Mikaele mfumu wa banjelu nnganyi?

Diandamuna dia mu Bible

Mikaele udibu babikila mu bitendelelu bikuabu ne: “Munsantu Mikaele,” ndîna didibu bapeshe bushuwa Yezu kumpala ne panyima pa dilua diende pa buloba.a Mikaele ne Satana bakakokangana panyima pa lufu lua Mose, ne wakambuluisha muanjelu kampanda bua kumanyisha Danyele mukenji wa kudi Nzambi. (Danyele 10:13, 21; Yuda 9) Mikaele udi wenza malu mu diumvuangana ne dîna diende didi diumvuija ne: “Nnganyi udi bu Nzambi?”, bualu udi ubingisha bumfumu bua Nzambi ne uluisha bena lukuna bende.​​—Danyele 12:1; Buakabuluibua 12:7.

Mona bua tshinyi tudi tufika ku diamba ne: Yezu ke Mikaele mfumu wa banjelu.

• Mikaele ‘mmfumu wa banjelu.’ (Yuda 9) Muanzu “mikaele” udi umvuija ne: “mfumu wa banjelu”, udi mu Bible miaba anu ibidi. Miaba yonso ibidi ayi, muanzu eu udi ku bumue, bidi bileja ne: anu muanjelu umue ke udi ne muanzu eu. Umue wa ku mvese eyi udi uleja ne: Mukalenge Yezu wakabishibua ku lufu, “neatuluke mu diulu ne lubila lua bumfumu, ne dîyi dia mfumu wa banjelu.” (1 Tesalonike 4:16) Yezu udi ne “dîyi dia mfumu wa banjelu” bualu yeye udi Mikaele, mfumu wa banjelu.

• Mikaele udi utumina tshiluilu tshia banjelu dîyi. “Mikaele ne banjelu bende bakaluangana ne dragon,” Satana. (Buakabuluibua 12:7) Mikaele udi ne bukokeshi bua bungi pa bifukibua bia mu nyuma bualu badi bamubikila ne: “umue wa ku bakokeshi banene” ne “Mukokeshi munene.” (Danyele 10:13, 21; 12:1) David Aune, mushikuluji kampanda wa Dipungila Dipiadipia udi wamba ne: Mianzu yonso eyi idi ileja ne: Mikaele udi “mfumu munene wa biluilu bia banjelu.”

  Bible udi uleja anu dîna dia muntu mukuabu umue udi ne bukokeshi pa tshiluilu tshia banjelu. Udi uleja ne: “dîba dia dibuluibua dia Mukalenge Yezu kumbukila mu diulu ne banjelu bende ba bukole mu kapia kadi kalakuka, padiye ulua ne disombuela.” (2 Tesalonike 1:7, 8; Matayi 16:27) Yezu “uvua muye mu diulu, ne banjelu ne makokeshi ne makole biakatekibua ku bukokeshi buende.” (1 Petelo 3:21, 22) Kabivua mua kumvuika bu Nzambi yeye muteke Yezu ne Mikaele bamfumu babidi badi balombola banjelu bansantu to. Nunku mbia meji bua kuamba ne: mêna onso abidi aa: Yezu ne Mikaele adi aleja anu muntu umue.

• Mikaele “neimane” tshikondo tshitu katshiyi tshianji kuenzeka tshia “dikenga.” (Danyele 12:1) Mu mukanda wa Danyele, muaku wa ne: “neimane” batu batamba kuwutela bua kuleja mukalenge udi ujuka bua kuenza bualu kampanda bua dikema. (Danyele 11:2-4, 21) Yezu Kristo udi Bible ubikila ne: “Dîyi dia Nzambi,” neenze bualu bua dikema bu “Mfumu wa bamfumu” pabutulaye bena lukuna bonso ba Nzambi ne pakubaye bantu ba Nzambi. (Buakabuluibua 19:11-16) Neenze bualu ebu mu tshikondo tshia “dikenga dinene dia buena ditu kadiyi dianji kuenzeka katshia ku tshibangidilu tshia buloba.”​​—Matayi 24:21, 42.