Tshia kuenza bua kushala ne lulamatu padi ntatu itukuata

1-2. Ntshinyi tshiakenzeka pavua Yezu ulongesha mu Kapênuma?

DIMUE dituku pavua Yezu ulongesha bantu mu Kapênuma, wakabambila ne: “Nuenu kanuyi badie mubidi wa Muana wa muntu ne banue mashi ende, kanuena ne muoyo munda muenu to.” Kuambaye kabidi ne: “Muntu yonso udi udia mubidi wanyi ne unua mashi anyi, udi ne muoyo wa tshiendelele; nemmubishe ku lufu dituku dia ku nshikidilu.” (Yone 6:53, 54) Bayidi bende ba bungi kabakasanka ne tshivuaye muambe atshi to. Bakamba ne: “Edi dîyi ndibi ditambe; nnganyi udi mua kuditeleja?”​—Yone 6:60.

² Bayidi ba bungi bakalekela kulonda Yezu bua bualu abu. Bakalekela kumulonda bualu kabavua ne ditabuja kudiye anyi? Bidi bimueneka ne: bamue ba kudibu bavua nadi, bualu pavuabu bamone tshivuaye muenze kumpala, bakamba ne: “Eu udi bulelela Muprofete uvua ne bua kulua pa buloba.” (Yone 6:14) Nunku mbiumvuike ne: bavua anu ne ditabuja kudiye. Kadi pavua Yezu muambe bualu buvua bubatonde, kabakashala ne lulamatu kudiye to.

3. Ntshinyi tshiakenza bayidi bavua ne lulamatu bua mêyi avua Yezu muambe? Bua tshinyi? (Tangila kabidi tshimfuanyi.)

³ Bayidi bavua ne lulamatu bakatungunuka bobu anu ne kulonda Yezu. Pavua Yezu mubebeje bua kumanya ni bavua pabu basue kulekela kumulonda, Petelo wakandamuna ne: “Mukalenge, netuye kudi nganyi? Wewe udi ne mêyi a muoyo wa tshiendelele. Tudi bitabuje ne bafike ku dimanya ne: wewe udi Wa Tshijila wa Nzambi.” (Yone 6:68, 69) Mona ne: Petelo kavua usua kuleja ne: yeye ne bapostolo bakuabu abu bavua bumvue bimpe tshivua Yezu muambe atshi to. Nansha nanku, bakashala anu ne lulamatu kudi Yezu. Bua tshinyi? Bualu bavua batuishibue ne: Yezu uvua “Kristo wa Nzambi.”​—Luka 9:20, 35.

4. Nnsombelu kayi idi mifuane kutupangisha bua kushala balamate Yehowa?

⁴ Kudi nsombelu idi mifuane kutupangisha bua kushala balamate Yehowa. Tutele nansha isatu eyi: Wa kumpala, padi bulongolodi buetu buakaja mushindu ututu tumvua mvese kampanda anyi mushindu wa kuyisha lumu luimpe. Muibidi, patudi katuyi tumvua tshidi Yehowa mulekeele bualu kampanda butukebela lutatu lukole menemene. Muisatu, padi mulunda wetu wa pa muoyo utuenzela bualu budi butunyingalaja bikole anyi padi muntu utudi tunemeka utuenzela malu mabi.

5. Bua tshinyi tudi ne bua kukolesha ditabuja dietu? Fila tshilejilu. (Kolosayi 1:23)

⁵ Bua kushala ne lulamatu kudi Yehowa mu ntatu, tudi ne bua kuikala ne ditabuja dikole kudiye. Tshilejilu, bua nzubu kushalaye anu muimane padi tshipepele tshikole menemene tshituta, udi ne bua kuikala ne tshishimikidi tshikole. Bia muomumue, bua tuetu kushala ne lulamatu kudi Yehowa patudi tutuilangana ne nsombelu ya buena idi mu tshikoso tshinayi, bidi bikengela tuikale ne ditabuja dikole. Nunku, tudi ne bua kutungunuka ne kukolesha ditabuja dietu bua tuenzele anu Yehowa mudimu nansha nsombelu kayi mua kutufikila.​—1 Kol. 15:58; bala Kolosayi 1:23.

