Jozefe ne Mariya bavua basombele mu Nazaleta ne Yezu ne bana babu bakuabu ba balume ne ba bakaji. Jozefe uvua ukumbaja majinga a bena mu dîku diende pavuaye wenza mudimu wa mabaya, ne ubalongesha malu a Yehowa ne mikenji yende. Dîku diende divua ne tshibidilu tshia kuya ku nsunagoga bua kutendelela ne kuya ku Yelushalema bua kuenza Pasaka tshidimu tshionso.

Pavua Yezu ne bidimu 12, dîku diabu diakenza luendu lule ditangile ku Yelushalema anu bu pa tshibidilu. Bantu bavua balue bua kuenza Pasaka bavua bapuilamu. Pashishe Jozefe ne Mariya bakabanga kupingana kuabu kumbelu, bamanye ne: Yezu uvua munkatshi mua bantu bavuabu nabu mu luendu alu. Kadi pavuabu bamukebe mu balela babu, kabakamupeta to.

Bakapingana ku Yelushalema, bobu kukeba muanabu munkatshi mua matuku asatu. Ndekelu wa bionso bakaya ku ntempelo. Bakasangana Yezu kuntu aku, musombe munkatshi mua balongeshi, ubateleja ne ntema ne ubela nkonko mimpe ya dikema. Yezu wakakemesha balongeshi bikole, kubangabu kumuela nkonko. Mandamuna avuaye ufila avua abakemesha. Bakamona ne: uvua mumanye mikenji ya Yehowa bimpe.

Bivua bitonde Jozefe ne Mariya bikole. Mariya kumuambila ne: ‘Muananyi, tudi bakukebe miaba yonso! Uvua kuepi?’ Yezu wakabandamuna ne: ‘Kanuena bamanye ne: ndi ne bua kuikala muaba eu mu nzubu wa Tatu wanyi anyi?’

Yezu wakapingana ne baledi bende ku Nazaleta. Jozefe uvua ulongesha Yezu mua kuenza mudimu wa mabaya. Udi wela meji ne: Yezu uvua mua kuikala nsonga wa mushindu kayi? Pavua Yezu wenda ukola, uvua wenda ukola mu meji ne mu dianyishibua kudi Nzambi ne kudi bantu.

Yone muana wa Zekâya ne Elizabeta wakalua muprofete pakakolaye. Yehowa wakatuma Yone bua kulongesha bantu ne: Masiya uvua ne bua kulua. Kadi pamutu pa kulongesha mu nsunagoga anyi mu bimenga, Yone yeye uvua uyisha mu tshipela. Bantu bavua balua bafumina ku Yelushalema ne mu Yudaya mujima bua Yone abalongeshe. Uvua ubalongesha ne: bivua bikengela balekele malu mabi bua kusankisha Nzambi. Bantu ba bungi bakanyingalala bua mpekatu yabu pakumvuabu malongesha a Yone, yeye kubabatiza mu musulu wa Yadene.

Yone kavua ne bintu bia bungi to. Uvua uvuala bilamba bienza ne miosa ya kamelu, udia mpasu ne buitshi bua muitu. Bantu bavua basue kumanya Yone. Nansha Bafalese ne Basadoke bena lutambishi bakalua pabu bua kumumona. Yone wakabambila ne: ‘Bidi bikengela nushintuluke ne nunyingalale. Kanuedi meji ne: nudi bantu ba pa buabu anu bualu nudi nudiamba munudi bana ba Abalahama to. Abi kabiena biumvuija ne: nudi bana ba Nzambi to.’

Bantu ba bungi bakalua kudi Yone, kumuebejabu ne: ‘Tuenze tshinyi bua kusankisha Nzambi?’ Yone wakambila bena Yuda abu ne: ‘Wewe muikale ne bilamba bibidi, pesha muntu udi mu dikenga tshimue.’ Udi mumanye bua tshinyi uvua muambe nanku anyi? Uvua musue bua bayidi bende bamanye ne: bua kusankisha Nzambi bavua ne bua kunanga bantu nabu.

Yone wakambila balambuishi ba bitadi ne: ‘Ikalayi nuamba bulelela, kanuikadi nuiba muntu nansha umue to.’ Wakambila basalayi ne: ‘Kanuitabi bua banukose mishiku anyi kanuambi malu a dishima to.’

Bakuidi ne bena Lewi bakalua pabu kudi Yone, kumuebejabu ne: ‘Bantu bonso mbasue kumanya ne: wewe udi nganyi?’ Yone wakamba ne: ‘Ndi dîyi didi diumvuika mu tshipela didi difikisha bantu kudi Yehowa, anu mukavua Yeshaya muambe.’

Bantu bavua basue malu avua Yone ubalongesha. Ba bungi bavua badiebeja bikala Yone uvua Masiya. Kadi wakabambila ne: ‘Kudi muntu munene kumpita meme udi ulua. Tshiena nansha mukumbane bua kusulula nshinga ya sandala yende to. Meme ndi mbatizangana ne mâyi, kadi yeye neabatize bantu ne nyuma muimpe.’