Mua kuangata mapangadika mimpe

Diandamuna dia mu Bible

Bible udi ne mibelu mimpe mitambe ya mua kuangata mapangadika. Udi utuambuluisha bua ‘kupeta meji ne dijingulula dia malu.” (Nsumuinu 4:5) Imue misangu udi utuleja patoke tshia kuenza bua kuangata dipangadika. Misangu mikuabu mibelu idimu idi ituambuluisha bua kuangata mapangadika mimpe.

Mu tshiena-bualu etshi, netumone malu aa:

Tshia kumanya bua kuangata mapangadika mimpe

Kulubakanyi to. Bible udi wamba ne: “Muntu mudimuke udi welangana meji a tshidia tshionso tshidiye wela.” (Nsumuinu 14:15) Wewe mulubakane, udi mufuane kulengulula malu a mushinga. Disumbila tshikondo tshia kukonkonona malu onso bimpe.—1 Tesalonike 5:21.
Kuangatshi mapangadika paudi ne tshiji anyi kanyinganyinga to. Bible udi utubela bua kubenga kueyemena muoyo wetu misangu yonso. (Nsumuinu 28:26; Yelemiya 17:9) Tshilejilu, udi uleja ne: katuena mua kuangata mapangadika mimpe tuetu ne tshiji, dibungama, batekete mu maboko, anyi nansha batshioke bikole to.—Nsumuinu 24:10; 29:22.
Sambila bua kupeta meji. (Yakobo 1:5) Nzambi utu musue kuandamuna masambila a nanku. NTatu udi utabalela bana bende, ki mmusue bua basamishile mutu bua malu adi kaayi ne mushinga to. “Yehowa muine udi ufila meji; mukana muende mudi mupatuka dimanya ne dijingulula dia malu.”a (Nsumuinu 2:6) Udi ufila meji au nangananga kupitshila ku Bible Dîyi diende.—2 Timote 3:16, 17.
Enza makebulula. Bua wewe kuangata dipangadika dimpe, mbimpe ukebe malu a kueyemena. Anu mudi Bible wamba, “muena meji udi uteleja ne udi upeta malongesha a bungi.” (Nsumuinu 1:5) Nkuepi kuudi mua kupetela malu mimpe a kueyemena?

Tshia kumpala, keba bua kumanya tshidi Bible nkayende wamba bua bualu buudi nabu. Bu mudi Mufuki wetu mumanye tshidi tshitambe buimpe buetu tuetu, Dîyi diende didi ne mibelu mimpe mitambe. (Misambu 25:12) Mu imue nsombelu, Bible udi uleja tshia kuenza patoke, pamuapa ku diambuluisha dia mikenji anyi mêyi matuma. (Yeshaya 48:17, 18) Kadi mu nsombelu mikuabu ya bungi, Bible kena uleja tshia kuenza patoke to. Udi utupesha buludiki ku diambuluisha dia mêyi manene. Mêyi manene au adi mua kutuambuluisha bua kuangata mapangadika mimpe nansha owu mashilangane ne a bantu bakuabu. Bua kupeta mvese idi itangila tshilumbu tshiudi natshi, enza makebulula mu biena-bualu anyi mikanda ya malu a mu Bible, bu mudi ya tshianana idi mu site wa jw.org.b

Mu imue nsombelu, pamuapa udi mua kukeba mikanda mikuabu ya kueyemena. Tshilejilu, kumpala kua kusumba tshintu kampanda, nangananga tshia mushinga mukole, mbimpe ukebe bua kumanya tshintu atshi bimpe ne udi mutshienze; ukebe kabidi tshikala mua kuenzeka tshiotshi tshinyanguke, anyi wewe musue kutshipingaja. Mbimpe umanye kabidi ne: ntshintu tshiudi ukeba menemene.

