Nkonko ya babadi

Ndîba kayi diela bisamba lubila lua ne: “ditalala, ne kakuena bualu bua kutshina”?

Anu mutuvua bamone mu “Nkonko ya babadi” ivua mu Tshibumba tshia Nsentedia tshivua tshipatuke matuku mashale aa, Yehowa ukadi pa kuela “lungenyi luende” mu mioyo ya “Nsengu dikumi” idi ileja makokeshi onso a mbulamatadi, bua ipeshe “Nyama wa luonji mukunze,” bukole buayi ne bukokeshi buayi. Nyama wa luonji eu udi uleja Nsangilu wa matunga. Badi bamubikila kabidi ne: “tshimfuanyi tshia nyama wa luonji.” (Buak. 13:14, 15; 17:3, 16, 17) Pashishe “Nsengu dikumi” ne nyama wa luonji udiyi ipesha bukole nebibutule bitendelelu bia dishima pa buloba. Kadi lubila lua ne: “ditalala, ne kakuena bualu bua kutshina”b nebaluele kumpala kua kubutulabu bitendelelu bia dishima anyi pikalabu bamane kubibutula?​—1 Tes. 5:3.

Katuena bamanye dîba dijalame dielabu lubila lua ne: “ditalala, ne kakuena bualu bua kutshina” to. Bu tuetu bamanye dîba dijalame katuvua mua kumona mudibi ne mushinga bua kushala batabale to. Kadi pende Yezu uvua mubele bayidi bende misangu ne misangu bua ‘kushale batabale.’ (Mat. 24:42; 25:13; 26:41) Tukonkononayi mpindieu bimpe bimpe dîyi dia buprofete divua mupostolo Paulo mufunde mu mukanda uvuaye mufundile bena Tesalonike.

Paulo uvua mufunde ne: “Dîba dionso diambabu ne: ‘Ditalala, ne kakuena bualu bua kutshina!’ dîba adi kabutu ka tshimpitshimpi nekalue kudibu diakamue.” (1 Tes. 5:2, 3) Kumpala mu mikanda yetu tuvua tuamba ne: Lubila lua “ditalala ne kakuena bualu bua kutshina” nebaluele katupa kakese kumpala kua dikenga dinene kutuadija. Dikenga adi nedituadije ne dibutuka dia Babilona Munene udi nsangilu wa bitendelelu bionso bia dishima. Tuvua tuamba kabidi ne: lubila elu ntshimanyinu tshia ndekelu tshidi tshileja ne: dikenga dinene dikadi pa kutuadija.

Kadi patudi bakonkonone kabidi malu bimpe, tudi bajingulule ne: kudi mushindu mukuabu kabidi utudi mua kumvua mvese eu. Pamuapa nebele lubila lua “ditalala, ne kakuena bualu bua kutshina” panyima pa dibutuka dia bitendelelu bia dishima. Bua tshinyi bidi mua kuenzeka nanku? Tuandamunayi nkonko idi ilonda eyi.

Mmudimu kayi udi nawu bitendelelu bia dishima mu mvita ya bisamba? Bible udi uleja ne: “Bakapeta munda muende [mua “Ndumba munene,” Babilona Munene] mashi a . . . bantu bonso bavuabu bashipe pa buloba.” (Buak. 17:1, 5; 18:24) Kukadi bidimu bia bungi bidi ndumba munene eu mutue mvita ya bisamba mpanda, mukebeshe ndululu ne mushipeshe bantu miliyo ne miliyo. Bidi bileja ne: yeye ke udi ukebesha mvita ne malu a tshikisu. Nunku bidi mua kuenzeka bua bisamba kuelabi lubila lua “ditalala, ne kakuena bualu bua kutshina” anu panyima pa biobi bimane kubutula Babilona munene. Kadi katuena bajadike bualu ebu to.

Ntshinyi tshienzeka panyima pa lubila lua “ditalala, ne kakuena bualu bua kutshina”? Paulo udi wamba ne: “Dîba adi kabutu ka tshimpitshimpi nekalue kudibu diakamue.” (1 Tes. 5:3) Biobi bienzeke ne: makokeshi a tshididi a pa buloba ele lubila lua ne: “ditalala, ne kakuena bualu bua kutshina” panyima pa dibutuka dia bitendelelu bia dishima, dîba adi kabutu ka makokeshi au onso nekalue mu tshimpitshimpi.

Ntshinyi tshienza bantu ba Yehowa penzeka malu aa? Paulo udi wamba ne: “Bana betu, kanuena mu mîdima, bua dituku adi dinujikile bu mudidi mua kujikila bivi” to. (1 Tes. 5:4) Biobi bienzeke ne: lubila lua “ditalala ne kakuena bualu bua kutshina” nduedibue panyima pa dibutuka dia bitendelelu bia dishima, dîba adi bantu ba Nzambi nebamanye ne: bakadi pa kubutula makokeshi a tshididi. Kadi bua makokeshi a tshididi au, kabutu aku nekalue mu tshimpitshimpi anu bu muivi kakuyi didimuija.

Tshitudi bamanye ntshia ne: mu katupa kîpi emu, “nsengu dikumi” ne nyama wa luonji udibu bapeshe bukole nebibutule bitendelelu bionso bia dishima. Dikenga dinene nedituadije ne bualu abu. Tudi bamanye kabidi ne: kudi dîba dikala bisamba ne bua kuela lubila lua ne: “ditalala, ne kakuena bualu bua kutshina.” Nebaluele dîba kayi? Tudi bakule bua mishindu ibidi. Wa kumpala: Lubila elu nebaluele kumpala kua kubutulabu bitendelelu bia dishima. Muibidi: Nebaluele pikala makokeshi a tshididi mamane kubutula bitendelelu bia dishima. Kadi mbimpe tushale bindile bua kumona tshialua kuenzeka; bualu tutu tumvua mêyi a buprofete bimpe anu patuwu enda akumbana anyi pakadiwu mamane kukumbana.​—Fuanyikija Yone 12:16.

Bua mpindieu tshidi ne mushinga ki ndîba dielabu lubila lua “ditalala, ne kakuena bualu kutshina” to, kadi tshidi ne mushinga nkushala ne lulamatu kudi Nzambi. Tudi ne bua ‘kushala batabale ne kulama bieledi bietu bia meji,’ bua tuikale badilongolole nansha malu owu mua kuenzeka mushindu kayi.​—1 Tes. 5:6.