Kuenza malu ne tshikisu ki nkumana bualu to

Lelu, bantu ba bungi batu bela meji ne: kuenza malu ne tshikisu mmushindu muimpe wa kujikija bilumbu. Kadi ki ntshivua Yezu mulongeshe to. Yeye muine kavua muenze malu mushindu au to. Mona amue malu avuaye muambe ne muenze.

Tshivua Yezu muambe

Yezu uvua mulongeshe mu Muyuki wende wa pa mukuna ne: kuenza malu ne tshikisu ne tshiji ki mmushindu muimpe wa kujikija bilumbu to. Tumonayi bilejilu bikese ebi:

• “Malu onso anudi basue bua bantu banuenzele, nudi ne bua kubenzelawu penu.” (Matayi 7:12; Luka 6:31) Mubelu eu udi utukankamija bua kuenzela bakuabu malu mutudi basue bua batuenzela petu. Bu mutudi katuyi basue bua batuenzela malu ne tshikisu, tudi petu ne bua kunemeka bakuabu, kubenzela malu mimpe nansha biobi ne: katuena tumvuangane nabu.

• “Muntu yeye mukutape dipi ku ditama dia balume, umutekele kabidi dikuabu.” (Matayi 5:38, 39; Luka 6:29) Yezu kavua usua kuamba ne: tudi ne bua kuanyishila bakuabu bua batuenzela malu mabi to. Kadi uvua ujinga kuakaja dilongesha dia dishima divua bamue bamfumu ba bitendelelu balongesha dia ne: mbimpe kupingaja bubi ku bubi. Uvua wambila bayidi bende ne: kabivua bimpe bua kupingaja bubi ku bubi to, kadi bikale ne bupole pavua muntu ubenzela malu mabi.a

• “Tungunukayi ne kunanga bena lukuna benu.” (Matayi 5:43, 44; Luka 6:27) Yezu wakalongesha ne: tudi ne bua kuikala bimpe ne bantu badi batukine anyi batuenzela malu mabi. Kadi kavua usua kuamba ne: tudi ne bua kuanyisha bienzedi biabu bibi to.b Tuetu tuenzela bantu badi batukine malu mimpe, tudi mua kutuyisha tshiji tshiabu ne kubasaka bua kutuenzela petu malu mimpe.

Tshivua Yezu muenze ne tshienzaye

Yezu wakalongesha ne: kuenza malu ne tshikisu ki mmushindu muimpe wa kujikija bilumbu to. Mushindu uvuaye wenze malu wakajadika bualu ebu. Pavuabu balue bua kumukuata butuku, umue wa ku bayidi bende wakenza bualu bua tshikisu bua kumukuba. Kadi Yezu wakamba ne: “Pingaja muele webe wa mvita muaba wawu, bualu muntu yonso udi wambula muele wa mvita, neafue ku muele wa mvita.” (Matayi 26:52) Yezu wakaleja muvuaye munange bena lukuna bende pavuaye mubafuile luse bua malu mabi avuabu bamuenzele ne musambile too ne bua bualu buabu.​—Luka 23:33, 34; 1 Petelo 2:23.

Bible mmulaye ne: mu katupa kîpi emu, Yezu, Mukalenge wa Ditalala neajikije malu a tshikisu onso. (Yeshaya 9:6, 7) Bua kumanya malu makuabu adi atangila mulayi udi ukankamija eu, bala tshiena-bualu tshia “Muajika mvita.”