Malu adibu baledile mu Mabeji a tshisangilu tshia Nsombelu ne mudimu wetu
© 2025 Watch Tower Bible and Tract Society of Pennsylvania
LUMINGU LUA DIA 5-11/1
BIUMA BIA MU DÎYI DIA NZAMBI YESHAYA 17-20
“Tshiapeta badi batupawula”
“Bukalenge buanyi ki mbua pa buloba ebu to”
16 Mbimpe tushintuluke petu anu bu bobu! Bible udi ufuanyikija bukua bantu ne mbuu udi usampuka kayi mua kubatama, bualu kabena ne ditalala to. (Yesh. 17:12; 57:20, 21; Buak. 13:1) Padi eku malu a tshididi ajula bantu luonji, abatapulula, ne abafikisha ku dienza malu ne tshikisu, tuetu tudi balame ditalala ne buobumue buetu. Padi Yehowa umona mudi bena panu batapuluke, udi usanka bikole bua mudi bantu bende mu buobumue.—Bala Sefanya 3:17.
Kubuelakanyi mu malu a pa buloba ebu budi butapuluke
4 Tudi mua kuikala basombele muaba udi bantu bamanye ne: katutu tulamata ku luseke kampanda mu malu a tshididi to. Kadi bu mutudi tuenda tusemena bikole ku nshikidilu wa bulongolodi bua Satana, netupete lutatu lukole lua kubenga kubuelakana mu malu a tshididi. Lelu, bantu mbadianjile kuikala “kabayi ne lungenyi lua kumvuangana” ne “bena mutu mukole,” ne nebatapuluke kabidi bikole menemene. (2 Timote 3:3, 4) Kudi bamue bana betu bakadi bapete ntatu pavua malu a tshididi a mu matunga abu mashintuluke diakamue. Ke bualu kayi tudi ne bua kudilongolola ku mpindieu bua kubenga kubuelakana mu malu a pa buloba nansha mu nsombelu mikole. Tukonkononayi malu anayi atudi mua kuenza bua kudilongolola.
ip-1 198 §20
Mudi Yehowa unyoka bisamba
20 Malu neenzeke mushindu kayi? Yeshaya udi wamba ne: “Dilolo kudi buôwa bukole. Kumpala kua kutshiabu mu dinda kabienaku kabidi to. Etshi ke tshiapeta badi batupawula ne ke difutu dia badi batunyenga bintu.” (Yeshaya 17:14) Bantu ba bungi badi bapawula bantu ba Yehowa, babenzela malu ne tshikisu ne kabayi babanemeka to. Badi babenzela malu aa bualu kabena mu bitendelellu binene bidi bimanyike pa buloba bujima ne kabatu basue kubuelamu to, batu babamona mu mushindu mubi, babapetula ne babamba mêyi mabi. Kadi bena mudimu ba Nzambi mbatuishibue ne: “mu dinda” kampanda ntatu yabu neijike.—2 Tesalonike 1:6-9; 1 Petelo 5:6-11.
Bubanji bua mu Dîyi dia Nzambi
Malu manene a mu mukanda wa Yeshaya: Tshitupa I
20:2-5—Mu bulelela, Yeshaya uvuaku muende butaka bidimu bisatu anyi? Pamuapa Yeshaya wakumbusha bilamba biende bia pa mutu ne kuendaye ne bilamba bivua bileja mubidi.—1 Samuele 19:24.
LUMINGU LUA DIA 12-18/1
BIUMA BIA MU DÎYI DIA NZAMBI YESHAYA 21-23
Tshidi dikuluka dia Shebena ditulongesha
Dinyoka ntshijadiki tshia mudi Nzambi mutunange
7 Bua kumvua bimpe mushinga udi nawu dinyoka, tukonkononayi bilejilu bia bantu babidi bavua Nzambi munyoke aba: Shebena, uvua ne muoyo mu matuku a mukalenge Hezikiya, ne Graham, muanetu wa balume wa mu matuku etu aa. Bu muvua Shebena mulami wa bintu uvua “utangila nzubu,” pamuapa nzubu wa Hezikiya, uvua ne bukokeshi bua bungi. (Yesh. 22:15) Kadi bia dibungama, wakapeta lutambishi, ukeba butumbi buende. Wakadienzela too ne lukita lua mushinga mukole, ne uvua wendela mu ‘matempu a butumbi.’—Yesh. 22:16-18.
8 Bu muvua Shebena udikebela butumbi, Nzambi ‘wakamuipata ku mudimu wende,’ kutekaye Eleyakima. (Yesh. 22:19-21) Bualu ebu buakenzeka pavua Saneheliba mukalenge wa Ashû ukeba kuluisha Yelushalema. Panyima pa matuku, mukalenge au wakatuma bakokeshi banene ku Yelushalema ne tshiluilu tshinene tshia basalayi bua kutekesha bena Yuda mu maboko ne kuzakeja Hezikiya bua adifile mu bianza biabu. (2 Bak. 18:17-25) Hezikiya wakatuma Eleyakima bua ayukile ne bakokeshi abu, kadi kavua nkayende to, uvua ne bantu bakuabu babidi, umue wa kudibu uvua Shebena ukavua mulue sekretere. Pavua Shebena muitabe ne budipuekeshi buonso mudimu mushadile eu, bidi bileja ne: kavua mukuatshilangane tshiji ne mulaminangane munda to. Mmalongesha kayi atudi tupetela ku muyuki wende eu? Tumonayi malongesha asatu.
