Ambuluisha bakuabu bua bamanye Yehowa

1. Mmunyi muutu umvua paudi umona mulongi wa Bible uya kumpala?

MMUNYI muutu umvua patu mulongi webe wa Bible utuadija kubuela mu bisangilu, wandamunamu, wambila bantu bakuabu malu adiye ulonga, ne wangata dipangadika dia kudilambula kudi Yehowa? Utu umvua disanka dia katshia! Yehowa ke utudi ne bua kupesha butumbi padi mulongi wetu wa Bible uya kumpala. Ke tshitutu tuenza patudi tumona mudiye wambuluisha mulongi wetu bua kulubuluka.​—1 Kol. 3:5-9; 3 Yone 3, 4.

2. Ntshinyi tshidi Yehowa musue bua balongi ba Bible? (1 Timote 2:3, 4)

² Nzambi mmusue bua “bantu ba mishindu yonso bapandishibue ne bafike ku dimanya dijalame dia bulelela.” (Bala 1 Timote 2:3, 4.) Yehowa mmusue bua bantu bamumanye, bamanye malu akadiye mutuenzele ne aluaye kutuenzela. (Yel. 9:24) Mbuena kuamba ne: muntu udi dijinga ne dimanya dijalame. Mumanyi mukuabu wa malu a mu Bible wakamba ne: tshiambilu tshia ne: “dimanya dijalame” mu muakulu wa ntuadijilu katshiena tshiumvuija anu kumanya malu patupu to, kadi tshidi tshiumvuija kulonga “mu mushindu udi ufikisha muntu ku dishintulula nsombelu wende.” Padi mulongi wa Bible umanya Yehowa, dimanya adi didi dishintulula mushindu wende wa kuenza malu. Padiye wenza nanku, neapete “muoyo wa tshiendelele.”​—Yone 17:3.

3. Ntshinyi tshituamona mu tshiena-bualu etshi?

³ Yehowa mmutupeshe diakalenga dia kuambuluisha bantu bakuabu bua bafike ku dimumanya. Mu tshiena-bualu etshi, netuandamune nkonko idi ilonda eyi: Bua tshinyi balongi ba Bible badi ne bua kumanya Yehowa bimpe? Mmunyi mutudi mua kubalongesha bua kumanya mutu Yehowa? Mmunyi mutudi mua kubambuluisha bua kutumikila malu adibu balonga?

AMBULUISHA MULONGI WA BIBLE BUA AMANYE YEHOWA BIMPE

4. Bilondeshile Mâko 12:30, ntshipatshila kayi tshinene tshitudi natshi patudi tulombola malonga a Bible?

⁴ Yezu wakamba ne: mukenji udi munene kupita mikuabu ngua kunanga Yehowa ne muoyo wetu mujima, ne anyima wetu yonso ne lungenyi luetu luonso ne bukole buetu buonso. (Bala Mâko 12:30.) Mulongi udi ne bua kumanya Yehowa bua amone mua kumunanga. Tutu basue bua balongi betu ba Bible badilambule kudi Yehowa bualu mbamunange, ki mbualu mbatunange tuetu, malongesha etu, anyi bulongolodi buetu to. Nunku, tshipatshila tshietu tshinene ntshia kuambuluisha mulongi bua kumanya Yehowa ne kumunanga.

5. Mulongi wa Bible yeye munange Yehowa, dinanga adi nedimusake bua kuenza tshinyi?

⁵ Kudi dipetangana pankatshi pa kunanga ne kutumikila. Padi anu mulongi webe umanya Yehowa ne umunanga, nebimusake bua kumutumikila. Yezu wakamba ne: “Bua ba pa buloba kumanya ne: ndi munange Tatu, ndi ngenza anu mudi Tatu mungambile bua kuenza.” (Yone 14:31) Bia muomumue, mulongi wa Bible yeye munange Yehowa kupita tshintu kayi tshionso, dinanga adi nedimusake bua kumutumikila ne kumueyemena.​—1 Yone 5:3.

6. Mmunyi mudi kumanya Yehowa mua kuambuluisha mulongi webe wa Bible bua kuangata mapangadika? Fila tshilejilu.

⁶ Balongi ba Bible badi bamanye Yehowa bimpe batu bangata mapangadika mimpe. Tshilejilu, muendeshi wa ndeke katu ulonga anu mua kuendesha ndeke anyi mikenji ya mua kumuendesha patupu to; peshi katu wenza anu mateta a mua kumuendesha to. Kadi udi ne bua kuendesha ndeke misangu ya bungi. Dîba adi nebimuambuluishe bua kumanya mua kumuendesha padi kuulu kuimpe anyi padiku kubi; ne neamanye kabidi mapangadika mimpe a kuangata padiye wenda umuendesha. Biamuomumue, mulongi wa Bible neafike ku dimanya Yehowa padiye ulonga Bible ne umona mudi malu enda bimpe padiye wangata mapangadika bilondeshile mêyi manene a mu Bible. Padiye wenda umanya Yehowa bikole ne umona mudiye umuambuluisha, neamanye mua kuangata mapangadika mimpe mu nsombelu yonso.

