Kubutulwa Monka—Dyo Dishinda dya Lupandilo?

LELO ukalondolola namani kino kipangujo kya amba: “Lelo wi mubutulwe monka?” Batōtyi bavule kujokoloka ntanda balondololanga na bukomo bonso amba, “I amo!” Bakulupile amba kubutulwa monka i kiyukeno kya Bene Kidishitu bonso ba bine kadi dyo dishinda dimo kete dya lupandilo. Betabije mulangwe wa bendeji ba bipwilo pamo bwa Robert C. Sproul, mufundi wa teoloji, waandikile amba: “Shi muntu kabutwilwepo monka, . . . nankyo kadipo Mwine Kidishitu.”

Le nobe ubadilwa mu boba bakulupile amba kubutulwa monka i dishinda dya lupandilo? Shi i amo, nabya usakilanga kukwasha babutule ne balunda nobe basokole dino dishinda ne kushilula kunangila’mo. Pa kusaka babwanye’byo, bafwaninwe kuyuka dibajinji kwishila kudi pa muntu mubutulwe monka ne yewa wampikwa kubutulwa monka. Le ukebashintulwila namani buluji bwa kubutulwa monka?

Bantu bavule betabije amba bishima “kubutulwa monka” bifunkila pa muntu utyipa kwingidija Leza ne Kidishitu, ne pa kino, washinta kakidipo mufwe ku mushipiditu ino ke mūmi ku mushipiditu. Na bubine, dibuku dimo dishintulula bishima dya panopano dishintulula kubutulwa monka kwa muntu bu “Mwine Kidishitu walamunwa dipya ne kutonga kwitabija nakampata pa kupwa kuyuka bivule bya mu kipwilo.”—Merriam-Webster’s Collegiate Dictionary—Eleventh Edition.

Lelo ukatulumuka pa kuyuka amba Bible ketabijepo ino nshintulwilo? Le usaka kuyuka bine bifundija Kinenwa kya Leza pa mwanda utala kubutulwa monka? Usa kumwena mu kubandaula na katentekeji uno mwanda. Mwanda waka? Mwanda kwivwanija mushintulwila kubutulwa monka kukashinta būmi bobe ne byobya byotengele kumeso.

I Bika Bifundija Bible?

Kifuko kimo kete mu Bible yense kitelelwe’po bishima “kubutulwa monka” i enka mu Yoano 3:1-12, mulombola mīsambo mikatampe yēsambile Yesu na mwendeji umo wa kipwilo mu Yelusalema. Tala ino nsekununi mu kapango kadi mu kino kishinte iselelwe monka moikadile mu Bible. Tubakukankamika utange’yo na katentekeji.

Mu ino nsekununi, Yesu unena ukoma myanda palapala itala pa ‘kubutulwa kupya.’a Kunena na bubine, mīsambo ya Yesu itukwasha tulondolole ku bino bipangujo bikatampe bitano:

◼ Mwanda waka kubutulwa kupya kudi na mvubu?

◼ Le i batwe bene ba kutonga kubutulwa kupya?

◼ Lelo kudi na kitungo’ka?

◼ Le kulongekanga namani?

◼ Lelo kushintanga namani kipwano kya muntu ubutulwa kupya?

Tubandaulei bino bipangujo kimo ne kimo.

Kubutulwa Kupya—Mwanda Waka Kudi na Mvubu?

YESU paādi wisamba na Nikodema wānene ukoma amba kubutulwa kupya, nansha kubutulwa monka, kudi na mvubu mikatampe. Le wālombwele’kyo patōka muswelo’ka?

