Mua kuambuluisha balela betu badi kabayi batendelela Yehowa

1-2. Ntshinyi tshivua pamuapa tshinyange malanda etu ne balela betu patuakatuadija kulonga bulelela?

YEZU wakambila muntu kampanda uvua musue kulua muyidi wende ne: “Ndaku kuenu kudi balela bebe, ubalondele malu onso adi Yehowa mukuenzele.” (Mâko 5:19) Uvua muambe nanku bualu uvua mumanye ne: muntu yonso utu musue kulondela bana babu malu mimpe adiye mumvue.

² Udi uvuluka muuvua mumvue musangu wa kumpala uvuabu bakuambile malu a Bible anyi? Pamuapa wakumvua disanka, wewe kujinga bua kualondela balela bebe. Kadi bavua mua kuikala babenga kuateleja, bualu pamuapa mushindu uuvua mubambilawu uvua mubafikishe ku dikufiikila munda. Pikalabi bikuenzekela nanku, tshiena-bualu etshi netshikuambuluishe bua kushala anu ne lulamatu kudi Yehowa ne kuikala anu mu malanda mimpe ne balela bebe.

3. Tshinyi tshituamona mu tshiena-bualu etshi?

³ Mu tshiena-bualu etshi, netumone malu anayi aa: 1) Tuetu tumvuila balela betu badi kabayi Bantemu luse, muoyo wetu neutusake bua kubananga ne kuikala nabu lutulu nansha bobu babenga malongesha etu; 2) tshitudi mua kuenza padibu batuamba mêyi mabi anyi batuenzela malu mabi; 3) mudi lutulu luetu ne ditekemena ditudi nadi dia ne: nebashintuluke mua kubambuluisha bua kuitaba bulelela; ne 4) mutudi mua kubaleja ne: tudi babanange.

LUSE LUKUSAKE BUA KUBAMBULUISHA

4. Ntshinyi tshivua Yezu wenza pavua bantu babenga kumuteleja?

⁴ Pavua bantu babenga kuteleja Yezu, kavua ulekela kubayisha diakamue to. Wakadifuanyikija ne muntu uvua wenza mudimu mu budimi buende bua tumuma tua mvinyo. Muntu au uvua wenza muende muonso bua mitshi ivua kayiyi ikuama tumuma ikuame payi. (Luka 13:6-9) Pavua Yezu mufile tshilejilu atshi, kukavua bidimu bipite pa bisatu bivuaye udienzeja bua kuambuluisha bena Yuda bua kumuitabuja ne kulua bayidi bende. Bua tshinyi wakatungunuka anu ne kubambuluisha? Bualu uvua ubumvuila luse; kumuambuluishabi bua kuikala nabu lutulu.

5. Ntshinyi tshivua tshisaka Yezu bua kumvuila bena Yuda nende luse?

⁵ Yezu uvua umvuila bena Yuda nende luse bualu bamfumu ba bitendelelu kabavua babambuluisha bua bafike ku ditabuja Nzambi to. Wakamona muvuabu “bu mikoko ivua kayiyi ne mulami.” (Mâko 6:34) Pakavua lufu luende lulembelele, wakadila ne muadi bua bualu bua Yelushalema bualu uvua mumanye ne: benamu ba bungi bavua ne bua kufua bua dipanga ditabuja. (Luka 19:41-44) Tuetu tumvuila petu balela betu luse, muoyo wetu neutusake bua kubambuluisha.

6. Bua tshinyi mbimpe tuikale lutulu ne balela betu badi kabayi batendelela Yehowa? (Galatiya 6:9)

⁶ Bala Galatiya 6:9. Nansha balela betu bobu babenga malongesha etu, mbimpe tuikale anu nabu lutulu ne katulekedi “kuenza malu mimpe nansha.” Tudi bamanye ne: bitu biangata dîba bua muntu kulekela malongesha akadiye muitabuje ne bua kuitabuja Yehowa. Pamuapa kumpala uvua pebe bu bantu badi kabayi ‘ne ditekemena ne kabayi ne Nzambi panu apa.’ (Ef. 2:12) Kadi muntu mukuabu wakakuambuluisha ne lutulu luonso bua ushintuluke ne bua umanye Yehowa. Bua bualu abu, mbimpe wambuluishe pebe bena mu dîku dienu bua bamumanye pabu.