Bible udi wamba ne: “Malu malongolola adi apangila padiku kakuyi dishintakaja dia ngenyi.” (Nsumuinu 15:22) Nanku kumpala kua wewe kuangata dipangadika, yukila ne bantu ba kueyemena. Tshilejilu, mbia meji bua kuyukila ne munganga kumpala kua kuangata dipangadika dia kudiondopisha. (Matayi 9:12) Mu nsombelu mikuabu, udi mua kulomba mibelu kudi bantu bakadi bapete lutatu lua buena luebe alu. Kadi kupu muoyo ne: ndekelu wa bionso wewe ke udi ne bua kuangata dipangadika ne kuambula bujitu bua bipeta biadi to.—Galatiya 6:4, 5.
Konkonona malu onso. Wewe mumane kupeta malu onso, udi mua kufunda mapangadika mashilashilangane, pamue ne buimpe ne bubi bua dipangadika dionso. Pashishe, elangana meji bimpe bua tshiakufikila wewe muangate dipangadika adi. (Dutelonome 32:29) Diebeja tshidi dipangadika adi mua kukuenzela wewe, dîku diebe, anyi bantu bakuabu. (Nsumuinu 22:3; Lomo 14:19) Wewe mudiebeje nanku ne mukonkonone mêyi manene a mu Bible newangate dipangadika dimpe dia meji.
Angata dipangadika. Imue misangu, tudi mua kuelakana bua kuangata dipangadika bualu katuena basue kuangata mapangadika mabi to. Kadi kubenga kuangata dipangadika kudi mua kutupangisha tshintu tshimpe anyi kutupetesha ntatu. Mbuena kuamba ne: kubenga kuangata dipangadika nkubi paku kupita too ne kuangata dipangadika dibi. Bible udi utuambuluisha bua kumvua bualu abu padiyi wamba ne: “Muntu udi utangila lupepele kakukuna mamiinu to, ne muntu udi utangila matutu kakupuola to.”—Muambi 11:4.

Manya kabidi ne: kuangata dipangadika ditambe buimpe kakuena kumvuija kuangata dipangadika dipuangane to. Kuangata mapangadika kutu misangu ya bungi kulomba kudipangisha bualu kampanda. Ne kabidi, malu adi kaayi melela meji adi mua kuenzeka. (Muambi 9:11) Nanku, wewe mumane kukonkonona bualu bimpe, angata dipangadika diudi mumone ne: ndimpe.

Ndi ne bua kushintulula dipangadika dinkadi muangate anyi?

Dipangadika dionso kaditu anu dia kashidi to. Nsombelu webe udi mua kushintuluka, anyi udi mua kumona ne: dipangadika diebe ndipatule bipeta biuvua kuyi muelele meji to. Bua bualu abu, pamuapa mbimpe wewe kukonkonona kabidi malu bimpe, pashishe kuangata dipangadika didi difuane kupatula bipeta biudi ukeba.

Kadi kudi mapangadika atudi katuyi ne bua kushintulula to. (Misambu 15:4) Tshilejilu, Nzambi mmusue bua bena dibaka banemeke mutshipu wabu wa dibaka.c (Malaki 2:16; Matayi 19:6) Padi bilumbu bijuka mu dibaka, mulume ne mukajende badi ne bua kuenza muabu muonso bua kubijikija pamutu pa kujinga bua kushipa dibaka.

Kadi ngenze tshinyi meme tshiyi ne mushindu wa kushintulula dipangadika dibi?

Bitu bitufikila tuetu bonso bua kuangata mapangadika mabi anyi kuenza bilema. (Yakobo 3:2, dimanyisha dia kuinshi kua dibeji) Ki mbibi bua kudipisha anyi kumvua kanyinganyinga to. (Misambu 69:5) Misangu mikuabu kumvua nanku ki nkubi to kuoku kutuambuluisha bua kubenga kuenza bilema bia muomumue. (Nsumuinu 14:9) Kadi Bible udi uleja ne: kutamba kudipisha kudi mua kututekesha bikole anyi kutupangisha bua kuela meji bimpe. (2 Kolinto 2:7)d Bible udi wamba ne: “Yehowa udi ne luse ne udi uditeka pa muaba wa bakuabu.” (Misambu 103:8-13) Nanku, dipangadika dibi diudi kuyi ne mushindu wa kushintulula dikupeteshe kalasa ne enza tshiudi mua kuenza bua kuakaja malu.

a Yehowa ke dîna dia Nzambi didi dileja mu Bible.—Misambu 83:18.

b Mu site wa jw.org, udi mua kukeba muaku anyi tshiambilu bidi bipetangana ne dipangadika diebe. Site eu udi wambuluisha bua kupeta mibelu ya mu Bible idi itangila biena-bualu bia bungi. Udi mua kuenza kabidi makebulula pa muaku mu “Tshikebelu tshia miaku ya mu Bible” mu Bible—Nkudimuinu wa bulongolodi bupiabupia.

c Nzambi mmusue bua bena dibaka basombe pamue matuku abu onso a muoyo. Udi witaba kushipa kua dibaka ne kubuela mu dibaka dikuabu anu padi umue wa kudibu wenda masandi. (Matayi 19:9) Nuenu ne ntatu mu dibaka dienu, mibelu ya meji ne ya dinanga idi mu Bible idi mua kunuambuluisha bua kuyijikija.

d Bua kumanya malu makuabu, bala tshiena-bualu tshia “Je me sens coupable. La Bible peut-elle me libérer de ce poids?”