7. Mmunyi muvua kumanya Yehowa kuambuluisha Jozefe bua kuangata dipangadika dimpe?

⁷ Bu muvua Jozefe mumanye Yehowa, biakamuambuluisha pavua mukaji wa Potifâ ujinga kuenda nende masandi. Pavuaye muana, bakamulongesha muyuki wa Adama ne Eva, ne wa Abalahama ne Sala. (Gen. 2:24; 20:3, 6) Miyuki ayi yakamuambuluisha bua kumona mutu Yehowa umona dibaka ne disangila. Bu muvua Jozefe mumanye Yehowa bimpe wakafika ku dibenga malu avua mukaji wa Potifâ umuambila, yeye kumuambila ne: “Mmunyi mundi mua kuenza bualu bubi bunene nunku, ne bushuwa kuenzela Nzambi mpekatu?” (Gen. 39:7-9) Jozefe uvua mumanye tshivua tshimpe ne tshivua tshibi ku mêsu kua Yehowa. Uvua mumanye kabidi tshivua mua kunyingalaja Nzambi wende. Ke bualu kayi wakangata dipangadika dimpe. Tuetu tuambuluisha balongi betu ba Bible bua kumanya Yehowa bimpe ne kumanya tshidiye, nebangate pabu mapangadika adi amusankisha.

MULONGESHA BUA AMANYE TSHIDI YEHOWA MENEMENE

8. Mmunyi muudi mua kulongesha ne mukanda wa Shala ne muoyo kashidi! bua kuambuluisha mulongi wa Bible bua kumanya Yehowa?

⁸ Mmunyi muudi mua kulongesha mulongi wa Bible bua kumanya tshidi Yehowa? Yehowa wakela Yobo nkonko mipite pa 50 bua kumuambuluisha bua amanye malu a bungi adi amutangila. (Yobo 38:1–41:34) Tuetu petu tudi ne nkonko itudi mua kudiela. Nkonko itu mu mukanda wa Shala ne muoyo kashidi! itu miela bua kuambuluisha mulongi wa Bible bua amanye ngikadilu ya Yehowa ku kakese ku kakese. (Tangila kazubu ka “Nkonko idi ituambuluisha bua kulongesha.”) Nunku, uvuluke bua kuela mulongi nkonko eyi, bua umuambuluishe bua afike ku dimanya Yehowa.

9-10. a) Ntshinyi tshidi mua kuambuluisha balongi ba Bible bua kupeta malongesha a bungi padibu babala Bible? (Yakobo 5:11) b) Fila tshilejilu tshia mudi bualu bua mu Bible mua kuleja malu adi asankisha Yehowa ne adi amunyingalaja.

⁹ Patutu tutuadija anu kulonga Bible ne bantu, tutu tubakankamija bua batuadije kubala Bible dituku dionso.a Kadi mmunyi mutudi mua kubambuluisha bua bikale bapeta malongesha a bungi padibu babala Bible? Tudi mua kubalomba bua padibu babala bualu kampanda mu Bible, bikale badiebeja ne: Bua tshinyi Yehowa uvua mufundishe bualu ebu? Nngikadilu yende kayi itudi tupeta mu bualu ebu? Mona muvua muyidi Yakobo muenze nanku pavuaye ubala bualu bua Yobo. Kavua muimanyine anu pa dinanukila dia Yobo to, kadi uvua mukebe kabidi ngikadilu ya Yehowa mu bualu abu, bu mudi dinanga dikole menemene ne luse.​—Bala Yakobo 5:11.

¹⁰ Tudi basue bua balongi betu ba Bible bajingulule mudi bualu buonso bua mu Bible buleja malu adi asankisha Yehowa ne adi amunyingalaja. Tshilejilu, mulongi wetu wa Bible udi mua kuya mu kazubu ka ne: “Keba mua kutuadija kubala Bible,” mu mukanda wa Shala ne muoyo kashidi! Pashishe utuambila ne: mmusungule bua kubala bualu bua Danyele mu buina bua ntambue. Tudi mua kumulomba bua elangane meji a nkonko bu mudi: ‘Bua tshinyi Yehowa uvua musungile Danyele? Bualu ebu budi bundongesha tshinyi bua malu adi asankisha Yehowa?’ (Dan. 6:10, 22) Udi mua kudiebeja kabidi ne: ‘Ntshinyi tshivua tshifikile bantu bavua bafunde Danyele? Bualu ebu budi bundongesha tshinyi bua malu adi anyingalaja Yehowa?’ (Dan. 6:4, 5, 24) Ndekelu wa bionso, udi mua kuelangana kabidi meji a ngikadilu mikuabu ya Yehowa idi mu bualu abu.​—Dan. 6:26, 27.