IKALA UBUMVUILA PADIBU BAKUAMBA MÊYI MABI NE BAKUENZELA MALU MABI

7. Ntshinyi tshivua pamuapa tshienze bua bana babu ne Yezu kabamuitabuji?

⁷ Bana babu ne Yezu bavua mua kuikala bumvue lumu lua bishima bivuaye muenze mu Galela. (Luka 4:14, 22-24) Kadi bakanji kubenga bua kumuitabuja. (Yone 7:5) Bua tshinyi? Bible kena wandamuna lukonko elu to. Kadi udi uleja malu matue ku abidi avua mapangishe bamue bena Yuda bua kulua bayidi ba Yezu. Bua kumpala, bamue ba kudibu bavua ne buôwa bua ne: bavua mua kulua kubakengesha kudi bantu ba muaba uvuabu basombele. (Yone 9:18-22) Buibidi, bu muvua bena Yuda bakuabu bamanye Yezu katshia ku buana, kabivua bipepele bua bobu kumumona bu muleji-mpala wa Nzambi to. (Mâko 6:1-4) Bana babu ne Yezu bavua pabu mua kuikala bamona malu anu bu bena Yuda abu. Balela betu kabena mua kuikala babenga kuteleja malongesha etu bualu badi bamona pabu malu mushindu au anyi?

8. Ntshinyi tshidi mua kusaka balela betu badi kabayi Bantemu bua kutuamba mêyi mabi anyi kutuenzela malu mabi?

⁸ Manya tshidi tshibasaka bua kutuamba mêyi mabi ne kutuenzela malu mabi. Bana babu ne Yezu bavua pabu mua kuikala munkatshi mua balela bende bavua bambe umue musangu ne: uvua ‘mujimije lungenyi.’ (Mâko 3:21) Bua tshinyi bavua bamuambe mushindu au? Bualu bilondeshile Bible, Yezu uvua uyisha bikole ne wondopa bantu, upanga too ne dîba dia kudia. (Mâko 3:20) Pamuapa bana babu bavua bela meji ne: uvua uyisha wela ne kalela. Balela betu badi pabu mua kuela meji ne: tudi tuela kalele mu dienza malu a ntendelelu wetu. Biobi nanku, mbimpe tuleje ku mêyi etu ne ku bienzedi bietu ne: tudi ne nkatshinkatshi.

9. Ntshinyi tshidi mua kuambuluisha balela betu bua kushintulula mushindu udibu bamona Bantemu ba Yehowa? (1 Petelo 3:1, 2) (Tangila kabidi bimfuanyi.)

⁹ Lekela bienzedi biebe bikuakuile. Mêyi etu mimpe ne bienzedi bietu bimpe bidi mua kusaka balela betu bua kushintulula mushindu udibu bamona Bantemu ba Yehowa. (Bala 1 Petelo 3:1, 2.) Mulume udi kayi Ntemu wa Yehowa udi mua kudiumvua nkaya anyi kufiika munda padi mukajende udi muena Kristo umushiya kumbelu, uya mu bisangilu anyi mu buambi. Muanetu wa bakaji yeye kayi musue bua adiumvue nanku, mbimpe ashintulule programe wende wa malu a mu nyuma bua apete dîba dia bungi dia kusomba ne bayende. Tshilejilu, udi mua kuya mu buambi padi bayende ne bia bungi bia kuenza anyi padiye kayi kumbelu. Muanetu wa bakaji yeye wenza malu ne nkatshinkatshi, bidi mua kuambuluisha bayende bua kushintulula mushindu utuye umona Bantemu ba Yehowa.

10. Mmunyi muudi mua kuidikija Yezu padi bantu bakula bibi bua bualu buebe?

¹⁰ Kudiumvu muenzejibue bua kuandamuna balela bebe padibu bakula bibi bua bualu buebe to. Pavuabu bashiminyine Yezu ne: uvua mudiavi ne munuavi, kakakeba bua kudibingisha to. Kadi uvua musue bua bantu batangile bienzedi biende bua kumona ni bivuabu bamuambe abi mbilelela. (Mat. 11:19) Wakaleja kabidi ne: uvua ne nkatshinkatshi mu bivuaye wenza. (Fuanyikija ne Yone 2:2, 6-10.) Wewe pebe kudiumvu muenzejibue bua kudibingisha dîba dionso didibu bakushiminyina malu to. Kadi leja balela bebe ku bienzedi biebe ne: udi ne nkatshinkatshi ne disanka. Dîba adi badi mua kufika ku dimona ne: malu onso avua bantu batuamba au nga dishima.

