Dilama Nzubu yetu ya Bukalenga

Nsongakaji mukuabu wa mu Colombie diende Nicole udi wamba ne: “Ntu munange Nzubu wetu wa Bukalenge bikole. Ke muaba untu mpetangana ne bena Kristo nanyi.” Udi umona pebe malu bu yeye anyi?

Pa buloba bujima, Bantemu ba Yehowa batu badisangishila mu Nzubu ya Bukalenge mitue ku 63 000. Tutu tuya mu nzubu eyi bua kutendelela ne bua kuenza malu makuabu a bungi. Muanetu wa balume wa mu Colombie udi mpanda-njila wa pa tshibidilu, diende David udi wamba ne: “Nzubu yetu ya Bukalenge itu yenza bua bantu bamone buimpe bua malongesha etu. Bantu ba bungi batutu tubikilamu batu bakema bikole bua mushindu ututu tuyilama bimpe.” Makenda au kaatu a ku mpukapuka to, kadi tutu tuenza mudimu wa bungi bua kuyisukula ne kuyitabalela. Mmunyi mututu tuenza mudimu eu?

Diyitabalela

Bisumbu bitu bidisangishila mu Nzubu wa Bukalenge yonso ke bitu ne mudimu wa kumutabalela. Ke bualu kayi, bena Kristo netu batu ne tshibidilu tshia kusukula Nzubu wabu wa Bukalenge, kutabalela bintu bidiku bua kabinyanguki ne kulongolola tumue tuntu tukese tudi mua kuikala tunyanguke.

Bua kuambuluisha bena mu bisumbu bua kulamabu Nzubu yabu ya Bukalenge bimpe, bena mu Tshibambalu tshia malu a luibaku (LDC) batu basungula bana betu badi mua kuambuluisha mu mudimu wa dilongesha bakuabu mua kulama Nzubu ya Bukalenge. Muanetu yonso wa ku badibu basungula abu utu utangila Nzubu ya Bukalenge kutuadijila ku 6 too ne ku 10. Utu uya kutangila Nzubu ya Bukalenge ayi ne ulongesha benamu mudibu mua kuyilama bimpe. Utu ukenketa Nzubu wa Bukalenge yonso panyima pa bidimu 3 bua kumona bintu bidibu mua kutabalela anyi kuakaja.

Bena Kristo netu batu basanka bikole patubu babalongesha mua kulama Nzubu yabu ya Bukalenge. Muanetu wa bakaji kampanda wa mu Inde, diende Indhumathi, udi wamba ne: “Malu avuabu batulongeshe avua mimpe be! Tuvua bumvue disanka bua muvuabu batulongeshe mua kulama Nzubu wetu wa Bukalenge bimpe.” Muanetu wa balume mukuabu wa mu Kenya, diende Evans, udi wamba pende ne: “Tuakalonga mua kutula makuta makese bua kulongolola bintu pavuabi binyanguka kakese pamutu pa kulua kutula makuta a bungi bua kubilongolola pavuabi binyanguka bikole.”

Ditula dia makuta

Tshidimu tshionso etshi batu batula makuta binunu ne binunu bua malu adi enzekela ku Nzubu wa Bakalenge ne bua kumulama bimpe.a Batu batula makuta aa bilondeshile muaba udi Nzubu wa Bukalenge, bungi bua bidimu bikadiye muenze, ne bungi bua bisumbu bitu bidisangishilamu. Ntshinyi tshitubu benza bua kupeta makuta au?

Midimu ya dilama Nzubu ya Bukalenge bua ikale anu mimpe itu yenzeka ne mapa atu bena Kristo netu bafila ku budisuile. Muanetu wa balume mukuabu wa mu Kazakhstan, diende Alexander, udi wamba ne: “Tutu tutula ndambu wa makuta bua kufuta bua Enternete, ne bua kufuta bua bintu bikuabu bidi ne mushinga, bu mudi mâyi ne nzembu. Ndambu mukuabu tutu tusumba nende bintu bikuabu bitutu tuenza nabi mudimu, bu mudi mabeji a kuya nawu ku nkumba, bintu bia kuvuala ku bianza, bia kusukula nabi Nzubu wa Bukalenge, ne mukubu.” Mapa atu ashala batu baatuma bua kuambuluisha mu midimu minene ya dilama nzubu yetu ne mu midimu mikuabu idi ilomba makuta a bungi.

