Jikijayi bilumbu bienu ne lukasa

Tshilejilu, bua mufuba wa muntu udi mutshibuke kupinganawu muawu ne kale, bidi bikengela bawondope ne lukasa. Kadi bobu kabayi bawondope bimpe newutungunuke anu ne kusama anyi mene muntu udi mua kushala mulema.

Ke mudibi bua malanda etu ne bena Kristo netu adi manyanguke. Tudi ne bua kuakaja ne lukasa. Tuetu katuyi benze nanku, netutungunuke anu ne kulamingana munda, ne pamuapa kushipa bulunda buetu. Yezu wakamba ne: “Akaja malu ne lukasa.” (Mat. 5:25) Nanku, yukila bimpe ne mulunda webe umuambile tshidi tshikunyingalaje. Bua tshinyi bidi mua kukola bua kuenza nunku? Tuakulayi bua malu abidi aa.

Bua kumpala, udi mua kulengulula bualu abu kuyi ubujikija to, pamuapa bualu kuena musue kubuakula bua muudi mufiike munda.b Tuakulabi bua Evodi ne Sentishe, bana betu ba bakaji bavua bamueneka bu ne: kabavua bajikije tshilumbu tshivua pankatshi pabu to. Tshilumbu atshi tshiakashala too ne pavua mupostolo Paulo uvua muaba mule ku Lomo mufike ku ditshimanya. Wakabalomba bua benze muabu muonso bua kukeba ditalala ne kulama bulunda buabu. (Filip. 4:2) Bavua mua kulua kabidi balunda anu bobu badipuekeshe, bayukile ne muoyo mujima bua tshilumbu tshiabu atshi, ne bafuilangane luse.

Bualu buibidi, udi mua kutekemena bua muntu udi mukuenzele bibi itabe tshilema tshiende. Kadi manya ne: udi ukeba kuakaja malanda enu, kuena ukeba bua kuleja udi ne tshilema anyi udi mupile to. Doktere udi wondopa mufuba utu utuma meji ende onso ku diondopa, ki nku dikeba tshivua tshifikishe muntu ku ditshibuka to. Wewe pebe paudi uyukila ne mulunda webe, kukebi anu bua kuimanyina pa uvua muenze tshilema to. Kadi manya ne: bulunda buenu budi ne mushinga wa bungi ne imanyine pa tshiudi mua kuenza bua kubuakaja.

Wewe tshilumbu ne muena Kristo nebe, yukila nende ne tshipatshila tshia kukeba mua kutshijikija. “Kanulekedi dîba dibuela nuenu bikale anu ne tshiji.” (Ef. 4:26) Paudi wenza amue malu bua kujikija bilumbu pa lukasa, udi wambuluisha bua kulama “tshisuikidi [tshietu] tshia buobumue tshia ditalala.”​—Ef. 4:1-3.