Ikala utshina Nzambi bikole anu bu Obadaya

Obadaya uvua mulami wa nzubu wa mukalenge mubi Ahaba. Ahaba uvua mulekele ntendelelu wa Bâla utangalaka bikole mu Isalele. Kadi Obadaya yeye uvua utshina Yehowa “katshia ku buana buende.” (1 Bak. 18:1-13) Nunku pavua mukalenge mukaji Yezabele mutume dîyi bua bashipe baprofete bonso ba Yehowa, Obadaya uvua mumanye ne: bivua bikengela ikala ne dikima dia kuenza bualu kampanda bua kubambuluisha. Kusokoka muprofete nansha umue kuvua ne njiwu ya bungi; kadi Obadaya wakasokoka yeye baprofete 100 ne uvua ubapesha biakudia mu tshikondo tshivuaku tshiyole tshikole tshia nzala. Elabi meji muvua kuenza bualu ebu mua kuikala ne njiwu, bualu bavua mua kumumona kudi baprofete ba bungi ba dishima bavua benzela mukalenge ne mukajende mudimu.​—1 Bak. 18:19.

Tshilejilu tshia Obadaya tshidi tshitulongesha tshinyi? Nansha muvuaye utshina Ahaba, uvua utamba kutshina Nzambi bikole menemene. Ke bualu kayi wakapeta dikima dia kuteka muoyo wende mu njiwu bua kukuba bana babu. Mbimpe tuetu petu tuikale tutshina Yehowa bikole, nangananga biobi ne: mbakandike midimu yetu muaba utudi basombele. Ditshina edi neditupeteshe dikima dia kuambuluisha bana betu badi batuilangana ne ntatu.