwe māni mu mafuku ālondele’po. Abo bāshingilwe māni pa kubatyijibwa. (Bilongwa 2:38) Kadi, ke bene Kidishitu bonsopo bāshingilwe māni pa kubatyijibwa. Bene Samadia bāshingilwe māni papo ke bapwe kubatyijibwa. (Bilongwa 8:14-17) Kadi mwanda wa pa bula i wa Konilusa ne ba mu njibo yandi bāshingilwe māni abo papo kebabatyijibwe.—Bilongwa 10:44-48.

 6. I kika kitambulanga bashingwe māni bonso, ne kino kibakulupijanga bika?

⁶ Bine, bene Kidishitu bayukile amba bashiñwanga māni mu miswelo palapala. Bamo babwanya kuyuka kiponka na ponka amba Yehova webashinga māni. Bakwabo bajingululanga kino papo ke papite kitatyi. Inoko mutumibwa Polo wāshintulwile kyokya kilongekanga ku muntu yense ushingwa māni. Wānene amba: “Pa kupwa kwitabija, mwatūdilwe ne kiyukeno kupityila kudi aye na mushipiditu ujila walailwe, ao i kyeya kyetweyekelwe kala kya bupyani bwetu.” (Efisesa 1:13, 14) Nanshi Yehova wingidijanga mushipiditu wandi ujila pa kukulupija bano bene Kidishitu amba i mwibatonge kwenda mūlu. Mu uno muswelo, mushipiditu ujila i ‘kyeya kyebeyekelwe kala,’ nansha bu bukamoni kobadi bwa amba mu mafuku āya kumeso, bakekala na būmi bwa nyeke momwa mūlu, ke pano pa ntandapo.—Tanga 2 Kodinda 1:21, 22; 5:5.

 7. Le i bika bifwaninwe kulonga mwine Kidishitu yense mushingwe māni pa kutambula mpalo ya momwa mūlu?

⁷ Shi mwine Kidishitu washingwa māni, lelo ko kunena amba watambwididila mpalo yandi? Aa. Ukulupile na bubine amba i mwitwe kwenda mūlu. Ino ukapalwa mpalo enka shi wakōkela nyeke Yehova. Petelo ushintulula’kyo mu uno muswelo amba: “O mwanda mwine, banwe banabetu, longai bukomo bwenu bonso nakampata mufikidije banwe bene lwito ne kutongwa kwenu; mwanda shi mwendelele kulonga bino bintu’bi kemukaponepo nansha dimo. Bine, nabya mukapebwanga dyese dya ntanda ne miseke dya kutwela mu Bulopwe bwa nyeke bwa Mfumwetu Umpandiji Yesu Kidishitu.” (2 Petelo 1:10, 11) O mwanda mwine Kidishitu yense mushingwe māni kafwaninwepo kuleka kintu nansha kimo kimukankaje kwingidila Yehova. Nansha byaityilwe kwenda mūlu, shi kalaminepo kikōkeji, nabya kakatambulapo mpalo.—Bahebelu 3:1; Kusokwelwa 2:10.

8, 9. (a) Mwanda waka bavule bakomenwanga kwimvwanija kitatyi kishingwa muntu māni? (b) I muswelo’ka muntu wayukanga’mba i mwitwe kwenda mūlu?

⁸ Bengidi bavule ba Leza dyalelo babwanya kukomenwa kwimvwanija bine bilongekanga shi Leza wamushinga māni. Kino i kyendele’mo, mwanda badi kebashingilwe’o kashā. Leza wāpangile bantu mwanda wa kwikala nyeke pano pa ntanda, ke mwandapo wa kwenda mūlu. (Ngalwilo 1:28; Ñimbo 37:29) Inoko Yehova i mutonge bamo kwikala bu balopwe ne bu babitobo momwa mūlu. Nanshi shi Leza webashinga māni, lukulupilo, mulangilo wabo bishintanga, mwanda kebatengele būmi bwa momwa mūlu.—Tanga Efisesa 1:18.

⁹ Penepa i muswelo’ka muntu wayukanga’mba i mwitwe kwenda mūlu? Tala byānene Polo ku banababo bashingwe māni ba mu Loma, bene bāityilwe “kwikala bajila.” Wēbasapwidile amba: “Banwe kemwatambwilepo mushipiditu wa bupika wimulengeja moyo dikwabo, ino mwatambwile mushipiditu wa kwimwalamuna kemudi bana, mushipiditu otwita nao amba: ‘Abba, Tata!’ Mushipiditu mwine usapulanga bukamoni na mushipiditu wetu amba twi bana ba Leza.” (Loma 1:7; 8:15, 16) Kupityila ku mushipiditu ujila, Leza ukulupijanga muntu amba i mwitwe kukabikala na Yesu mūlu.—1 Tesalonika 2:12.

10. Panena 1 Yoano 2:27 amba mwine Kidishitu mushingwe māni kadipo kyasakila muntu mukwabo amufundije, le usaka kunena bika?

