Bukalenge bua Nzambi budi mu muoyo wa muntu anyi?
Diandamuna dia mu Bible
Tòo, Bukalenge bua Nzambi kabuena mu mioyo ya bena Kristo to.a Bible udi uleja muaba udibu menemene padiyi ububikila ne: “Bukalenge bua mu diulu.” (Matayi 4:17) Udi uleja ne: Bukalenge bua Nzambi mmbulamatadi mulelela udi ukokeshila mu diulu.
Bukalenge bua Nzambi budi ne bakokeshi, bena diabu, mikenji, ne mudimu wa ne: disua dia Nzambi dienzeke mu diulu ne pa buloba.—Matayi 6:10; Buakabuluibua 5:10.
Mbulamatadi wa Nzambi, anyi Bukalenge buende nebukokeshe “bukua bantu, bisamba, ne bisumbu bia miakulu” bia pa buloba. (Danyele 7:13, 14) Bukenji buabu bua kukokesha kabuena bufumina kudi bena diabu to, kadi kudi Nzambi nkayende.—Misambu 2:4-6; Yeshaya 9:7.
Yezu wakambila bapostolo bende ba lulamatu ne: nebadisange nende mu Bukalenge bua mu diulu bua ‘basombe mu nkuasa ya bukalenge.’—Luka 22:28, 30.
Bukalenge bua Nzambi budi ne bena lukuna, ne nebubabutule bonso.—Misambu 2:1, 2, 8, 9; 110:1, 2; 1 Kolinto 15:25, 26.
Bible kena ulongesha ne: Bukalenge bua mu diulu budi bukokeshila mu muoyo wa muntu to. Kadi udi uleja ne: “dîyi dia Bukalenge” anyi ‘lumu luimpe lua Bukalenge’ ludi mua kulenga mioyo yetu ne ludi luyilenga bushuwa.—Matayi 13:19; 24:14.
‘Bukalenge bua Nzambi budi munda muenu’ bidi biumvuija tshinyi?
Bua mushindu udibu bakudimune mêyi adi mu Luka 17:21 mu nkudimuinu mikuabu ya Bible, bamue bantu mbabuejakaje malu bua muaba udi Bukalenge bua Nzambi bushikame. Tshilejilu, mu nkudimuinu wa Mukanda wa Nzambi wa bena mishonyi mbambamu ne: ‘bukalenge bua Nzambi budi munda muenu.’ Bua kumvua mvese eu bimpe, tukonkonone tshidiye wakuila.
Bukalenge bua Nzambi kabuvua mu mioyo mipape ya baluishi ba Yezu bavua bakeba kumushipa to
Bavua Yezu wambila mêyi au mBafalese, bamfumu ba bitendelelu bavua bamuluisha ne bamuelela tshifufu bua kumushipa. (Matayi 12:14; Luka 17:20) Mbia meji bua kuamba ne: Bukalenge bua Nzambi buvua mu mioyo yabu mipape anyi? Yezu wakabambila ne: “Munda nudi buwule tente ne lubombo ne dishipa dia mikenji.”—Matayi 23:27, 28.
Nkudimuinu mikuabu ya Bible mmikudimune mêyi a Yezu adi mu Luka 17:21 bimpe bitambe: “Bukalenge bua Nzambi budi nenu muaba eu.” (Tuetu ke badi bafiikishe maleta; Contemporary English Version) “Bukalenge bua Nzambi budi munkatshi muenu.” (Nkudimuinu wa bulongolodi bupiabupia) Bukalenge bua mu diulu buvua ‘ne’ Bafalese anyi “munkatshi” muabu, mu ngumvuilu wa ne: Yezu, udi Nzambi muteke bua kuikala Mukalenge, uvua muimane kumpala kuabu.—Luka 1:32, 33.
a Bitendelelu bia bungi bia bukua buena Kristo bidi bilongesha ne: Bukalenge bua Nzambi budi munda mua muntu, anyi mu muoyo wende. Tshilejilu mu États-Unis, Ekeleziya wa bena Batiste ba ku Sud wakamba ne: Bukalenge bua Nzambi “mbukokeshi bua Nzambi mu muoyo wa muntu anyi mu nsombelu wende.” Bia muomumue, Pape Benoît XVI wakafunda mu mukanda wende wa Yezu wa mu Nazaleta ne: “Bukalenge bua Nzambi butu buluila mu muoyo wa muntu udi utumikila.”