6. Ntshinyi tshivua tshiambuluishe bayidi bakuabu bua kushalabu balamate Yezu?

⁶ Bua tshinyi bayidi bakuabu bakashala ne lulamatu kudi Yezu pavua bakuabu ba bungi bamulekele? Bualu bavua batuishibue ne: Yehowa mmukumbane bua kumutendelela bua mudiye Mufuki wa bintu bionso; Yezu mMuana wa Nzambi udi ne “mêyi a muoyo wa tshiendelele”; ne bavua batuishibue kabidi ne: Yehowa uvua usanka ne bionso bivua Yezu wenza. Kudi malu atudi bamanye bua Yehowa adi mua kutuambuluisha bua kushala ne lulamatu kudiye mu nsombelu mikole. Asatu a kudiwu ngowu aa: 1) Yehowa ke Mufuki wa bintu bionso. 2) Yehowa ke muena Bible. 3) Yehowa ke udi ulombola bantu bende lelu. Tuetu batuishibue ne: malu aa mmalelela, netushale anu ne lulamatu kudi Yehowa nansha nsombelu kayi mua kutufikila.

YEHOWA KE MUFUKI

7. Buakabuluibua 4:11 udi utuvuluija tshinyi? Mmunyi mudi mvese eu mua kutuambuluisha patudi mu ntatu?

⁷ Bala Buakabuluibua 4:11. Mvese eu udi utuvuluija ne: Yehowa ke Mufuki wa bintu bionso. Ke bualu bunene budi ne bua kutusaka bua kumutendelela. Patudi tuelangana meji a mudiye ne bukole bua bungi, bidi bitushindikila ne: neatuambuluishe mu ntatu yonso itudi mua kutuilangana nayi. Kadi Satana mmumuangalaje malu a dishima pa buloba apa bua kufikisha bantu ku ditaba ne: Nzambi katuku to. Bamue bena malu a sianse badi mene bamba ne: kakuena muntu udi mufuke bintu bidi ne muoyo to. Tuetu katuyi batuishibue ne: Yehowa ke Mufuki ne mmutunange, tudi mua kubanga kuelakana, tuamba ne: katuku ne kakutuambuluisha padi ntatu itukuata to.​—Eb. 11:6.

8-9. Wewe mubange kuelakana, wamba ne: Yehowa ki mMufuki wetu, ntshinyi tshiudi ne bua kuenza? (Tangila kabidi tshimfuanyi.)

⁸ Wewe mubange kuelakana, wamba ne: Yehowa ki mMufuki, keba tshia kuenza ne lukasa. Kebulula malu mu mikanda yetu adi mua kukujadikila ne: Yehowa ke Mufuki wa bintu bionso. Pamuapa neupete malu akolesha ditabuja diebe mu broshire wa La vie a-​t-​elle été créée? ne wa Cinq questions à se poser sur l’origine de la vie. Udi mua kupeta bijadiki bikuabu mu biena-bualu bitu bipatuka mu jw.org bia ne: “Mbidienzekele anyi mbifuka?” Muanetu mukuabu wa bakaji wa mu États-Unis, diende Jessica, udi wamba ne: “Malu angakabala mu mikanda yetu akanjadikila ne: kudi muntu wa meji a bungi udi mufuke bintu bionso. Nkavua mumanye bualu ebu, kadi malu amvua mubale au akatamba kabidi kunshindikila ne: Mufuki wa bionso udiku.” Padi bena Kristo bakuabu ba bungi bakonkonone kabidi malu adi mu mukanda wa Shala ne muoyo kashidi!, mu dilongesha 6 ne dia 7, mbafike ku dipeta bijadiki bia ne: Mufuki wa bionso udiku. Pamuapa ukadi mubale malu au mu mikanda yetu, kadi kuenaku mua kuabalulula anyi?

⁹ Tshilejilu, mu didilongela diebe dia Bible udi mua kukonkonona malu adi mua kukujadikila ne: Nzambi udiku. Malu au neakushindikile ne: Yehowa udiku ne neakuambuluishe bua kumumanya bimpe. (Lomo 1:20) Dîba adi neufike ku diambuluisha bantu bakuabu badi belakana, bamba mudi Nzambi kayiku. Bualu bunene mbuobu ebu: Yehowa mmutupeshe bijadiki bia bungi bidi bitujadikila ne: yeye ke Mufuki wetu.