11. Mmunyi mutudi mua kuleja mulongi wetu wa Bible ne: Yehowa ke udi umulongesha?

¹¹ Tutu tusanka patu balongi betu ba Bible bamone mudi malu adibu balonga abambuluisha. Nansha nanku, tudi ne bua kubaleja ne: Yehowa, Mulongeshi wetu Munene ke udi ubalongesha malu onso au. (Yesh. 30:20, 21) Mulongi wetu wa Bible udi mua kutuela tuasakidila bua malu adiye ulonga anyi udi mene mua kututumbisha bua mushindu utudi tumulongesha. Biobi ne: udi utuela tuasakidila nanku ne muoyo mujima, tuitabe kadi tumuleja ne: Yehowa ke utudi ne bua kutumbisha ne kuleja dianyisha.

MUAMBULUISHA BUA ATUMIKILE MALU ADIYE ULONGA

12-13. Mmunyi mudi kumanya Yehowa mua kuambuluisha mulongi padiye ubala bualu bua mu Bible budiye kayi umvua bimpe? (Tangila kabidi tshimfuanyi.)

¹² Bua dimanya dijalame kutuambuluishadi, tudi ne bua kutumikila malu atudi tulonga. Kadi mmunyi muudi mua kuambuluisha mulongi webe wa Bible bua kutumikila malu adiye ulonga? Bualu bua kumpala, muambile bua ikale uvuluka malu a Yehowa adiye mumanye padiye ubala bualu mu Bible budiye kayi umvua bimpe to. Tshilejilu, padiye ubala bua muvua Nzambi muenzele bantu malu, udi mua kudiebeja tshivua tshimusake bua kushipa bamue bantu ne kulekela bakuabu. Mmunyi muudi mua kuambuluisha mulongi webe bua ikale wela meji mu mushindu muimpe padiye ubala Bible?

¹³ Udi mua kumukankamija bua ikale welangana meji a malu a Yehowa adiye mulonge. Udi mua kudiebeja ne: Mmunyi mutu Yehowa wangata muoyo? (2 Pet. 3:9) Mmalu kayi mmimpe adiye muenze bua kutusungila nansha mutudi bena mpekatu? (Ef. 2:4, 5) Utu unyoka bantu badi kabayi bakanyine dinyoka anyi? Peshi utu ulekela bantu babi badi bakanyine dinyoka? (Ekes. 34:6, 7) Imue misangu, muyuki kampanda wa mu Bible kawutu ne malu onso adi mua kutuambuluisha bua kumvua tshivua tshifikishe Yehowa ku diangata dipangadika kampanda to. Nansha nanku, katuena dijinga ne kumanya kalu ne kalu konso to. Tudi bamanye Nzambi wetu ne tudi batuishibue ne: utu misangu yonso wenza malu adi makane.

14. Mmunyi muudi mua kuambuluisha mulongi webe biobi bimukolela bua kupetangana ne muntu mu tshisumbu?

¹⁴ Tuakulayi bua bualu buibidi budi mua kuambuluisha mulongi bua kutumikila malu adiye ulonga. Fuanyikijabi ne: mulongi webe ukadi ubuela mu bisangilu, kadi bidi bimukolela bua kupetangana ne muanetu kampanda mu tshisumbu. Pamuapa bualu muanetu au uvua mumuenzele bualu buvua bumunyingalaje. Biobi nanku, mukankamije bua ela meji a mutu Yehowa umona bena Kristo netu. Adiebeje ne: Ntshinyi tshidi Yehowa muenze bua kuleja ne: mmubanange? (Yone 3:16) Bua tshinyi buobumue buetu budi ne mushinga kudiye? (Mis. 133:1) Mmunyi mutuye umvua patudi tudienzeja bua kulama buobumue buetu? (2 Kol. 13:11) Ambuluisha mulongi webe bua amone ne: Yehowa neasanke bikole patudi tuimanyina pa ngikadilu mimpe ya bena Kristo netu pamutu pa kuimanyina pa bilema biabu.

