Mwākwashishe Ngaiusa Banababo

NGAIUSA ne bene Kidishitu bakwabo bātenwe na makambakano dya ku mfulo kwa myaka ya katwa kabajinji. Bantu bādi basambakanya mfundijo ya bubela bāshilwile kuzozeja bipwilo ne kwibikalañanya. (1 Yoano 2:18, 19; 2 Yoano 7) Muntu umo witwa bu Deotefese wādi unenena mutumibwa Yoano ne bakwabo “bintu byampikwa kwendelela’mo,” upela kulombola kizaji ku bene Kidishitu beni, ne kutompa kunekenya bakwabo beule kimfwa kyandi. (3 Yoano 9, 10) Ino yo ngikadilo yādi’ko kitatyi Yoano kyaālembēle Ngaiusa mukanda. Mutumibwa wālembele uno mukanda mu mwaka wa 98 Yesu Ke mwiye, utelwa mu Bisonekwa bya Kingidiki bya bwine Kidishitu bu “Mukanda wa Busatu wa Yoano.”

Ngaiusa wāendelele kwingidila Yehova na kikōkeji nansha byaātenwe na bikoleja. Le wālombwele kikōkeji namani? Mwanda waka dyalelo tusakilwa kwiula kimfwa kya Ngaiusa? I muswelo’ka ubwanya kwitukwasha mukanda wa Yoano twiule kimfwa kya Ngaiusa?

Mulembi wa mukanda wa Busatu wa Yoano witela bu “mwana-mulume mutame.” Na bino binenwa, Ngaiusa wandi mwana wa ku mushipiditu muswedibwe, wāyukile amba i mutumibwa Yoano. Yoano wātelele Ngaiusa na kyanga bu “muswedibwe, onsenswe bya bine.” Kupwa Yoano wānena’mba usakilanga Ngaiusa ekale mukomo ku ngitu ne ku mushipiditu. Bine uno shao o mutyima wa kufwija’ko!​—3 Yoano 1, 2, 4.

Bimweka’mba Ngaiusa wādi mutadi pa kipwilo, inoko mukanda keunenenepo patōkelela uno muswelo. Yoano wātendele Ngaiusa pa kutundaila banababo enka ne boba bādi bamweka bu beni kwadi bene. Yoano wāmwene kino bu bubinga bulombola’mba Ngaiusa udi na kikōkeji, mwanda kulombola kizaji kyādi kiyukeno kya kuyukila’po bengidi ba Leza.​—Ngalwilo 18:1-8; 1 Temote 3:2; 3 Yoano 5.

Binenwa bya Yoano bya kufwija’ko Ngaiusa pangala pa kizaji kyandi ku banababo, bilombola’mba bene Kidishitu bādi benda kitatyi ne kitatyi kwādi kwikala Yoano ne ku bipwilo, kadi na bubine, bano bantu bādi basekunwina Yoano myanda yobādi bemwena. Padi uno o muswelo wādi utambula Yoano mapya a bino bipwilo.

Bene Kidishitu bendakana bādi basangela kushikata na banababo mu lwitabijo. Mwanda maotela a kala ādi matumbe bu bifuko bilongelwa’ko bintu bibi ne busekese. Nanshi, o mwanda padi bano beni ba tunangu bādi bashikata na balunda nabo, ko kunena’mba bene Kidishitu bendakana na bene Kidishitu bene kibundi.

Yoano wākankamikile Ngaiusa endelele monka na kulombola kizaji, o mwanda mutumibwa wamunenene ashindikile “[beni] mu muswelo usangaja Leza.” Kushindikila beni uno muswelo pobenda, kwādi kushintulula kwibomekela byobasakilwa mu lwendo ne kwibapa kintu kyo-kyonso kya kwibakwasha enka ne byobafika kwabo. Na bubine Ngaiusa wādi kala ulonga bino bintu ku beni baādi utundaila dibajinji, bene bāsapwidile Yoano muswelo waādi wibatundaila na buswe ne na lwitabijo.​—3 Yoano 3, 6.

Padi bano beni bādi bamishonele, batumwa ba Yoano, nansha batadi bendakana. Bano bonso bādi bendela pa mwanda wa myanda miyampe. Yoano wānenene amba: “I pa mwanda wa dijina dyandi pobatalukile kebenda.” (3 Yoano 7) Pano Yoano wādi wisambila padi Leza (tala vese 6), nanshi bishima “i pa mwanda wa dijina dyandi” bifunkila pa dijina dya Yehova. Bano banabetu byobādi mu kipwilo kya bwine Kidishitu, o mwanda nanshi bādi bafwaninwe kutambulwa na kyanga. Kyo kine kyālembele Yoano amba: “Batwe, tufwaninwe kutundaila na kizaji bantu badi namino’ba, amba twikale bengidi nabo mu bubine.”​—3 Yoano 8.

Yoano kālembēlepo’tu Ngaiusa enka pa mwanda wa kumufwija’ko kete. Yoano wādi usaka ne kumukwasha mwa kulwila na makambakano makomo. Kimfwa, muntu umo wa mu kipwilo kya bwine Kidishitu witwa bu Deotefese kādipo usaka kulombola kizaji ku bene Kidishitu bendakana. Kadi wādi ukankaja’nka ne bakwabo baleke kulombola kizaji.​—3 Yoano 9, 10.

