Peta busambi mu mukanda wa Yeshaya

1-2. Leja mutu Yehowa utuambuluisha patudi ne malu adi matubungamije.

DIFUANYIKIJILA muana wenda udila bikole, muikale ne kanyinganyinga ka bungi, pamuapa bualu udi ushiyangana ne balunda bende bua mudi bena mu dîku diabu bamuangala. Udi mua kuikala ne kanyinganyinga aku pamuapa bua tshilema kampanda tshidiye muenze. Ntshinyi tshidi mamu udi munange muanende mua kuenza dîba dia nunku? Udi wela muanende mu tshitupa, umuteleja padiye umuambila malu adi mamutonde, ne umuambila ne: mmumunange.

² Mu Bible, Yehowa mmudifuanyikije ne mamu udi munange muanende, umutabalela, ne umusamba. Udi wamba ne: “Bu mudi mamu usamba muanende, ke mungatungunuka ne kunusamba.” (Yesh. 66:13) Yehowa mmutunange bikole kupita muledi kayi yonso. (Yesh. 49:15) Udi utusamba ku diambuluisha dia Bible Dîyi diende ne utupetesha bukole butudi nabu dijinga patudi babungame anyi patudi tukenga.​—Lomo 15:4.

3. Mmalu kayi atuamona mu tshiena-bualu etshi?

³ Mu mukanda wa Yeshaya mudi mêyi a bungi adi atupetesha busambi. (Yesh. 40:1) Tatu wetu wa dinanga uvua muwufundishe ku bukole bua nyuma wende bua kusamba bantu bende bavua mu Yuda pavuabu ne ntatu. Tuetu petu tudi dijinga ne busambi bualu tudi mu “bikondo bia malu makole bidi bikole mua kupita nabi.” (2 Tim. 3:1) Tumonayi imue mvese ya mu mukanda eu idi mua kutupetesha busambi ne kutukolesha 1) padi bualu butuvua katuyi belele meji butufikila, 2) patudi tutungunuka ne kudipisha bua mpekatu utuvua benze, ne 3) patudi ne kanyinganyinga bua mutudi bafuishe.

PADI BUALU BUTUVUA KATUYI BELELE MEJI BUTUFIKILA

4. Mmunyi mutudi mua kumvua padi malu atuvua katuyi belele meji atufikila?

⁴ Nsombelu wetu udi mua kushintuluka mu mushindu utuvua katuyi belele meji. (Muam. 9:11; 1 Kol. 7:31) Tudi mua kupeta ntatu mu tshimpitshimpi bu mudi kusama, lutatu lua makuta, bimvundu bia malu a tshididi bidi mua kuenzeka muaba utudi, anyi badi mua kutumbusha mu mudimu utudi tuenzela Yehowa. Malu aa adi mua kutubungamija bikole, tudimona bapange tshia kuenza. Dîba adi muntu udi anu mua kudiebeja ne: ‘Ntshinyi tshindi mua kuenza mpindieu?’ Tuakulabi bua muanetu wa balume kampanda, diende Joseph. Yeye mumane kuenza bidimu 17 ku Betele, bakamutuma bu mpanda-njila mu tshisumbu. Udi wamba ne: “Ngakimana mukolo mule ne muîpi. Bu mumvua muenze bidimu bia bungi ku Betele, kabivua bipepele bua meme kutuadija nsombelu mupiamupia au to. Tshivua mumanye pa kubangila to.” Ntshinyi tshidi Yehowa utujadikila mu mukanda wa Yeshaya patudi tutuilangana ne nsombelu ituvua katuyi belele meji?

