Lelo Ulongele Bubi bwa Kutuka Mushipiditu Sandu?

“Kudi kadi ne bubi buleta lufu.”—1 YOANO 5:16, MB.

1, 2. Tuyukile namani amba muntu ubwanya kulonga bubi bwa kutuka mushipiditu sandu wa Leza?

“MILANGWE yami imponejanga’mba ne mulonge bubi bwa kutuka mushipiditu sandu.” Mo mwāsonekele mwana-mukaji umo wa mu Alemanye nansha byaadi wingidila Leza. Le Mwine Kidishitu ubwanya bine kulonga bubi bwa kutuka mushipiditu sandu wa Leza, bukomo bwandi bwingila?

² I amo, muntu ubwanya kulonga bubi bwa kutuka mushipiditu sandu wa Yehova. “Myanda yonso īkebalekelwa bantu,” mo mwānenene Yesu, “nanshi kutuka Mushipiditu ako kekukalekelwapo bantu, ehe.” (Mateo 12:31) Twi badyumunwe amba: “Wivwane kadi, tupyanga mambo a mu lupata popa po twatambwile ñeni ya kuyūkidila byobya byabinebine, nankyo nanshi kekukishelepo pano kitapwa kikwabo kya pa mambo, mhm, poso ke kukulupila konka kwa malwa kwa kuponejibwa.” (Bahebelu 10:26, 27) Kadi mutumibwa Yoano wāsonekele’mba: “Kudi kadi ne bubi buleta lufu.” (1 Yoano 5:16, MB) Ino le muntu ulongele bubi bukatampe ye ufwaninwe kuyuka shi bubi bwandi i “bubi buleta lufu”?

Kwisāsa Kufikijanga Muntu ku Kulekelwa

 3. Shi twitopeka pangala pa bubi botulongele, nabya kino kilombola bika?

³ Yehova ye Mutyibi umo kete wa banonga-bibi. Na bubine, batwe bonso tukeshintulwila kwadi, kadi aye uloñanga nyeke byoloke. (Ngalwilo 18:25; Loma 14:12) Yehova ye utyiba mbila shi bubi botulongele i bubi boketukalekelwapo, kadi i enka aye ukokeja kwituyata mushipiditu sandu wandi. (Mitōto 51:11) Inoko shi twitopeka bininge pangala pa bubi botulongele nabya kino kilombola padi amba bine tudi na mutyima wa kwisāsa. Le penepa kwisāsa kwa bine i bika?

 4. (a) I muswelo’ka okokeja kushintulula kwisāsa? (b) Mitōto 103:10-14 witusenga namani?

⁴ Kwisāsa i kushinta mwikadila wetu wa kala nansha kuleka kilongwa kibi kyotwadi ba kulonga. I kwivwana bulanda nansha kutompola ne kuvundamina mwiendelejo umbi. Shi tubalonga bubi bukatampe, kupwa tubatabula matabula alombwa pa kulombola amba bine tubesāsa, nabya tusengwei na byānene mulembi wa mitōto amba: “Aye [Yehova] ketulongelepo monka mwendele mambo etu, mhm, nansha kwitupala monka mwikadile bubi bwetu mpika. Ke-muntu monka mulepele mūlu peulu pa ntanda, mo monka ne lusa lwandi lwine i lukatampe lwa bonso bamwakaminwe. Monka mulepele kutunduka na kushika, e monka mwatundulwila ne kujilula kwetu ko tudi. Monka mufwila shamuntu bāna bandi lusa, e monka mwibafwila lusa Yehova, bamwakaminwe. Ke-muntu uyūkile ngitu yetu; witunena’mba, i luvumbi.”—Mitōto 103:10-14.

5, 6. Lombola mulangwe mukatampe udi mu 1 Yoano 3:19-22, kadi shintulula buluji bwa binenwa bya mutumibwa.