Tala muswelo wākomene Yesu mvubu ya kubutulwa kupya mu mwisambo wandi na Nikodema. Wānene amba: “Shi muntu kabutwilwepo ne kokwa kūlu, nankyo kakebumonepo bulopwe bwa Leza, mhm.” (Yoano 3:3) Bishima “Shi” ne “kakebumonepo” bilombola patōka mvubu ya kubutulwa kupya. Tulete kimfwa: Shi muntu wanena’mba, “Shi dyuba keditambilepo, nankyo ketumonepo misanya,” usaka kunena’mba, pa kumona misanya, bilomba poso bidi dyuba ditambe. Mo monka ne Yesu nandi wānene amba i biyampe kubutulwa monka shi tusaka binebine kumona Bulopwe bwa Leza.

Ku mfulo, pa kukulupija muntu aleke kutatana, Yesu wānene amba: “Poso bidi ubutulwe kupya.” (Yoano 3:7) Nanshi mungya Yesu kubutulwa kupya i kisakibwa ku muntu usaka ‘kutwela mu Bulopwe bwa Leza.’—Yoano 3:5.

Ku meso a Yesu, kubutulwa kupya i mwanda wa mvubu mikatampe, o mwanda Bene Kidishitu bafwaninwe kuyukidiija senene uno mwanda. Kimfwa, le ulanga Mwine Kidishitu ye ufwaninwe kutonga kubutulwa monka?

[Bushintuludi pa paje 5]

“Shi dyuba keditambilepo, nankyo ketumonepo misanya”

Kubutulwa Kupya—Le I Muntu Mwine wa Kutonga?

LELO i ani ulengejanga muntu abutulwe dipya? Basapudi bamo pa kusomanya bemvwaniki babo babutulwe monka bu Bene Kidishitu, bapitulukanga mu bishima bya Yesu amba: “Poso bidi ubutulwe kupya.” (Yoano 3:7) Bano bengidi bengidijanga bino bishima bu lubila, amba, “Ufwaninwe kubutulwa monka!” Basapulanga amba mwitabije umo ne umo ufwaninwe kukōkela Yesu ne kulonga bintu bimulengeja abutulwe kupya. Kukwatañana na uno mulangilo, kubutulwa kupya ubaikala bu mwanda unenwe muntu mwine kutonga. Ino le byobyādi bisaka kunena Yesu kudi Nikodema?

Shi tutange na katentekeji binenwa bya Yesu tukamona amba kadipo usaka kufundija amba i muntu mwine wa kutonga shi usaka kubutulwa dipya nansha kasakilepo. Mwanda waka tunena namino? Kishima kya Kingidiki kyalamwinwe bu ‘kubutulwa monka’ kikokeja kwalamunwa ne bu ‘kubutulwa ne kokwa kūlu.’a Nanshi mungya munenena Bible pano ne popa, kubutulwa kupya kutambanga “kokwa kūlu”—ko kunena’mba “mūlu,” nansha ‘kudi Tata.’ (Yoano 19:11; Yakoba 1:17) Bine, i Leza ulengejanga’ko. —1 Yoano 3:9.

Shi tulame mu ñeni muneneno wa amba “kokwa kūlu,” kebiketukolelapo kwimvwanija mwanda waka muntu kakokejapo kutonga kubutulwa dipya. Langa’tu bidi mowabutwidilwe. Le i abe watongele mwa kubutwilwa? Mhm, ke abepo! I shobe walengeje ubutulwe. Mo monka netu ketukokejapo kubutulwa kupya shi Leza, Tata wetu wa mūlu, kalengejepo tubutulwe dipya. (Yoano 1:13) O mwanda mutumibwa Petelo wānene mokyendele amba: “Leza Shandya Mfumwetu Yesu Kidishitu ēkale mutōkwe aye, ponka pa lusa lwandi lukatampe, wetubutwile kupya.”—1 Petelo 1:3.

Lelo I Lubila?

Bamo bakokeja kwiipangula’mba, ‘Shi na bubine muntu kakokejapo kutonga kubutulwa kupya, mwanda waka Yesu wānene’mba: “Poso bidi ubutulwe kupya”?’ Kino i kipangujo kifwaninwe. Le kadi, shi Yesu wāletele lubila, nabya wādi wa kwitulomba tulonge kintu kitupite bukomo. Nankyo ke bikomo kwimvwana. Penepa tukevwanija namani buluji bwa binenwa bya amba poso bidi “ubutulwe kupya”?