Kibamweka’mba, bene Kidishitu ba kikōkeji kebādipo basaka kushikata kwa Deotefese nansha shi kudi mukenga. Wādi usenswe kifuko kibajinji mu kipwilo, kādipo utambula na bulēme kintu nansha kimo kitamba kudi Yoano, kadi wādi unenena batumibwa ne bantu bakwabo bintu byampikwa kwendela’mo. Nansha Yoano byākamutelelepo bu mufundiji wa bubela, Deotefese wādi ufutulula lupusa lwa batumibwa. Deotefese byaādi usaka bukatampe ne mwikadilo wandi wampikwa kufwaninwa ku bene Kidishitu, byālengeje kikōkeji kyandi kitatanwe. Kimfwa kya Deotefese kilombola lupusa lubi lubwanya kusambakanya bantu babila bukata ne betatula mu kipwilo. Pa kino Yoano wāsapwidile Ngaiusa enka ne batwe bene kumo amba: “Abe kokeula byobya bibi.”​—3 Yoano 11.

Demeteusa wādi mwishile na Deotefese, o mwanda Yoano wāmutelele bu muntu muyampe. Yoano wālembele amba: “Demeteusa unenenwanga biyampe . . . I bine, batwe netu, tusapulanga bukamoni pa mwanda wandi, kadi uyukile amba bukamoni botusapula i bwa bine.” (3 Yoano 12) Padi Demeteusa wādi usakilwa bukwashi bwa Ngaiusa, ne kadi padi Yoano wa Busatu wādi mukanda wa mutumibwa wa madingi ne wa kuyukanya Demeteusa. Pakwabo Demeteusa ye wākapele Ngaiusa uno mukanda. Byaādi mutumwa wa Yoano, nansha padi mutadi wendakana, bimweka’mba Demeteusa wakomeneje myanda yālembele Yoano.

Mwanda waka Yoano wāsoñenye Ngaiusa endelele na kulombola kizaji nansha byaādi kala ulonga namino? Le Yoano wāmwene amba Ngaiusa usakilwa kukankamikwa bininge? Lelo mutumibwa wādi ulangalanga’mba Ngaiusa ukekaka kulombola kizaji pa mwanda wa Deotefese wādi wela panja pa kipwilo bene Kidishitu ba kizaji? Mu ino myanda yonso, Yoano wākulupije Ngaiusa amba: “Yewa ulonga biyampe i mutambe kwa Leza.” (3 Yoano 11) Buno bo bubinga bukatampe bwa kulongela biyampe ne kwendelela na kwibilonga nyeke.

Le mukanda wa Yoano wākankamikile Ngaiusa endelele na kulombola kizaji? Kulamwa kwālaminwe 3 Yoano mu mikanda ya mu Bible mitabijwe ne byoukyendelela na kukankamika bantu bakwabo beule “byobya biyampe,” bilombola’mba wāmukankamikile.

Ketuyukilepo myanda yonso itala Ngaiusa mwanetu muswedibwe wa pa kala. Nansha nankyo, ino myanda mityetye’tu ya mu būmi bwandi ibwanya kwitufundija bintu bivule.

Kibajinji, padi bavule motudi bayukile bubine kupityila ku bantu ba kikōkeji badi na mutyima wa kwiya kwitusapwila. Na bubine, ke bantu bonsopo badi mu kipwilo kya bwine Kidishitu dyalelo bendanga kulampe mwanda wa kukasapula myanda miyampe. Inoko, pamo bwa Ngaiusa, tubwanya netu mu muswelo kampanda kukwatanya ne kukankamika boba bendakana, kimfwa mutadi wa kipindi ne wandi mukaji. Nansha kadi tubwanya kukwatakanya mu miswelo mipotoloke batutu ne bakaka betuma mu kipindi kikwabo kya mu yabo ntanda nansha ke boba benda mu ntanda-bene mwanda wa kukengidila kokwa kusakilwa basapudi bavule ba Bulopwe. Nanshi twikalei “na kibidiji kya kutundaila beni.”​—Loma 12:13; 1 Temote 5:9, 10.

Kya bubidi, ketufwaninwepo kutulumuka shi kitatyi kimo kubaikala makambakano a kufutulula lupusa mu kipwilo dyalelo. Lupusa lwa mutumibwa Yoano lwāfutulwilwe’nka na mwāfutulwidilwe ne lwa mutubwa Polo. (2 Kodinda 10:7-12; 12:11-13) Penepa le tufwaninwe kulonga namani shi bantu bamo mu kipwilo baloñanga uno muswelo? Polo wādingile Temote amba: “Umpika wa Mfumwetu kafwaninwepo kūmana, ino ufwaninwe kwikala mutūkanye ku bonso, muyuke kufundija, uyukile kwīfula shi abamulubila, ufundija boba ba lupata na kutalala.” Shi twīfula kitatyi kyobetukolomona, nabya bikalengeja boba betufutula balemunune mumweno wabo. Kadi Yehova ubwanya kwibapa “kwalamuka pa mutyima, kutwala ku buyuki bwinebwine bwa bubine.”​—2 Temote 2:24, 25.

Kya busatu, banabetu bene Kidishitu bengidila Yehova na kikōkeji nansha ke mu kupangwapangwa bafwaninwe kutebwa mutyima ne kufwijibwa’ko bya binebine pa mwanda wa lwendo lwabo lwa kikōkeji. Na bubine mutumibwa Yoano wākankamikile Ngaiusa ne kumukulupija amba wādi ulonga biyampe. Bakulumpe nabo dyalelo bafwaninwe kwiula kimfwa kya Yoano na kukankamika batutu ne bakaka amba baleke ‘kukōka.’​—Isaya 40:31; 1 Tesalonika 5:11.

Mukanda wa mutumibwa Yoano waātumine Ngaiusa, o mukanda mwīpi bininge mu mikanda yonso ya mu Bible, kadi mu bilembwa bya Kingidiki udi’tu enka na bishima 219. Nansha nankyo, udi bine na mvubu mikatampe ku bene Kidishitu dyalelo.