9 Tshia kumpala, Shebena wakajimija muanzu wende. Bualu buvua bumufikile budi butuvuluija didimuija dia ne: “Lutambishi ludi lulua kumpala kua dibutuka, ne lungenyi lua didibandisha ludi lulua kumpala kua dikuluka.” (Nsu. 16:18) Wewe ne majitu mu tshisumbu, pamuapa bakuanyisha bikole, neudienzejaku bua kuikala ne didipuekesha anyi? Neupeshaku Yehowa butumbi bua bipedi biwudi nabi anyi bua biudi muenze anyi? (1 Kol. 4:7) Mupostolo Paulo wakafunda ne: “Ndi ngambila muntu yonso wa munkatshi muenu amu bua kedi meji ne: mmupite tshidiye atshi to, kadi ele meji bua ikale ne meji mimpe.”—Lomo 12:3.
Dinyoka ntshijadiki tshia mudi Nzambi mutunange
10 Tshibidi, dinyoka dikole divua Yehowa mupeshe Shebena divua pamuapa dileja ne: uvua wela meji ne: Shebena uvua mua kushintuluka. (Nsu. 3:11, 12) Bua bantu badi bajimija majitu mu tshisumbu tshia Nzambi lelu, edi ndilongesha dimpe be! Pamutu pa kukuata tshiji anyi kulaminangana munda, mbimpe batungunuke ne kuenzela Nzambi mudimu ne muabu muonso bilondeshile tshikadibu, bamona dinyoka adi bu tshijadiki tshia mudi Yehowa mubanange. Tuvuluke ne: tuetu tudipuekesha kumpala kua Tatu wetu, kakupanga kutufuta to. (Bala 1 Petelo 5:6, 7.) Dinyoka difila ne dinanga didi mua kuikala mushindu udi Nzambi utufumba, nanku tulekele Nzambi atufumbe.
Dinyoka ntshijadiki tshia mudi Nzambi mutunange
11 Tshisatu, mushindu uvua Yehowa muenzele Shebena malu udi dilongesha dinene kudi bantu badi ne bukokeshi bua kufila manyoka, bu mudi baledi ne bakulu. Ndilongesha kayi adi? Bu mudi Yehowa unyoka muntu bua kuleja mudiye mukine mpekatu, bidi bileja kabidi mudiye uditatshisha bua muntu udi muenze mpekatu. Biwikala muledi anyi mukulu, ne bikulomba bua kufila dinyoka, newidikijaku Yehowa, ukina bubi eku ukeba malu mimpe adi kudi muanebe anyi kudi muena Kristo nebe anyi?—Yuda 22, 23.
Bubanji bua mu Dîyi dia Nzambi
Malu manene a mu mukanda wa Yeshaya: Tshitupa I
21:1—Ntshitupa kayi tshidibu babikila ne: ‘Tshipela tshia ku luseke lua mâyi manene’? Nansha muvua Babulona kayi pabuipi ne mâyi manene, badi bamubikila nunku. Bidi nanku, bualu ku tshidimu tshionso mâyi a musulu wa Pelata ne wa Tigre avua asapalala mu tshitupa etshi, bienza tshisense tshia ‘mâyi manene’ malabale a mu tshisense.
LUMINGU LUA DIA 19-25/1
BIUMA BIA MU DÎYI DIA NZAMBI YESHAYA 24-27
“Eu udi Nzambi wetu!”
“Tangilayi! Eu udi Nzambi wetu!”
21 Ukadiku mumone muana mutekete ufunkuina balunda bende tatuende ne disanka ne kudisua kuonso wamba ne: “Papa wanyi nyeye eu” anyi? Batendeledi ba Yehowa badi ne malu makumbane adi abasaka bua kudiumvua pabu mushindu eu bua bualu buende. Bible ukavua mumanyishe tshikondo tshikala bantu bena lulamatu mua kuamba ne disanka ne: “Tangilayi! Eu udi Nzambi wetu!” (Yeshaya 25:8, 9) Paudi wenda upeta dimanya ditue dia ngikadilu ya Yehowa, neubange kumvua bimpe menemene ne: udi mupete Tatu muimpe wa dikema.
Tshishima tshia mampa
14 Pavua Yezu wakula bua “tshiakudia tshietu tshia dituku edi,” uvua wakula bua tshikondo tshienzeka disua dia Nzambi “kabidi pa buloba muomumue ne mu diulu.” (Mat. 6:9-11) Nsombelu neikale mushindu kayi tshikondo atshi? Bible udi uleja ne: Nzambi mmusue kabidi bua kuikale biakudia bimpe pa buloba. Bilondeshile Yeshaya 25:6-8, nekuikale biakudia bimpe bitule bipuwe mu Bukalenge bua Yehowa. Misambu 72:16 ukavua muambe ne: “Nekuikale ntete ya bungi pa buloba; neyivulangane bikole pa nsongo ya mikuna.” Udi muindile ne muoyo kuulu kuulu bua kulamba tshiakudia tshiutu munange anyi tshiutu kuyi muanji kulabula anyi? Pamuapa udi kabidi muindile ne muoyo kuulu kuulu bua kudia tumuma tua mvinyo tuwakuna. (Yesh. 65:21, 22) Muntu yonso neikale utshionkomoka ne bintu biende bimpe bidiye ukuna.
