Bu mu ngondo muinayi wa tshidimu tshia 30 panyima pa Yezu, Yezu wakaya ku Yelushalema. Bantu ba bungi bavua balue mu tshimenga etshi bua kuenza Pasaka. Bua kuenza Pasaka, bavua bafila kabidi milambu ya nyama ku ntempelo. Kuvua bantu bavua balua ne nyama yabu, kadi bakuabu bavua bayisumbila mu Yelushalema.

Pavua Yezu mufike ku ntempelo, wakamona bantu basumbishilaku nyama. Bualu bua dikema, balumiana abu bavua bendela mushinga ku nzubu wa Yehowa wa kutendelela! Yezu wakenza tshinyi? Wakenza mfimbu wa mionji, kuipataye mikoko ne ngombe ku ntempelo. Wakatonkola mêsa a bashintudi ba makuta, kuitshikijaye makuta abu a binjanja. Yezu wakambila bantu bavua bapana nyunyi ya nkutshi ne: ‘Umbushayi bintu ebi muaba eu! Kanuvuiji nzubu wa Tatu wanyi muaba wa kuendela mushinga to!’

Bantu bavua ku ntempelo bakakema bua tshivua Yezu muenze. Bayidi bende bakavuluka mêyi a buprofete aa avua atangila Masiya: ‘Nengikale ne tshisumi tshia bungi bua nzubu wa Yehowa.’

Pashishe mu tshidimu tshia 33 panyima pa Yezu, Yezu wakakezula ntempelo musangu muibidi. Kavua witaba bua muntu apange kanemu bua nzubu wa Tatuende to.

Tshikondo kampanda Pasaka mumane kupita, Yezu ne bayidi bende bakapitshila mu Samalea pakavuabu bapingana ku Galela. Yezu wakimana muaba mukuabu uvuabu babikila ne: tshina tshia mâyi tshia Yakoba, pabuipi ne tshimenga tshia Suka. Pavuaye muikishe muaba au, bayidi bende bakaya mu tshimenga bua kusumba biakudia.

Muntu mukaji mukuabu wakalua ku tshina atshi bua kusuna mâyi. Yezu wakamuambila ne: “Mpesha koku mâyi a kunua.” Yeye kumuandamuna ne: ‘Bua tshinyi udi ungakuisha? Meme ndi muena Samalea. Bena Yuda kabatu bakuisha bena Samalea to.’ Yezu wakamuambila ne: ‘Bu wewe mummanye meme, uvua mua kundomba mâyi a kunua ne mvua mua kukupesha mâyi a muoyo.’ Mukaji au wakamuebeja ne: ‘Udi usua kuamba tshinyi? Kuena nansha ne mbeketshi to.’ Yezu wakamuambila ne: ‘Muntu yonso udi unua mâyi andi mmupesha kakumvua kabidi nyota to.’ Mukaji au kuamba ne: “Mukalenge, mpesha koku mâyi au.”

Yezu wakamuambila ne: ‘Luaku ne bayebe ku tshina eku.’ Yeye kumuambila ne: ‘Tshiena ne mulume to.’ Ke yeye kumuambila ne: ‘Udi muambilamu. Bakadi bakusele misangu itanu, mpindieu mulume uudi nende au ki mmukusele to.’ Mukaji au kuamba ne: ‘Ndi mumone ne: udi muprofete. Bena mu tshisamba tshietu batu bamba ne: tudi ne bua kutendelela Nzambi ku mukuna eu, kadi bena Yuda bobu badi bamba ne: tudi ne bua kutendelela anu ku Yelushalema. Ndi mumanye ne: palua Masiya, neatulongeshe mua kutendelela.’ Ke Yezu kumuambila bualu bukuabu buvuaye kayi muanji kuambila muntu mukuabu ebu: ‘Meme ke Masiya.’

Mukaji au wakaya lubilu mu tshimenga tshiabu, kuambilaye bena Samalea ne: ‘Ndi ngela meji ne: ndi mumone Masiya. Mmumanye malu anyi onso. Luayi nudimuene!’ Bakamulonda ku tshina tshia mâyi ne kutelejabu malu avua Yezu ulongesha.

Bena Samalea bakalomba Yezu bua ashale mu tshimenga tshiabu. Wakabalongesha matuku abidi, bantu ba bungi kumuitabujabu. Bakambila mukaji muena Samalea ne: ‘Patudi bateleje muntu eu, tudi bamone ne: yeye udi bushuwa mupandishi wa ba pa buloba.’