IKALA NE LUTULU, MUTEKEMENE NE: NEBASHINTULUKE

11. Yezu uvua wenzela bana babu malu mushindu kayi?

¹¹ Bible udi uleja ne: Yezu uvua anu lutulu ne bana babu. Tshilejilu, bavua pabu mua kuikala mu Kana pavua Yezu muenze tshishima tshiende tshia kumpala. (Yone 2:11, 12) Anu mutukadi baleje, bana babu ne Yezu kabavua bamuitabuja to. Kadi Yezu kakashipa bulela ne bana babu to, bualu Bible udi uleja ne: bidimu bitue ku bisatu yeye mumane kuenza tshishima atshi, uvua anu uyukila bimpe ne bana babu.​—Yone 7:5-8.

12. Ntshinyi tshidi mua kutuambuluisha bua kuikala anu ne ditekemena dia ne: bamue balela betu badi mua kushintuluka?

¹² Kumanya ne: Yehowa utu ufuilangana luse kudi mua kutuambuluisha bua kuikala batekemene ne: dimue dituku bamue balela betu badi mua kupangadija bua kumuenzela mudimu. Pabutulabu bitendelelu bia dishima, balela betu nebavuluke ne: tuvua babamanyishe bualu abu.a (Buak. 17:16) Pamuapa nebabuele mu ntendelelu mukezuke patuadija dikenga dinene. Bobu batuilangana ne ntatu lelu eu, mbimpe tuenze muetu muonso bua kubambuluisha. Bobu bamone mutudi ne dinanga dilelela bidi mua kubasaka bua kulonga Bible.

LEJA NE: UDI MUBANANGE

13. Nansha mutudi ne bia bungi bia kuenza mu mudimu wa Yehowa, mbualu kayi butudi ne bua kutabalela?

¹³ Nansha mutudi ne bia bungi bia kuenza mu mudimu wa Yehowa, ki mbimpe balela betu bafike ku dimona ne: katuena ne dîba dia kusomba nabu anyi ne: katuena babanange kabidi to. (Mat. 7:12) Mmunyi mutudi mua kuleja ne: tudi babatabalela? Tuakulayi bua malu makese atudi mua kuenza.

14-15. Ngumue mushindu kayi utudi mua kuleja balela betu badi kabayi Bantemu ba Yehowa ne: tudi babanange? Fila tshilejilu.

¹⁴ Ikala uyukila nabu ne uleja muudi mubanange. Tuetu ne tshibidilu tshia kuyukila ne balela betu nebileje ne: tudi babanange. Tshilejilu, tudi mua kubafundila mesaje ne kubatumina foto ivuabu batukuate matuku mashale aa patuvua baye kuendakana muaba kampanda. Tudi mua kubapesha ka tshintu nansha ka makuta makese anyi kubafundila mukanda muikale ne mêyi mimpe. Dîba adi bidi mua kuleja mutudi babanange ne mutudi basue kuikala nabu mu malanda mimpe.

¹⁵ Tuakulayi bua muanetu wa bakaji wa mu Arménie, diende Anna. Bena mu dîku diabu bavua ne tshibidilu tshia kusomba pamue, nangananga mu bikondo bia mafesto a mifikilu ya diledibua ne bia diya miaba kampanda mu dikisha. Pakaluaye Ntemu wa Yehowa, balela bende bakatuadija kusamisha mutu, bela meji ne: kakuikala kabidi usomba nabu to. Bavua kabidi bela meji ne: nsombelu uvua mua kumukolela. Anna udi umvuija tshivuaye muenze bua ikale anu nabu mu malanda mimpe, wamba ne: “Ntu nya kutangila balela banyi ne mbambila malu adi antangila ne midimu intu ngenza. Ntu kabidi mbabikila kuanyi bua batuilangane ne bamue ba ku balunda banyi. Ke bualu kayi, balela banyi ba bungi mbamanyangane ne balunda banyi ndambu, ne batu bayukila nabu badilekelele. Balela banyi ba bungi mbangambile ne: badi bammona ne disanka, ne kabena kabidi basamisha mutu bua bualu buanyi to.”

16. Mmunyi muvua Yezu muleje ne: uvua utabalela muanabu Yakobo? (Tangila dimanyisha dia kuinshi kua dibeji.)

¹⁶ Ikala uleja ne: udi ubatabalela. Yezu mumane kubishibua ku lufu, wakamuenekela muanabu Yakobo bua kuleja muvuaye umutabalela. (1 Kol. 15:7) Pamuapa Yakobo uvua ne bua kuikala mumvue disanka dia bungi pakajingululaye ne: Yezu utshivua anu mumunange. Imue misangu dimumuenekela adi diakamujadikila ne: Yezu uvua Masiya. Panyima pa dituilangana diabu adi, pamuapa wakambuluisha bena mu dîku diabu bakuabu bua kujingulula ne: Yezu uvua Masiya.b​—Bien. 1:14.

