Dibanda dia bintu mushinga​—Ntshinyi tshidi Bible wamba?

Dibanda dia bintu mushinga bu mudi, nzembu ne biakudia mbualu butudi katuyi mua kuepuka to. Bitu bitamba kubanda mushinga nanku bua bimvundu bia malu a tshididi, anyi mvita. Nansha bantu badi kabayi basombele miaba idi mvita ayi badi batata pabu bualu matunga a bungi adi mu malanda makole kupita ne kuonso eku.

Bible udi utuambuluisha bua kumanya bua tshinyi tudi tutuilangana ne ntatu ya malu a makuta ya nunku, mutudi mua kupita nayi, ne udi uleja ne: Nzambi mmulongolole malu bua kuyijikija bua kashidi.

Dibanda dia bintu mushinga mu “matuku a ku nshikidilu”

• Bible udi ubikila tshikondo tshitudi etshi ne: ‘Mmatuku a ku nshikidilu.’​​—2 Timote 3:1.

• Yezu wakamba muvua “malu adi akuatshisha buôwa” mua kuenzeka mu matuku etu aa. (Luka 21:11) Bantu badi ne buôwa bua mudi bintu bibanda mushinga bikole. Badi basamisha mutu bua tshikalabu matuku kumpala anyi badiebeja muikalabu mua kukumbajila mêku abu bidiwu akengela.

• Mukanda wa Buakabuluibua ukavua muakule bua dibanda dia biakudia mushinga mu tshikondo etshi mu mêyi aa: “Meme kumvua bu diyi . . ., diamba ne: ‘Kilo umue wa ntete ya kuenza bukula, nansha kilo isatu ya ntete ya orje ikale [mushinga wa] difutu dia mudimu wa dituku dimue.’”​​—Buakabuluibua 6:6, Mukanda wa Mvidi Mukulu [wa Mishonyi].

Bua kumanya malu makuabu a “matuku a ku nshikidilu” ne a mêyi a buprofete adi mu mukanda wa Buakabuluibua, tangila filme wa Malu a panu mmashintuluke katshia ku 1914, ne ubale tshiena-bualu tshia “Bendeshi ba tubalu banayi mbanganyi?”

Muajika ntatu yonso ya malu a makuta

• “Nebase nzubu ne nebasombelamu, ne nebadime madimi a tumuma tua mvinyo ne nebadie tumuma tuawu. Kabakuibaka bua muntu mukuabu asombelamu, ne kabakukuna bintu bua bantu bakuabu babidie.”​​—Yeshaya 65:21, 22.

• “Nekuikale ntete ya bungi pa buloba; neyivulangane bikole pa nsongo ya mikuna.”​​—Misambu 72:16.

• “‘Bu mudibu bakengesha bakengi ne bua mikemu ya bapele, nenjuke bua kuenza bualu,’ ke mudi Yehowa wamba.”​​—Misambu 12:5.a

Mu katupa kîpi emu, Nzambi neajikije kansungansunga mu malu a mabanji pa buloba bujima. Bua kumanya tshienzaye, bala tshiena-bualu tshia “Bantu bonso pa buloba badi mua kulua babanji anyi?”

Nansha mpindieu kabidi, Bible udi mua kukuambuluisha bua kumanya mua kupita ne malu a dibanda dia bintu mushinga. Mushindu kayi? Udi ne mibelu mimpe ya meji ya mua kutula makuta bimpe. (Nsumuinu 23:4, 5; Muambi 7:12) Bua kumanya malu makuabu, bala tshiena-bualu tshia “Kuba makuta ne bintu biebe” ne tshia “Muudi mua kutula makuta makese audi nawu.”