Malu mimpe atudi tupeta bua mudi Yehowa mutunange
11 Difuanyikijilabi nsombelu uwikale nende mu Mparadizu. Kuakusamisha kabidi mutu bua masama ne lufu to. (Yesh. 25:8; 33:24) Yehowa neakupeshe bionso biudi nabi dijinga. Mmalu kayi awajinga kumanya? Neujinge kumanya malu adi atangila nyama anyi? Neujinge kumanya mua kuimba mijiki ne tshiombelu kampanda anyi? Neujinge kumanya mua kuzola anyi? Kakuyi mpata, nebikengele ne: mu Mparadizu muikale benji ba plan ya nzubu, bibaki, ne babidime. Nebikengele muikale kabidi bantu badi batabalela bia pa madimi, badi benza biamu bia mudimu, ne badi batabalela madimi malenga a bikunyibua. (Yesh. 35:1; 65:21) Bu mutuikala ne muoyo wa tshiendelele tshikondo atshi, netupete dîba dia kuenza midimu yonso ayi ne mikuabu ya bungi.
12 Patuatuilangana ne bantu babishibua ku lufu, netumvue disanka dia dikema! (Bien. 24:15) Ela kabidi meji a disanka diwikala nadi pawikala wenda ulonga malu makuabu adi atangila Yehowa ku diambuluisha dia bintu bia bungi bidiye mufuke. (Mis. 104:24; Yesh. 11:9) Bualu buimpe menemene budi ne: netutendelele Yehowa katuyi tuenza kabidi mpekatu to! Neujinge bua kujimija masanka onso aa anu bua “disanka dia mpekatu dia tshitupa tshîpi” anyi? (Eb. 11:25) Kuitabi bua kuajimije to! Masanka au mmapite malu onso atudi tudipangisha lelu. Manya ne: kamana kamana buloba ebu nebulue anu Mparadizu, kabuakushala mudibu emu to. Bu Yehowa kayi mufile Muanende bua kutufuila, katuvua mua kutekemena malu onso aa to!
Bubanji bua mu Dîyi dia Nzambi
Yehowa mmumone binsonji biebe
18 Mêyi avua Yehowa muambile Hezikiya akamukolesha. Mêyi a Yehowa adi mu Bible adi mua kutukolesha petu ne kutuambuluisha bua kutukija patudi ne tunyinganyinga. (Lomo 15:4) Pavuabu bamanyishe muanetu wa bakaji kampanda wa ku Ouest kua Afrike ne: uvua ne kansere, ukavua udila anu kudila. Udi wamba ne: “Yeshaya 26:3 ke mvese uvua mutambe kunkolesha. Nansha mutudi katuyi mua kujikija ntatu yetu, mvese eu mmunjadikile ne: Yehowa udi mua kumpesha ditalala dia mu muoyo didi mua kungambuluisha bua kutukija ne kunanukila.” Udi ne mvese utu nangananga ukukolesha paudi ne ntatu mikole idi imueneka bu ne: kayakujika anyi?
LUMINGU LUA DIA 26/1–1/2
BIUMA BIA MU DÎYI DIA NZAMBI YESHAYA 28-29
Tumbisha Yehowa ne mishiku yebe ne muoyo webe
ip-1 299 §23
Yeshaya udi umanyisha ‘bienzedi bia kukema’ bia Yehowa
23 Bamfumu ba ntendelelu wa bena Yuda bavua badiamba mudibu ne dimanya dia bungi dia malu a mu nyuma, kadi bakela Yehowa nyima. Bavua balongesha ngenyi yabu mibi bua tshidi tshimpe ne tshidi tshibi, badibingisha bua dipanga diabu dia lulamatu ne bienzedi biabu bibi ne bua muvuabu bafikisha bantu ku dibenga kuanyishibua kudi Nzambi. Yehowa neenze “bualu bua dikema” bua kulumbuluisha bantu aba bua bienzedi biabu bibi bia lubombo. Udi wamba ne: “Bantu aba badi basemena kundi ne mukana muabu ne badi bannemeka ne mishiku yabu, kadi muoyo wabu udi kule menemene nanyi; ne kuntshina kuabu nkuimanyine pa mikenji ya bantu idibu babalongeshe. Nunku, meme ke Yeye wenza kabidi malu a kukema ne bantu aba, bualu bua kukema pa bualu bua kukema; ne meji a bena meji babu neajimine, ne dijingulula dia malu dia bantu babu badi badimuke nedisokokibue.” (Yeshaya 29:13, 14) Meji ne dijingulula dia malu bivua bena Yuda bamba ne: badi nabi, bivua ne bua kujimina pavua Yehowa ne bua kusaka bukokeshi bua bukole bua Babilona bua kubutula ntendelelu wa batontolodi wa bena Yuda au. Bualu bua buena ebu buakenzeka mu bidimu lukama bia kumpala pakavua balombodi bena Yuda bavua badiamba mudibu ne meji bafikishe tshisamba ku dienza malu mabi. Bualu bua muomumue nebufikile kabidi bitendelelu bia bukua buena Kristo matuku etu aa.—Matayi 15:8, 9; Lomo 11:8.
Kakuena tshidi mua kulenduisha muntu muakane
7 Yezu wakela bamfumu ba bitendelelu ba mu tshikondo tshiende patoke ne dikima dionso bua bienzedi biabu bia lubombo. Tshilejilu, wakela Bafalese patoke bua muvuabu batamba kutabalela anu mushindu wa kuowa mâyi ku bianza kupita mua kutabalela baledi babu. (Mat. 15:1-11) Bivua mua kuikala bikemeshe bayidi ba Yezu pavuabu bumvue mêyi ende. Bakamuebeja ne: “Udi mumanye ne: Bafalese bavua balenduke pavuabu bumvue tshiuvua muambe anyi?” Yeye kubandamuna ne: “Mutshi wonso uvua Tatu wanyi udi mu diulu kayi mukune, nebawujule. Balekelayi. Mbalombodi bampofu. Nunku, bikala mpofu ulombola mpofu mukuabu, bonso babidi nebakuluke mu tshina.” (Mat. 15:12-14) Nansha muvua bamfumu ba bitendelelu kabayi banyisha bivua Yezu wamba, kabiakamupangisha bua kumanyisha bulelela to.