Nebula: IAC/RGO/David Malin Images; tshikele ne mashinyi: Mercedes-Benz USA; ndeke: Kristen Bartlett/University of Florida

YEHOWA KE MUENA BIBLE

10. Bua tshinyi Bible udi ne mushinga wa bungi kutudi? (2 Timote 3:16, 17)

¹⁰ Bala 2 Timote 3:16, 17. Mu Bible mudi mêyi a Yehowa mafundila bantu. Bible udi wandamuna nkonko ya mushinga mukole ne udi utuambila tshidi Nzambi musue bua tuenze. Tudi batuishibue ne: Yehowa ke muena Bible. Ke bualu kayi tudi tuangata Bible ne mushinga wa bungi mu nsombelu wetu. Tutu basue kuenza muetu muonso bua kumvua Dîyi dia Nzambi bimpe ne kuditumikila.

11. Ntshinyi tshidi tshikujadikila ne: Bible mmukanda wa Nzambi?

¹¹ Ntshinyi tshidi tshitujadikila ne: Yehowa ke muena Bible? Kudi malu a bungi adi atujadikila nanku. Bible udi wamba malu avua menzeke kale anu muvuawu menemene. (Luka 3:1, 2) Udi kabidi wamba malu adi atangila buloba ebu anu mudiwu. (Yobo 26:7) Satana mmuenze muende muonso bua Bible ajimine mu bantu, nansha nanku mmuele bua tshiombe musabu, bualu mmukanda udibu babanyina bantu bikole menemene mu miakulu ya bungi kupita mukanda kayi wonso. Mbawufunde kudi bantu batue ku 40 bashilangane munkatshi mua bidimu bitue ku 1600. Nansha nanku, malu adibu bafunde adi apetangana. Mmukanda wa kale bushuwa, kadi mibelu idimu idi yambuluisha bantu lelu. (Nsu. 13:20; 15:21; Mat. 7:12) Bualu bukuabu budi butusaka bua kueyemena Bible budi ne: mêyi a buprofete a bungi adimu mmakumbane. (Yosh. 23:14) Bushuwa, Bible mmukanda wa Nzambi!

12. Tuetu katutshiyi ne dituishibua dia ne: Bible mmukanda wa Nzambi, ntshinyi tshitudi ne bua kuenza?

¹² Tuetu katutshiyi ne dituishibua dia ne: Bible mmukanda wa Nzambi, ntshinyi tshitudi ne bua kuenza? Mbimpe tusambile bua bualu abu, tulombe Yehowa diambuluisha, ne pashishe tuenze makebulula bua tshilumbu atshi. Mona tshidi muanetu wa balume utshidi nsonga udibu balongeshe bulelela kudi baledi bende wamba: “Tshitu ngitaba bualu kampanda anu bualu baledi banyi anyi bantu kampanda ke badi babungambila to. Ntu nganji kubutata nkayanyi kumpala kua kubuitaba. Mu bulelela, kutu misangu intu mpeta dielakana bua malu a mu Bible adibu bangambila anyi andi mbala. Dîba dia buena adi, ntu ngenza makebulula mu mikanda yetu bua kupeta malu adi mua kujikija dielakana dianyi adi.” Tuetu tuvuluka malu adi atujadikila ne: Yehowa ke muena Bible, ditabuja dietu nedikole menemene.​—1 Kol. 3:12, 13.

YEHOWA KE UDI ULOMBOLA BANTU BENDE LELU

13. Tuetu babange kuelakana, tuamba ne: Yehowa kena ulombola bulongolodi bua Bantemu ba Yehowa lelu, ntshinyi tshitudi ne bua kuenza?

¹³ Tuetu babange kuelakana, tuamba ne: Yehowa kena ulombola bulongolodi bua Bantemu ba Yehowa lelu, mbimpe tukebe tshia kuenza ne lukasa luonso. Tshilejilu, mbimpe tukebe mandamuna a nkonko eyi: ‘Mbanganyi badi badienzeja bua kutumikila mikenji ya Nzambi mu nsombelu wabu? Ntshitendelelu kayi tshidi tshiangatshila malongesha atshi anu mu Bible?’ (2 Tim. 4:3, 4) ‘Mbanganyi badi benza disua dia Yehowa lelu?’​—Mat. 7:20, 21.

