7 YAKOBA
Wakenza malu ne dikima, kukubaye dîku diende
MATUKU makese kumpala kua Yakoba kufua, wakamba ne: bidimu bia muoyo wende bivua ‘bikese ne bia dikenga.’ (Gen. 47:9) Uvua mutuilangane ne ntatu ya bungi! Patshivuaye nsonga, wakanyema Esau, dipasa diende, uvua usua kumushipa; kuyaye kusombela mu musoko wa kule wa Halana. Mu Halana amu, wakasua kusela Lakele. Kadi Labana, tatuende wa Lakele, wakamudingakaja kuanjiye kumuselesha yayende wa Lakele. Yeye kulua kabidi kusela Lakele. Nanku Yakoba uvua ne bakaji babidi, kadi kabavua bapetangana to. Yakoba wakenzela Labana mudimu bidimu bia bungi, kadi Labana kavua umufuta muvuabu bumvuangane to. Nansha nanku, Yakoba uvua anu ne dikima, ditabuja, ne dinanukila.
Dimue edi Yehowa wakambila Yakoba bua umbuke mu Halana amu, apingane kuabu ku Kanâna. Kadi kumuangala kuvua mua kumukebela njiwu bualu Labana uvua muena lukuka ne uvua wela meji ne: bintu bionso bivua nabi Yakoba bivua biende. Yakoba wakayukila ne bakaji bende, kubalejaye tshivua Yehowa muambe. Pashishe kunyemabu ne bana kabayi balaye Labana to. Pakamanya Labana ne: bavua banyeme, wakasangisha bantu bende kuyabu babalondakaje. Pakabapetaye, wakatandisha Yakoba bikole bua muvuaye mumbuke kayi mumulaye to. Labana wakafika too ne ku dimufunyina wamba muvuaye ne bukokeshi bua kumuenzela bibi. Kadi Yakoba uvua ne dikima, kumulejaye malu onso kayi udia tshibanga to. Wakamuambila bua muvuaye mumudie bintu ne mumushimakaje, pende Yakoba wenza anu bua basombe mu ditalala. Kumpala kua Labana kushiyangana ne Yakoba, bakadia tshipungidi tshia ditalala.
Dikima dia Yakoba diakenza bua akebe ditalala ne balela bende bavua bamukengesha, ne bua afike ne ku diluangana ne muanjelu wa bukole
Ntatu ya Yakoba kayakajikila apu to. Esau uvua mu njila ulua bua kutuilangana nende. Bidimu bia bungi kumpala, mamuabu Lebeka ukavua mudimuije Yakoba ne: Esau uvua ujinga kumushipa. Esau uvua mutuishibue ne: Yakoba uvua mumuibe dibenesha divua tatuabu mumulongoluele. Yakoba ukavua ukeba kulengejangana ne muanabu. Wakumvua lumu ne: Esau uvua wenda ulua ne bantu 400 bua kutuilangana nende yeye ne dîku diende. Bible udi wamba ne: “Yakoba wakumvua buôwa bua bungi, kupampakanaye.” Wakapesha bena mudimu bende bintu bitambe buimpe, kubatumaye nabi kumpala kuende bua babipeshe Esau bu dipa. Kadi dipa adi divua mua kutuyisha tshiji tshia Esau anyi? Yakoba kavua mumanye to. Kadi bualu bua dikema buakenzeka.
Kumpala kua butuku kutshia, Yakoba wakamona muntu uvuaye kayi mumanye to. Uvua muanjelu. Wakatuadija kuluangana nende. Bu muvuaye mujingulule ne: muanjelu au uvua mua kumubenesha, wakaluangana nende mêba a bungi butuku abu. Kakalekela kuluangana nende to, nansha mukavuaye ne bidimu 97 ne muanjelu au mumupite bukole. Wakaluangana nende bikole, kudilaye ne muadi. (Hosh. 12:4) Bu muvua Yakoba mumanye ne: dibenesha dia kudi Yehowa nditambe buimpe, uvua mudisuike bua kuenza tshionso tshivuaye mua kuenza bua kudipeta. Pakatshiabu, muanjelu au wakamulenga patupu pa dinungu dia tshikundukundu, diodi kukoyoboka. Nansha nanku, wakamubenesha, kumuinyikaye ne: Isalele. Dîna edi didi diumvuija ne: muntu udi uluangana ne Nzambi. Divua dimukumbanyine bualu uvua mudienzeje ne muoyo mujima kayi ulekela too ne muakapetaye dibenesha dia kudi Yehowa adi.