⁵ Binenwa bya mutumibwa Yoano nabyo bitusenga, amba: “E ponka po tūkayūkana’mba, nanshi twi bantu babinebine, ne kukēkankamija mityima yetu mu meso andi; monso mwituponeja mityima yetu; mwanda aye Leza utabukile bukatampe mityima yetu, uyūkile bintu byonsololo. Bānwe baswe, shi mityima ne kwituponeja mpika, nankyo twi bakankamane kudi Leza; ne byonso byo tulomba tutambula’byo kudi aye, ke-twi-bantu tulamine bijila byandi, ne kulonga byonka byakuloelelwa ku meso andi.”—1 Yoano 3:19-22.

⁶ Tuyukene amba “twi bantu babinebine” mwanda tudi na buswe bwa bu bana na bana kadi kulonga bubi ke wetupo mwikadila. (Mitōto 119:11) Shi mutyima witutopeka pa mwanda kamukaya, nabya tuvulukei amba “Leza utabukile bukatampe mityima yetu, uyūkile bintu byonsololo.” Kadi Yehova witufwilanga lusa mwanda uyukile amba tudi na ‘lusa ku bana betu lwakubulwa kubepa,’ tulwanga na bubi, kadi twielelanga’ko kulonga kiswa-mutyima kyandi. (1 Petelo 1:22) Mutyima wetu ‘keuketuponejapo’ shi tukulupile mudi Yehova, shi tuswele banabetu, ne shi ketulongelapo bubi ku kusaka. Kadi tukekala “bakankamane kudi Leza” mu milombelo; ke-muntu uketulondolola mwanda tulamine mbila yandi.

Bālongele Bubi bwa Kutuka Mushipiditu

 7. Kulekelwa nansha kubulwa kulekelwa bubi i mwanda utala bika ne bika?

⁷ Lelo i bubi’ka kebukalekelwapo? Pa kulondolola kino kipangujo, tubandaulei bidi bimfwa bimobimo bya mu Bible. Kino kekikabulwepo kwitusenga shi twi besāse ino mutyima wetu ukitutopeka pangala pa bilubo bikatampe byotulongele. Tusa kumona amba kulekelwa nansha kubulwa kulekelwa bubi ke mwandapo utala mwikadile bubi bwine botulongele ino i mwanda utala ngikadila ya mutyima, bine byotutana mu mutyima, ne kusaka kwa mutyima wetu.

 8. Le bendeji ba kipwilo kya Bayuda ba mu myaka katwa kabajinji bālongele namani bubi bwa kutuka mushipiditu sandu?

⁸ Bendeji ba kipwilo kya Bayuda ba mu myaka katwa kabajinji bālwile na bunwanwa bonso Yesu Kidishitu, o mwanda bālongele bubi bwa kutuka mushipiditu sandu. Bāmwene mingilo ya mushipiditu wa Leza pādi palonga Yesu bingelengele biletela Yehova bulēme. Ino bano balwana na Kidishitu bānena amba buno bukomo i bwa Satana Dyabola. Mungya Yesu, bonso batuka mushipiditu sandu wa Leza baloñanga bubi bokebakalekelwapo “nansha uno mwaka, nansha ku ukāyako, mhm.”—Mateo 12:22-32.

 9. Mutonko wa kutuka Leza i bika, ne Yesu wānene’po namani?

⁹ Kutuka Leza i kunena binenwa bya lumvuba, bya kitonko nansha bya kibengo. Leza byādi Nsulo ya mushipiditu sandu, nanshi kutuka uno mushipiditu i kutuka Yehova mwine. Kunena binenwa bibi uno muswelo kekukalekelwapo. Binenwa byānene Yesu pangala pa buno bubi bilombola amba wādi wisambila pa boba balwa na mwingilo wa mushipiditu sandu wa Leza ku kusaka. O mwanda balwana na Yesu bāpile mambo a kutuka mushipiditu, ke-bantu bāmwene mushipiditu wa Yehova wingila mudi Yesu ino abo kebanena amba i bukomo bwa Dyabola. Pa kino, Yesu wānene amba: “Wakutuka Mushipiditu Sandu, aye kakalekelwapo mwanda, mhm, nyeke ne nyeke upīle mambo a kupona mafuku onso nyeke.”—Mako 3:20-29.