Shi tutadije biyampe uno muneneno mungya ludimi lubajinjibajinji, ulombola amba Yesu kādipo usomanya nansha kuleta lubila. Ino aye ulombola’tu kisakibwa. Mu muneneno mukwabo, Yesu paānene amba ufwaninwe bidi “ubutulwe kupya,” wādi ulombola mwanda, kādipo usomanya bu mbila. O mwanda wānene amba: “Poso bidi ubutulwe kupya.”—Yoano 3:7.

Pa kumona kwishila kudi pa bukata bwa lubila ne kisakibwa, tala kino kimfwa. Langa shi mu kibundi mudi masomo palapala. Amo atūdilwe enka bana ba masomo bene kibundi, bashikete kufula kufula kwa kine kibundi’kya. Dyuba dimo, nsongwalume umo mweni walombe dilekitele wa masomo’a amba, “Ñandikei’ko nami.” Dilekitele wamunena’mba, “Pa kwiandikija poso bidi wikale mwine kibundi.” Eyo, dilekitele kamusomenyepo, mhm. Kanenepo mwana wa masomo’wa amba, “Ikala bidi mwine kibundi.” Ino wāmunena’mba. Dilekitele walombola mwanda udi’po—kisakibwa pa kufunda ku masomo’a. Mo monka, Yesu nandi paānene amba: “Poso bidi ubutulwe kupya,” wādi ulombola bitupu mwanda mwine—kisakibwa kine ku muntu usaka ‘kutwela mu Bulopwe bwa Leza.’

Uno mulangwe wa mfulo—ke Bulopwe bwa Leza kadi—uleta mulangwe mukwabo wa kubutulwa kupya. Wimanine pa kino kipangujo, Le kudi na kitungo’ka? Kuyuka malondololo a kino kipangujo o muswelo mwine wa kwimvwanija senene mushintulwila kubutulwa monka.

[Kunshi kwa dyani]

[Kifwatulo pa paje 6]

Le i kwiifwana’ka kudi pa kubutulwa kupya ne kubutulwa kwa muntu?

Kubutulwa Kupwa—Lelo Kudi na Kitungo’ka?

BAVULE betabije amba muntu ufwaninwe kubutulwa kupya shi usaka kutambula lupandilo lwa nyeke. Ino tala byānene Yesu mwine pa mwanda kitungo kine kya kubutwilwa dipya. Wānene amba: “Shi muntu kabutwilwepo ne kokwa kūlu, nankyo kakebumonepo bulopwe bwa Leza, mhm.” (Yoano 3:3) Nanshi kubutulwa monka i kisakibwa ku muntu usaka kukatwela mu Bulopwe bwa Leza, ino ke pa kukatumbulapo lupandilo. Bamo bakanena’mba: ‘Ino, mwene bino bishima bibidi—kutwela mu Bulopwe ne kutambula lupandilo—bifunkila pa mpalo imo yonka?’ Mhm, ke imopo. Pa kwimvwanija kwishila kudi’po, tubandaulei dibajinji buluji bwa bishima “bulopwe bwa Leza.”

Bulopwe i umbikalo. O mwanda nanshi bishima “bulopwe bwa Leza” bishintulula “umbikalo wa Leza.” Bible ufundija amba Yesu Kidishitu, “mwana muntu,” ye Mulopwe wa Bulopwe bwa Leza ne amba Kidishitu udi balopwe bakabikala nabo. (Danyele 7:1, 13, 14; Mateo 26:63, 64) Pakwabo kadi, kimonwa kyāpelwe mutumibwa Yoano kitusokwela amba boba bakabikala na Kidishitu i bantu batongwe “ku bisaka byonso, ne ba mu ndimi yonso, ne ba ku bantu bonso, ne ba ku mizo” kadi bo “bakukabikala panopantanda.” (Kusokwelwa 5:9, 10; 20:6) Kinenwa kya Leza kilombola kadi amba boba bakabikala bu balopwe i babunde “kaluombe katyetye” ka bantu 144000 “bakūdilwe panopanshi.”—Luka 12:32; Kusokwelwa 14:1, 3.

