Bidimu bipite pa 400 panyima pa bamane kuibakulula bimanu bia Yelushalema, muakuidi mukuabu dîna diende Zekâya ne mukajende Elizabeta bavua basombele pabuipi ne tshimenga atshi. Bakavua baselangane kukavua bidimu bia bungi, kadi kabavua balele to. Dituku dikuabu pavua Zekâya ulambula musenga wa manananshi muaba munsantu mu ntempelo, muanjelu Gabaliele wakamumuenekela. Zekâya wakumvua buôwa, kadi Gabaliele wakamuambila ne: ‘Kutshinyi to. Ndi mukutuadile lumu luimpe lua kudi Yehowa. Mukajebe Elizabeta nealele muana wa balume ne dîna diende nedikale Yone. Yehowa mmusungule Yone bua mudimu wa pa buawu.’ Zekâya wakamuebeja ne: ‘Ndi mua kuitaba tshiudi wamba atshi mushindu kayi? Meme ne mukajanyi tukadi bakulakaje, katuena mua kulela kabidi to.’ Gabaliele kumuambila ne: ‘Nzambi ke udi muntume bua kukuambila bualu ebu. Kadi bu muudi kuyi witaba tshindi nkuambila, neushale mupuwa kuyi mua kuakula too ne paledibua muana.’

Zekâya wakashala muaba munsantu au mutantshi mule kupita muvuaye ushalamu pa tshibidilu. Ndekelu wa bionso pakapatukaye, bantu bavua bamuindile pambelu bavua bajinga kumanya tshivua tshimufikile. Zekâya kavua mua kuakula to. Uvua unyungisha anu bianza bua kuleja bivuaye wamba. Ke bantu kumanyabu ne: Zekâya uvua mupete mukenji wa kudi Nzambi.

Pakapita matuku, Elizabeta wakapeta difu, kulelaye muana wa balume anu muvua muanjelu muambe. Balunda bende ne balela bakalua bua kumona muana. Bavua ne disanka dia bungi bua Elizabeta. Elizabeta wakamba ne: ‘Dîna diende nedikale Yone.’ Bakamba ne: ‘Kakuena muntu mu dîku dienu udi ne dîna dia Yone to. Muinyika dîna dia tatuende Zekâya.’ Kadi Zekâya wakafunda mêyi aa: ‘Yone ke dîna diende.’ Anu dîba adi, Zekâya wakatuadija kuakula kabidi! Lumu lua muana au luakatangalaka mu Yudaya mujima, ne bantu bavua bakema bamba ne: ‘Muana eu nealue nganyi pakolaye?’

Pashishe Zekâya wakuwula tente ne nyuma muimpe. Kuambaye mêyi a buprofete aa: ‘Yehowa atumbishibue. Uvua mulaye Abalahama ne: neatume musungidi, Masiya, bua kutupandisha. Yone neikale muprofete, ne nealongoluele Masiya njila.’

Bualu kampanda bua pa buabu buakenzekela kabidi Mariya mulela wa Elizabeta. Tumonayi bualu ebu mu nshapita udi ulonda.

Elizabeta uvua ne nsongakaji mukuabu uvua mulela wende dîna diende Mariya. Mariya eu uvua musombele mu tshimenga tshia Nazaleta mu Galela. Bavua babangile Mariya bua kumusela kudi Jozefe uvua muena mabaya. Pavua Elizabeta ne difu dia ngondo isambombo, muanjelu Gabaliele wakamuenekela Mariya. Yeye kumuambila ne: ‘Muoyo au Mariya. Yehowa mmukuanyishe bikole.’ Kavua mumvue tshivua Gabaliele musue kuamba to. Ke muanjelu kumuambila ne: ‘Neupete difu ne neulele muana wa balume; udi ne bua kumuinyika ne: Yezu. Neakokeshe bu Mukalenge. Bukalenge buende nebushalaku bua kashidi.’

Mariya kuamba ne: ‘Kadi ki mbanji kunsela to. Nendele bishi?’ Gabaliele kumuambila ne: ‘Kakuena bualu budi Nzambi kayi mua kuenza to. Nyuma muimpe nealue kuudi, ne neupete muana wa balume. Mulela webe Elizabeta ukadi pende ne difu.’ Ke Mariya kumuambila ne: ‘Ndi nsongakaji mupika wa Yehowa. Bingenzekele anu muudi muambe.’

Mariya wakaya mu tshimenga kampanda tshia ku mikuna bua kuya kutangila Elizabeta. Pavua Mariya muele Elizabeta muoyo, Elizabeta wakumvua muana uvua munda muende utumpika. Yeye mumane kuwujibua tente ne nyuma muimpe, wakamba ne: ‘Mariya, Yehowa mmukubeneshe. Edi ndiakalenge dinene dia kumona mamuende wa Mukalenge wanyi mulue kuanyi!’ Mariya kuamba ne: ‘Ndi ntumbisha Yehowa ne muoyo wanyi wonso.’ Mariya wakashala kua Elizabeta ngondo isatu, pashishe kupinganaye ku Nazaleta kuvuaye musombele.

Pakamanya Jozefe ne: Mariya uvua ne difu, wakajinga bua kumulekela. Kadi muanjelu wakamumuenekela mu tshilota, kumuambilaye ne: ‘Kutshinyi bua kusela Mariya to. Ki mmuenze bualu bubi nansha bumue to.’ Nunku Jozefe wakasela Mariya, kumutekaye kumbelu.