10. Mwanda waka Yesu wāityile Yudasa bu “yewa mwana wadi moneke kala”?

¹⁰ Ivwana bidi byālongele Yudasa Isakadiota. Wāikele na budimbidimbi, ke-muntu wādi wiba lupeto mu mukōlo waādi ulama. (Yoano 12:5, 6) Mwenda mafuku Yudasa wakamona baludiki ba Bayuda ne kukwata nkuku ya kwaba Yesu ku bibese bya ndalama 30. Bine, Yudasa wēalakenye pa kupwa kwaba Yesu, ino kāikelepo kwisāsa pa buno bubi bwaālongele ku kusaka. Nanshi Yudasa kakasangulwapo. O mwanda Yesu wāmwityile bu “yewa mwana wadi moneke kala.”—Yoano 17:12; Mateo 26:14-16.

Kebālongelepo Bubi bwa Kutuka Mushipiditu

11-13. Le i muswelo’ka wālongele Mulopwe Davida bubi na Bafesheba, ne i busengi’ka botumwena mu muswelo wāpwijije Leza mwanda wandi?

¹¹ Kyaba kimo Bene Kidishitu, pa kupwa kwisāsa bubi bwabo bukatampe ne kukwashibwa ku mushipiditu na bakulumpe pa kipwilo, bekalanga na mutyima wibaponeja pangala pa kujilula kobajilwile kijila kya Leza. (Yakoba 5:14) Shi netu twi bavutakanibwe mutyima uno muswelo, nabya padi tukamwena mu kubandaula Bisonekwa bīsambila pa bantu balekelwe bubi bwabo.

¹² Mulopwe Davida wālongele bubi bukatampe na Bafesheba, mukaja Udia. Pādi Davida pa musaka wa njibo yandi, wāmwene kubwipi na kwandi uno mwana-mukaji mupopoke oya mema, wāmwityija mu ndaku yandi ne kulāla wālāla nandi. Mafuku’po, Bafesheba wāmulombola amba naimita, penepa Davida wālonga bukomo amba Udia mulumyandi aye alāle nandi mwakufila ano makoji. Ino mulopwe pa kutunya, wākuta nkuku ya kwipaija Udia ku divita. Ebiya kupwa Bafesheba wāikala ke mukaja Davida, kadi wabutula mwana ino mwana’wa wafwa.—2 Samwele 11:1-27.

¹³ Yehova wāolwele uno mwanda wa ba Davida ne Bafesheba. Leza wālekela Davida, mobimwekela pangala pa kwisāsa kwandi ne pangala pa kipwano kya Bulopwe kyāpwene nandi. (2 Samwele 7:11-16; 12:7-14) Bafesheba nandi umweka amba wāikele kwisāsa, mwanda wāeselwe wāikala ke inandya Mulopwe Solomone ne nkambulula wa Yesu Kidishitu. (Mateo 1:1, 6, 16) Shi tubalonga bubi, i biyampe tuvuluke amba Yehova umonanga mwikadilo o-onso wa kwisāsa.