Le Bulopwe bwa Leza budi kwepi? “Bulopwe bwa Leza” bwitwanga ne bu “bulopwe bwa mūlu,” kintu kilombola amba Yesu ne balopwe bakabikala nabo bakekala mūlu. (Luka 8:10; Mateo. 13:11) Nanshi Bulopwe bwa Leza i umbikalo wa mūlu ubundilwe na Yesu ne kibumbo kya balopwe bakabikala nabo batongelwe mu bantu.

Penepo i bika byādi bisaka kunena Yesu pa kutela amba muntu usakilwa kubutulwa monka ‘pa kukatwela mu bulopwe bwa Leza’? wādi usaka kunena amba muntu ufwaninwe kubutulwa monka pa kusaka amba abikale na Kidishitu mūlu. Nanshi mu kīpi, kitungo kine kya kubutulwa kupya i mwanda wa kuteakanya’ko kibumbo kityetye kya bantu ba kukabikala mūlu.

Monka motwamwenanga, kubutulwa kupya kudi na mvubu, i Leza ulengeja’ko, ne kuteakanyanga kibumbo kya bantu ba kukabikala mūlu. Penepo kubutulwa kupya kulongekanga namani?

[Bushintuludi pa paje 7]

Kitungo kine kya kubutulwa kupya i mwanda wa kuteakanya’ko kibumbo kityetye kya bantu ba kukabikala mūlu

[Kifwatulo pa paje 7]

Yesu Kidishitu ne kibumbo kya balopwe bakabikala nabo batongelwe mu bantu bo babundile Bulopwe bwa Leza

Kubutulwa Kupya—Le Kulongekanga Namani?

YESU kālombwelepo Nikodema enka mvubu, mwanda, ne kitungo kine kya kubutwilwa kupya ino wāmusapwidile ne mulongekelanga kuno kubutulwa kupya. Yesu wānene amba: “Shi muntu kabutwilwepo ku mema ne ku Mushipiditu, nabya kakatwelapo mu bulopwe bwa Leza, ehe.” (Yoano 3:5) Nanshi muntu ubutulwanga monka ku mema ne ku mushipiditu. Ino le bino bishima “ku mema ne ku Mushipiditu” bifunkila pa bika?

‘Mema ne Mushipiditu’—Lelo I Bika?

Nikodema, byaādi mufundi wa mutōtelo wa Bayuda, kādipo widilwe muswelo wingidija Bisonekwa bya Kihebelu kishima “mushipiditu wa Leza”—bukomo bwa Leza bwingila bukokeja kutonona muntu alonge bintu bya nkuo. (Ngalwilo 41:38; Divilu 31:3; 1 Samwele 10:6) Penepa pāingidije Yesu kishima “mushipiditu,” Nikodema wāivwene amba i mushipiditu sandu, bukomo bwa Leza bwingila.

Lelo mema nao ātelele Yesu? Ivwana binkumenkume bisonekelwe byālongekele kumeso ne pa kupwa kwa mīsambo ya Yesu na Nikodema. Binkumenkume’bi bilombola amba Yoano Mubatyiji ne bana ba bwanga ba Yesu bādi babatyija bantu mu mema. (Yoano 1:19, 31; 3:22; 4:1-3) Ne kino kilongwa kyādi kiyukilwe senene mu Yelusalema. Nanshi pēsambile Yesu na Nikodema pa mwanda utala mema, Nikodema wāyukile amba Yesu katelangapo mema o-onso, i oa a kubatyija’mo bantu.a