Shala mu ntenta wa Yehowa bua kashidi
8 Bantu badi ‘bamba bulelela mu muoyo wabu’ kabena batumikila Nzambi padibu pa bantu, babenga kumutumikila padibu pa nkayabu to. (Yesh. 29:13) Badi bepuka malu a bibenda. Muntu muena malu a bibenda udi mua kutuadija kudiambila ne: mikenji ya Yehowa kayitu anu ne mushinga misangu yonso to. (Yak. 1:5-8) Udi mua kutuadija kushipa mikenji ya Nzambi mu malu adiye umona ne: kaena ne mushinga to. Kushipa mikenji ya Yehowa ayi kuoku kakuyi kumutuadila bipeta bibi, udi mua kutuadija kuenza malu mabi bikole. Nansha mudiye wela meji ne: utshidi utendelela Yehowa, Yehowa katshiena witaba ntendelelu wende to. (Muam. 8:11) Ke bualu kayi, tudi ne bua kuikala bena bululame mu malu onso.
Bubanji bua mu Dîyi dia Nzambi
it “Aliele” §1; “Aliele” No. 3
Aliele
(Aliele) [Dîku dia tshioshelu tshia Nzambi anyi ntambue wa Nzambi].
3. Dîna edi ndia mu tshimfuanyi didibu batele bua kuakula bua Yelushalema mu Yeshaya 29:1, 2, 7. Yelushalema ke muaba uvua ntempelo wa Nzambi uvua ne muaba wa tshioshelu tshia kulambuila milambu. Bua bualu ebu, tshimenga etshi tshivua muaba wa tshioshelu tshia Nzambi. Yelushalema ke muaba umuepele uvua ntendelelu mukezuke wa Yehowa. Nansha nanku, mukenji udi mu Yeshaya 29:1-4 udi wenza buôwa, bualu udi wakula bua muvua bena Babilona ne bua kubutula Yelushalema mu 607 K.B.B., pavua Yelushalema ne bua kulua “dîku dia tshioshelu” mu ngumvuilu wa mu tshimfuanyi, mmumue ne: bu tshimenga tshiapuekesha mashi panshi ne tshiabutulabu, ne muikala bitalu bia bungi bia bantu bashipa. Malu avua mua kukebesha kabutu aka mmaleja mu mvese wa 9 too ne wa 16. Kadi Yeshaya 29:7, 8, udi uleja yeye ne: bisamba bivua ne bua kubutula Yelushalema kabivua ne bua kukumbaja tshipatshila tshiabi tshionso to.
LUMINGU LUA DIA 2-8/2
BIUMA BIA MU DÎYI DIA NZAMBI YESHAYA 30-32
Nyemena mu mapuapua a Yehowa
Yehowa udi tshisokomenu tshietu
7 Mêyi adi alonda aa adi atukolesha ku muoyo bualu adi aleja ne: Yehowa udi tshisokomenu tshietu: ‘Neakubuikile ne masala ende, neusangane [tshisokomenu] muinshi mua mapuapua ende; bujalame buende bua bushuwa budi ngabu [munene ne lumbu].’ (Musambu 91:4) Nzambi udi utukuba anu mutu nyunyi ubuikila bana bende mu masala. (Yeshaya 31:5) ‘Udi utubuikila ne masala ende.’ Misangu mivule “masala” a nyunyi atu aleja mapuapua ende. Nyunyi utu uabuikila bana bende, ubakuba ku nyama ta nyunyi itu idia mikuabu. Anu bu bana ba nyunyi, tudi mu bukubi mu mapuapua a Yehowa a mu tshimfuanyi bualu tudi basokomene mu bulongolodi buende bua bena Kristo balelela.—Luta 2:12; Musambu 5:1, 11.
Yehowa neakuambuluishe mu ntatu
13 Tshitudi ne bua kuenza. Dienzeja bikole bua kulekela lungenyi lua kuditola. Misangu yonso itudi tuditola, tudi tutuma meji etu anu ku majinga etu ne ku ntatu itudi nayi. Tuetu tuenza nanku, tudi mua kufika ku diangata mapangadika mabi. (Nsu. 18:1) Kutu misangu itutu basue kuikala nkayetu, nangananga tshikondo tshidi malu makole atufikila. Tuetu tuditola mutantshi mule, bidi bimueneka bu ne: tudi tubenga diambuluisha dia bantu badi Yehowa usaka bua kutuambuluisha. Nansha tuetu mu bikondo bikole bia mushindu kayi, mbimpe tuitabe diambuluisha dia kudi bena mu mêku etu, dia kudi balunda betu ne dia kudi bakulu ba mu tshisumbu. Tubamone anu bu ne: Yehowa ke udi mubatume bua kutuambuluisha.—Nsu. 17:17; Yesh. 32:1, 2.
“Neakukoleshe”—Mushindu kayi?