17. Mmunyi mutudi mua kutumikila dîyi dinene didi mu Lomo 12:15? (Tangila kabidi tshimfuanyi.)

¹⁷ Bala Lomo 12:15. Tuetu tutabalela balela betu padibu bimpe ne nangananga padibu ne ntatu, bidi mua kubambuluisha bua kushintulula mushindu udibu bamona Bantemu ba Yehowa.c Tshilejilu, mulela wetu kampanda yeye mulele muana, mbimpe tuye kumumona ne tumutuadilaku katshintu bua amanye ne: tudi petu ne disanka. Mulela wetu kansanga yeye mufuishe, mbimpe tumusambe ne mêyi mimpe patudi tuya kumutangila anyi tumufundilawu mu mesaje, peshi tukebe mishindu mikuabu ya kumuambuluisha. Mbimpe tuikale kabidi ne tshibidilu tshia kubebeja bua kumanya ni badi bimpe, nangananga padibu mu ntatu.

18. Mmunyi mutudi mua kuidikija muyidi Andele?

¹⁸ Enza bua bamanyangane ne bena Kristo nebe. Pavua muyidi Andele mujingulule ne: Yezu uvua Masiya, wakenza bua muanabu Petelo alue kutuilangana ne Yezu. (Yone 1:40-42) Tudi petu mua kuidikija Andele. Tshilejilu, tudi mua kuikala imue misangu tubikila mulela wetu kampanda mu bisangilu anyi patudi tusomba ne bena Kristo netu bua kuela nabu tshianza mukana. Dituilangana nabu mushindu au nedimuambuluishe bua amone ne: Bantemu badi anu bu bantu bonso ne mbantu ba malu mimpe.

19. Nansha balela betu bobu kabayi bumvua amue malongesha etu bimpe, tudi ne bua kubenzela malu mushindu kayi? (1 Petelo 3:15)

¹⁹ Bala 1 Petelo 3:15. Bena mu mêku etu badi mua kupanga kumvua tshidi tshitusaka bua kubenga kuenza amue malu, kadi nebashale bavuluka malu mimpe atudi tubenzela ne mushindu utudi tubanemeka. Nansha mutuikala katuyi mua kuenza nabu mafesto kampanda anyi bilele kansanga, tuetu tudienzeja bua kusomba nabu, bidi mua kubasankisha bikole. Tshilejilu, tudi mua kuya kubatangila, kudia nabu pamue anyi kubapesha tudo bikondo bikuabu.

MANYA NE: BADI ANU MUA KULUA BANTEMU

20. Bua tshinyi tshilejilu tshia Yakobo tshidi tshitukankamija?

²⁰ Pavua Yezu pa buloba, Yakobo kavua mulue muyidi wende to. Kadi uvua mulue kulua muyidi wende pashishe, ne bavua ne bua kuikala bamulongeshe malu a bungi avua Yezu mulongeshe pavuaye pa buloba. (Gal. 1:18, 19; 2:9) Tshilejilu, mukanda uvuaye mufunde ku bukole bua nyuma muimpe udi ne malongesha a buena avua Yezu mulongeshe mu Muyuki wa pa mukuna.d

21. Bua tshinyi mbimpe tuikale anu bamanye ne: dimue dituku balela betu badi anu mua kulua Bantemu?

²¹ Nansha tuetu benzele balela betu malu mimpe a mushindu kayi, badi anu mua kutuamba mêyi mabi anyi mene kubenga bua kulonga malu a Yehowa. Bua tshinyi mbimpe tutungunuke anu ne kubenzela malu mimpe? Bua kuleja mutudi tuidikija Yehowa Nzambi wetu wa luse ne Muanende Yezu. (Luka 6:33, 36) Mu kupita kua matuku, bienzedi bietu bimpe bidi mua kubasaka bua kushintulula mushindu udibu bamona Bantemu ba Yehowa. Bualu bukuabu, balela betu badi mua kuvuluka malu a Yehowa atuvua babambile. Tuetu batungunuke anu ne kubambuluisha ne kubenzela malu mimpe, badi mua kuangata dipangadika dia kudisanga netu bua kuenzela Yehowa mudimu, ne netumvue disanka dia bungi.