Mukalenge mukuabu wa Babilona uvua Dayawesha muena Madayi. Dayawesha wakamona ne: Danyele uvua muntu wa pa buende. Wakateka Danyele ku mutu kua bantu batambe bunene ba mu buloba. Bantu abu bavua bumvuila Danyele mukawu ne bavua basue bua bajikije bualu buende. Bavua bamanye ne: Danyele uvua usambila Yehowa misangu isatu dituku dionso, ke bobu kuambila Dayawesha ne: ‘Mukalenge wetu, kuikale koku mukenji wa ne: muntu yonso akusambile anu wewe nkayebe. Muntu yonso udi ubenga kutumikila mukenji au badi ne bua kumuela mu buina bua ntambue ya bungi.’ Dayawesha wakanyisha lungenyi alu, kutuaye tshiala pa mukenji au.

Pavua Danyele mumvue lumu lua mukenji mupiamupia au, wakaya kuende musangu umue. Wakatua binu panshi, kusambilaye Yehowa kumpala kua dididishi dikangula. Bantu bena mukawu abu bakabuela diakamue mu nzubu muende, kumujikilabu usambila. Bobu kuya lubilu kudi Dayawesha, kumuambilabu ne: ‘Danyele kena ukutumikila to. Udi usambila Nzambi wende misangu isatu dituku dionso.’ Dayawesha uvua munange Danyele, ne kavua musue bua afue to. Dituku dijima wakela meji bua mushindu wa kupandisha Danyele. Kadi nansha mukalenge yeye muine kavua mua kushintulula mukenji ukavuaye mutue tshiala to. Uvua ne bua kutumina bantu bende dîyi bua bele Danyele mu buina bua ntambue ya luonji lua dikema.

Butuku abu, bualu bua Danyele buakatonda Dayawesha bikole, kupangilaye too ne tulu. Mu dinda, wakaya lubilu ku buina, kuelaye Danyele dîyi wamba ne: ‘Nzambi webe mmukupandishe anyi?’

Dayawesha wakumvua dîyi. Divua dîyi dia Danyele! Wakandamuna Dayawesha ne: ‘Muanjelu wa Yehowa uvua mukange mbanga ya ntambue. Ki mmingenzele bualu nansha bumue to.’ Dayawesha wakasanka bikole! Wakatuma dîyi bua bapatule Danyele mu buina abu. Ntambue kayivua mitape Danyele kaputa nansha kamue to. Pashishe mukalenge wakatuma dîyi ne: ‘Elayi bantu bavua bafunde Danyele abu mu buina.’ Pavuabu bele bantu abu mu buina, ntambue yakabadia bonso.

Dayawesha wakatumina bena mu tshisamba tshiende bonso dîyi edi: ‘Muntu yonso udi ne bua kutshina Nzambi wa Danyele. Uvua musungile Danyele mukana mua ntambue.’

Utu usambila Yehowa dituku dionso anu bu Danyele anyi?

Esetê uvua nsongakaji muena Yuda uvua usombela mu tshimenga tshia mu Pelasa tshia Shushana. Bidimu bia bungi kumpala, Nebukadenesâ uvua mukuate bakakuende mumbuke nabu ku Yelushalema. Bavua bamukoleshe kudi muana wa tatuende mukuabu dîna diende Môdekai uvua muena mudimu wa Ahashawelosha, mukalenge wa Pelasa.

Mukalenge Ahashawelosha uvua dijinga ne mukalenge mukaji mukuabu. Bena mudimu bende bakamutuadila bakaji batambe buimpe ba mu buloba; Esetê pende uvua munkatshi muabu. Mu bakaji bonso abu, mukalenge wakasungula Esetê bua ikale mukalenge mukaji. Môdekai wakambila Esetê bua kambidi muntu ne: uvua muena Yuda to.

Muntu mukuabu wa lutambishi dîna diende Hamana uvua ku mutu kua bakokeshi bonso. Uvua musue bua bantu bonso bikale bamuinamina. Môdekai wakabenga bua kumuinamina, ke Hamana kufiika munda bikole, kujingaye too ne bua kumushipa. Pavua Hamana mulue kumanya ne: Môdekai uvua muena Yuda, wakalongolola bua kushipa bena Yuda bonso bavua mu buloba. Wakambila mukalenge ne: ‘Bena Yuda mbantu babi; bidi bikengela bua ujikije bualu buabu.’ Ahashawelosha wakamuambila ne: ‘Enza tshionso tshiudi musue,’ kumupeshaye ne bukokeshi bua kuela mukenji mupiamupia. Hamana wakela mukenji uvua wambila bantu bua kushipa bena Yuda bonso mu dituku dia 13 dia ngondo wa Adâ. Yehowa uvua mumone bualu abu.

Esetê kavua mumanye bualu bua mukenji au to. Nunku Môdekai wakamutumina mukanda uvua ne mukenji au, kumuambilaye ne: ‘Ndaku uyukile ne mukalenge.’ Esetê wakamba ne: ‘Muntu yonso udi uya kudi mukalenge kabayi bamubikile badi bamushipa. Kukadi matuku 30 adi mukalenge kayi mumbikile! Kadi nenye. Yeye mungoluele dikombo diende, nenshale ne muoyo. Yeye kayi mudingoluele, nemfue.’

Esetê wakaya mu lubanza lua mukalenge. Pavua mukalenge mumumone, wakamuoluela dikombo diende. Wakaya kudiye, mukalenge kumuebejaye ne: ‘Esetê, udi musue nkuenzele tshinyi?’ Wakamba ne: ‘Ndi musue kunubikila wewe ne Hamana mu didia dinene.’ Mu didia adi, Esetê wakababikila kabidi bua balue mu didia dikuabu. Mu didia dibidi adi, mukalenge wakamuebeja kabidi ne: ‘Udi musue nkuenzele tshinyi?’ Yeye kuamba ne: ‘Kudi muntu udi ukeba kutushipa meme ne bena mu tshisamba tshietu. Tupandisha koku.’ Mukalenge wakamuebeja ne: ‘Udi ukeba kunushipa nnganyi?’ Wakamuambila ne: ‘Ng’Hamana muntu mubi eu.’ Ahashawelosha wakafiika munda bikole, kushipeshaye Hamana musangu umue.

Kakuvua muntu uvua mua kushipa mukenji wa Hamana to, nansha mukalenge muine. Nunku mukalenge wakateka Môdekai ku mutu kua bakokeshi, kumupeshaye bukokeshi bua kuela mukenji mukuabu. Môdekai wakela mukenji uvua wanyishila bena Yuda bua kudiluila pavuabu babaluisha. Mu dituku dia 13 dia ngondo wa Adâ, bena Yuda bakatshimuna baluishi babu. Kutuadijila anu tshikondo atshi, bakatuadija kusekelela ditshimuna edi tshidimu tshionso.