Kubatyijibwa “mu Mushipiditu Sandu”

Shi ‘kubutulwa ku mema’ ko ako kubatyijibwa na mema, le penepo ‘kubutulwa ku mushipiditu’ nako i bika? Kumeso kwa Yesu kwisamba na Nikodema, Yoano Mubatyiji wāsapwile amba bantu bakabatyijibwa ke enkapo mu mema, ino i ne ku mushipiditu. Wānene amba: “Amiwa nemubatyija mu mema, ino aye ukemubatyija mu Mushipiditu Sandu.” (Mako 1:7, 8) Mako mulembi wa Evanjile ulombola musunsa umbajinji wāikele’ko luno lubatyijo. Usoneka’mba: “Penepo kala byo kwadipo nabya mu oa mafuku Yesu wafundukile ku Nazala, kibundi kya Ngadilea, ino wabatyijibwa kudi Yoano monka mu Yodano. Ebiya ponka pa kwabuka bitupu pa mema wamwene diulu ke disanika, ne Mushipiditu wamutumba pamo bwa nkunda.” (Mako 1:9, 10) Yesu pa kutubikwa mu mema, wābatyijibwe ku mema. Ino kitatyi kyaātambwile mushipiditu utamba mūlu, wābatyijibwe ku mushipiditu sandu.

Myaka isatu Yesu pa kupwa kubatyijibwa, wākulupije bandi bana ba bwanga amba: “Mukabatyijibwa mu Mushipiditu Sandu, napo kepakidipo mafuku mangi, mhm.” (Bilongwa 1:5) Le uno mwanda wāfikidile kitatyi’ka?

Mu difuku dya Pentekosa mu mwaka wa 33 K.K., kintu kya bana ba bwanga 120 ba Yesu bēbungile mu njibo mu Yelusalema. “Ponkapo kwebapulumukile kitūta bwa luvula lukatampe lwa malwa lupukuma, kyayūja ne njibo yonso mo badi bashikete. Ino kwebasokokela ndimi milale mubukata īkele’nka bwa mudilo, . . . , kadi abo bonsololo bayūlwa Mushipiditu Sandu.” (Bilongwa 2:1-4) Mu difuku’dya, bantu bakwabo mu Yelusalema basoñanibwa kubatyijibwa mu mema. Mutumibwa Petelo wālombola kibumbo kya bantu amba: “Alamukai pa mutyima mubatyijibwe bonso mu dijina dya Yesu Kidishitu, nankyo ko kulekelwa kwa myanda, ebiya mukatambula kyabuntu kya Mushipiditu Sandu.” Le bantu bālonga namani? “Boba basepelele mwanda wandi babatyijibwa; balundwako mu dyonka dyadyo difuku bantu bafika ne ku bu-tununu tusatu.”—Bilongwa 2:38, 41.

Matabula Abidi

Le ino mbatyijo itala namani pa kubutulwa kupya? Ilombola amba kubutulwa kupya kulongekanga mu matabula abidi. Vuluka amba Yesu wābatyijibwe bidi mu mema. Ebiya wātambula mushipiditu sandu. Ne bana ba bwanga babajinji nabo bābatyijibwe mu mema (bamo na Yoano Mubatyiji), ebiya bātambula mushipiditu sandu. (Yoano 1:26-36) Mo monka ne bantu 3000 bāitabije ne kubatyija bābatyijibwa mu mema, ebiya kupwa ke bātambula mushipiditu sandu.

