Yone uvua uyisha wamba ne: ‘Kudi muntu munene kumpita meme udi ulua.’ Pavua Yezu ne bidimu bitue ku 30, wakumbuka ku Galela kuyaye ku musulu wa Yadene, muaba uvua Yone ubatijidila bantu. Yezu uvua musue bua Yone amubatize, kadi Yone wakamuambila ne: ‘Tshiena mua kukubatiza to. Wewe ke udi mua kumbatiza.’ Yezu wakambila Yone ne: ‘Yehowa mmusue bua wewe umbatize.’ Nunku bakabuela mu musulu wa Yadene, Yone kuinaye Yezu yonso mujima mu mâyi.

Yezu mumane kupatuka mu mâyi, wakasambila. Dîba adi diulu diakabululuka, nyuma wa Nzambi kumupuekelaye bu nyunyi wa nkutshi. Pashishe Yehowa wakakula mu diulu wamba ne: “Wewe udi Muananyi, munanga; ndi mukuanyishe.”

Pavua nyuma wa Yehowa mupuekele Yezu, wakalua Kristo anyi Masiya. Mpindieu dîba divua dikumbane bua kutuadijaye mudimu uvua Yehowa mumutume bua kuenza pa buloba.

Diakamue bamane kubatiza Yezu, wakaya mu tshipela, yeye kuenzamu matuku 40. Pavuaye mumbukamu, wakaya kumona Yone. Pavua Yezu wenda ulua kudiye, Yone wakamba ne: ‘Monayi Muana wa mukoko wa Nzambi wikala ne bua kumbusha mpekatu wa ba pa buloba.’ Pavua Yone muambe mêyi aa, uvua musue kuleja bantu ne: Yezu uvua Masiya. Udi mumanye tshivua tshienzekele Yezu pavuaye mu tshipela anyi? Tumonayi tshivua tshimuenzekele atshi.

Panyima pa bamane kubatiza Yezu, nyuma muimpe wakamulombola mu tshipela. Wakenza matuku 40 kayi mudie kantu nansha kamue to, yeye kumvua nzala ya dikema. Pashishe Diabolo wakalua bua kumuteta, kumuambilaye ne: ‘Biwikala bushuwa udi Muana wa Nzambi, ambila mabue aa andamuke mampa.’ Kadi Yezu wakamuandamuna ne mêyi a mu Bible wamba ne: ‘Mbafunde ne: kuena ne bua kuikala ne muoyo anu bua biakudia to. Udi ne bua kuteleja mêyi onso adi Yehowa wamba.’

Pashishe Diabolo wakateta kabidi Yezu wamba ne: ‘Biwikala bushuwa udi Muana wa Nzambi, tumpika muaba mule menemene wa ntempelo eu, udiele panshi. Bualu mbafunde ne: Nzambi neatume banjelu bende bua bakuakidile.’ Kadi Yezu wakatela kabidi mêyi a mu Bible wamba ne: ‘Mbafunde ne: Kuena ne bua kuteta Yehowa to.’

Pashishe Satana wakaleja Yezu makalenge onso a pa buloba ne mabanji awu ne butumbi buawu, kumuambilaye ne: ‘Nenkupeshe makalenge onso aa ne butumbi buawu wewe muntendelele nansha kasangu kamue.’ Kadi Yezu wakamuandamuna ne: ‘Umbuka, Satana! Bualu mbafunde ne: udi ne bua kutendelela anu Yehowa.’

Panyima pa bualu ebu, Diabolo wakashiya Yezu, ne banjelu bakalua, kumupeshabu biakudia. Kutuadijila anu dîba adi, Yezu wakatuadija kuyisha lumu luimpe lua Bukalenge bua Nzambi. Ke mudimu uvuabu bamutume bua kuenza pa buloba. Bantu bavua banange malu avua Yezu ubalongesha, ke bualu kayi bavua bamulonda kuonso kuvuaye uya.