¹⁰ Boba batambula luno lwito lwa Leza kebadipo kyobasakila muntu mukwabo ebalombole amba abashingwa māni. I Yehova wibakulupijanga. Mutumibwa Yoano wāsapwidile bene Kidishitu bashingwe māni amba: “Banwe mwi bashingwe māni na yewa ujila kadi banwe bonso mudi na buyuki.” Wābweja’ko kadi amba: “Kadi banwe, kushingwa komwashingilwe māni na aye kudi nyeke momudi, kadi kekudipo kyomusakila muntu emufundije; inoko kushingwa komwashingilwe māni na aye kwimufundijanga bintu byonso, kadi i kwa bine, ke kwa bubelapo. Monka mokwemufundijije, ikalai nyeke umbumo nandi.” (1 Yoano 2:20, 27) Bene Kidishitu bashingwe māni bafwaninwe kufundijibwa na Yehova monka mufundijibwanga bantu bonso. Inoko kebasakilwapo muntu mukwabo ebalombole amba abashingwa māni. Yehova wingidijanga mushipiditu ujila, bukomo bwandi butabukile bonso, mwanda wa kwibakulupija amba i bashingwe’o!

11, 12. Le mwine Kidishitu mushingwe māni ubwanya kwiipangula bika, ino i bika byakatatanangapo?

¹¹ Shi bene Kidishitu abashingwa māni na mushipiditu ujila, bashintanga bininge. Na bubine Yesu wānene amba ‘babutulwanga monka.’ (Yoano 3:3, 5) Kupwa washintulula’mba: “Kokatulumuka mwanda nakunena’mba, Mufwaninwe kubutulwa monka. Luvula lupukumanga konso kolusaka, kadi wivwananga lunwa lwalo, ino kuyukangapo kolwiya ne kolwenda. Mo mwikadile ne ense ubutwilwe ku mushipiditu.” (Yoano 3:7, 8) Bine, i bikomo kushintulwila senene muntu kashingilwe māni mwiimvwanina yewa ushingilwe’o.^[2]—Tala bilembwa bya ku mfulo.

¹² Yewa ushingilwe māni ubwanya padi kwiipangula amba, ‘Mwanda waka Yehova wantonge’ko ami pa kyaba kya kutonga mukwabo?’ Ubwanya’nka ne kwiipangula shi i mufwaninwe kino kiselwa. Kutatana’ko katatenepo amba Yehova i mumutonge. Ino, usangele bininge kadi ufwijanga’ko pa kino kyabuntu. Bashingwe māni beimvwananga pamo bwa Petelo wānene amba: “Eselwe dyese Leza Shandya Mfumwetu Yesu Kidishitu, mwanda mwendele lusa lwandi lukatampe wetubutwile dipya twikale na lukulupilo lūmi kupityila ku kusangulwa kwa Yesu Kidishitu mu bafwe, tutambule bupyani kebubolapo, bwampikwa disubi kadi kebufumbapo. I bwimubikilwe mūlu.” (1 Petelo 1:3, 4) Bashingwe māni pobatanga bino binenwa, bamonanga na bubine amba Tata wisambanga nabo ku muntu ne muntu.

13. I muswelo’ka ushintanga muntu mulangilo wandi shi washingwa māni mushipiditu ujila, ne i kika kilengejanga kuno kushinta?

¹³ Kumeso kwa Yehova kutonga bano bene Kidishitu kwenda mūlu, badi bidi na lukulupilo lwa kwikala nyeke pano pa ntanda. Badi batengele kitatyi kikalamuna Yehova ino ntanda ke paladisa ne kutalula’ko bibi byonso. Padi badi bafwatakanya kukatundaila babutule nansha balunda nabo bakasangulwa. Kadi badi batengele kōbaka mobo ne kushikata’mo nansha kukuna mityi ne kudya bipa byayo. (Isaya 65:21-23) Penepa mwanda waka pano ke balanga bikwabo? Le i pa mwanda abatyumukwa mutyima ne kususuka mpata? Le i mwanda abamone amba kushikata nyeke pano pa ntanda kukokejañana? Nansha le basaka’tu kuyuka mwikadile mūlu? Aa. Ino, i Leza ye wibatongēle’byo. Paebatonga, wingidijanga mushipiditu wandi ujila ushinte mulangilo wabo ne mpalo yobatengēle.

14. Lelo bashingwe māni a bamonanga namani būmi bwabo bwa pano panshi?

¹⁴ Penepo le kino kishintulula’mba bashingwe māni basakanga kufwa? Polo ulombola mwiimvwaninanga bashingwe māni. Wādingakenye imbidi yabo ya bu muntu na “pema” ne kunena’mba: “Na bubine, batwe badi mu uno pema tubinzanga, tulēmenwe; mwanda ketusakilepo kuvūla’ye, ino tusakanga kuvwala kikwabo, amba kyokya kya lufu kiminwe na būmi kubyu.” (2 Kodinda 5:4) Bano bene Kidishitu kebasakangapo kufwa. Basangelanga būmi kadi basakanga kwingidila Yehova difuku ne difuku pamo na babutule babo ne balunda. Nansha balonge bika, bavulukanga byobya bibalaile Leza kumeso.—1 Kodinda 15:53; 2 Petelo 1:4; 1 Yoano 3:2, 3; Kusokwelwa 20:6.