Na kulama ino mbatyijo yālongekele mu Pentekosa 33 K.K., i muswelo’ka ubwanya kulongeka kubutulwa kupya dyalelo? I muswelo umo onka na mobyāikadile mu mafuku a batumibwa ne bana ba bwanga babajinji ba Yesu. Dibajinji, muntu ufwaninwe kwisāsa ku bubi bwandi, wāalamuka ku mwiendelejo wandi umbi, wapāna būmi bwandi kudi Yehova kumutōta ne kumwingidila, ne kulombola ku bonso kuno kwipāna kwandi na kubatyijibwa mu mema. Ebiya, shi Leza wāmutonge akabikale mu Bulopwe Bwandi, nankyo washingwa māni na mushipiditu sandu. Ditabula dibajinji (kubatyijibwa mu mema) ditoñwanga na muntu mwine, ebiya dya bubidi (kubatyijibwa na mushipiditu) ditoñwanga na Leza. Shi muntu wābatyijibwa ino mbatyijo yonso ibidi, wabutulwa kupya.

Penepa mu mwisambo wa Yesu na Nikodema, mwanda waka Yesu wātelele ‘kubutulwa ku mema ne ku Mushipiditu’? I mwanda’tu wa kukomeneja kushinta kushintanga yewa ubatyijibwa mu mema ne mu mushipiditu. Kishinte kilonda’ko kisa kubandaula uno mwanda utala kubutulwa kupya.

[Kunshi kwa dyani]

[Kifwatulo pa paje 9]

Yoano wābatyije mu mema Bene Isalela bēsāshile

Kubutulwa Kupya—Le Kuletanga Kushinta’ka?

MWANDA waka Yesu wāingidije kishima ‘kubutulwa ku mushipiditu’ pa kwisambila pa kubatyijibwa ku mushipiditu? (Yoano 3:5) Mu muneneno wa kyelekejo “kubutulwa” kushintululanga ne “ngalwilo,” kimfwa mu bishima “muzo ubabutulwa.” O mwanda kishima ‘kubutulwa kupya’ kufunkila pa “ngalwilo impya” Nanshi muneneno wa kyelekejo ‘kubutulwa’ ne ‘kubutulwa kupya’ bileta mulangwe wa ngalwilo impya ya kipwano kya boba babatyijibwa ku mushipiditu sandu na Leza. Le kino kishintanga namani kipwano kya muntu?

Mutumibwa Polo pa kushintulula muteakenyanga Leza bantu ba kukabikala mulu, wāingidije kyelekejo kya mu būmi bwa kisaka. Wāsonekele Bene Kidishitu ba mu abo mafuku amba bakekalanga “bu-bāna” ne Leza ukekalanga nabo “bwa bāna.” (Ngalatea 4:5; Bahebelu 12:7) Pa kwivwanija kimfwa kya kulela bana mokikwashisha muntu ayuke muswelo ushintanga boba babatyijibwa ku mushipiditu sandu, tujokele bidi ku kimfwa kya nsongwalume usaka kwiandikija ku masomo a bana ba masomo bene kibundi.

Mushintyilanga Mwana wa Bulelwa

Mu kimfwa kishele kunyuma, nsongwalume kadipo ubwanya kwiandikija ku masomo mwanda kabadilwapo mu bana bene kibundi. Pano langa shi difuku dimo, bintu bibashinta. Waitabijibwa kulelwa na mbutwile mwine kibundi mungya bijila. Le i bika bisa kushinta kudi uno nsongwalume? Byaalelwa bu mwana, pano ubwanya kwikala na kyepelo kimo na bankasampe bakwabo bene kibundi—kubadila’mo ne kya kwandikijibwa ku masomo. Bine, kulelwa kwandi kubashinta byepelo byandi byonso.

Kino kilombola biyampe byobya bifikilanga boba bonso babutulwa dipya. Tala kwiifwana kumokumo kudi’po. Nsongwalume wa mu kimfwa uketabijibwa ku masomo enka shi wabwanya bisakibwa, ke kubadilwa mu bana ba kibundi kadi. Ino ku bukomo bwandi kabwanyapo kino kisakibwa. Mo monka ne bantu bamo baketabijibwa mu Bulopwe bwa Leza, nansha umbikalo wa mūlu, enka shi ababwanya kisakibwa—ke kya ‘kubutulwa kupya’ kadi. Napo abo bene na bukomo bwabo kebabwanyapo kino kisakibwa, mwanda i Leza mwine ulengejanga muntu ‘abutulwe kupya.’

