9 SHIFELA, PUA, AMALAMA, YOKEBEDE, MÎYAMA
‘Bua ditabuja, bakasokoka Mose’
KUKAVUA bidimu bipite pa 60 katshia Jozefe wafua. Bena Ejipitu bakavua bamupue muoyo nansha muvua Yehowa mumuambuluishe bua kubasungila ku tshiyole tshia nzala. Palô mukuabu ke ukavua ukokesha mu Ejipitu. Uvua mukine bena Isalele ne uvua ubatshina bualu, bu muvua Yehowa ubabenesha, bavua benda bavulangana. Ke bena Ejipitu kubakuata ku bupika, kutuadijabu kubakengesha. Nansha nanku, bavua anu bavulangana.
Palô wakakeba tshikuabu tshia kubenzela. Wakabikidisha Shifela ne Pua, bakaji baleleshi bena Ebelu. Elabi meji muvuabu bumvue pavua mukalenge wa bukole au mubambile bua kushipa muana yonso wa balume wa bena Isalele uvuabu balelesha! Kadi bakaji babidi ba dikima abu “bakatshina Nzambi mulelela.” Bavua bamanye ne: muntu nansha umue, nansha yeye mukalenge wa bukole, kavua mua kubenzeja bua bashipe muntu to, bualu muoyo wa muntu ntshintu tshia tshijila kudi Yehowa Mukalenge munene wa diulu ne buloba. Bu muvuabu batshina Nzambi, bakenza malu ne dikima dia bungi. Bible udi wamba ne: “Kabakenza tshivua mukalenge wa Ejipitu mubambile bua kuenza to.” Bakakuba bana ba balume ba bungi mu mushindu uvuabu bakokeshile. Bu muvua Palô mumone ne: bana ba balume bavua anu baledibua, wakumvua tshiji tshikole. Kubikidishaye kabidi baleleshi abu. Kadi bu muvuabu batalame, bakamusokoka tshivuabu benza. Yehowa uvua yeye umona tshivuabu benza. Bua bualu abu, “Nzambi wakenzela baleleshi abu malu mimpe.” Wakalua kubapesha mêku.
Ntshinyi tshivua mua kuikala tshienzekele Mose bu bakaji baleleshi, baledi bende, ne yayende kabayi benza malu ne dikima?
Pakamona Palô ne: tshivuaye ujinga kuenza katshivua tshikumbane, wakela mukenji mubi wa ne: bena Ejipitu bele muana wa balume yonso uvua bena Ebelu balela mu Musulu wa Nile! Tatu mukuabu muena Ebelu diende Amalama ne mukajende Yokebede bavua kumpala kua dipangadika dinene tshikondo atshi. Bakavua ne bana babidi, Mîyama ne Alona. Pakimita Yokebede difu disatu, yeye ne bayende bavua bamanye ne: muana au uvua ne bua kutuilangana ne njiwu ya lufu yeye muikale wa balume. Pakalelaye muana wa balume, bakanji kumusokoka tshikondo kampanda. Kadi kabitu anu bipepele bua kusokoka muana to. Pakakumbajaye ngondo isatu, Yokebede wakangata tshisaka, kutshilabaye kabudimbu ne budimbu, ne kumuladikaye munda muatshi. Wakaya kutshisokoka mu malenge ku muelelu kua Musulu wa Nile. Muanende Mîyama utshivua mushadile wakasokoma pabuipi apu bua kumona tshivua mua kufikila muakunyende.
