Mukokeshi kampanda wa bukalenge bua Lomo diende Kaisa Augusto wakatumina bena Yuda bonso dîyi bua kuya kudifundisha mêna ku mikanda mu bimenga biabu. Ke Jozefe ne Mariya kuyabu ku Beteleheme kuvua dîku dia ba Jozefe difumine. Mariya ukavua pabuipi ne kulela.

Pavuabu bafike ku Beteleheme, muaba uvua mushale uvuabu mua kupeta bua kusombela uvua anu mu tshikumbi tshia nyama. Muaba au ke uvua Mariya mulelele muanende Yezu. Wakamujingila bilamba binefuke, kumuladikaye mu tshidilu tshia nyama bimpe bimpe.

Pabuipi ne Beteleheme apu, kuvua bamue balami ba mikoko bavua batshishila pambelu bua kulama mikoko yabu. Muanjelu wakabapatukila mu tshimpitshimpi, kuimanaye kumpala kuabu, ne bukenke bua butumbi bua Yehowa buakakenkesha muaba uvuabu au. Balami ba mikoko bakumvua buôwa, kadi muanjelu wakabambila ne: ‘Kanutshinyi to. Ndi ne lumu lua disanka. Lelu mbalele Masiya ku Beteleheme.’ Anu dîba adi, banjelu bakuabu ba bungi bakamueneka mu diulu bamba ne: ‘Butumbi kudi Nzambi mu diulu, ne ditalala pa buloba.’ Pashishe banjelu abu bakajiminangana. Balami ba mikoko bakenza tshinyi?

Balami ba mikoko abu bakambilangana ne: ‘Luayi tuyayi ku Beteleheme anu mpindieu.’ Bakaya lukasa lukasa, kusanganabu Jozefe ne Mariya mu tshikumbi tshia nyama ne muanabu mutoke.

Muntu yonso uvua umvua tshivua muanjelu muambile balami ba mikoko atshi uvua ukema. Mêyi avua muanjelu muambe au akelesha Mariya meji bikole, ne kavua mua kuapua muoyo to. Balami ba mikoko bakapingana kudi nyama yabu, benda bela Yehowa tuasakidila bua malu onso avuabu bamone ne bumvue.

Mu buloba bua ku est kua Isalele kuvua bantu bavua bitaba ne: mitoto ivua mua kubalombola. Dimue dituku butuku, bantu bakuabu ba ku est bakamona tshintu tshikuabu tshienze bu mutoto uvua ukenka wenda wenda mu diulu, bobu kutshilonda. Tshivuabu bamone bu mutoto atshi tshiakabalombola too ne ku Yelushalema. Bantu abu bakebeja bantu ne: ‘Muana walua mukalenge wa bena Yuda au udi penyi? Tudi balue bua kumuinamina.’

Pavua Helode mukalenge wa Yelushalema mumvue bakula bua mukalenge mupiamupia, biakatuadija kumutonda bikole. Wakebeja bamfumu ba bakuidi ne: ‘Mukalenge uvuabu bambe ne: nealedibue au udi penyi?’ Bakamuambila ne: ‘Baprofete bavua bambe ne: nealedibue mu Beteleheme.’ Ke Helode kubikilaye bantu ba ku Est abu, kubambilaye ne: ‘Ndayi ku Beteleheme numanye muaba udi muana au. Pashishe nulue kungambila muaba udiye. Ndi musue kumuinamina panyi.’ Kadi uvua ushima.

Mutoto au wakasa kabidi luendu. Bantu abu kuwulonda too ne ku Beteleheme. Mutoto wakimana pa mutu pa nzubu, bantu abu kubuela mu nzubu amu. Bakasanganamu Yezu ne mamuende Mariya. Bakinamina muana, kumupeshabu mapa a or, budimbu bua mupuya muimpe ne mire. Yehowa ke uvua bulelela mutume bantu abu bua kumanya muaba uvua Yezu anyi? Tòo.

Butuku abu, Yehowa wakambila Jozefe mu tshilota ne: ‘Helode udi usua kushipa Yezu. Angata mukajebe ne muana nunyemena mu Ejipitu. Nushalamu too ne pangakuambila ne: dîba dia kupingana diakumbanyi.’ Diakamue, Jozefe ne dîku diende bakaya mu Ejipitu.

Yehowa uvua muambile bantu bavua bafume ku Est abu bua kabapinganyinyi kudi Helode to. Pakalua Helode kumanya ne: kabavua bapinganyine kudiye, wakafiika munda bikole. Bu muvuaye kayi mua kumanya muaba uvua Yezu, wakatuma dîyi bua bashipe bana ba balume bonso ba batekete bavua bukole bua Yezu mu Beteleheme. Kadi kabavua bashipe Yezu to, bualu ukavua kule, mu Ejipitu.

Pakapita matuku, Helode wakafua. Yehowa kuambila Jozefe ne: ‘Mpindieu dîba dia nuenu kupingana ndikumbane.’ Jozefe, ne Mariya, ne Yezu bakapingana mu Isalele, bobu kusombela mu tshimenga tshia Nazaleta.