Midimu minene ya dilama nzubu yetu

Padibu bakeba kulongolola bimue bintu ku Nzubu wa Bukalenge, kadi makuta adibu mua kutula bua midimu owu mapite pa atu bana betu batula bua Nzubu wa Bukalenge au munkatshi mua ngondo ibidi anyi isatu, mbimpe bakulu bayukile ne muena mu LDC utu ubalongesha mua kulama Nzubu wa Bukalenge. Bena mu LDC bobu babanyishile bua kuenza midimu ayi, makuta atu bantu bafila bua kutua midimu ya pa buloba bujima mpanda ke atulabu bua kuyenzeja. Mu tshidimu tshia 2023, midimu ya buena eyi ivua mienzeke mu miaba 8793, ne bavua batule ndola miliyo 76,6. Tuakulayi bua ibidi ya ku midimu ayi.

Mu Angola, mudi Nzubu wa Bukalenge ukadi muenze bidimu 15 udi ne miaba ya bungi ya kuakaja. Biamu bionso bia nzembu bivuamu bikavua bia kale ne bivua bikengela kupingaja bipiabipia. Bimanu bikavua biele mitanta ne kabidi bena mutumba bavua bamanyishe ne: mâyi a mvula avua umbukila ku malata a Nzubu wa Bukalenge uvua apuekela mu lupangu luabu. Bana betu ba mu Tshibambalu tshia malu a luibaku bakalongolola malu bua kujikija ntatu eyi. Mudimu au uvua ubalomba kutula makuta ndola 9,285. Pakajika mudimu, bena mutumba abu bakaleja dianyisha dia bungi ne kabidi mushindu uvua mudimu eu muenzeke, wakabakemesha bikole.

Mu Pologne, muvua Nzubu wa Bukalenge uvua ne malata matubuke ne tapi uvuamu ukavua munyanguke bikole, kakuyi mushindu wa kumuakaja to. Bena mu Tshibambalu tshia malu a luibaku bakanyisha bua benze mudimu wa diakajilula musaka wa nzubu au. Mudimu au wakabalomba kutula ndola 9,757. Diakajilula bintu bikese tshianana bia ku Nzubu wa Bukalenge eu divua mua kuambuluisha bana betu abu anu bua bidimu bikese.

Dilama Nzubu ya Bukalenge didi ditumbishisha Yehowa

Dilama Nzubu ya Bukalenge didi dituambuluisha bua kubenga kutulakaja mapa a bana betu ne didi ditumbishisha Yehowa. Muanetu Shaun wa mu ditunga dia Tonga, udi wamba ne: “Kudiambuluisha dia mudimu wetu wa dilama nzubu ya bukalenge, tudi tutendelela Yehowa muaba muimpe udi ne mankenda ne bulongame udi usaka bantu ku diakula bimpe bua dîna diende. Tutu tuvua disanka dia kubikila bantu mu bisangilu bietu.’’

Muudi mua kuambuluisha

Tuetu bonso tudi mua kuambuluisha bua kusukula muaba wetu wa ntendelelu ne kuwulama. Muanetu Marino wa mu Australie ngumue wa ku bana betu batu balongesha mushindu wa kulama Nzubu ya Bukalenge. Udi wamba ne: “Yonso wa kutudi udi ne diakalenga dia kuenza pende mudimu wa kulama Nzubu yetu ya Bukalenge. Kuenza nunku kudi kuambuluisha bua kulama mapa etu ne kuenza nawu mudimu muaba udi dijinga.’’

Muanetu Joel wa mu Inde utu musue kulama Nzubu wabu wa Bukalenge udi wamba ne: Kuenza mudimu ne bena Kristo nanyi kudi kungambuluisha bua kudifuanyikijila mutuikala mu bulongolodi bupiabupia.’’ Nicole utukavua batele udi wamba ne: “Matuku mashala aa, mvua mukolope mu Nzubu wa Bukalenge pavua bana betu bakuabu benda bakaja muaba uvua umatshisha mâyi mu tshiowedi. Nansha mumvu tshiyi muakaja nabu pamue, mvua mukolope kumpala kua dîba bua kubabidila njiwu.

Wewe musue kuenza mudimu bu mudisuile bua kuakaja Nzubu wenu wa Bukalenge, ambila bakulu ba mu tshisumbu tshienu. Mapa audi wela mu kashete anyi utuma mu donate.jw.org, adi kabidi ambuluisha bua kulama Nzubu wenu wa Bukalenge ne Nzubu mikuabu ya Bukulenga ya pa buloba bujima. Tudi ne dianyisha dia bungi bua muoyo wenu wa kupa.