Yone Mubatiji uvuaku bulelela anyi?
Mikanda ya Evanjeliyo idi yakula bua muntu uvua muyishe bualu bua Bukalenge bua Nzambi mu Yudaya uvuabu babikila ne: Yone Mubatiji. Bualu budi Bible wamba bua muntu au mbulelela anyi? Konkonona malu adi alonda aa:
Bible udi wamba ne: “Yone Mubatiji wakalua wenda uyisha mu tshipela tshia Yudaya, wamba ne: ‘Nyingalalayi bua mpekatu yenu, bualu Bukalenge bua mu diulu mbusemene pabuipi.’” (Matayi 3:1, 2) Mikanda mikuabu idi ijadika bualu ebu anyi? Eyowa.
Flavius Josèphe mumanyi wa malu a kale wa mu bidimu lukama bia kumpala wakakula bua muntu mukuabu diende “Yone, uvuabu batue dîna ne: Mubatiji.” Uvua “mubele bena Yuda bua kunanga buakane,” bua “kulamata Nzambi,” ne “bua kubatijibua.”—Histoire ancienne des Juifs, mukanda wa XVIII.
Bible udi uleja ne: Yone uvua mubele Helode Antipa wa mu distrike dia Galela ne Peleya. Helode uvua udiamba muvuaye muena Yuda uvua utumikila Mikenji ya Mose. Yone wakamuambila ne: uvua muenze bibi pavuaye musele Helodiya mukaji wa muanabu. (Mâko 6:18) Mikanda mikuabu idi ijadika kabidi bualu abu.
Josèphe wakamba ne: Antipa uvua “munange Helodiya” ne “wakamuambila bua kumusela kayi umvua nansha bundu to.” Helodiya wakitaba, kushiyaye bayende.
Bible udi uleja ne: “Bantu ba mu Yelushalema, ba mu Yudaya mujima ne ba mu misoko yonso ya pabuipi ne Yadene bavua bapatuka baya [kudi Yone], ne wakababatiza mu Musulu wa Yadene.”—Matayi 3:5, 6.
Josèphe wakajadika pende bualu abu. Wakafunda ne: “misumba” ya bantu yakalua bua kumona Yone ne “malu avuaye ulongesha akalenga bantu abu ku muoyo bikole.”
Mbimueneke bimpe ne: Josèphe mumanyi wa malu a kale wa mu bidimu lukama bia kumpala uvua mujadike ne: Yone Mubatiji uvuaku bulelela. Ke bualu kayi tudi tuitaba petu bualu ebu.