Yezu mumane kuyisha bu tshidimu tshimue ne tshitupa, wakadimona kumpala kua dipangadika dikole dia kuangata. Mbanganyi bavuaye mua kusungula bu bena diende bua kuenzabu nende mudimu? Mbanganyi bavuaye mua kulongesha bua kulombola tshisumbu tshia bena Kristo? Bua Yezu kuangata mapangadika aa, wakajinga bua Yehowa amulombole. Ke bualu kayi wakaya ku mukuna muaba uvuaye mua kuikala nkayende, kusambilaye butuku bujima. Mu dinda, Yezu wakabikila bamue ba ku bayidi bende ne kusungulaye bapostolo 12. Mmêna a banganyi audi muvuluke? Mêna abu ngowu aa: Petelo, Andele, Yakobo, Yone, Filipo, Bâtolomayo, Tomase, Matayi, Yakobo muana wa Alafayo, Tadayo, Simona, ne Yudasa Isakaliote.

Bapostolo 12 abu bavua benza nende ngendu. Yeye mumane kubalongesha, wakabatuma bua bayishe bobu nkayabu. Yehowa wakabapesha bukole bua kuipata bademon ne kuondopa babedi.

Yezu wakabikila bapostolo bende abu ne: balunda bende, ne uvua ubeyemena. Bafalese bavua bela meji ne: bapostolo kabavua balonge to, ne bavua bantu tshianana. Kadi Yezu uvua mubalongeshe bua kuenza mudimu wabu. Bavua ne Yezu mu bikondo binene bia mu nsombelu wende, bu mudi kumpala kua lufu luende ne panyima pa dibishibua diende. Anu bu Yezu, bapostolo bende ba bungi bavua ba mu Galela. Bamue ba kudibu bavua ne bakaji.

Bapostolo bavua bantu bapange bupuangane bavua benza bilema. Imue misangu bavua bakula kabayi banji kuela meji bimpe ne bavua bangata mapangadika mabi. Kuvua misangu ivuabu kabayi ne lutulu. Bakafika too ne ku dikokangana bua kumanya uvua munene kupita bakuabu. Kadi bavua bantu bimpe bavua banange Yehowa. Bavua ne bua kulua tshishimikidi tshia tshisumbu tshia bena Kristo panyima pa dipingana dia Yezu mu diulu.

Yezu mumane kusungula bapostolo bende 12, wakatuluka ku mukuna, kuyaye muaba uvua musumba munene wa bantu mudisangishe. Bantu abu bavua bafumine mu Galela, mu Yudaya, mu Tulo, mu Sidona, mu Sulia, ne dia muamua dia Yadene. Bavua balue ne babedi ne bantu bavua bademon batatshisha. Yezu wakabondopa bonso. Pashishe wakasomba pa mpulumuku wa mukuna, kutuadijaye kuakula. Wakaleja tshitudi ne bua kuenza tuetu basue kuikala balunda ba Nzambi. Tudi ne bua kujingulula ne: tudi dijinga ne Yehowa ne kulonga mua kumunanga. Kadi katuena mua kunanga Nzambi tuetu katuyi banange bantu bakuabu to. Tudi ne bua kuenzela bantu bonso malu mimpe, nansha baluishi betu, katuyi ne kansungansunga to.

Yezu wakamba ne: ‘Kanuena ne bua kunanga anu balunda benu to. Nudi kabidi ne bua kunanga baluishi benu ne kufuila bantu luse ne muoyo mujima. Wewe munyingalaje muntu, ndaku umonangane nende diakamue, umulombe luse. Ikala wenzela bantu malu muudi musue bua bakuenzelawu pebe.’

Yezu wakapesha kabidi bantu mibelu mimpe bua bintu bia ku mubidi. Wakamba ne: ‘Mbimpe kuikala mulunda wa Yehowa pamutu pa kuikala ne makuta a bungi. Muivi udi mua kuiba makuta ebe, kadi kakuena muntu udi mua kuiba bulunda buebe ne Yehowa to. Lekelayi kuditatshisha bua tshinuadia, tshinuanua, anyi bua tshinuavuala. Tangilayi nyunyi. Nzambi utu wenza bua yikale ne biakudia bikumbane. Kuditatshisha kakuena mua kulepesha muoyo webe bua dituku nansha dimue to. Vulukayi ne: Yehowa mmumanye binudi nabi dijinga.’

Misumba ya bantu ayi kayivua mianji kumvua muntu wakula bu muvua Yezu wakula to. Bamfumu babu ba bitendelelu kabavua babalongeshe malu aa to. Bua tshinyi Yezu uvua mulongeshi munene wa mushindu eu? Bualu malu onso avuaye ulongesha avua afumina kudi Yehowa.