5. Bonakanya Pano Panshi

“[Leza ukonakanya] boba bonakanya panopanshi.”—KUSOKWELWA 11:18.

● Mukelenge Pirri wingilanga kaji ka kukeka malevu mu kibundi kya Kpor, mu Nijeria. Mwingilo wandi waonenwe na mabimbi a pitolo pa mema (marée noire) mu Musanza wa Nijer. Pirri unena’mba: “Aipaile mwita wetu, kona bikoba byetu, ne tunonga twetu. Nabulwe ne mwa kumwena muswelo.”

I BIKA BINE BILONGEKA? Bayuki bamo banenanga’mba mwaka ne mwaka kudi mantoni a malitele midiyo 6 ne kipindi elwa mu tulunga-lui ntanda yonso. Bimonwa amba kintu kya malitele 50 pa katwa i mapalashitike alela’po kintu kya myaka tutwa kubola mpika. Kutentekela pa kukusakanya busala pano pa ntanda, bantu aba bakubija bintu bya kipangila mu muswelo uleta bulanda. Bwifundi bulombola amba pa kusaka ntanda ijokeje dipya byobya byonwa mu mwaka umo, kufwaninwe kupita mwaka umo ne makweji atano. Julunale Sydney Morning Herald wa mu Ostrali unena’mba: “Shi bantu bendelela kona’nka namino, pa kufika mu 2035, biketulomba imbuo ibidi ya ntanda.”

BAVULE BANENA’PO NAMANI? Batwe bantu tudi na ñeni. Tukokeja kupwa ano makambakano ne kulama ntanda.

LE BINO BYOBANENA I BYA BINE? Bantu bavule nansha bitango bingila mingilo mikatampe ababweja’ko buyuki bwa mwa kulamina bintu bitujokolokele. Ino, busala bukyendelela kusalakanibwa mpata pa ino ntanda ponso.

LE ULANGA’PO NAMANI? Lelo tusakilwa Leza alonge’po kintu ne kukinga umbuo wetu kutyina wakonakanibwa na bantu—enka na mwalaile kulonga?

Kutentekela pa bupolofeto butano botwabandaula, Bible i mulaye kadi ne bintu biyampe bya kulongeka mu mafuku a mfulo. Tala’po bidi kimfwa kimo mu bupolofeto bwa busamba.

[Bushintuludi pa paje 8]

“Nemonanga bwa ami wadi mu paladisa ya ndoe, ino naenda mu bakusakanya bulembe.”—ERIN TAMBER, MWIKADI WA MU GOLFE DU MEXIQUE, MU ÉTATS-UNIS, WISAMBILA PA BYAKUMINE MABIMBI A PITOLO PA MEMA MU 2010 MU YABO NTANDA.

[Kapango pa paje 8]

Lelo Leza ye Mwine Ulengeja Bino Bintu?

Bible byaālaile ngikadilo imbi yotumona dyalelo, lelo kino kilombola’mba Leza ye mwine ulengeja’yo? Lelo aye ye ulengeja masusu etu? Ukokeja kutana malondololo asangaja ku bino bipangujo mu shapita wa 11 wa dibuku Lelo I Bika Bine Bifundija Bible? dilupwilwe na Batumoni ba Yehova.

[Kutambile Kifwatulo pa paje 8]

U.S. Coast Guard photo