5. Bilondeshile Yeshaya 42:16, Yehowa udi utujadikila tshinyi? (Tangila kabidi tshimfuanyi.)

⁵ Bala Yeshaya 42:16. Yehowa mmulaye bua kulombola bantu badi bu bampofu mu tujila tudibu kabayi bibidilangane natu ne bua kuvuija mîdima butoke. Padibu bakula bua “bampofu,” ‘tujila tudibu kabayi bibidilangane natu,’ “mîdima,” “muaba wa binina,” badi basua kuakula bua mutudi mua kumona nsombelu wetu wa matuku atshilualua padi malu ashintuluka mu tshimpitshimpi. Tudi mua kudimona anu bu ne: tudi tuendela mu dîtu dinene, bajimine njila. Kadi Yehowa udi utujadikila ne: nansha tuetu batuilangane ne lutatu kayi, kakutulekela nansha kakese, neatulombole. Neatukuate ku tshianza bua kutulombola mu mîdima, ututokeshila njila wetu ne utulandakajilaye padiye ne binina. Mmunyi mutu Yehowa wenza nanku? Utu wenza nanku ku diambuluisha dia bulongolodi buende ne dia mibelu idi mu Dîyi diende. (Mis. 119:105; Yesh. 30:21) Utu usaka kabidi bena Kristo netu ne bantu bakuabu bua kutuambuluisha. Nansha tuetu katuyi bamanye tshiatufikila, tuikalayi batuishibue ne: Yehowa neatuambuluishe bualu mmutunange ne mmumanye mutudi tudiumvua.​—Yesh. 41:10; 1 Pet. 5:6, 7.

6. Nsombelu webe yeye mushintuluke mu mushindu uuvua kuyi muelele meji, udi ne bua kuikala ne dishindika kayi?

⁶ Joseph utukadi batele wakumvuija muvua Yehowa mubambuluishe yeye ne mukajende pakavuabu bumbuke ku Betele. Udi wamba ne: “Tshikondo atshi, tuvua bamone muvua Yehowa mutuambuluishe ku butuangaji bua bena Kristo netu. Tuakapeta bintu bituvua nabi dijinga ne busambi mu tshikondo tshiakanyine; ne udi utungunuka anu ne kutuambuluisha.” Bionso abi bidi bileja ne: mmutunange. Nsombelu webe yeye mushintuluke mu mushindu uuvua kuyi muelele meji, ikala pebe mutuishibue ne: Yehowa neakukoleshe ne neakulombole nansha lutatu luolu lumueneka lukole menemene. (Yesh. 54:10; 58:11) Joseph udi wamba kabidi ne: “Mêyi a mu musambu wetu wa pa buawu, a ne: ‘Tshianduila malaba [tshiena mutshimanye]; tshibi tshiakuikala [meme nkayanyi to],’a adi aleja bualu ebu bimpe. Bushuwa, nansha malu kaayi menzeke mu mushindu utuvua baalongolole, tudi batuishibue ne: Yehowa neatuambuluishe.”

PATUDI TUTUNGUNUKA NE KUDIPISHA

7. Ntshinyi tshidi bamue mua kumvua bua mpekatu ivuabu benze?

⁷ Patudi tutonda mpekatu munene utudi benze, bakulu batu batuambuluisha, pashishe tutu tudienzeja bikole bua kubenga kuenzulula mpekatu au. (Nsu. 28:13; Yak. 5:14-16; 1 Yone 1:9) Kadi nansha Yehowa mumane kutufuila luse, pamuapa tudi mua kutungunuka anu ne kudipisha, tudiambila ne: ‘Bua eu mpekatu umvua muenze, Yehowa ki mmumbuikidile anu to.’ (2 Kol. 2:7) Bidi anu mua kutufikila bua kumvua nanku, bualu mpekatu utuvua benze uvua mua kuikala munene, ne bidi mua kushala bitutonda matuku a bungi. Mukalenge Davidi wakamba ne: “Bua mpekatu wanyi, ditalala kadiena mu mifuba yanyi. Ndi mukuatshike tukulakaja ne mulue muzajike yonso.” (Mis. 38:3, 8) Wewe umvua pebe nanku imue misangu bua mpekatu uuvua muenze, mukanda wa Yeshaya udi mua kukusamba.

8-9. Mmunyi mudi Yeshaya 1:18 uleja ne: Yehowa udi utubuikidila mpekatu ne muoyo mujima?