19 Mona tshia kuenza bua kukolesha ditekemena diebe. Biwikala ne ditekemena dia kupeta muoyo pa buloba, bala mvese idi ileja muikala nsombelu mu Mparadizu ne uyelele meji. (Yesh. 25:8; 32:16-18) Ela meji a muikala nsombelu mu bulongolodi bupiabupia, udifuanyikijile ukadimu, bantu bawamona, mitoyi iwateleja, ne muwadiumvua. Ikala utangila bimfuanyi bia Mparadizu bidi mu mikanda yetu bua kudifuanyikijila muikalayi. Ikala kabidi utangila filme ya misambu, bu mudi wa Buloba bupiabupia bualua, wa Anu pabuipi apa, anyi wa Monabi dîba adi. Wewe mulame ditekemena dia bulongolodi bupiabupia bimpe mu meji ebe, ntatu yebe neikale ya ‘tshitupa tshîpi ne mipepele.’ (2 Kol. 4:17) Yehowa neakukoleshe kupitshila ku ditekemena didiye mukupeshe.
Bubanji bua mu Dîyi dia Nzambi
it “Diampa” §3
Diampa
Ngumvuilu wa tshimfuanyi. Muaku “diampa” udibu bakudimune mu Bible udi umvuija bintu bia bungi. Tshilejilu, Yoshua ne Kaleba bakambila bena Isalele bavua badisangishe ne: “Bena Kanâna badi bu diampa kutudi.” Pamuapa bidi biumvuija ne: bena Isalele bavua ne bua kubatshimuna bipepele ne ditshimuna adi divua ne bua kushindamija Isalele. (Nom 14:9) Mêyi adi mu Misambu 80:5 adi amba bua Yehowa mulami wa Isalele ne: “Wewe udi ubadiisha binsonji bu diabu diampa.” Mêyi aa adi aleja pamuapa kanyinganyinga kakole kadi bantu bapeta padi Yehowa kayi ubanyisha. Badi bakula kabidi bua Yehowa ne: neapeshe bantu bende “dikenga bu biakudia ne dikengeshibua bu mâyi.” Badi bakula bua nsombelu uvua ne bua kubafikila pavuabu babatshintshimika, nsombelu uvua mua kuikala kudibu anu bu diampa ne mâyi.—Yes 30:20.
LUMINGU LUA DIA 9-15/2
BIUMA BIA MU DÎYI DIA NZAMBI YESHAYA 33-35
“Yeye udi dishindama dia bikondo biebe”
Yehowa neakuambuluishe mu ntatu
7 Lutatu. Patudi mu lutatu, katuakuikala tudiumvua bu konso eku to, tuela meji anyi tuenza malu bu pa tshibidilu to. Dîba dia nanku, tunyinganyinga tudi mua kutupita bungi. Ana utukadi batele kuulu eku, udi uleja muvuaye mumvua kanyinganyinga kakole pavua bayende Luis mufue. Wakamba ne: “Pantu ndiumvua nkaya tshiyi ne bayanyi, bitu bintonda bikole. Ntu ntuadija kumvua tshiji bua mudiye mufue.” Misangu mikuabu, Ana uvua udiumvua nkaya, umvua bibi pavuabi bimufikila bua kuangata mapangadika mu malu avua Luis mumanye bikole. Uvua udimona bu uvua mu mâyi, tshipepele tshimukupa eku ne eku. Mmunyi mudi Yehowa utuambuluisha padi tunyinganyinga tututshibuila panshi?
8 Tshidi Yehowa wenza. Mmulaye bua kutujalamija. (Bala Yeshaya 33:6.) Patu tshipepele tshikole tshituadija, mazuwa atu atuadija kutenkakana bibi menemene. Mazuwa a bungi atu menze ne biamu ku nseke bitu biajalamija patuku tshipepele. Biamu abi bitu biambuluisha bua kaikadi atenkakana to. Dîba adi, bantu badi mu mazuwa nebikale mu bukubi, luendu ludibu benza kaluakubatonda to. Kadi bua biobi kufika ku diajalamija, bidi bikengela mazuwa ikale mu lubilu. Bia muomumue, Yehowa neatujalamije tuetu tutungunuka ne kumuenzela mudimu ne lulamatu patudi mu ntatu.
Mua kulama disanka patudi mu ntatu
10 Tshia kuenza: Lomba Yehowa meji. Bua tuetu kunanukila mu ntatu ne disanka, tudi ne bua kuanji kulomba Yehowa meji bua tuangate mapangadika mimpe. (Bala Yakobo 1:5.) Ntshinyi tshiudi ne bua kuenza wewe mumone ne: Yehowa ki mmuandamune disambila diebe ne lukasa? Yakobo udi wamba ne: udi ne bua ‘kutungunuka ne kulomba’ Nzambi. Wewe utungunuka ne kumulomba meji kabitu bimutonda to. Kakukufiikila munda to. Patudi tulomba Tatu wetu wa mu diulu meji bua kunanukila mu ntatu, udi utupeshawu “ne tshianza tshilekelela.” (Mis. 25:12, 13) Utu umona ntatu itudi nayi, uditeka pa muaba wetu, ne mmusue kutuambuluisha. Ebu si mbualu butudi ne bua kusankila! Kadi mpindieu, mmunyi mutu Yehowa utupesha meji?
11 Yehowa utu utupesha meji ku diambuluisha dia Dîyi diende. (Nsu. 2:6) Bua kuapeta, tudi ne bua kulonga Dîyi dia Nzambi ne mikanda yetu itu yumvuija malu a mu Bible. Kadi bualu ki mbua kuwuja dimanya mu mutu tshianana to. Tudi ne bua kutumikila mibelu ya Nzambi bua meji ende akuate mudimu wawu. Yakobo wakafunda ne: “Nulue benji ba dîyi, kanuyi anu bateleji patupu.” (Yak. 1:22) Patudi tutumikila mibelu ya Nzambi, tudi tulua bena ditalala ba menemene, bafuidianganyi ba luse, katuyi ne malu makole. (Yak. 3:17) Ngikadilu eyi idi yenza bua tumanye mua kupita ne lutatu nansha lua mushindu kayi katuyi tujimija disanka dietu to.
ip-1 352 §21-22
“Muntu nansha umue udi musombele mu ditunga kakuamba ne: ‘Ndi nsama.’”