14. Bukata bwa lulekelo lwa Leza i bumweke namani mu mwanda wātene Mulopwe Manase?

¹⁴ Bukata bwa lulekelo lwa Yehova i bumweke ne mu mwanda wātene Manase Mulopwe wa Yuda. Wālongele bibibibi mu meso a Yehova. Manase wāshimikile madabahu a Bala, watōta ne “kibumbo kyonsololo kya mūlu,” kadi wāubaka ne madabahu a bilezaleza mu bipango bibidi bya tempelo. Wāikele ne kupityija bandi bana mu mudilo, wākankamika bya majende, ne kutonona bekadi ba Yuda ne ba Yelusalema ku “kulonga bubi pakatampe [kutabuka ne] mizo yaonakenye Yehova ku meso a bāna ba Isalela.” Bidyumu byānenwe na bapolofeto ba Leza kebyādipo bilondwa. Mfulo mfulō, mulopwe wa Ashidia wāsela Manase bu musungi. Mu bu musungi bwandi, Manase wēsāsa ne kulomba Leza na kwityepeja, Leza nandi wāmulekela ne kumwaluja pa bulopwe bwandi mu Yelusalema, amba endeleje kumeso mutōtelo wa bine.—2 Bilongwa 33:2-17.

15. Mwanda wāfikīle mutumibwa Petelo mu būmi bwandi ulombola namani amba Yehova ulekelanga “byamwiko’tu”?

¹⁵ Myaka pa kupita’po, mutumibwa Petelo nandi walonga bubi bukata pa kutuna Yesu. (Mako 14:30, 66-72) Inoko Yehova wālekele Petelo “byamwiko’tu.” (Isaya 55:7) Mwanda waka? Mwanda Petelo wēsāshile bya binebine. (Luka 22:62) Kyāmwekele patōka amba Leza udi na lulekelo, mwanda mafuku 50 pa kupita’po, mu difuku dya Pentekosa, Petelo wāpebwa dyese dya kusapula myanda ya Yesu pakubulwa moyo. (Bilongwa 2:14-36) Penepa le kudi bubinga bwa kulekela kwitabija amba Leza ukalekela Bene Kidishitu besāsa dyalelo? Kaimba wa mitōto wimba amba: “Shi abe, Yehova, ubangile mambo nankyo le i ani, a Mfumwami, ukēmananga? Ino kudi abe ko ku kulekelwa kwa mambo.”—Mitōto 130:3, 4.

Kutyepeja’ko Moyo Pangala pa Bubi

16. Yehova witulekelanga pangala pa ngikadilo’ka?

¹⁶ Bimfwa byapwa kala kutelwa bifwaninwe kutyepeja’ko kuzumbazumba kwa mityima yetu pa mwanda utala kulonga bubi bwa kutuka mushipiditu sandu. Mwanda bilombola’mba Yehova ulekelanga babipya-mambo besāsa. Kintu kya mvubu kutabuka i kulomba Leza milombelo itamba ku mutyima. Shi tubalonga bubi, tukokeja kulomba kulekelwa pa kitapwa kya kikūlwa kya Yesu, kuzenza lusa lwa Yehova, kutela kubulwa kubwaninina kotupyene ne mingilo yetu ya kikōkeji yotwingile. Byotuyukile amba Yehova i Leza wa buntu, tufwaninwe kulomba lusa koku tukulupile amba uketulekela.—Efisesa 1:7.

17. Tufwaninwe kulonga bika shi tubaluba ketukimbe bukwashi bwa ku mushipiditu?

¹⁷ Lelo shi muntu walonga bubi ino kakomenwa ne kulomba kwine mwanda bubi bubamubeleka ku mushipiditu napo? Pa uno mwanda, mwanā bwanga Yakoba wasonekele amba: “Nabya [ēte] bakulumpe ba kipwilo; nabo bamulombelele, ne kumushinga mani ponka, mu dijina dya Mfumwetu; kadi ne lulombelo lwa kwitabija lukamupandija ubela, ne Mfumwetu ukamulangula; nansha wapīle mambo akamulekelwa.”—Yakoba 5:14, 15.