⁸ Bala Yeshaya 1:18. Yehowa utu ufila bilejilu bua kumvuija mushindu udiye utubuikidila mpekatu ne muoyo mujima. Udi wamba ne: nansha mpekatu yetu yoyi “mikunze kunzuu,” udi uyivuija “mitoke anu bu neje.” Dikeji dikunze kaditu diumbuka ku tshilamba bipepele to. Kadi Yehowa udi utujadikila ne: nansha mpekatu yetu mikale bu dikeji dikunze adi, padiye utubuikidilayi, kakuyivuluka kabidi to.

⁹ Tuakulabi bua mukalenge Davidi. Nansha muvuaye muende masandi ne mushipangane, Yehowa wakamubuikidila, kuluaye kuamba muvuaye muntu wa muoyo mutoke. (2 Sam. 11:3, 4, 14, 15; 12:13; 1 Bak. 9:4, 5) Yehowa kavua wimanyina pa mpekatu ya Davidi to, uvua wimanyina pa lulamatu luende. Ke mudi Yehowa utufuila petu luse patudi tunyingalala bua mpekatu yetu; ne udi utuambuluisha bua tutungunuke ne kumuenzela mudimu ne kondo ka muoyo kimpe. Patudi tutungunuka ne kudipisha, ntshinyi tshidi Yehowa utujadikila kabidi mu mukanda wa Yeshaya?

10. Mmêyi kayi adi Yehowa utukankamija nawu mu Yeshaya 38:17?

¹⁰ Bala Yeshaya 38:17 ne dimanyisha. Badi mua kukudimuna kabidi tshiambilu tshia ne: “Udi mukupe mpekatu yanyi yonso panyima pebe” mushindu eu: Udi “mumbushe mpekatu yanyi yonso ku mêsu kuebe.” Tshiambilu etshi tshidi tshileja ne: Yehowa udi wangata mpekatu ya muntu uyikupa panyima pende yeye, muaba udiye yeye muine kayi mua kuyimona anyi kuyivuluka kabidi to. Mukanda mukuabu udi uleja ne: tshiambilu etshi badi mua kutshikudimuna ne: “Udi mumbushe mpekatu yanyi, bilua anu bu ne: tshivua muyenze to.” Nunku padi Yehowa utubuikidila mpekatu, buende yeye, bidi bilua anu bu ne: katuvua nansha bamuenze to. Nunku kakatunyoka bua mpekatu au to, bualu kakumuvuluka kabidi to. Udi utulaya ne: “Tshiakuvuluka mpekatu yebe to.” (Yesh. 43:25) Mêyi aa adi atukolesha ku muoyo. Bikala Yehowa, Mulumbuluishi Munene, kayi uvuluka mpekatu yetu, tuetu tudi banganyi bua kutungunuka ne kudipisha bua bualu buayi?

11. Nansha biobi ne: tuvua benze mpekatu ku kale, tshidi ne mushinga wa bungi kudi Yehowa ntshinyi? (Tangila kabidi tshimfuanyi.)

¹¹ Tuetu tutungunuka ne kudipisha bua mpekatu utuvua benze, mbimpe tuvuluke tshidi Yehowa mutulaye. Udi utufuila luse ne muoyo mujima. Katuena tumuenza bundu bua mpekatu ituvua benze, ne kena bu bantu batu bashala balaminangane munda to. (Yesh. 57:16) Malu atudi tuenza lelu ne atuenza matuku atshilualua ke adi ne mushinga wa bungi kudi Yehowa, kadi ki ngatuvua benze kale to. (Yesh. 55:7) Yehowa Nzambi wetu utudi tuenzela mudimu mmutunange bikole ne mmusue kutufuila luse. Nunku katulekedi mpekatu ituvua benze kale itujimijila disanka dietu ne itupangisha bua kupeta mabenesha atshilualua to.

PATUDI NE KANYINGANYINGA BUA MUTUDI BAFUISHE

12. Mmunyi mutudi mua kumvua patudi tufuisha?

¹² Patudi tufuisha, kanyinganyinga kadi mua kutupuila panshi ne tudi mua kushala naku matuku a bungi. Kudi misangu itudi mua kudiebeja ne: “Bua tshinyi Yehowa mmulekele mulela wanyi eu ufua?” Muanetu wa balume mukuabu, diende Michael, uvua mufuishe baledi bende mu kapia, udi wamba ne: “Muoyo wanyi uvua musunsuke ne mvua mukuatshile Yehowa tshiji bua muvuaye mulekele baledi banyi bafua. Ndi mumanye ne: ki nyeye uvua mubashipe to, kadi kavua mubepule ku njiwu ayi to.” Pamuapa ukadi pebe mufuishe muntu ne mufike ku diumvua anu bu Michael. Biobi nanku, mmushindu kayi udi Yehowa ukusamba ne ukupetesha ditekemena?