21 Dîyi dia buprofete didi mu Yeshaya edi didi dikumbana matuku etu aa. Bantu ba Yehowa mbapete luondapu lua mu nyuma matuku etu aa. Mbasuludibue ku malongesha a dishima bu mudi dia dibenga kufua dia anyima, busatu bunsatu, ne dia iferno wa kapia. Batu bapeta mibelu ya malu a bikadilu idi ibambuluisha bua kuepuka bikadilu bibi ne bua kuangata mapangadika mimpe. Ku diambuluisha dia mulambu wa tshia kupikulangana natshi wa Yezu Kristo, mbakezuke ku mêsu kua Nzambi ne badi ne kondo ka muoyo kimpe. (Kolosayi 1:13, 14; 1 Petelo 2:24; 1 Yone 4:10) Luondapu lua mu nyuma ludibu bapeta ludi lubambuluisha bua kuepuka bikadilu bibi. Tshilejilu, kuepuka malu a masandi ne dinua dia makanya kudi kubepula ku masama a mu bilamba ne kansere ka mishindu mishilashilangane.—1 Kolinto 6:18; 2 Kolinto 7:1.
22 Pashishe, mêyi adi mu Yeshaya 33:24 neakumbane mu mushindu mualabale panyima pa mvita ya Armagedone, mmumue ne: mu bulongolodi bupiabupia bua Nzambi. Mu bukekoshi bua Masiya bantu nebikale ne makanda a mubidi ne a mu nyuma mimpe. (Buakabuluibua 21:3, 4) Katupa kakese panyima pa kabutu ka ndongoluelu wa malu wa Satana eu, Yezu neenze bishima pa buloba bujima bia buena bivuaye muenze pavuaye pa buloba. Bampofu nebamone, bampudi matshi nebumvue, ne balema nebende. (Yeshaya 35:5, 6) Dikumbana dia mêyi aa nedipeteshe bantu bonso bapanduka ku dikenga dinene mpunga wa kuenza mudimu wa kuvuija buloba Mparadizu.
Bubanji bua mu Dîyi dia Nzambi
Tungunuka ne kuendela mu “Njila wa Bunsantu”
8 Bamue bantu badi mua kuamba ne: ‘Malu onso aa adi akoka ntema. Kadi bualu buvua bufikile bena Yuda kukadi bidimu bia bungi ebu budi bututangila tuetu lelu anyi?’ Eyowa, bualu mu mushindu kampanda, tudi tuenza luendu mu “Njila wa Bunsantu.” Nansha tuetu bikale bela manyi anyi bena mu “mikoko mikuabu,” bimpe tushale anu mu “Njila wa Bunsantu” bu mudiye utuambuluisha bua kuikala anu mu mparadizu wa mu nyuma ne utufikisha ku mabenesha a Bukalenge atshilualua. (Yone 10:16) Katshia mu 1919 P.Y., bantu balume ne bantu bakaji ne bana miliyo ya bungi mbapatuke mu Babilona Munene udi nsangilu wa bitendelelu bionso bia dishima; ne mbatuadije kuendela mu njila wa mu tshimfuanyi. Pamuapa udi pebe mu bantu abu. Nansha mudibu bakangule njila eu kukadi bidimu bitue ku 100, mudimu wa kumulongolola wakatuadija bidimu nkama ya bungi kumpala.
LUMINGU LUA DIA 16-22/2
BIUMA BIA MU DÎYI DIA NZAMBI YESHAYA 36-37
“Kutshinyi bua mêyi audi mumvue”
it “Hezikiya” No. 1 §6
Hezikiya
Dipangila dia Saneheliba mu Yelushalema. Saneheliba wakapangadija bua kuluisha Yelushalema anu mukavua Hezikiya muele meji. Bu muvuaye ne tshiluilu tshikole wakatshintshimika Lakisha, tshimenga tshikolesha. Wakatuma ndambu wa basalayi bende ne bamfumu ba basalayi bua kuenzeja bena mu Yelushalema bua kudifila kudibu. Labashake (kadivua dîna diende to, kadi tshivua muanzu wende wa mu busalayi) uvua wakula tshiena Ebelu bimpe ke uvua muleji mpala wa tshisumbu tshia basalayi atshi. Uvua wakula ne dîyi dikole wamba Hezikiya ne umupetula, uyobola ne Yehowa. Uvua wamba ujadika ne lutambishi luonso muvua Yehowa kayi mua kusungila kabidi Yelushalema, anu muvua nzambi ya bisamba bikuabu kayiyi mikokeshe bua kusungila bisamba biayi ne bantu bavua bayitendelela ku tshianza tshia mukalenge wa Ashû.—2Bk 18:13-35; 2Ku 32:9-15; Yes 36:2-20.
