Muena budipuekeshi wa mu Afrike uvua munange Dîyi dia Nzambi

BANTU batu balua mu Afrike batu bakema bua kumona ne: bitu bipepele be bua kutuadija kuyikila ne bantu malu a mu Bible. Nkonko bu mudi: “Bukalenge bua Nzambi ntshinyi?” anyi “Ntatu bu mudi biyole bia nzala, masama, mvita ne dibunda bibawu nebijikaku kashidi anyi?” itu ikoka bantu bua bobu kuteleja mandamuna ayi. Ne disanka dionso, ba bungi batu banyishila muenyi udi mubendele bua kubaleja mandamuna a mu Bible. Ebi bitu misangu mivule bifikisha ku dilonga dia Bible pa tshibidilu. Patu balongi badiunda mu nyuma, batu balua bena Kristo batambule.

Umue wa ku bena mu Afrike ba kumpala bakitaba lumu luimpe mushindu eu ngudibu batele mu Bible mu Bienzedi 8:26-40. Uvua muena Atiopa uvua muye ku Yelushalema bua kutendelela Nzambi mulelela, Yehowa.

Anu mudibu baleje mu tshimfuanyi tshidi kuinshi eku, muena Atiopa eu udi upingana kuende mu ditempu, mukangule muvungu udiye wenda ubala. Muntu kampanda udiye kayi mumanye udi ulua pabuipi nende ne umuebeja ne: “Udi mujingulule bualu bûdi ubala, anyi?” Ne budipuekeshi buonso, muena Atiopa eu udi witaba mudiye dijinga ne diambuluisha ne udi usengelela muntu eu, Filipo muambi wa lumu luimpe muena Kristo bua abande mu ditempu. Pashishe udi ulomba Filipo bua amupeshe diumvuija dia Mufundu udiye mufume ku dibala. Filipo udi umumvuija ne: mulayi eu udi wakula bua lufu ludi Masiya, Yezu Kristo, mufume ku difua. Filipo udi umuambila kabidi malu makuabu adi atangila ‘lumu luimpe lua Yezu,’ ne kakuyi mpata udi umuambila kabidi bua dibika diende ku lufu.

Yeye mumane kumvua malongesha malelela aa mimpe, muena Atiopa udi ujinga bua kulua muyidi wa Yezu ne webeja ne: “Tshidi tshimpumbisha bua kubatijibua ntshinyi?” Kunyima kua batismo wende, muena budipuekeshi eu wa mu Afrike udi upingana kuende, ne Bible kêna wakula kabidi bualu buende to.

Lelu, Bantemu ba Yehowa badi bambuluisha bantu miliyo mivule pa buloba bujima bua kumvua “lumu luimpe” lua muomumue. Badi balonga Bible ne bantu batue ku miliyo isambombo kabayi babafutshisha mfranga.