Katantshi aka, muana wa bakaji wa Palô kuluaye bua kuowa mâyi mu Musulu wa Nile. Pakamonaye tshisaka atshi, wakatuma mupika wende mukaji bua amutuadilatshi. Pakatshikangulaye, wakamona muana wa balume muimpe wenda udila, kumumvuilaye luse. Wakapangadija bua kumukolesha, kadi uvua pamuapa mumone ne: muana au uvua dijinga ne mumuamuishi wa dibele. Diakamue Mîyama kumanyaye tshia kuenza. Wakapeta dikima, kuyaye lubilu kudi muana wa bakaji wa Palô, kumulombaye bua amukebele muntu uvua mua kumuamuishila muana au, yeye kuitaba. Mîyama kuyaye kubikila mamuende. Difuanyikijila muvua Yokebede musanke pavuaye mumvue ne: yeye ke uvua ne bua kudikoleshila muanende munanga kayi ne buôwa bua ne: bena Ejipitu bavua mua kulua kumushipa to. Kupita apu, muana wa bakaji wa Palô au uvua umufuta ne kumufuta bua amukoleshile muana au. Yeye ne Amalama bakalongesha muana au malu a Yehowa ne muabu muonso. Pakakolaye, bakaya kumufila kudi muana wa bakaji wa Palô; yeye kumuinyika ne: Mose.
Yehowa wakafuta Amalama, Yokebede, ne Mîyama bua dikima ne ditabuja diabu anyi? Eyowa. Amalama ne Yokebede bakalongesha Mîyama ne Alona malu a Yehowa, bobu kukola kuluabu batendeledi bende. Bavua kabidi bamone muvua Yehowa ukuba Mose. Bible kena uleja ni batshivua ne muoyo pakavua Mose mukole, mupete ngikadilu mimpe ya bungi, ne bamone muvuaye muenzele Yehowa mudimu to. (Ekes. 6:20) Kadi Mîyama ne Alona bavua bobu bamone muvua Yehowa muambuluishe Mose bua kuenza bishima bia bungi. Busatu buabu bavua ne ditabuja dikole, kuenzelabu Yehowa mudimu ne dikima dia bungi. Mu nshapita udi ulonda, netumone muvua Mose mukole ne muvuaye muangate dipangadika dia kuenzela Yehowa mudimu.
Bala bualu ebu mu:
Lukonko lua kuelela meji:
Mmushindu kayi uvua baleleshi ne bena mu dîku dia Mose benze malu ne dikima?
Buela mu buondoke
1. Ntshinyi tshidi balongi ba bintu bia kale bambe tshidi tshileja ne: bena Isalele bavua bapika mu Ejipitu? (g04 8/4 4 §4–5 §1-wcgr)
2. Ntshinyi tshidi bamanyi ba malu a mu Bible bambe bua dishipa dia bana ba mu maboko ne bua tshivua bena Ejipitu benza ne bisonsa bia nyandu tshidi tshileja ne: muyuki wa mu Bible eu mmulelela? (g04 8/4 5 §2–6 §1-wcgr) A
Christine Osborne Pictures/Alamy Stock Photo
Tshimfuanyi tshia A: Too ne lelu, bantu batshidi benza matu ne nyandu
3. Mmalu kayi avua bakaji baleleshi bena Ebelu benze? Mmunyi muvua Yehowa mubabeneshe? (w03 1/11 8 §3-4; it “Mukaji muleleshi”-wcgr) B
Tshimfuanyi tshia B
4. Mmunyi muakenza Mîyama malu ne ditabuja dikole pakavuaye mukulakaje? (ijwia tshiena-bualu tshia 7 §14-18-wcgr)
Keba malongesha
Malu avua Amalama ne Yokebede benze adi alongesha baledi tshinyi?
Malu avua Mîyama muenze patshivuaye muana adi mua kulongesha bana ba muntu tshinyi? C
Tshimfuanyi tshia C
Mmunyi muudi pebe mua kuenza malu ne dikima bu Shifela ne Pua?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Shifela, Pua, Amalama, Yokebede, ne Mîyama pabishibuabu ku lufu?
Bia kutangila kabidi
Mona tshidi tshilejilu tshia bakaji bavua babenge kutumikila Palô tshitulongesha.
“Bakaji bakasankisha mutshima wa Yehowa” (w03 1/11 8-9 §3-5)
Ntshinyi tshidi tshitujadikila ne: Yehowa neatungunuke ne kutabalela bonso badi bamutumikila ne dikima bu mfumu pamutu pa kutumikila bantu?