KIFUNDWA 33
Byobya Bisa Kulonga Bulopwe bwa Leza
Bulopwe bwa Leza buludikanga kala. Panopano ponka busa kushinta ino ntanda bya binebine. Leka tubandaule’ko bintu bimo biyampe byokokeja kutengela mu buludiki bwa buno Bulopwe.
1. Le Bulopwe bwa Leza bukaleta ndoe ne boloke muswelo’ka?
Yesu, Mulopwe wa Bulopwe bwa Leza, usa konakanya bantu babi ne maludiki mabi ku divita dya Amakedona. (Kusokwelwa 16:14, 16) Mu kine kitatyi’kyo, mo mukafikidila ne pa mfulo uno mulao wa mu Bible unena’mba: “Kubashala kakitatyi katyetye’tu, babi kebakekala’kopo monka.” (Ñimbo ya Mitōto 37:10) Yesu ukengidija buno Bulopwe mwanda wa kuyuja pano pa ntanda ponso ndoe ne boloke.—Tangai Isaya 11:4.
2. Le būmi bukekala namani pakalongwa kiswa-mutyima kya Leza pano pa ntanda?
Mu buludiki bwa Bulopwe bwa Leza, “boloke bakapyananga ntanda, kadi bakekalanga’po nyeke.” (Ñimbo ya Mitōto 37:29) Langa’po bidi kwikala mu ntanda muyudile bantu bonka boloke basenswe Yehova kadi besenswe abo bonso! Kutupu wa kubela, kadi bonso bekele na būmi bwa nyeke.
3. Le i bika bikalonga Bulopwe bwa Leza shi bubapu konakanya babi?
Shi babi abaonakanibwa, Yesu ukaludika bu Mulopwe mu bula bwa myaka 1 000. Mu kino kitatyi, aye pamo ne bantu 144 000 bakaludika nabo, bakakwasha bantu pano pa ntanda bekale ke babwaninine ne bampikwa bubi. Ku mfulo kwa ino myaka kanunu, ntanda ikalamuka ke paladisa milumbuluke, miyule’po bantu ba nsangaji, bamwena mu kukōkela bijila bya Yehova. Pene’po Yesu ukalwija Shandi, Yehova, buludiki. Pano, po ‘pakapandulwa dijina’ dya Yehova mu muswelo okedyapandwilwe kashā. (Mateo 6:9, 10) Kikamweka patōka’mba Yehova ye Muludiki muyampe, utele mutyima babikalwa bandi. Ebiya Yehova ukonakanya Satana, bandemona, ne bantu bonso batonga kutombokela buludiki Bwandi. (Kusokwelwa 20:7-10) Ngikadilo milumbuluke ikaletwa na Bulopwe bwa Leza ikalādila nyeke ne nyekeke.
LANGULUKA BININGE
Bandaula, umone mwanda waka tubwanya kukulupila’mba Leza ukengidija Bulopwe mwanda wa kufikidija byobya bilaile Bible pa mafuku a kumeso.
4. Bulopwe bwa Leza busa kufudija imbikalo ya bantu
“Muntu [i mubikale] muntu mwanda wa kumusanshija.” (Musapudi 8:9) Yehova, kupityila ku Bulopwe bwandi, ukalongolola byonso byonenwe na bantu bakondame.
Tangai Danyele 2:44 ne 2 Bene Tesalonika 1:6-8, ne kwisambila pa bino bipangujo:
Lelo Yehova pamo ne wandi Mwana, Yesu, bakalonga bika ku ano maludiki a bantu ne boba bonso beakwatakenye?
Byobya byowefunda padi Yehova ne Yesu bibakukulupija namani amba byobya byobakalonga, bakebilonga na boloke, kwampikwa mboloji?
5. Yesu i Mulopwe muyampe
Yesu byadi Mulopwe wa Bulopwe bwa Leza, ukalonga bivule pa mwanda wa kamweno ka babikalwa bandi pano panshi. Talai VIDEO mumone byobya bilongele kala Yesu mobilombwela’mba udi na mutyima, kadi udi na bukomo bumupēle Leza bwa kukwasha bantu.
Pādi Yesu pano pa ntanda, wāletele ntompejo ya byobya bikalonga Bulopwe bwa Leza. Le i madyese’ka pa ano alombwelwe pano otengēle kwimwena? Tangai bino bisonekwa bitela ano madyese.
BYĀLONGELE YESU PAĀDI PANO PA NTANDA . . . |
BYOBYA BIKALONGA YESU, AYE MŪLU . . . |
|---|---|
|
|
|
|
|
|
|
|
6. Bulopwe bwa Leza busa kuleta būmi bulumbuluke bwa kumeso
Bulopwe bukafikidija ne pa mfulo mpango imbajinjibajinji ya Yehova itala bantu. Bantu bakekala na būmi bwa nyeke mu paladisa pano pa ntanda. Talai VIDEO mumone byobya bilonga Yehova kupityila kudi Yesu, Mwana wandi, mwanda wa kufikidija mpango Yandi.
Tangai Ñimbo ya Mitōto 145:16, ne kwisambila pa kino kipangujo:
Le ubeivwana namani pa kuyuka’mba Yehova ukavuija “bisaka mutyima wa bintu byonso byūmi”?
BANTU BAMO BANENANGA’MBA: “Shi twingidile bonso umbumo, tubwanya kupwija makambakano adi mu ino ntanda.”
Le i makambakano’ka akapwija Bulopwe bwa Leza keabwanyapo kupwija imbikalo ya bantu?
MU KĪPI
Bulopwe bwa Leza bukafikidija kitungo kyabo. Bukalamuna ntanda yonso ke paladisa miyule’po bantu bayampe batōta Yehova nyeke ne nyeke.
Pitulukai’mo
Le Bulopwe bwa Leza bukapandula namani dijina dya Yehova?
Mwanda waka tubwanya kukulupila’mba Bulopwe bwa Leza bukafikidija milao ilaile Bible?
Le abe, i kintu’ka kikalonga Bulopwe kyotengēle nakampata kumona?
KIMBA
Tala mushintulwila Amakedona.
“Le Divita dya Amakedona I Bika?” (Kishinte kya pa Entelenete)
Tala myanda ikalongeka mu bula bwa myaka 1 000 ne ku mfulo kwayo.
“Le I Bika Bikalongeka mu Difuku dya Butyibi?” (Kiteba kya Mulami, 1 Kweji 10, 2012)
Tala muswelo ubwanya bisaka kulangulukila abo bonso pamo pa madyese akaleta Bulopwe.
Mu kipindi “Nadi na Bipangujo Bivule Bimvutakanya Ñeni,” tala ntomboki umo wa bya politike mwaatanine malondololo ku bipangujo byaadi nabyo.
“Bible Ushintanga Būmi” (Kiteba kya Mulami, 1 Kweji 1, 2012)