Ikala ne dikima ne lulamatu anu bu Benaya

Benaya uvua musalayi wa dikima mu tshiluilu tshia mukalenge Davidi ne pashishe mu tshiluilu tshia mukalenge Solomo, ne uvua muana wa muakuidi. Nansha muvua bakuidi ne bena Lewi kabayi ne bua kuambula bia mvita bua kuya kuluangana, yeye wakaluangana mvita ya Yehowa; kulejaye muvuaye ne dikima dia bungi. Tshilejilu, wakashipa nyama wa ntambue mu tshina tshia kulamina mâyi ne wakaya kuluangana tshiluilu kampanda tshia mvita tshinene. Bu muvua Davidi weyemene Benaya bikole, wakamuteka mfumu wa basalayi bavua bamulama.​—2 Sam. 23:20-23.

Benaya wakashala anu mulamate Davidi pavua Abashaloma ne Adoniya bamutombokele. (2 Sam. 8:18; 15:18; 1 Bak. 1:8) Pakavua Davidi mukulakaje, Benaya wakambuluisha kabidi bua kutekabu Solomo mukalenge. (1 Bak. 1:32-40) Bushuwa, Benaya uvua anu ushala ne lulamatu kudi bantu bavua Yehowa wela manyi nansha pavua bantu bakuabu kabayi babalamata to.

Tuetu petu mbimpe tuikale ne dikima bua tumone mua kuluangana ne muluishi wetu munene Satana ne bena diende. Tudi kabidi ne bua kudisuika bua kutumikila anu mikenji ya Yehowa. (Ef. 6:11; 1 Pet. 5:8, 9) Nansha bantu bakuabu bobu basungule bua kulekela Yehowa, tuetu tushalayi anu bamulamate batuishibue ne: neatufute.​—2 Sam. 22:26.