Yakoba wakapingana kuvua dîku diende wenda utebuka. Pashishe, pakabandishaye mêsu, wakamona Esau pa bule wenda ulua ne bantu 400. Yakoba wakaya nkayende bua kutuilangana nabu. Pakafikaye pabuipi ne Esau, wakinama panshi misangu muanda mutekete. Ke Esau kuasa lubilu mutangile kuvuaye kayi ne tshia mvita mu tshianza to. Wakamuakidila ne muoyo mujima! Bubidi buabu kutuadijabu kudila. Bu muvua Yakoba mudipuekeshe ne mutumine Esau dipa, Esau katshivua mumukuatshile tshiji to. Pamuapa wakanyisha kabidi Yakoba bua dikima diende. Yakoba wakalengejangana ne muanabu.
Yakoba wakashala utebuka too ne muakafuaye bua tshikundukundu tshiende tshivua tshikoyoboke. Ntatu mikuabu yakalua kumukuata. Kadi kakanyingalala musangu nansha umue bua muvuaye utumikila Yehowa anyi bua muvuaye muluangane ne muanjelu au to. Bidimu bia bungi pashishe, bualu bulenga buvua Yehowa mumulaye buakakumbana, Isalele kuluaye tshisamba tshinene. (Gen. 28:14) Bible udi ubikila Yehowa ne: “Nzambi wa Yakoba.” (Ekes. 3:6) Yezu Kristo wakamba pende tshiambilu atshi. Pashishe kuambaye ne: Yehowa “kena Nzambi wa bafue, kadi ngua badi ne muoyo.” (Luka 20:37, 38) Mêyi a Yezu aa adi aleja ne: Yakoba neikale ne nsombelu muimpe kumpala eku bualu ku mêsu kua Yehowa utshidi ne muoyo. Mu bulongolodi bupiabupia, bidimu bia muoyo wende kabiakuikala bîpi ne bia makenga to, kadi nebikale biuwule ne disanka kabiyi ne ndekelu to!
Bala bualu ebu mu:
Lukonko lua kuelela meji:
Mmushindu kayi uvua Yakoba muenze malu ne dikima?
Buela mu buondoke
1. Bua tshinyi Yehowa wakenza bua Yakoba apete dibenesha divua Esau ne bua kupeta? (w03 15/10 29 §2)
2. Ntshilota kayi tshivua Yehowa muloteshe Yakoba? Tshiakenza bua atuishibue ne bualu kayi? (w03 15/10 28 §3–29 §1) A
Tshimfuanyi tshia A
3. Bua tshinyi Yakoba uvua mutuishibue ne: muanjelu uvuaye muluangane nende au uvua mua kumubenesha? (w03 15/10 31 §1) B
Tshimfuanyi tshia B
4. Ntshinyi tshivua Yakoba muenze bua kukuba dîku diende bua bena Kanâna kabalu kudinyanga? (w95 15/9 21 §5, dim.)
Keba malongesha
Yakoba uvua mudimone ne bujitu bua kulama mikoko ya Labana. (Gen. 31:38-40) Ntshinyi tshidi bakulu mua kuenza lelu bua kulama mikoko ya Yehowa, tuambe ne: kulama bena Kristo nabu? C
Tshimfuanyi tshia C
Pavua Yakoba ne buôwa, wakasambila. (Gen. 32:6-12) Ntshinyi tshidi tshilejilu tshiende tshikulongesha bua malu audi ne bua kulomba mu masambila ebe?
Mmunyi muudi pebe mua kuenza malu ne dikima bu Yakoba?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Yakoba pabishibuaye ku lufu?
Bia kutangila kabidi
Tuetu bajingulule ne: tudi banyingalaje muena Kristo netu, ntshinyi tshitudi ne bua kuenza anu bu Yakoba?
Leja bena mu dîku diebe muyuki wa mu Bible wa bualu bua Yakoba eu bua kubalongesha.
“Yakoba ne Esau” (ijwis tshiena-bualu 3-wcgr)