ip-1 387 §10
Badi bafuta mukelenge bua ditabuja diende
10 Labashake udi wambila kabidi bena Yuda ne: tshiluilu tshiabu katshivua tshia kutekemena to. Udi wambila Hezikiya ne diambu ne: “Nenkupeshe tubalu 2 000 ni udi mua kupeta batuendeshi bungi bukumbane.” (Yeshaya 36:8) Kadi bungi bua bendeshi ba tubalu bena Yuda ke buvua ne mushinga menemene anyi? Too, bualu lupandu lua bena Yuda kaluvua lufumina ku basalayi ba bungi bavuabu ne bua kuikala nabu to. Nsumuinu 21:31 udi wamba ne: “Kabalu nkalongolola bua dituku dia mvita, kadi lupandu ndua Yehowa.” Pashishe, Labashake udi wamba mudi dibenesha dia Yehowa dikale kudi bena Ashû kadi kadiyi kudi bena Yuda. Udi wamba kabidi ne: bu biobi kabiyi nanku, bena Ashû kabavua mua kuikala babuele ntanta mule mu buloba bua Yuda to.—Yeshaya 36:9, 10.
ip-1 388 §13-14
Badi bafuta mukelenge bua ditabuja diende
13 Mu bungi bua mêyi avua Labashake wakula, wakapatula dîyi dikuabu divua anu bu tshingoma. Udi wambila bena Yuda bua kubenga kuitaba bivua Hezikiya wabamba nansha yeye mubambile ne: “Yehowa neatusungile.” Labashake udi wambila bena Yuda ne: nzambi ya bena Samalea ki mmipangishe bena Ashû bua kutshimuna bisa dikumi bia Isalele to. Kadi netuambe tshinyi bua nzambi ya bisamba bikuabu bidi Ashû mutshimune? Udi webeja bena Yuda ne: “Nzambi ya Hamate ne Âpada idi penyi? Nzambi ya Sefâwayima idi penyi? Mmisungilaku Samalea mu tshianza tshianyi anyi?”—Yeshaya 36:18-20.
14 Labashake udi utendelela nzambi ya dishima kena umona dishilangana didi pankatshi pa Samalea tshimenga tshia batontolodi ne Yelushalema udibu balombola kudi Hezikiya to. Bu muvua nzambi ya dishima ya Samalea kayiyi ne bukole, kayivua mikokeshe bua kusungila bukalenge bua bisa dikumi bua Isalele to. (2 Bakalenge 17:7, 17, 18) Kadi pavua Hezikiya ukokesha, bena mu Yelushalema bakalekela nzambi ya dishima, kutuadijabu kutendelela Yehowa. Nansha nanku, baleji mpala basatu ba bena Yuda kabavua nansha bajinge kuambila Labashake bualu abu to. “Bakashala bapuwe, kabakamuandamuna dîyi, bualu dîyi divua mukalenge mutume divua ne: “Kanuena ne bua kumuandamuna to.” (Yeshaya 36:21) Eleyakima, ne Shebena, ne Yoa bakalua kupesha Hezikiya luapolo lua malu avua Labashake muambe.—Yeshaya 36:22.
Bubanji bua mu Dîyi dia Nzambi
it “Muonji” §4
Muonji
Yehowa wakambila Saneheliba mukalenge wa Ashû ne: “Nengele ndobo wanyi mu diulu diebe ne mionji yanyi pankatshi pa mishiku yebe, ne nenkupingaje mu njila uuvua muluile.” (2Bk 19:28; Yes 37:29) Saneheliba walekela kutshintshimika Yelushalema ne wakapingana mu Niniwe muvuabu balue kumushipela kudi bana bende kabiyi ku disua diende to, kadi Yehowa ke uvua muenze bua bienzeke nanku. (2Bk 19:32-37; Yes 37:33-38) Yehowa utu wela muonji mu mbanga ya bena lukuna mu ngumvuilu wa ne: udi ubalombola anu mutubu balombola nyama idibu bele ku muonji.—Yes 30:28.
LUMINGU LUA DIA 23/2–1/3
BIUMA BIA MU DÎYI DIA NZAMBI YESHAYA 38-40
“Bu mulami wa mikoko, yeye nealame tshisumbu tshiende tshia mikoko”
Tshidi Bible wamba bua Muenaye
3 Bala Yeshaya 40:8. Dîyi dia Nzambi ndilombole balume ne bakaji ba lulamatu bimpe munkatshi mua bidimu binunu ne binunu. Bua tshinyi mbienzeke nanku? Bualu bavua bafunde Mifundu kukadi bidimu bia bungi pa bintu bivua binyanguka lukasa. Nunku kakutshiena mivungu ya ntuadijilu idiku lelu eu to. Kadi Yehowa wakenza bua bantu batentule Mifundu ya tshijila ayi. Nansha muvua batentudi bapange bupuangane, bavua bayitentule bimpe bimpe. Tshilejilu, mumanyi kampanda wa malu a mu Bible wakamba bua Mifundu ya mu tshiena Ebelu ne: “Tudi batuishibue ne: kakuena mukanda mukuabu wa kale uvuabu batentule bimpe menemene bu Bible to.” Nunku nansha muvuabu bafunde Bible kukadi bidimu bia bungi pa bintu bivua binyanguka lukasa, ne bamutentule kudi bantu bapange bupuangane, tudi bashindike ne: malu atudi tubalamu lelu adi afumina kudi Yehowa Muenaye.
4 Yehowa ke Muena “dipa dionso dimpe ne dipa dionso dipuangane.” (Yak. 1:17) Bible ndimue dia ku mapa matambe buimpe adiye mutupeshe. Dipa didi ditulongesha bualu kampanda bua muntu udi mudifile, didi dileja mudiye mumanye majinga etu ne mutumanye bimpe. Ke mudibi kabidi bua Mufidi wa Bible. Patudi tutangila dipa edi bimpe, tudi tulonga malu a Yehowa a bungi. Tudi tulonga mudiye mutumanye bimpe ne mudiye mumanye majinga etu. Mu tshiena-bualu etshi, netumone mudi Bible uleja ngikadilu isatu ya Yehowa eyi: meji, buakane, ne dinanga. Tuanji tumone mudiye uleja ne: Nzambi udi ne meji.