14. Ntshinyi tshidi Bantemu ba Yehowa benza pabu bua kukumbaja mêyi adi mu Matayi 24:14?

¹⁴ Bua kumanya badi benza disua dia Nzambi lelu, diebeja ne: ‘Mbanganyi badi benza mudimu wa diyisha uvua Yezu muambe ne: uvua ne bua kuenzeka mu matuku a ku nshikidilu?’ (Mat. 24:14) Tudi tuandamuna katuyi tudia tshibanga ne: Bantemu ba Yehowa ke badi Nzambi ulombola bua kuenzabu mudimu au. Anu bobu ke badi bayisha lumu luimpe mu matunga ne miaba mipite pa 240. Kukadi mpindieu bidimu bipite pa 100 bitudi tuetu Bantemu ba Yehowa tuenda tuenza mudimu eu; ke mudimu wa mushinga mukole bua bantu ba Nzambi.​—Mat. 28:19, 20.

15. Ntshinyi tshidi Bantemu ba Yehowa benze bua kutumbisha dîna dia Nzambi lelu? (Matayi 6:9; Yeshaya 43:10)

¹⁵ Bala Matayi 6:9 ne Yeshaya 43:10. Tudi ne diakalenga dia kubikidibua ne: Bantemu ba Yehowa. Bantu ba bungi lelu badi balengulula dîna dia Nzambi, kadi tuetu tudi badienzeje bua kudipingaja mu Bible muaba uvuadi mu Mifundu ya ku ntuadijilu. Mu Bible wa Nkudimuinu wa bulongolodi bupiabupia didimu misangu mipite pa 7000.

16. Bua tshinyi tudi tuamba ne: Bantemu ba Yehowa badi batumikila mukenji udi mu Yone 13:34, 35? (Tangila kabidi tshimfuanyi.)

¹⁶ Bala Yone 13:34, 35. Lelu bantu ba bungi kabena bapetangana ne ki mbanangangane to. Kadi Bantemu ba Yehowa bobu mbanangangane ne badi mu buobumue. Mba mu matunga mashilangane ne badi ne bibidilu bishilangane, nansha nanku badi mu ditalala ne mbanangangane. Pamuapa ukadi mubuele mu bisangilu biabu ne mudimuenene mudibu banangangane ne bikale mu buobumue. Bidi bileja bimpe ne: Yehowa udi bushuwa ubalombola bua kuenzabu disua diende lelu. Tuetu tuvuluka bualu ebu, nebituambuluishe bua kushala ne lulamatu kudi Yehowa patudi tutuilangana ne ntatu.

KULEKEDI YEHOWA TO

17-18. Nntatu kayi itudi mua kupeta? Ntshinyi tshitudi mua kuamba ne dishindika dionso?

¹⁷ Mu matuku a ku nshikidilu aa, netutuilangane ne ntatu. (2 Tim. 3:1, 13) Pamuapa netutuilangane ne nsombelu mikuabu idi mua kutukebela tunyinganyinga. Bulongolodi bua Nzambi budi mua kuangata mapangadika atudi katuyi mua kumvua bimpe menemene to. Muena Kristo netu udi mua kuenza bualu budi mua kutunyingalaja. Bidi mua kutukolela bua kumanya mua kujikija lutatu lutudi nalu anyi bua kumanya tshidi tshienze bua lutatu kampanda lutufikile.

¹⁸ Nansha mutudi mua kumvua bibi bua malu adi atufikila, tudi anu mua kushala ne lulamatu kudi Yehowa bualu tudi bamanye ne: yeye ke Mufuki wetu ne ke muena Bible. Tudi kabidi bamanye ne: Bantemu ba Yehowa mbantu bende. Tudi petu mua kuambila Yehowa anu bu Petelo uvua muambile Yezu ne: “Mukalenge, netuye kudi nganyi? Wewe udi ne mêyi a muoyo wa tshiendelele.”