Bantu ba mu tshimenga tshia bena Ashû tshia Niniwe bavua bantu babi. Yehowa wakambila muprofete wende Yona bua kuya ku Niniwe bua kubadimuija bua bashintuluke. Kadi Yona wakanyema, kuyaye luseke lua tshianana. Wakabanda mu mazuwa avua aya ku Tâshishi, kuyaye.

Pavua mazuwa munkatshi mua mâyi, tshipepele tshikole menemene tshiakajuka, bendeshi ba mazuwa kumvuabu buôwa. Bakasambila nzambi yabu, kuebejabu ne: ‘Bua tshinyi bualu ebu budi buenzeka?’ Ndekelu wa bionso, Yona wakabambila ne: ‘Meme ke udi ne tshilumbu. Ndi nyema bualu tshiena musue kuenza bualu buvua Yehowa mungambile bua kuenza to. Nkupayi mu mâyi, tshipepele netshijike.’ Bendeshi ba mazuwa kabavua basue kukupa Yona mu mâyi to, kadi yeye uvua anu usuminyina. Pavuabu bamukupe mu mâyi, tshipepele tshiakajika.

Yona wakela meji ne: neafue. Pavuaye wenda upueka muinshi menemene mua mâyi, wakasambila Yehowa. Pashishe Yehowa kutumaye mushipa munene wa dikema. Mushipa au wakamina Yona, kadi kawuvua mumushipe to. Pavua Yona munda mua mushipa au, wakasambila wamba ne: ‘Ndi nkulaya ne: nengikale anu nkutumikila.’ Yehowa wakalama Yona munda mua mushipa au matuku asatu kakuyi bualu bubi bumuenzekela, pashishe mushipa wakaluka Yona ku mukuna.

Bu muvua Yehowa mupandishe Yona, bivuaku biumvuija ne: Yona kavua ne bua kuya kabidi ku Niniwe anyi? Tòo. Yehowa wakambila kabidi Yona bua kuya kuntu aku. Bua musangu eu, Yona wakatumikila. Wakaya kuntu aku, kuambilaye bantu babi abu ne: ‘Mu matuku 40 nebabutule Niniwe.’ Pashishe bualu kampanda buvua kabuyi buelela meji buakenzeka: bena Niniwe bakateleja tshivua Yona muambe, kushintulukabu. Mukalenge wa Niniwe wakambila bantu bende ne: ‘Bikilayi Nzambi, nunyingalale, nulekele kuenza malu mabi. Pamuapa kakutubutula to.’ Pavua Yehowa mumone ne: bantu bavua banyingalale, wakabenga kubutula Niniwe.

Yona wakafiika munda bualu kabavua babutule tshimenga atshi to. Anji elabi meji: Yehowa uvua muleje Yona lutulu, mumufuile luse, kadi Yona yeye kavua musue kumvuila bantu ba mu Niniwe luse to. Kadi wakaya, kusombaye pambelu pa tshimenga mu dileji dia muonji wa tshilowalowa, musuike mishiku. Pashishe muonji au wakuma, Yona kufiikaye munda. Ke Yehowa kumuambila ne: ‘Udi uditatshisha bikole bua tshikunyibua etshi kupita muudi uditashisha bua bena mu Niniwe. Ndi mubafuile luse, bashale ne muoyo.’ Yehowa uvua musue kuamba tshinyi? Uvua musue kuamba ne: bantu ba mu Niniwe bavua ne mushinga wa bungi kupita tshikunyibua kayi tshionso.

Bukalenge bua bena Ashû buvua bukuate bukalenge bua Isalele bua bisa dikumi. Mpindieu Saneheliba mukalenge wa Ashû uvua musue kukuata bukalenge bua Yuda bua bisa bibidi. Wakatuadija kukuata bimenga bia Yuda ku tshimue ku tshimue. Kadi tshimenga tshivuaye musue bikole tshivua tshia Yelushalema. Tshivua Saneheliba kayi mumanye ntshia ne: Yehowa uvua ukuba Yelushalema.

Hezikiya mukalenge wa Yuda wakapesha Saneheliba makuta a bungi bua alekele Yelushalema. Nansha muvua Saneheliba muangate makuta, uvua anu utuma basalayi bende ba bukole bua kuluisha Yelushalema. Bantu ba mu Yelushalema bakumvua buôwa bualu bena Ashû bavua anu benda basemena pabuipi ne Yelushalema. Pashishe Hezikiya wakabambila ne: ‘Kanumvu buôwa to. Bena Ashû badi ne bukole bua bungi, kadi Yehowa neatupeshe tuetu bukole bua bungi kubapita.’

Saneheliba wakatuma Labashake, mutuadi wende wa mikenji, ku Yelushalema bua kuseka benamu. Labashake wakimana pambelu pa tshimenga, kuelaye dîyi wamba ne: ‘Yehowa kena mua kunuambuluisha to. Kanuitabi bua Hezikiya anudingakaje to. Kakuena nzambi udi mua kunupandisha mu bianza bietu to.’

Hezikiya wakebeja Yehowa bua kumanya tshivuaye ne bua kuenza. Yehowa wakamuandamuna ne: ‘Kanumvu buôwa bua bidi Labashake wamba to. Saneheliba kakukuata Yelushalema to.’ Pashishe Hezikiya wakapeta mikanda ya kudi Saneheliba. Mikanda ayi ivua yamba ne: ‘Wewe difila anu kudifila. Yehowa kena mua kukupandisha to.’ Hezikiya wakasambila wamba ne: ‘Yehowa, tupandisha koku bua muntu yonso amanye ne: wewe ke Nzambi umuepele mulelela.’ Yehowa wakamuambila ne: ‘Mukalenge wa Ashû kakubuela mu Yelushalema to. Meme nenkube tshimenga tshianyi.’

Saneheliba uvua mutuishibue ne: ukavua pa kukuata Yelushalema. Kadi butuku kampanda, Yehowa wakatuma muanjelu muaba uvua basalayi ba bena Ashû batudile pambelu pa tshimenga. Muanjelu au wakashipa basalayi binunu 185! Mukalenge Saneheliba wakajimija basalayi bende ba bukole. Bu muvuabu bamutshimune, wakapingana kuende bualu kavua ne tshikuabu tshia kuenza to. Yehowa wakakuba Hezikiya ne Yelushalema anu muvuaye mulaye. Bu wewe muikale mu Yelushalema amu, uvuaku mua kuikala mueyemene Yehowa anyi?