Dibishibua dia bafue ntshinyi?

Diandamuna dia mu Bible

Mu Bible, muaku udibu bakudimune ne: “dibishibua” mmufumine ku muaku wa tshiena Greke anastasis, udi umvuija “kubika” anyi “kujuka kabidi.” Muntu udi mubishibue udi ujuka ku lufu upetulula muoyo, udi ulua anu muvuaye kuonso eku.​—1 Kolinto 15:12, 13.

Nansha mudi muaku “dibishibua” kawuyi mu Mifundu ya mu tshiena Ebelu, idibu batamba kubikila ne: Dipungila Dikulukulu, kadi idi yakula bua dilongesha dia dibishibua dia bafue. Tshilejilu, Yehowa wakalaya mukana mua muprofete Hoshea ne: “Nembapikule ku bukole bua Lukita; nembumbushe ku lufu.”​—Hoshea 13:14; Yobo 14:13-15; Yeshaya 26:19; Danyele 12:2, 13.

Bantu babishabu ku lufu nebasombe penyi? Bamue nebabishibue bua kuya kukokesha bu bakalenge pamue ne Kristo mu diulu. (2 Kolinto 5:1; Buakabuluibua 5:9, 10) Bible udi ubikila dibishibua adi ne: “dibishibua ku lufu dia kumpala” ne “dibishibua dia bantu ku lufu didi didianjila kumpala,” biambilu bibidi abi bidi bileja ne: kudi kabidi dibishibua dikuabu dienzeka pashishe. (Buakabuluibua 20:6; Filipoyi 3:11) Dibishibua adi nedikale dia kuikala ne muoyo pa buloba; ke didi bantu ba bungi menemene babishabu ku lufu bindile.​—Misambu 37:29.

Dibishibua dia bantu ku lufu nedienzeke mushindu kayi? Nzambi mmupeshe Yezu bukole bua kujula bafue. (Yone 11:25) Yezu neapingajile “bantu bonso badi mu nkita ya tshivulukilu” muoyo, muntu yonso ne ngikadilu yende misunguluke, muikale ne bumuntu buvuaye nabu, ne malu avuaye mumanye pakafuaye. (Yone 5:28, 29) Badibu babisha ku lufu bua kuya mu diulu badi bapeta mubidi wa nyuma, kadi babishabu bua kushala ne muoyo pa buloba nebikale ne mubidi wa musunyi muimpe menemene.​—Yeshaya 33:24; 35:5, 6; 1 Kolinto 15:42-44, 50.

Mbanganyi bajulabu ku lufu? Bible udi wamba ne: “nekuikale dibishibua dia bantu ku lufu, dia bakane ne dia badi kabayi bakane.” (Bienzedi 24:15) Mu bakane amu mudi bena lulamatu, bu mudi Noa, Sala, ne Abalahama. (Genese 6:9; Ebelu 11:11; Yakobo 2:21) Mu badi kabayi bakane mudi bantu bakapanga kutumikila mikenji ya Nzambi bualu kabavua bapete mpunga wa kuyilonga ne kuyitumikila to.

Kadi bantu badi badine bikole mu dienza dia malu mabi badi kabayi pabuipi bua kushintuluka, kabakubishibua ku lufu to. Padibu bafua, badi babutuka bua kashidi bualu kabena ne ditekemena dia kupetulula muoyo to.​—Matayi 23:33; Ebelu 10:26, 27.

Dibishibua dia bantu ku lufu nedienzeke dîba kayi? Bible ukavua muambe ne: dibishibua dia bantu badi baya mu diulu nedienzeke mu tshikondo tshia dikalaku dia Yezu, divua dituaje mu 1914. (1 Kolinto 15:21-23) Dibishibua ku lufu dia bantu bashala ne muoyo pa buloba nedienzeke mu Bukokeshi bua Yezu Kristo bua bidimu tshinunu, palua buloba Mparadizu.​—Luka 23:43; Buakabuluibua 20:6, 12, 13.

Bua tshinyi mbikumbane bua kuitabuja dibishibua dia bantu ku lufu? Bible udi ulonda malu a bantu tshitema bavuabu bajule ku lufu, ne baajadike kudi bantu bavua muaba au pavua malu au menzeke. (1 Bakalenge 17:17-24; 2 Bakalenge 4:32-37; 13:20, 21; Luka 7:11-17; 8:40-56; Yone 11:38-44; Bienzedi 9:36-42; 20:7-12; 1 Kolinto 15:3-6) Dibishibua dia Lazalo ku lufu divua dibishibua dia pa buadi bualu Yezu wakamujula ku lufu panyima pa matuku anayi, uvua muenze tshishima atshi kumpala kua bantu ba bungi. (Yone 11:39, 42) Nansha baluishi ba Yezu kabavua mua kuvila bualu abu to, ke bualu kayi bakela tshifufu bua kushipa Yezu ne Lazalo.​—Yone 11:47, 53; 12:9-11.

Bible udi uleja ne: Nzambi udi ne bukole ne dijinga dia kujula bafue. Muntu yonso wajulaye ku lufu ku diambuluisha dia bukole buende buonso, mmumulame bimpe mu meji ende adi kaayi ne ndekelu to. (Yobo 37:23; Matayi 10:30; Luka 20:37, 38) Nzambi udi ne bukokeshi bua kujula bantu ku lufu, ne udi ne dijinga adi! Bua dibishibua ku lufu ditshilualua, Bible udi wamba bua Nzambi ne: “Neujinge bikole mudimu wa bianza biebe.”​—Yobo 14:15.

Malu atubu babuejakaja bua dibishibua dia bantu ku lufu

Mudi bamue babuejakaja: Dibishibua ndisangisha anyima ne mubidi pamue.

Bulelela bua bualu: Bible udi ulongesha ne: anyima mmuntu mu kabujima kende, ki ntshitupa kampanda tshidi tshishala ne muoyo padi muntu ufua to. (Genese 2:7, dimanyisha; Yehezekele 18:4) Padi muntu ubishibua ku lufu, kabena bamusangisha ne anyima wende to; kadi badi bamufuka tshiakabidi ulua anyima udi ne muoyo.

Mudi bamue babuejakaja: Bamue badi babishibua bua kubutudibua diakamue.

Bulelela bua bualu: Bible udi wamba ne: “bavua benze malu mabi” nebapete “dibishibua ku lufu dia dilumbuluisha.” (Yone 5:29) Kadi nebabalumbuluishe bilondeshile malu enzabu panyima pa dibishibua diabu, ki mbilondeshile malu avuabu benze kumpala to. Yezu wakamba ne: ‘bafue nebumvue dîyi dia Muana wa Nzambi, aba badi bateya ntema nebikale ne muoyo.’ (Yone 5:25) Badi ‘bateya ntema,’ anyi batumikila malu abalongeshabu panyima pa dibishibua diabu ku lufu, nebafunde mêna abu mu ‘muvungu wa muoyo.’​—Buakabuluibua 20:12, 13.

Mudi bamue babuejakaja: Padi muntu ubishibua ku lufu, udi upetulula anu mubidi umue umue uvuaye nawu kumpala kua kufuaye.

Bulelela bua bualu: Padi muntu ufua, mubidi wende udi unyanguka ne uvingutuka.​—Muambi 3:19, 20.