15. Le i ku bika kekwiyukilangapo muntu amba washingwa māni a mushipiditu ujila?

¹⁵ Padi wiipangulanga shi Yehova i mukutonge kwenda mūlu. Shi wimonanga’mba i mukutonge, langulukila pa bino bipangujo bya mvubu mpata: Le wiimvwananga bu mupyasakane bininge mu mwingilo wa busapudi? Lelo wifundanga bya binebine Bible ne kuyuka “bintu bya mushike bya Leza”? (1 Kodinda 2:10) Lelo umonanga’mba Yehova i mukukwashe umone bipa bivule mu mwingilo wa busapudi? Le usakanga kulonga bidi byobya bisangaja Yehova kutabuka kintu kyo-kyonso? Lelo usenswe mpata bakwabo ne kwimona bu udi na kiselwa kya kwibakwasha bengidile Yehova? Le kodi mwimwene bukamoni bulombola’mba Yehova i mukukwashe mu miswelo mivule mipotoloke mu būmi bobe? Shi ubalondolola’mba, en-en ku bipangujo byonso, le ko kunena’mba wi mutongwe kwenda mūlu? Aa, ke amopo. Mwanda waka? Mwanda bengidi bonso ba Leza babwanya kwiimvwana uno muswelo, bekale bashingwe māni nansha kebashingilwe’opo. Kadi Yehova ubwanya kupa mwingidi wandi e-ense buno bukomo kupityila ku mushipiditu wandi ujila, nansha shi utengele mpalo’ka. Na bubine, shi wiipangulanga kutongwa kobe, nankyo kutongelwepo. Boba batongelwe na Yehova kebatatanangapo! Beyukile bine amba i batongwe!

16. Le tubayuka namani amba ke bonsopo batambwile mushipiditu ujila wa Leza batongelwe kwenda mūlu?

¹⁶ Mu Bible, mudi bimfwa bivule bya bantu ba kikōkeji bātambwile mushipiditu ujila wa Yehova, ino kwenda mūlu mpika. Kimfwa kimo i kya Yoano Mubatyiji. Yesu wānene amba kekudipo muntu utabukile Yoano bukata, ino wānene amba Yoano kakabikalapo bu mulopwe mūlu. (Mateo 11:10, 11) Davida nandi wāludikilwe na mushipiditu ujila. (1 Samwele 16:13) Mushipiditu ujila o wāmukweshe emvwanije bintu bya mushike bya Yehova ne kumuludika asoneke bipindi bimo bya mu Bible. (Mako 12:36) Nansha nabya, mutumibwa Petelo wānene amba Davida “kākandilepo mūlu.” (Bilongwa 2:34) Yehova wāingidije mushipiditu wandi ujila kupa bano bantu bukomo bwa kulonga bintu bitulumukwa, ino kāingidije’opo mwanda wa kwibatonga bende mūlu. Le kino kishintulula’mba kebādipo na kikōkeji nansha’mba kebādipo babwenye bisakibwa bya kukabikala mūlu? Aa. Yehova mwine ye usaka’tu kukebajokeja ku būmi mu Paladisa pano pa ntanda.—Yoano 5:28, 29; Bilongwa 24:15.

17, 18. (a) Lelo i mpalo’ka itengele bengidi bavule ba Leza dyalelo? (b) I bipangujo’ka byotukabandaula mu kishinte kilonda’ko?

¹⁷ Bengidi bavule ba Leza dyalelo ke ba kwendapo mūlu. Abalahama, Davida, Yoano Mubatyiji, bana-balume ne bana-bakaji bakwabo ba mu kitatyi kyāsonekelwe Bible, batengēle kukekala na būmi pano pa ntanda mu buludiki bwa umbikalo wa Leza. (Bahebelu 11:10) Bantu 144000 bo bakaludika na Yesu momwa mūlu. Ino Bible wisambila pa bashingwe māni “bashele’ko” pano pa ntanda mu kino kitatyi kya mfulo. (Kusokwelwa 12:17) Mwanda bavule mu ba 144000 ke bafwe kala ne kusangukila mūlu.

¹⁸ Ino shi muntu wanena’mba nashingwa māni, lelo boba badi na lukulupilo lwa kwikala pano pa ntanda bakalonga’po namani? Shi muntu mu kyenu kipwilo washilula kudya ku mukate ne kutoma vinyu ku Kivulukilo, le mufwaninwe kumumona namani? Ino le bikekala namani shi kibalwa kya bashingwe māni kibavudila’ko? Le bikakukambakanya? Tukalondolola bino bipangujo mu kishinte kilonda’ko.