“Ditalala dia Kristo dilombole mioyo yenu”

“Ditalala dia Kristo” didibu batele mu Kolosayi 3:15 nditalala kayi? Nditalala dia mu muoyo ditu muntu umvua bua mudiye muyidi wa Kristo. Tutu tumvua ditalala adi patutu tumanya ne: Yehowa ne Muanende mbatunange.​—Yone 14:23, 27.

Mupostolo Paulo wakasengelela bena Kristo ba mu tshisumbu tshia ku Kolosayi bua balekele ditalala dia nunku dilombole mioyo yabu, anyi tshivuabu munda muabu. Mmunyi muvuabu mua kuenza nanku? Muaku wa mu tshiena Greke udi Paulo mukuate nawu mudimu muaba eu bua kuakula bua ‘kulombola’ udi upetangana ne muaku uvuabu bakuata nawu mudimu bua kuakula bua muntu utu wela kashiba padi bantu banya manaya kampanda. Bualu ebu budi butuvuluija ne: anu mutu muedi wa kashiba muikale ne dîyi dia ndekelu mu dinaya kampanda, ke mudi kabidi “ditalala dia Kristo” ne bua kutuambuluisha bua kumanya tshia kuenza mu nsombelu wetu.

Tshilejilu, patudi katuyi tupetangana ne muena Kristo netu, mbimpe tulekele “ditalala dia Kristo” dikale bu muedi wa kashiba bua dikose tshilumbu. Dîba adi nebituambuluishe bua kumanya tshia kuenza bua kulama ditalala ne buobumue buetu. Misangu mikuabu nebitulombe too ne bua kulekela tshituvua tuetu basue anyi mene kubuikidila mukuetu. Tuetu benze nanku, nebileje ne: tudi tulekela “ditalala dia Kristo” dilombola mioyo yetu.​—Kolos. 3:12-14.