Ingidija Diteba dya jw.org mu Busapudi

Diteba dyetu dya Entelenete i kingidilwa kitukwasha tusambakanye myanda miyampe “ne kulakula kwine kwa ntanda.” (Bil. 1:8) Bantu bavule kebatwelangapo pa jw.org abo bene. Ino, bediyukanga enka shi abalombolwa’dyo na musapudi.

Mutadi umo wendakana watentwile na yandi telefone video inena’mba, Mwanda Waka Twifunde Bible? ne kwiitadija ponso paamwene mukenga. Kimfwa, paadi wenda mu busapudi bwa ku njibo ne njibo wadi unena’mba: “Mpempulanga bantu mu kitatyi kityetye mwanda wa kwibakwasha batane malondololo ku bino bipangujo bisatu bya kamweno: Mwanda waka ntanda i miyule makambakano? Le Leza ukeapwija namani? Pano’ko bidi tubwanya kulwa nao namani? Ino video mīpi ilondolola ku bino bipangujo.” Kupwa wafinya pa buton bwa kutadija’yo, katale musa kulongela mwinē njibo. Ino video isangajanga bantu bavule, kekudipo usakanga kutala kungi kufika’nka ne byoipwa. Kupwa mutadi wa kipindi wanena’mba: “Abe mwine ubaivwana kala amba ubwanya kulomba kifundwa kya Bible ku Entelenete. Enka pondi pano, mbwanya’tu kukulombola bukidibukidi mwifundilwanga.” Shi mwinē njibo waitabija, nabya mulombole mwifundilwanga na kwingidija boloshile Myanda Miyampe. Shi mwinē njibo kadipo na kitatyi, nabya kwatai nandi mpangiko ya kumulombola mwifundilwanga mu bupempudi bukwabo. Kitatyi kyadi kyenda uno mutadi kukatoma kafé ku leshitola mu kitatyi kya kukōkolokwa, wadi unenanga enka namino ku muntu wadi ushikata kubwipi nandi pa kupwa kwisamba nandi mīsambo ya bulunda. Lelo wingidijanga diteba dya jw.org mu busapudi?