Lelo i bika byāshinta ngikadilo ya nsongwalume? I byepelo bya bulelwa. Bine, bino byepelo kebishintyilepo nsongwalume. Nansha byaapwa kulelwa, ukidi enka muntu’wa. Inoko byaabwanya bisakibwa bya bulelwa mungya bijila, o mwanda wamone kyepelo kipya. Eyo, wamone ngalwilo impya—kubutulwa kupya. Pano ke mwana, udi na kyepelo kya kwiandikija ku masomo ne kwikala bu mwana wa mbutwile wa bulelwa.

Yehova nandi i mushinte ngikadilo ya kibumbo kya bantu bampikwa kubwaninina na kwibapa ngalwilo ya kulelwa bu bandi bana. Mutumibwa Polo ubadilwa mu kino kibumbo, wāsonekēle banababo betabije amba: “Mwatambwile Mushipiditu wa bumwana po twita’mba; [Abba!] Tata! Aye Mwine Mushipiditu witabijanga bwa kamoni ku mishipiditu yetu’mba: Mudi bāna ba Leza.” (Loma 8:15, 16) I amo, kupityila ku misoñanya ya bulelwa, bano Bene Kidishitu ababadilwa mu kisaka kya Leza, ke “bāna ba Leza.”—1 Yoano 3:1; 2 Kodinda 6:18.

Shako kuno kulelwa na Leza ke kushintangapo bano balelwa, mwanda bakidi bakubulwa kubwaninina. (1 Yoano 1:8) Inoko monka mwābwejeje’ko Polo, pa kupwa kubwanya bisakibwa bya bulelwa, bano bantu i batambule kyepelo kipya. Ponka na ponka, mushipiditu wa Leza ubakune mu bano bana ba bulelwa kikulupiji kya amba bakekala na Kidishitu mūlu. (1 Yoano 3:2) Kino kikulupiji kya binebine kiletwa na mushipiditu sandu i kibape mumweno umpya wa būmi. (2 Kodinda 1:21, 22) Eyo, abamone ngalwilo impya—kubutulwa kupya.

Bible wisambila pa bano bana ba bulelwa ba Leza amba: “Bakēkalanga bapidishitu ba Leza, ne bā Kidishitu, ne kukabikala nandi myaka kanunu.” (Kusokwelwa 20:6) Bano bana ba bulelwa ba Leza bakekalanga balopwe pamo na Kidishitu mu Bulopwe bwa Leza, umbikalo wa momwa mūlu. Mutumibwa Petelo wālombwele banababo betabije amba bakatambula “bupyane bwa kubulwa kubola, nansha kujilulwa, nansha kujimina kwine mpika,” ‘bwibabikilwe mūlu.’ (1 Petelo 1:3, 4) Bine, buno i bupyani bulēme’po kashā!

Inoko uno mwanda utala Bulopwe i mulupule kipangujo. Shi boba babutulwa kupya bakekala balopwe momwa mūlu, lelo bakabikela pa bāni? Kino kipangujo kisa kubaundaulwa mu kishinte kilonda’ko.

[Kifwatulo pa paje 10]

Le i bika byānene Polo bitala pa bulelwa?

Bulopwe ku Bamo, Byabuyabuya ku Bavule

TAMBA mu mafuku a batumibwa, Leza utoñanga mu bantu kibalwa kityetye kya Bene Kidishitu ba kikōkeji bu bana ba bulelwa. Kushinta kushinta bano bana ba bulelwa i kutuntulu kulengeja Kinenwa kya Leza kitele’ko bu kubutulwa dipya. Kitungo kya kubutulwa dipya i kuteakanya’ko bengidi ba Leza babutulwa’ba bekale balopwe momwa mūlu. (2 Temote 2:12) Kumeso kwa kubikala, basangulwanga mu lufu ne kupebwa būmi bwa mūlu. (Loma 6:3-5) Bano’ba bo “bakukabikala panopantanda” abo’ko bekele mūlu.—Kusokwelwa 5:10; 11:15.