18. I kika kinenenwa amba nansha shi muntu wapangwa mu kipwilo ke kunenapo amba bubi bwandi kebukalekelwapo?

¹⁸ Kadi nansha shi muntu walonga bubi ne kwisāsa mpika, ku mfulo wapangwa mu kipwilo, ke kunenapo amba bubi bwandi kebukalekelwapo. Polo wāsonekele pangala pa mushingwe māni wāpangilwe mu Kodinda amba: “Ababwana ano madingi a muntu udi namino adingilwa kudi bavule bene. Poso longa umbamulekela, ne kumusenga pa mutyima, e nabyako, mwanda wa kutyina’mba wakaminwa ku mutyima wandi pa kumujia’o byamalwa.” (2 Kodinda 2:6-8; 1 Kodinda 5:1-5) Inoko boba balubile pa kujoka’bo ku mushipiditu bafwaninwe bidi kwitabija bukwashi bwa ku mushipiditu bwimanine pa Bible bwa bakulumpe Bene Kidishitu ne kulombola patōka amba abesāsa binebine. Bafwaninwe kusokola “bipa bifwaninwe kwalamuka pa mutyima.”—Luka 3:8.

19. I bika biketukwasha twikale “bakomo mu lwitabijo”?

¹⁹ I bika bitononanga muntu emone amba walonga bubi bwa kutuka mushipiditu sandu? Padi i kwita mutyima bipitepite nansha kwikala na misongo ya ngitu nansha ya mu ñeni. Shi bidi uno muswelo, milombelo ne kwitūkija bikokeja kukwasha. Nakampata ketufwaninwepo kushila Satana kyaba kya kwituzozeja tuleke kwingidila Leza. Ke-muntu Yehova kasangelangapo lufu lwa mubi, o mwanda kaloelelwangapo na bubine kujimija mwingidi wandi nansha umo. Pa kino shi tudi na moyo wa kulonga bubi bwa kutuka mushipiditu, nabya tufwaninwe kwendelela na kutanga Kinenwa kya Leza, mudi ne bipindi bisenga pa mutyima, kimfwa Mitōto. Tufwaninwe kadi kwendelela kutanwa ku kupwila ne kutambila mu mwingilo wa kusapula Bulopwe. Shi tulonge uno muswelo nabya tukekala “bakomo mu lwitabijo” ne kwinyongolola mu kuzumbijazumbija mutyima kwa amba tulongele bubi kebukalekelwapo.—Tetusa 2:2, MB.

20. I muswelo’ka ukokeja kulanguluka muntu mwanda wa amone amba kalongelepo bubi bwa kutuka mushipiditu sandu?

²⁰ Yense udi na moyo wa amba i mulonge bubi bwa kutuka mushipiditu ufwaninwe kwiipangula amba: ‘Le ne mutuke mushipiditu sandu? Lelo ndi mwisāse bubi bwami byabinebine? Lelo ngitabije amba Leza ulekelanga bine? Le ndi kapondo upela mwinya wa ku mushipiditu?’ Kepabulwe padi bantu ba uno muswelo bakemona amba kebatukilepo mushipiditu sandu wa Leza, nansha kwikala batupondo kwine mpika. I bantu besāse ne kwiubija na lwitabijo mu lulekelo lwa Yehova. Shi bidi namino, nabya kebalongelepo bubi bwa kutuka mushipiditu sandu wa Yehova.

21. Kishinte kilonda’ko kikabandaula bipangujo’ka bimo?

²¹ Bine, i kipite buya kuyuka amba ketulongelepo bubi bwa kutuka mushipiditu sandu! O mwanda mwine tukabandaula bipangujo bikwatañene na uno mwanda mu kishinte kilonda’ko. Kimfwa tukeipangula amba: ‘Lelo bine ndudikwanga na mushipiditu sandu wa Leza? Kipa kyao i kimweke patōka mu būmi bwami?’

Ukalondolola’po Namani?

• I kika kyotunenena amba muntu ukokeja kulonga bubi bwa kutuka mushipiditu sandu?

• Kwisāsa kushintulula bika?

• I bāni balongele bubi bwa kutuka mushipiditu pādi Yesu pano pa ntanda?

• Tukanekenya namani moyo wa kulonga bubi kebukalekelwapo?

[Kifwatulo pa paje 8]

Petelo wātunine Yesu, inoko kālongelepo bubi kebulekelwapo