Dituku dikuabu butuku, mukalenge Nebukadenesâ wakalota tshilota tshia dikema. Tshivua tshimulubakaje bikole, kupangaye too ne mua kulala. Wakabikila bena majimbu bende, kubambilaye ne: ‘Ngumvuijayi tshilota tshianyi.’ Bakamuambila ne: ‘Mukalenge wetu, tuambila tshiuvua mulote.’ Kadi Nebukadenesâ wakabambila ne: ‘Tòo! Nuenu ngambilayi tshindi mulote, tshianana ndi nnushipa.’ Bakamuambila kabidi ne: ‘Tuambila tshiudi mulote, pashishe netukumvuije natshi.’ Wakabambila ne: ‘Nuenu bonso nudi nukeba kunshimakaja. Ngambilayi nuenu tshindi mulote!’ Bakambila mukalenge ne: ‘Kakuena muntu pa buloba apa udi mua kuenza nanku to. Tshiudi ulomba ntshikole.’

Nebukadenesâ wakafiika munda bikole, kutumaye too ne dîyi bua bashipe bena meji bonso ba mu buloba buende. Munkatshi mua bena meji abu muvua Danyele, Shadalaka, Meshaka, ne Abedenego. Danyele wakalomba mukalenge ndambu wa matuku. Pashishe yeye ne balunda bende bakasambila Yehowa, bamulomba bua abambuluishe. Yehowa wakenza tshinyi?

Yehowa wakabuluila Danyele tshilota tshia Nebukadenesâ mu tshikena kumona, kumupeshaye too ne diumvuija diatshi. Dituku diakalonda, Danyele wakaya kudi muena mudimu wa mukalenge, kumuambilaye ne: ‘Kushipi muena meji nansha umue to. Ndi mua kumvuija tshilota tshia mukalenge.’ Muena mudimu au wakaya ne Danyele kudi Nebukadenesâ. Danyele wakambila mukalenge ne: ‘Nzambi mmukuleje muikala matuku atshilualua. Tshilota tshiebe tshivua nunku: Uvua mumone lupingu lunene luikale ne mutu wa or, tshiadi ne maboko bia tshiamu tshia arjan, difu ne bibelu bia tshiamu tshia mitaku, mikolo ya tshiamu tshifiike, ne makasa a tshiamu tshifiike tshisambakane ne dima. Pashishe dibue diakatuka ku mukuna, kudikumadi ku makasa a lupingu. Lupingu alu luakavingutuka, kushalalu bukulakula, kupepukalu ne lupepele. Dibue adi diakalua mukuna munene, kuwulawu buloba bujima.’

Pashishe Danyele wakamuambila ne: ‘Tshilota tshiebe tshidi tshiumvuija nunku: Bukalenge buebe ke mutu wa or. Tshiamu tshia arjan mbukalenge bualua panyima pebe. Pashishe nekuikale bukuabu bu tshiamu tshia mitaku buakokesha buloba bujima. Bukalenge bualonda nebuikale bukole bu tshiamu tshifiike. Ndekelu wa bionso nekuikale bukalenge butapuluke buikale ne bimue bitupa bikole bu tshiamu tshifiike, ne bikuabu bitekete bu dima. Dibue divua dilue mukuna didi diumvuija Bukalenge bua Nzambi. Nebuvingutule makalenge onso aa, ne nebushalaku tshiendelele.’

Nebukadenesâ wakatua mpala panshi kumpala kua Danyele. Wakamuambila ne: ‘Nzambi webe mmukubuluile tshilota etshi. Kakuena Nzambi mukuabu bu yeye to.’ Pamutu pa Nebukadenesâ kushipa Danyele, wakamuteka ku mutu kua bena meji bonso ne mulombodi ku mutu kua Babilona. Udi mumone muvua Yehowa muandamune disambila dia Danyele anyi?

Panyima pa mukalenge Nebukadenesâ mumane kulota tshilota tshia lupingu, wakenzeja lupingu lua or lunene menemene. Wakaluimanyika mu mpata wa Dula, kubikidishaye bantu batambe bunene ba mu buloba, kusangisha ne Shadalaka, Meshaka, ne Abedenego bua badisangishe kumpala kualu. Mukalenge wakabatumina dîyi wamba ne: ‘Dîba dinudi anu numvua muadi wa mpungi, wa nzenze, ne wa bipuidi, nuinaminayi lupingu! Muntu udi ubenga kuluinamina nebamuele mu tshikutu tshia kapia.’ Bena Ebelu basatu abu bavuaku mua kuinamina lupinga alu anyi? Peshi bavua ne bua kutendelela anu Yehowa?

Pashishe mukalenge wakatuma dîyi bua bimbe mijiki. Bantu bonso bakatua mpala panshi, kutendelelabu lupingu alu, pa kumbusha Shadalaka, Meshaka, ne Abedenego. Bantu bakuabu bakamona tshivuabu benze atshi, kuambilabu mukalenge ne: ‘Bena Ebelu basatu abu bavua babenge kutendelela lupingu luebe.’ Nebukadenesâ wakababikidisha, kubambilaye ne: ‘Ndi nnupesha mpunga mukuabu wa nuenu kutendelela lupingu elu. Nuenu kanuyi balutendelele, nennuele mu tshikutu tshia kapia. Kakuena nzambi udi mua kunupandisha mu bianza bianyi to.’ Bakamuandamuna ne: ‘Mukalenge wetu, katuena dijinga ne mpunga mukuabu to. Nzambi wetu udi mua kutupandisha. Kadi nansha yeye kayi mutupandishe, katuakutendelela lupingu elu to.’

Nebukadenesâ wakafiika munda bikole. Wakambila bantu bende ne: ‘Enzayi bua kapia kadi mu tshikutu tshia kapia kikale kakole misangu muanda mutekete kupita mutuku pa tshibidilu!’ Pashishe wakatumina basalayi bende dîyi ne: ‘Suikayi bantu aba, nubelamu!’ Bua mushindu uvua kapia kakole, basalayi bakafua musangu umue pavuabu basemenaku. Bena Ebelu basatu abu bakamata mu kapia. Kadi pavua Nebukadenesâ mutangile munda mua tshikutu tshia kapia, wakamona ne: kuvua bantu banayi bavua benda bendakana mu tshikutu amu pamutu pa kuikalabu basatu. Wakumvua buôwa, kuebejayi bantu banene ba muende ne: ‘Katuvua bele bantu basatu mu kapia emu anyi? Kadi ndi mmona bantu banayi, ne umue wa kudibu udi anu bu muanjelu!’

Nebukadenesâ wakasemena pabuipi ne tshikutu tshia kapia, kuelaye dîyi wamba ne: ‘Patukayi nuenu bena mudimu ba Nzambi Mutambe Bunene!’ Bantu bonso bakakema pavuabu bamone Shadalaka, Meshaka, ne Abedenego bapatuka mu kapia kakuyi bualu bubi bubenzekele. Dikoba diabu, nsuki yabu, ne bilamba biabu kabivua bioshike, ne kabavua nansha banunka kapia to.

Nebukadenesâ wakamba ne: ‘Nzambi wa Shadalaka, Meshaka, ne Abedenego mmunene. Uvua mutume muanjelu wende, yeye kubapandisha. Kakuena nzambi mukuabu bu wabu to.’

Udiku mudisuike bua kushala mulamate Yehowa nansha bualu bua mushindu kayi buenzeke anu bu bena Ebelu basatu abu anyi?