Bene-hadada mukalenge wa Sulia uvua anu uluisha bena Isalele. Kadi muprofete Elisha uvua anu udimuija mukalenge wa Isalele misangu yonso, ke bualu kayi uvua upeta mushindu wa kumuepuka. Nunku Bene-hadada wakangata dipangadika dia kukuata Elisha. Wakumvua ne: Elisha uvua mu tshimenga tshia Dotana, ke yeye kutuma basalayi bena Sulia kuntu aku bua kumukuata.

Bena Sulia bakalua ku Dotana butuku. Mu dinda, muena mudimu wa Elisha wakapatuka pambelu, kumonaye ne: basalayi ba bungi bavua banyunguluke tshimenga. Wakumvua buôwa bua bungi, kuelaye dîyi dikole wamba ne: ‘Elisha, tuenze tshinyi?’ Elisha wakamuambila ne: ‘Tuetu tudi ne basalayi ba bungi babapite.’ Dîba adi Yehowa wakenza bua muena mudimu wa Elisha amone ne: ku mikuna ivua minyunguluke tshimenga kuvua tubalu tua bungi menemene ne matempu a mvita a kapia.

Pavua basalayi bena Sulia bajinge bua kukuata Elisha, wakasambila wamba ne: ‘Yehowa bavuijaku bampofo.’ Diakamue basalayi abu kabakamanya muaba uvuabu to, nansha mutshivuabu bamona. Elisha wakambila basalayi ne: ‘Tshimenga tshinudi balue ki ntshiotshi to. Ndondayi nnuleje muntu unudi nukeba.’ Bakalonda Elisha too ne ku Samalea kuvua mukalenge wa Isalele musombele.

Bena Sulia bakalua kujingulula muaba uvuabu kabatshiyi kabidi ne tshia kuenza. Mukalenge wa Isalele wakebeja Elisha ne: ‘Mbashipe anyi?’ Elisha uvuaku mumone tshikondo etshi bu mpunga muimpe wa kudisombuela kudi bantu bavua bakebe bua kumuenzela bibi aba anyi? Tòo. Elisha wakamba ne: ‘Kubashipi to. Bapesha biakudia, pashishe ubalekele baye.’ Nunku mukalenge wakabalambishila biakudia bia bungi, kubapingajaye kuabu.

Yezabele uvua ne muana wa bakaji dîna diende Atalaya uvua wenza malu mabi anu bu mamuende. Atalaya uvua musedibue kudi mukalenge wa Yuda. Pavua bayende mufue, muanende wa balume wakabanga kukokesha. Kadi pavua muanende eu mufue, wakaditeka yeye nkayende mukokeshi wa Yuda. Pashishe wakateta bua kushipa ndelanganyi ya bukalenge yonso, ushipa muntu yonso uvua mua kulua mukalenge pa muaba wende, too ne bikulu bende yeye muine. Bantu bonso bavua bamutshina.

Muakuidi munene Yehoyada ne mukajende Yehosheba bavua bamanye ne: bualu buvua Atalaya wenza buvua bubi menemene. Bakateka muoyo wabu mu njiwu bua kusokoka muikulu wa Atalaya umue, muana mutekete dîna diende Yoasha. Bakamukoleshela ku ntempelo.

Pavua Yoasha mukumbaje bidimu muanda mutekete, Yehoyada wakasangisha bamfumu bonso ne bena Lewi, kubambilaye ne: ‘Lamayi biibi bia ku ntempelo, kanubueji muntu nansha umue to.’ Pashishe Yehoyada wakateka Yoasha mukalenge wa Yuda, kumuvuadikaye tshifulu tshia bukalenge ku mutu. Bantu ba mu Yuda bakela mbila bamba ne: ‘Mukalenge ikale ne muoyo matuku a bungi!’

Mukalenge mukaji Atalaya wakumvua mutoyi uvua musumba wa bantu wenza, kuyaye lubilu mutangile ku ntempelo. Pavuaye mumone mukalenge mupiamupia au, wakela dîyi dikole wamba ne: “Mbantungile tshitungu! Mbantungile tshitungu!” Bamfumu bakakuata mukalenge mukaji mubi au, kumupatulabu, kumushipabu. Kadi netuambe bishi bua malu mabi avuaye mufikishe bena mu tshisamba ku dienza?

Yehoyada wakambuluisha bena mu tshisamba bua kudia tshipungidi ne Yehowa, ne bakalaya mu tshipungidi atshi bua kutendelela anu Yehowa. Yehoyada wakenza bua bupule ntempelo wa Bâla ne bua basunsule mpingu yende. Wakateka bakuidi ne bena Lewi bua bikale benza mudimu ku ntempelo bua bantu balue kutendelelaku kabidi. Wakateka balami ba ku biibi bua kulama ku ntempelo bua muntu yonso uvua ne bukoya ku mêsu kua Yehowa kabuedi to. Pashishe Yehoyada ne bamfumu bakaya ne Yoasha ku dibalasa, kumusombeshabu mu nkuasa wa bukalenge. Bantu ba mu Yuda bakasanka. Ndekelu wa bionso bavua mua kutendelela Yehowa, Atalaya mukaji mubi uvua ubenzeja malu mabi ne ntendelelu wa Bâla kabitshiyiku. Udi mumone muvua dikima dia Yehoyada diambuluishe bantu ba bungi anyi?