13. Mbualu kayi budi Yehowa mutulaye mu Yeshaya 25:8?

¹³ Bala Yeshaya 25:8. Yehowa mmulaye bua ‘kumina lufu bua kashidi.’ Ela meji muikala nsombelu pikala lufu kalutshiyiku kabidi! Kuakumvua kabidi kanyinganyinga katu muntu umvua padiye ufuisha to. (Yesh. 35:10) Kuakumvua muoyo usama mutuwu usama muntu lelu padiye umona lukita lua muntu udiye mufuishe to. Kadi newikale anu ne balela bebe, ubamona ne muoyo ne makanda a mubidi mimpe. Bualu ebu ki mbua dishima to, nebukumbane bualu Yehowa nkayende ke udi mutulayabu. Anu yeye ke udi mua kubukumbaja.​—Buak. 21:4, 5.

14. Paudi welangana meji a dibishibua dia bantu ku lufu, udi umvua bishi? (Yeshaya 26:19) (Tangila kabidi tshimfuanyi.)

¹⁴ Bala Yeshaya 26:19. Yehowa neajimije lufu ne neabishe bafue betu. Udi wamba bua bantu batudi bafuishe ne: “Bitalu bianyi nebijuke.” Bidi bisua kumvuija ne: bafue betu abu mbantu bende ne udi nabu mu meji; neababishe ku lufu mu tshikondo tshiakanyine. Anu mutu lumuma luambuluisha bikunyibua bidi bifubidile bua kusampila, ke muikala Yehowa udi Mpokolo wa muoyo mua kubisha bafue betu. Patuakidilangana nabu, netumvue disanka dia bungi be!​—Fuanyikija ne Mâko 5:42.

15. Mmunyi mudi mulayi wa dibishibua dia bantu ku lufu utuambuluisha patudi ne tunyinganyinga?

¹⁵ Nansha mudi mulayi wa Nzambi wa dibisha dia bantu ku lufu kawuyi ujikija kanyinganyinga katudi tumvua, udi utukolesha bualu tudi bamanye ne: Yehowa ki mmupue bantu batudi bafuishe muoyo to. Mulayi eu ke uvua mukoleshe Michael utukadi batele. Udi wamba ne: “Yeshaya 26:19 mmungambuluishe bua kumona ne: baledi banyi bavua ne mushinga wa bungi menemene kudi Yehowa. Udi nabu mu meji too ne pababishaye ku lufu mu tshikondo tshikadiye mulongolole. Mvese eu mmunkoleshe ne mumpeteshe busambi.” Mbimpe tuikale tuelangana petu meji a tshikondo tshituamonangana kabidi ne bantu batudi bafuishe. Dîba adi, nebitukoleshe patudi ne tunyinganyinga.

16. Mmvese kayi utu ukukolesha wewe paudi mu ntatu?

¹⁶ Tudi bakonkonone mvese mikese ya mu mukanda wa Yeshaya idi mua kutupetesha busambi padi nsombelu wetu ushintuluka mu mushindu utuvua katuyi belele meji, patudi tutungunuka ne kudipisha bua mpekatu ituvua benze, ne patudi ne kanyinganyinga ka mutudi bafuishe. Tudi ne dianyisha dia bungi kudi Yehowa bua mudiye utusamba ku diambuluisha dia Dîyi diende. (Mis. 94:19) Kudi mvese utu nangananga ukusamba wewe paudi ne ntatu anyi? Udi mua kumukuata ku muoyo anyi kumufunda pa dibeji peshi kumuteka muaba uudi mua kuikala umumona pa tshibidilu. Nunku, mêyi a Yehowa, Tatu wetu wa mu diulu udi mutunange akusambe ne akukoleshe!