Ekesode 20:12​—“Nemeka tatuebe ne mamuebe”

“Nemeka tatuebe ne mamuebe bua ulale matuku a bungi mu buloba budi Yehowa Nzambi webe ukupesha.”​—Ekesode 20:12, Nkudimuinu wa bulongolodi bupiabupia.

‘Unemeke tatuebe ne mamuebe, bua matuku ebe ikale a bungi mu buloba budi Yehowa, Nzambi webe, ukupa.’​—Ekesode 20:12, Mukanda wa Nzambi.

Diumvuija dia Ekesode 20:12

Nzambi wakatumina bena Isalele wa kale dîyi dia kunemeka baledi babu. Pavuaye musakidile mulayi ku mukenji au, wakabapesha bualu bukuabu bua bobu kuwtumikila kabidi bikole. Nansha mudi bena Kristo kabayi ne bua kutumikila mikenji ya Mose, tuambe ne: mikenji ivua Nzambi muelele bena Isalele, malu manene adimu ki mmashintuluke to. Mikenji ya Nzambi ayi ivua mishindamene pa malu malelela adi ne mushinga bua bena Kristo lelu.​—Kolosayi 3:20.

Bana, bansonga ne bakulumpe badi banemeka baledi babu padibu babatumikila ne babumvuila. (Lewitiki 19:3; Nsumuinu 1:8) Nansha padi bana bakola, bapeta abu mêku, badi batungunuka ne kunanga baledi babu ne kubambuluisha. Tshilejilu, badi benza bua baledi babu bakadi bakulakaje bapete bionso bidibu nabi dijinga ne badi babapesha nansha makuta padibi bikengedibua.​—Matayi 15:4-6; 1 Timote 5:4, 8.

Mona ne: bana ba bena Isalele bavua ne bua kutumikila batatuabu ne bamamuabu, nunku badi ne bua kumanya mudimu wa mushinga udi nawu mamu mu dîku. (Nsumuinu 6:20; 19:26) Lelu eu bana badi ne bua kuenza pabu bia muomumue.

Mukenji wa kunemeka baledi uvua anu ne mikalu. Bana bena Isalele kabavua ne bua kutumikila baledi babu, anyi bantu bakuabu, pikala kuenza nanku kubafikisha ku dishipa mikenji ya Nzambi to. (Dutelonome 13:6-8) Ke mudibi kabidi lelu, bena Kristo badi ‘batumikila Nzambi bu mfumu pamutu pa kutumikila bantu.’​—Bienzedi 5:29.

Mu mikenji ivua Nzambi muelele bena Isalele, uvua mulaye ne: bana bavua banemeka baledi babu bavua ‘balala matuku a bungi ne batanta’ mu buloba buabu buvua Nzambi ubapesha. (Dutelonome 5:16) Kabavua mua kupeta dinyoka dia buena divua bana bakuabu bapeta bua muvuabu kabayi batumikila mikenji ya Nzambi ne bua ditombokela baledi babu to. (Dutelonome 21:18-21) Bidimu bikadi bipite ki mbishintulule mêyi manene avua mu mikenji ayi to. (Efeso 6:1-3) Nansha tuetu bikale bana anyi bakulumpe, netubadile Mufuki wetu malu. Ne anu mudi mulayi wende uleja, bana badi bamutumikila ne batumikila baledi babu nebalale matuku a bungi. Bualu bukuabu, badi ne ditekemena dia kushala ne muoyo kashidi.​—1 Timote 4:8; 6:18, 19.

Malu adi Ekesode 20:12 wakuila

Mukenji udi mu Ekesode 20:12 udi ne muaba wa mushinga mu mikenji dikumi, anyi mêyi dikumi. (Ekesode 20:12, 1-17) Mikenji idi kumpala kuawu idi ileja malu avua Nzambi mulombe bena Isalele, bu mudi dijinga diabu dia kumutendelela anu yeye nkayende. Mikenji idi ilonda ivua ileja malu avuabu babalombe bua kuenzela bantu nabu, bu mudi mukenji wa kushala ne lulamatu kudi muena dibaka nende ne wa kubenga kuiba. Nunku mukenji wa “nemeka tatuebe ne mamuebe” badi bawumona bu tshilamba tshidi tshituangaja mikenji ibidi ayi.