Inoko Kinenwa kya Leza kinena’mba kutentekela pa boba babutulwa kupya, kudi bantu bakwabo bakatambula lupandilo lwa nyeke. Mu Bible (mu Bisonekwa bya Kihebelu ne Bisonekwa bya Kingidiki bya Bwine Kidishitu) i mutelwe mpango ya Leza ya kupandija bino bibumbo byonso bibidi bya bantu—kibumbo kimo kityetye kya balopwe ba kukabikala mūlu, ne kikwabo kikatampe kya bakabikalwa na buno bulopwe pano pa ntanda. Kimfwa, tala byāsonekele mutumibwa Yoano ku banababo betabije babutwilwe kupya. Wānene pa mwanda utala Yesu amba: “Aye Mwine i kipwanino kya myanda yetu; kadi ke kya yetupo [kibumbo kityetye] yonka, mhm, i ne kya ya bapanopantanda bonso [kibumbo kikatampe].”—1 Yoano 2:2.

Mutumibwa Polo nandi wāsonekele amba: “Mwanda bipangwa nabyo [kibumbo kikatampe] bitengele, bitala meso so-o, kukasokokelwa kwa bāna ba Leza [kibumbo kityetye].” (Loma 8:19-21) Le tukokeja kwivwanija namani binenwa bya mutumibwa Yoano ne mutumibwa Polo? I namino: Boba babutulwa kupya bakabadilwa mu umbikalo wa mūlu. Mwanda waka? Mwanda wa kuletela midiyo ne midiyo ya bantu byabuyabuya bya nyeke, ke babikalwa ba umbikalo wa Leza bakekala pano panshi kadi. O mwanda Yesu wāfundije bana bandi ba bwanga balombele amba: “Bulopwe bobe bufike. Muswidile mutyima obe mūlu ne panopantanda pene i monka.”—Mateo 6:10.

Buno bubinebine bwa lupandilo lwa bibumbo bibidi lutanwa ne mu Bisonekwa bya Kihebelu. Tala kimfwa byānene Yehova kudi Abalahama nkambulula wa Yesu amba: “Mu lukunwa lobe [kibumbo kityetye] e mo ikeselwanga dyese mizo yonso ya panopanshi [kibumbo kikatampe].” (Ngalwilo 22:18) I amo, nanshi madyese adi a kukapebwa mizo yonso kupityila mu “lukunwa” lwa Abalahama.

Le “lukunwa” lwine i ani? I Yesu Kidishitu, pamo ne bana ba Leza ba bulelwa babutwilwe dipya. Mutumibwa Polo wāshintulwile amba: “Byo mudi bā Kidishitu mudi ba lukunwa lwa Abalahama.” (Ngalatea 3:16, 29) Penepo i madyese’ka apebwa bantu ba mizo kupityila ku “lukunwa”? I madyese a kupwana na Leza monka ne kumona būmi bwampikwa mfulo mu paladisa pano pa ntanda. Davida mulembi wa mitōto wālaile amba: “Boloke bakapyananga ntanda, ne kwikala monka nyeke.”—Mitōto 37:29; Isaya 45:18; Kusokwelwa 21:1-5.

Bine, buludiki bwa mūlu i bubikilwe bamo, ino byabuyabuya bya bulopwe bwa mūlu i bipebwe bavule, kubadila’mo ne būmi bwa nyeke pano pa ntanda ne madyese onso obukaleta. Lelo wabulwa’po, abe ne kisaka kyobe, kubadilwa mu boba bakamwena mu byabuyabuya bya nyeke bikaletwa na Bulopwe bwa Leza!