15-16. a) Mmunyi mudi mulongi wa Bible mua kuidikija Yezu padiye ne dipangadika dinene dia kuangata? b) Mmunyi muvua Marianne muambuluishe mulongi wende bua kuangata dipangadika dimpe? (Tangila kabidi tshimfuanyi.)

¹⁵ Bualu bua ndekelu, ambuluisha mulongi webe bua kuangata mapangadika mimpe bilondeshile malu a Yehowa adiye mulonge. Udi mua kuanji kumuleja dilongesha dia 35 dia mu mukanda wa Shala ne muoyo kashidi! dia ne: “Mua kuangata mapangadika mimpe.” Kadi ntshinyi tshiwenza biobi ne: mulongi webe mmusambile, mmuenze makebulula, kadi bimukolela anu bua kuangata dipangadika dimpe? Pamuapa mmupete mêyi manene a mu Bible a bungi adi akula bua tshiena-bualu atshi. Udi mua kumulomba bua ele meji a tshilejilu tshia Yezu. Ntshinyi tshivua Yezu wenza bua kuangata dipangadika? Wakamba ne: ‘Misangu yonso ndi ngenza malu adi asankisha Tatu wanyi.’ (Bala Yone 8:29.) Muambile bua ikale udiebeja ne: ‘Bilondeshile makebulula andi muenze ne malu andi mulonge, ndipangadika kayi didi mua kusankisha Yehowa?’ Muambila ne: dipangadika dionso didi disankisha Yehowa ke dipangadika dimpe.

¹⁶ Mamu mukuabu uvua ulonga Bible mu ditunga dia Chili uvua ne dipangadika dinene dia kuangata. Bena mu dîku diende bavua bamuenzeja bua kuitaba mudimu uvuabu ne bua kumufuta makuta a bungi; kadi umupangisha bua kuikala kubuela mu bisangilu matuku makuabu. Marianne, mulongeshi wende wa Bible udi wamba ne: “Ngakamukankamija bua kuela meji bikala dipangadika diende mua kusankisha Yehowa peshi kumubungamija. Ngakamuambila kabidi bua asambile bua bualu abu ne indile bua kumona muvua Yehowa ne bua kumuandamuna. Wakabenga mudimu au, matuku makese pashishe, yeye kupeta mudimu wa mêba makese uvua umupetasha mpunga wa kuikala kubuela mu bisangilu.” Mona ne: pamutu pa Marianne kuambilaye mulongi wende tshivuaye mua kuenza, wakamukankamija bua kuelangana meji a malu a Yehowa akavuaye mumanye. Ke bualu kayi, bulunda bua mulongi au ne Yehowa buakakola ne bulunda buende ne Marianne kabidi. Marianne udi wamba bua mulongi wende au ne: “Mmulonge ne: Yehowa utu ututabalela tuetu tuteka ntendelelu wende pa muaba a kumpala.”

MABENESHA APETA BANTU BADI BAMANYA YEHOWA BIMPE

17. Pakumbusha kulonga malu a mu Bible, ntshinyi tshitutu basue bua balongi betu benze nanganganga?

¹⁷ Balongi betu batu bamanya malu a bungi patudi tubalongesha Bible. Tshilejilu, tshitu tshienzekela muntu padiye ufua, bua tshinyi Yezu wakafua, ne tshiatuenzela Bukalenge bua Nzambi. Batu balonga kabidi malu a mu bulongolodi buetu bu mudi mutu bisangilu bietu bienzeka, mudimu utu nawu bakulu ne utu nawu bena mu Kasumbu kaludiki. Kadi tutu basue bua balonge nangananga mua kumanya Yehowa bimpe menemene.

18. Mmabenesha kayi apeta bantu bonso badi bafika ku dimanya Yehowa?

¹⁸ Kulongesha bantu bakuabu bua bafike ku dimanya Yehowa ndiakalenga dia dikema ditudi nadi. Bantu badi bafika ku dimanya Yehowa ne batuadija kumutendelela badi bapeta nsombelu wa disanka dia katshia nansha lelu eu. (Mis. 25:12-15) Matuku atshilualua, bantu bonso badi ‘bapeta dimanya dia yeye udi mulelela,’ mmumue ne: Yehowa, nebapete muoyo wa tshiendelele. (1 Yone 5:20) Kadi nebapete mabenesha makuabu kabidi. Bible udi wamba ne: bantu bonso badi badienzeja bua kufika ku dimanya Yehowa bimpe ne kumunanga ‘mbamanyike kudiye.’ (1 Kol. 8:3) Bushuwa, Nzambi Wa Bukole Buonso utu ututabalela ne mmumanye ne: tudi balunda bende. Edi si ndibenesha dia katshia ditudi tupeta bua mutudi bamanye Nzambi wetu umuepele mulelela!