Bukole bua kutukuba nabu: “Nzambi udi tshinyemenu tshietu”
7 Yehowa udi udifuanyikija ne mulami wa mikoko bua kutujadikila mudiye musue kutukuba ne muoyo mujima. (Yehezekele 34:11-16) Vuluka mudibu bumvuija Yehowa mu Yeshaya 40:11 mu nshapite 2 wa mukanda eu: “Bu mulami wa mikoko, yeye nealame tshisumbu tshiende tshia mikoko. Neasangishe bana ba mikoko pamue ne diboko diende, neabambule mu tshiadi tshiende.” Mmushindu kayi udi kana ka mukoko mua kufika mu “tshiadi” anyi mu mpaya wa tshilamba tshia pa mutu tshia mulami wa mikoko? Kana ka mukoko kadi mua kulua kudi mulami, kamutua nansha katshikonu. Kadi mulami wa mikoko ke udi ne bua kuinama bua kukambula bimpe bimpe kukateka mu tshiadi tshiende. Etshi si ntshilejilu tshimpe tshia dikema tshia mudi Mulami wetu Munene wanyisha bua kutukuba!
“Udi upesha muntu udi mutshioke bukole
4 Bala Yeshaya 40:26. Kakutu muntu ukatu mubale mitoto yonso ya muulu to. Bena sianse mbamanye ne: tshikata tshia mitoto tshitubu babikila ne: Voie lactée, tshidi nkayatshi ne mitoto mitue ku miliyare 400. Kadi Yehowa mmumanye dîna dia mutoto wonso. Bidi bitulongesha tshinyi? Bikala Yehowa utabalela bintu bidiye mufuke bu mudi mitoto, elabi meji mudiye udiumvua buebe wewe udi umuenzela mudimu ku budisuile bualu udi mumunange! (Mis. 19:1, 3, 14) Tatu wetu utudi banange bikole mmukumanye mpala ne nyima. “Nansha nsuki ya ku mutu kuenu mmibala yonso” kudiye. (Mat. 10:30) Muimbi wa misambu udi utujadikila ne: “Yehowa mmumanye malu adi bantu badi kabayi mua kubandibua bapetangana nawu.” (Mis. 37:18) Eyowa, Yehowa mmumanye bimpe ntatu yebe, ne udi mua kukupesha bukole bua kuyitantamena yonso.
5 Bala Yeshaya 40:28. Yehowa udi Mpokolo wa bukole bua bungi. Tuakulabi bua bungi bua bukole butuye upesha dîba nkayadi. David Bodanis mufundi wa malu a sianse wakamba ne: ku sekonde yonso, dîba didi dipatula kapia kakole kadi kapetangana ne bukole butu bombe ya nikleere miliyo nkama mivule ipatula patuyi itayika. Mukebuludi mukuabu wakenza makumi kupetaye ne: bukole budi dîba dipatula ku sekonde umue budi mua kuambuluisha bantu munkatshi mua bidimu binunu 200. Nnganyi udi mua kuamba ne: Yeye udi upesha dîba bukole, kena mua kutupesha bukole bua kutantamena ntatu yetu?
6 Bala Yeshaya 40:29. Kuenzela Yehowa mudimu kudi kutupetesha disanka dia bungi. Yezu wakambila bayidi bende ne: “Ambulayi mutshi wanyi wa tshikokedi.” Kubambilaye kabidi ne: “Nuenu nenupetulule bukole. Bualu mutshi wanyi wa tshikokedi mmuimpe ne bujitu buanyi mbupepele.” (Mat. 11:28-30) Mêyi aa mmalelela menemene! Kudi bikondo bitutu mua kudiumvua bazengele patudi tumbuka kumbelu bua kuya mu bisangilu anyi mu buambi. Kadi mmunyi mututu tudiumvua patudi tupingana kumbelu? Tutu tudiumvua ne bukole, badilongolole bimpe bua kutantamena ntatu ya mu nsombelu. Bushuwa mutshi wa tshikokedi wa Yezu mmuimpe!
Bubanji bua mu Dîyi dia Nzambi
Bua tshinyi dîna dia Yehowa didi ne mushinga kutudi?
12 Patudi tutamba kuakula bua dîna dia Yehowa, tuamba mudiye Nzambi muimpe, tudi tuidikija Yezu Kristo. Yeshaya ukavua muambe ne: kuvua muntu uvua ne bua ‘kutokesha [anyi ‘kulongolola,’ dim.] njila wa Yehowa.’ (Yesh. 40:3) Dîyi edi diakakumbana mushindu kayi? Yone mubatiji wakalongoluela Yezu njila, kadi mu bulelela, njila au uvua wa Yehowa bualu Yezu uvua mulue mu dîna dia Yehowa ne wakakula kabidi mu dîna dia Yehowa. (Mat. 3:3; Mâko 1:2-4; Luka 3:3-6) Dîyi dia buprofete divua diamba kabidi ne: “Butumbi bua Yehowa nebusokolodibue.” (Yesh. 40:5) Buakasokolodibua mushindu kayi? Pavua Yezu mulue pa buloba bu muleji mpala wa Yehowa, wakenza malu mu mushindu mupuangane, bienze anu bu ne: Yehowa nkayende uvua mulue pa buloba.—Yone 12:45.