Ikala mutuishibue ne: Yehowa udi ne bukole bua kukupandisha

Bala Nomba 13:25–14:4 bua umone muvua bena Isalele bapange kueyemena Yehowa.

Keba bua kumanya muvua malu menzeke. Ntshinyi tshivua ne bua kushindikila bena Isalele ne: Yehowa neabasungile pavuabu bapatuka mu Ejipitu? (Mis. 78:12-16, 43-53) Ntshinyi tshiakabafikisha ku dipanga kueyemena Yehowa? (Dut. 1:26-28) Mmunyi muvua Yoshua ne Kaleba baleje muvuabu beyemene Yehowa?​—Nom. 14:6-9.

Buela mu buondoke. Ntshinyi tshivua bena Isalele mua kuenza bua batambe kueyemena Yehowa? (Mis. 9:10; 22:4; 78:11) Bua tshinyi kunemeka Yehowa kudi kutuambuluisha bua kumueyemena?​—Nom. 14:11.

Keba malongesha. Diebeja ne:

• ‘Mmalu kayi adi mua kumpangisha bua kueyemena Yehowa ne muoyo mujima?’

• ‘Ntshinyi tshindi mua kuenza bua ntambe kueyemena Yehowa lelu ne matuku atshilualua?’

• ‘Ntshinyi tshindi ne bua kuikala mutuishibue ne: netshienzeke patuadija dikenga dinene?’​—Luka 21:25-28.